Tej Lus Tswv Yim txog Kev Qhia hauv Ntau Qhov Chaw thiab Kev Qhia cov Neeg Kawm uas Sib Txawv

Thawj Tswj Hwm Russell M. Nelson tau qhia tias peb yuav tsum kho peb lub tsev kom ua “lub hauv paus rau txoj kev kawm txoj moo zoo” (“Rais Los Ua Tsoom Haiv Neeg Ntseeg hauv Hnub Nyoog Kawg Ua Coj Yam Ntxwv Zoo,” Liahona, Kaum Ib Hlis Ntuj 2018, 113). Tej yam uas peb kawm hauv lub koom txoos los sis nyob hauv seminary yeej muaj nqis heev, tiam sis tej ntawd txhawb nqa tej yam uas peb qhia hauv tsev xwb. Qhov chaw tseem ceeb tshaj—thiab qhov chaw zoo tshaj plaws—rau kev kawm txog txoj moo zoo, rau peb tus kheej thiab peb tsev neeg, yog nyob hauv tsev.

Tiam sis qhov no tsis yog hais tias peb yuav kawm txog txoj moo zoo hauv tsev yog peb tsis ua dab tsi; peb yuav tsum ua tib zoo ua hauj lwm. Thawj Tswj Hwm Nelson tau hais tias tej zaum koj yuav tsum “kho [koj] lub tsev”—tsis yog los ntawm kev rhuav phab ntsa los sis tso tej khoom tshiab saum av tiam sis yog los ntawm kev ntsuas seb puas muaj tus Ntsuj Plig nyob hauv koj lub tsev, thiab koj puas pab kom muaj tus Ntsuj Plig ntawd (“Rais Los Ua Tsoom Haiv Neeg Ntseeg hauv Hnub Nyoog Kawg Ua Coj Yam Ntxwv Zoo,” 113). Piv txwv hais tias, cov nkauj, cov vidi-aus, thiab lwm yam qhauj tawm hauv koj lub tsev; cov duab uas muab dai rau ntawm phab ntsa; thiab txoj kev uas cov neeg hauv koj tsev neeg hais lus thiab ua ib leeg rau ib leeg. Tej no puas caw tus Vaj Ntsuj Plig Dawb Huv los? Koj puas tseg sij hawm cia rau kev kawm txoj moo zoo, koj ib leeg thiab nrog koj tsev neeg? Koj tsev neeg puas paub tias muaj neeg hlub lawv, lawv nyab xeeb, thiab nyob ze Vajtswv thaum lawv nyob hauv koj lub tsev?

Tej zaum koj yuav xav tias koj tswj tsis tau tib neeg sab ntsuj plig zoo li cas nyob hauv koj tsev. Yog tias zoo li no, ces ua zoo npaum li koj muaj peev xwm ua thiab thov tus Tswv pab koj. Nws yuav saib koj tej kev siv zog uas ncaj ncees. Thaum koj sim qhia thiab kawm txog txoj moo zoo, tsis hais thaum koj tsis pom qhov zoo tam sim ntawd los, koj yeej ua zoo.

“Hlub cov uas koj qhia” hais txog txhua qhov chaw uas peb qhia txog txoj moo zoo, tiam sis nyob hauv tsev, tsim nyog uas txhua tus paub zoo tshaj plaws hais tias muaj neeg hlub lawv. Txawm yog koj lub tsev tsis zoo tag nrho los, yeej tsim nyog uas koj lub tsev yog qhov chaw tseem ceeb tshaj plaws kom kawm txog txoj moo zoo vim nyob ntawd los peb tej kev txheeb ze kav ntev tshaj plaws. Cov xib hwb hauv tsev kawm ntawv los tej zaum lawv tau kawm ua cov xib hwb li ntawd, tiam sis lawv yeej tsis txawj pauv tej kev txheeb ze uas nyob mus ib txhis hauv tsev. Yog li ntawd yuav tsum saib xyuas kom zoo. Siv sij hawm thiab siv zog kom mloog nej tsev neeg lus thiab pab ib leeg tso siab rau ib leeg thiab ib leeg to taub ib leeg. Qhov no yuav pab tsim ib lub hauv paus ruaj khov rau koj txoj kev qhia thiab kawm txoj moo zoo nyob hauv tsev.

