“Qhia txog Yexus Khetos Txawm Koj Qhia Dab Tsi Los Yog,” Kev Qhia Raws Li tus Cawm Seej txoj Kev: Rau Tag Nrho cov uas Qhia hauv Tsev thiab hauv lub Koom Txoos (2022)
“Qhia txog Yexus Khetos Txawm Koj Qhia Dab Tsi Los Yog,” Kev Qhia Raws Li tus Cawm Seej txoj Kev
Kuv Muab Kuv txoj Kev Kaj Siab Tso rau Nej, los ntawm Walter Rane
Qhia txog Yexus Khetos Txawm Koj Qhia Dab Tsi Los Yog
Muaj ntau yam uas yus qhia tau txog Yexus Khetos txoj moo zoo—tej ntsiab cai, cov lus txib, tej lus qhia txog tej yuav muaj los yav tom ntej thiab cov dab neeg hauv vaj lug kub. Tiam sis tej no yeej zoo li tej ceg ntawm tib tug ntoo, vim tag nrho tej no los ntawm ib lub hom phiaj; kom pab tib neeg los cuag Khetos thiab hloov los ua neeg zoo tag nrho zoo li Nws (saib Yaloos 1:11; Maulaunais 10:32). Yog li ntawd txawm koj qhia dab tsi los, cia li nco ntsoov tias koj yeej qhia txog Yexus Khetos thiab txoj kev hloov ua neeg zoo li Nws. Tus Vaj Ntsuj Plig Dawb Huv pab tau koj kawm paub tej yam tseeb txog tus Cawm Seej thiab Nws lub hwj chim txhiv dim uas nyob hauv txoj moo zoo txhua lub ntsiab cai, txoj lus txib, thiab cov yaj saub tej lus qhia (saib Yakhauj 7:10–11).
Koj puas qhia txog kev txi? Xav seb koj puas nrog cov neeg kawm txog qhov uas thaum peb ua kev txi ces ua rau peb nco ntsoov txog tus Cawm Seej “txoj kev txi kawg uas tseem ceeb” (Amas 34:10). Koj puas qhia txog kev koom siab? Xav seb koj puas yuav sib tham txog Yexus Khetos txoj kev koom siab koom ntsws nrog Nws Leej Txiv thiab Nws txoj kev caw peb nrog Nkawd koom siab koom ntsws (saib Yauhas 17). Cia li saib taus txoj moo zoo txhua lub ntsiab cai yog ib lub cib fim qhia thiab kawm txog Yexus Khetos.
Txhua txoj lus txib kuj ua rau peb muaj cib fim no. Tsis txhob tsom ntsoov rau tej kev cai ntawm txoj moo zoo xwb—cia li kawm txog tus uas tau Qhia Kev Cai thiab. Yog koj sib tham txog Txoj Lus Txawj Ntse thiab tsis qhia ntxiv tom qab koj hais txog tej yam peb yuav tsum ua los sis tsis txhob ua kom noj qab nyob zoo, ces lub cim fim no yuav ploj mus kom to taub tias Yexus Khetos hlub peb npaum li cas—Nws xav txog peb sab ntsuj plig thiab peb sab cev nqaij daim tawv—Nws thiaj li tau pub txoj kev cai no rau peb. Tsom ntsoov rau qhov uas tus Cawm Seej xav xav foom koob hmoov rau peb kom muaj Nws lub hwj chim pab peb ua raws li Nws tej kev cai. Txhua txoj lus txib uas Nws qhia rau peb yeej qhia me ntsis txog Nws lub siab xav thiab lub siab nyiam—cia li muaj kev xyiv fab thaum peb kawm txog qhov no ua ke!
Hais Ntau txog Yexus Khetos tus Yam Ntxwv
Peb yuav tsom ntsoov rau Yexus Khetos nyob hauv peb txoj kev kawm thiab txoj kev qhia thaum peb pom thiab saib tias Nws yog tus uas coj yam ntxwv zoo tag nrho txog txoj moo zoo txhua lub ntsiab cai. Vim peb yog cov thwj tim, peb tsis ua raws li tej lub ntsiab cai xwb—peb coj raws li Yexus Khetos. Thaum peb tsom ntsoov rau tus Cawm Seej tus yam ntxwv zoo tag nrho, tus Vaj Ntsuj Plig Dawb Huv yuav ua tim khawv txog Nws thiab tshoov peb lub siab kom coj raws li Nws.
Cia li xav seb yuav zoo li cas yog koj qhia lub ntsiab cai txog kev nyiaj mus kom txog thaum kawg. Kev sib tham txog qhov uas tus Cawm Seej tau ua li cas kom nyiaj mus txog thaum kawg nyaj yuav ua rau cov neeg muaj siab xav hwm Nws. Cov uas koj qhia yuav kawm thiab xav dab tsi los ntawm Nws tus yam ntxwv?
Tus Cawm Seej tau coj yam ntxwv zoo tag nrho rau peb txhua tus. Nws Kho Tag Nrho Lawv Sawv Daws, los ntawm Michael Malm
Qhia txog Yexus Khetos tej Npe, tej Luag Hauj Lwm, thiab tej Cwj Pwm
Yexus Khetos muaj ntau lub npe nyob hauv cov vaj lug kub. Txhua lub npe qhia txog Nws tej luag hauj lwm hauv Vajtswv txoj hau kev thiab qhia peb txog Nws tej cwj pwm uas zoo li Vajtswv. Tej zaum koj yuav xav nrog cov neeg kawm sib tham hais tias tej lub npe no qhia dab tsi rau peb txog Yexus Khetos xws li Vajtswv tus Me Nyuam Yaj, tus Tuaj Peb Tog, tus Ua Kom Peb Kev Ntseeg Tiav, txoj Kev Kaj ntawm lub Ntiaj Teb. Tsis tas li ntawd, thaum koj pab cov neeg kawm paub ntxiv txog tus Cawm Seej, tsis txhob qhia tias Nws hais li cas xwb, cia li qhia tias Nws yog leej twg thiab Nws xav ua hauj lwm dab tsi kom pab peb lub neej. Thaum nej kawm ua ke txog tus Cawm Seej tus xeeb ceem thiab tej cwj pwm, tus Vaj Ntsuj Plig Dawb Huv yuav pab nej to taub thiab hlub Nws ntxiv.
Nrhiav tej lub Cim uas Ua Tim Khawv txog Yexus Khetos
Tus Tswv hais tias, “Tau tsim thiab tau ua txhua yam los ua pov thawj txog kuv” (Mauxes 6:63; kuj saib 2 Nifais 11:4). Thaum peb xav txog qhov tseeb no, peb yuav kawm kom pom tau tej lub cim ntau nyob hauv cov vaj lug kub uas ua pov thawj txog tus Cawm Seej. Muaj tej lub cim xws li cov mov mog, cov dej, thiab qhov kaj. Thaum peb to taub tias tej yam khoom no piv txog tus Cawm Seej zoo li cas, ces tej yam no yuav qhia peb txog Nws lub hwj chim thiab Nws tej cwj pwm. Koj kuj yuav nrhiav tau tej zaj lus piv txwv txog tus Cawm seej lub neej los ntawm cov yaj saub thiab lwm tus txiv neej thiab poj niam uas rau siab ntseeg nyob hauv cov vaj lug kub. Kev nrhiav tej lub cim yuav ua rau koj pom tau qhov tseeb txog tus Cawm Seej los ntawm tej yam uas ntshe lwm zaus koj yuav tsis