Tej chav kawm hauv lub Koom Txoos los muaj ib zaug txhua lub lim tiam xwb, muaj ib lub sij hawm thaum pib thiab kaw, tiam sis yeej tsis zoo li no nyob hauv tsev. Tej zaum yuav teem sij hawm rau tsev neeg hmo ua ke los sis tsev neeg kev kawm vaj lug kub, tiam sis tej lub cib fim qhia nyob hauv tsev neeg los feem ntau muaj thaum tej lub sij hawm uas tsis tau npaj ua ntej—thaum noj mov, ua tes num, ua si, thaum mus ua hauj lwm los sis mus kawm ntawv, thaum nyeem ntawv, los sis saib yeeb yam ua ke. Thaum ntuj los nag ces muaj cib fim sib tham txog qhov uas tus Cawm Seej tiv thaiv peb kom txhob raug cua daj cua dub ntawm sab ntsuj plig. Ib tug tub hluas ntxhais hluas uas yuav tsum txiav txim siab ua ib yam tseem ceeb tej zaum yuav npaj siab kawm txog kev tshwm sim. Ib tug me nyuam yaus uas ntshai los tej zaum yuav xav hnov koj hais lus tim khawv txog tus Nplij Siab. Qhia tau cov me nyuam uas txhoj pob los sis ua phem rau lwm tus txog kev hloov siab lees txim thiab kev zam txim.

Vim tsis tau paub yuav muaj tej lub sij hawm zoo li no, koj npaj tsis tau zoo li koj yuav npaj qhia ib zaj lus qhia. Tiam sis koj yeej npaj tau koj tus kheej los ntawm kev mloog tus Ntsuj Plig thiab siv zog “npaj tos txhua lub sij hawm” (1 Petus 3:15). Lub sij hawm twg yuav los ua ib lub sij hawm rau kev qhia los sis kev kawm.

Cov niam tsev txiv tsev los tej lub sij hawm lawv poob siab thaum lawv xav tias lawv txoj kev qhia txoj moo zoo hauv tsev tsis tshua pab. Xav txog ib lub sij hawm xwb, xws li ib zaug thaum ua tsev neeg hmo ua ke, kawm vaj lug kub, los sis sib tham txog txoj moo zoo ces yeej yuav xav tias tsis tshua pab hlo li. Tiam sis qhov uas yus ua tej yam me thiab yooj yim tsis tu tsis tseg tau ntev, thaum koom a ke, ces yuav muaj hwj chim thiab txhawb zog ntau tshaj qhov uas yus ua ib yam loj loj ib zaug xwb los sis qhia ib zaj lus qhia zoo zoo. Tus Tswv hais tias, “Txhua yam yuav tsum tshwm sim los thaum txog lub sij hawm. Yog li ntawd, tsis txhob nkees ua tej yam zoo, vim nej tab tom teeb lub hauv paus ntawm ib txoj hauj lwm loj. Thiab los ntawm tej yam me yuav muaj tej yam uas loj tawm los” (Lus Qhuab Qhia thiab Kev Khi Lus 64:32–33; kuj saib Amas 37:6–7). Yog li ntawd txhob tso tseg, thiab tsis txhob txhawj tias yuav tsum ua ib yam loj heev txhua zaus. Cia li siv zog ua mus li tsis tu tsis tseg.

Txoj moo zoo yeej tseem ceeb nyob hauv tsev. Nyob ntawd cov neeg uas nrog koj kawm txog txoj moo zoo yeej yog cov neeg uas koj yuav ua neej nyob—txhua hnub. Muaj tseeb tiag, feem ntau, kev ua neej raws li txoj moo zoo yeej yog peb txoj kev kawm txog txoj moo zoo. Yog li ntawd thaum koj kawm thiab qhia txog txoj moo zoo hauv tsev, nrhiav tej yam uas yuav pab koj tsev neeg kawm txog tej yam uas koj tsev neeg ua. Nyob hauv tsev, cia li siv zog ua raws li txoj moo zoo, tsis txhob sib tham txog txoj moo zoo xwb.

Daim Duab

tus poj niam qhia cov me nyuam

Txhua tus me nyuam nyias txawv nyias, thiab thaum lawv loj hlob tuaj, tej yam lawv xav tau yuav hloov. Kev muab koj tus txheej txheem qhia hloov ntau zaus yuav pab koj qhia raws li lawv xav tau. Piv txwv hais tias, xav saib puas tsim nyog siv tej yam nram qab no:

• Dab neeg. Cov dab neeg pab cov me nyuam pom tias yuav ua li cas kom siv txoj moo zoo hauv lub neej no txhua hnub. Siv cov dab neeg los ntawm cov vaj lug kub, los ntawm koj lub neej, los ntawm koj tsev neeg zaj keeb kwm, los sis los ntawm lub Koom Txoos cov ntawv xov xwm, qhov tseem ceeb yog tej zaj txog tus Cawm Seej. Npaj tej yam uas cov me nyuam ua tau kom hais dab neeg—cia lawv tuav daim duab, rov qab hais tej kab lus, los sis ua yeeb yam.

• Tej yam saib tau. Cov duab, cov vidi-aus, thiab tej khoom yuav pab cov me nyuam to taub thiab nco qab txoj moo zoo tej lub ntsiab cai. Muaj cov duab thiab cov vidi-aus uas siv tau hauv Media Library nyob ntawm ChurchofJesusChrist.org.

• Cov nkauj. Cov nkauj qhuas Vajtswv thiab lwm zaj nkauj yuav pab cov me nyuam hnov Vajtswv txoj kev hlub, hnov tus Ntsuj Plig, thiab kawm qhov tseeb ntawm txoj moo zoo. Tej suab nkauj, suab paj nruas, thiab tej paj lug pab cov me nyuam nco ntsoov qhov tseeb ntawm txoj moo zoo. Thaum koj nrog cov me nyuam hu nkauj, pab lawv kawm thiab to taub cov ntsiab cai nyob hauv tej zaj nkauj ntawd.

Cov me nyuam feem coob kawm zoo dua thaum lawv pom, hnov, thiab kov. Nrhiav tej yam uas pab cov me nyuam pom kev, hnov lus, thiab kov thaum lawv kawm. Tej lub sij hawm koj yuav nrhiav kev kom pab lawv hnov tsw thiab saj tej yam thiab!

Thaum koj caw koj cov me nyuam tsim ib yam uas qhia txog ib lub ntsiab cai ntawm txoj moo zoo, koj yuav pab lawv to taub lub ntsiab cai zoo dua ntxiv, thiab koj kuj yuav pab lawv muaj ib yam dab tsi uas ua rau lawv nco ntsoov txog qhov uas lawv tau kawm. Lawv kuj siv tau tej yam uas lawv tau tsim kom qhia lwm tus txog tej yam uas lawv tau kawm. Txhua phau xov xwm Friend muaj tej yam ntxim ua zoo rau cov me nyuam ua.

Thaum cov me nyuam nug tej yam, yeej yog ib lub cib fim, tsis yog kev cuam tshuam. Cov me nyuam tej lus nug qhia tias lawv npaj siab kawm, thiab lawv tej lus nug yuav pab koj paub tias lawv xav dab tsi. Cia li pab lawv kawm tias tej lus teb lawv tej lus nug los muaj nyob hauv cov vaj lug kub thiab cov yaj saub tej lus.

Tej lub sij hawm ib tug me nyuam ua tej yam uas cuam tshuam lwm tus txoj kev kawm. Feem ntau thaum ib tug coj cwj pwm txhoj pob ces yog vim nws xav tau dab tsi. Thaum twg muaj li no, cia li ua siab ntev, hlub nws, thiab to taub tej yam nyuaj uas tus me nyuam raug. Tej zaum nws yuav tsum muaj cib fim koom tes pab thaum koj qhia—piv txwv hais tias, thaum nws tuav ib daim duab rau lwm tus saib, kos duab, los sis nyeem ib nqe vaj lug ku.

Yog ib tug me nyuam tseem txhoj pob, tej zaum koj yuav tsum hais rau nws ib leeg xwb. Nrog kev hlub thiab kev ua siab ntev, piav tias koj xav kom nws ua dab tsi thiab qhia nws tias koj tso siab nws yuav muaj peev xwm ua li ntawd. Qhuas tus me nyuam thaum nws xaiv ua tej yam zoo dua.

Thaum cov me nyuam kawm ib yam dab tsi tshiab, lawv yeej xav qhia rau lwm tus. Txhawb nqa txoj kev xav ua li no thaum koj muab cib fim rau cov me nyuam ib leeg qhia ib leeg txog txoj moo zoo tej lub ntsiab cai, thiab qhia rau lawv tsev neeg thiab cov phooj ywg. Thov kom lawv qhia koj txog lawv tej kev xav thiab tej yam uas lawv ua hauv lawv lub neej raws li tej lub ntsiab cai uas koj qhia. Koj yuav kawm tias lawv muaj tswv yim uas yooj yim, dawb huv, thiab muaj hwj chim.

Cov me nyuam uas tseem tsis tau txais lub txiaj ntsim Vaj Ntsuj Plig Dawb Huv txawj hnov Nws lub hwj huam, qhov tseem ceeb yog thaum lawv kawm txog Yexus Khetos thiab Nws txoj moo zoo. Thaum lawv xaiv ua tej yam ncaj ncees, lawv hnov tau tus Cawm Seej txoj kev pom zoo dhau los ntawm tus Ntsuj Plig. Qhia cov me nyuam txog tej kev uas tus Ntsuj Plig siv kom qhia peb. Pab lawv paub Nws lub suab thaum Nws hais lus rau lawv. Qhov no yuav pab lawv nrhiav thiab ua raws li kev tshwm sim tas lawv lub neej.

Cov tub hluas ntxhais hluas muaj peev xwm ua tej yam zoo kawg nkaus thaum lawv ua hauj lwm rau tus Tswv. Muaj ntau zaj hauv cov vaj lug kub uas qhia tias Vajtswv tso siab rau cov tub hluas ntxhais hluas rab peev xwm ntawm sab ntsuj plig. Yog tias cov tub hluas ntxhais hluas paub tias koj tso siab rau lawv, ces lawv yuav txoj kev ntseeg lawv tus kheej yuav loj tuaj thiab lawv yuav ua rau koj xav tsis thoob. Cia li hlub lawv kom lawv thiaj to taub tias Leej Txiv Saum Ntuj Ceeb Tsheej paub lawv muaj peev xwm hloov los ua neeg zoo li Nws. Coj raws li tus Cawm Seej tus yam ntxwv hlub lawv thiab txhawb nqa lawv, ua siab ntev pab lawv, thiab tsis txhob tso lawv tseg ib zaug li.

Cov tub hluas ntxhais hluas tab tom tsim lub hauv paus ntawm lawv zaj lus tim khawv. Lawv tab tom kawm tias lawv ntseeg dab tsi. Lawv tab tom txiav txim txog tej yam uas yuav hloov lawv lub neej. Yog tias peb sab ntsuj plig yuav nyiaj kom dhau hauv lub caij nyoog uas muaj xwm txheej ntau no thiab ua raws li tus Tswv ntiag tug hauj lwm, ces cov tub hluas ntxhais hluas uas koj qhia yuav tsum paub nrhiav dag zog thaum lawv raug sim siab, muaj lus teb lawv tej lus nug, thiab ua siab loj kom “ua tim khawv txog Vajtswv” (Mauxiyas 18:9).

Cov tub hluas ntxhais hluas xav kawm txog tej yam los ntawm lawv txoj kev xav thiab lawv lub neej es lawv tsis xav kom lwm tus hais lus rau lawv xwb. Qhov no txhais tias koj yuav tsum mloog zoo zoo thaum qhia cov tub hluas ntxhais hluas. Thaum cov tub hluas ntxhais hluas paub tias koj to taub lawv, ces lawv yuav qhib siab kom txais tau koj tej lus ntuas thiab koj txoj kev coj kev. Qhia lawv tias tus Tswv paub lawv thiab yuav pab lawv thaum lawv muaj tej lus nug thiab raug tej kev sim siab. Lawv muaj peev xwm muab siab rau ntseeg Nws thaum lawv thov Vajtswv txhua hnub thiab kawm vaj lug kub thiab pab lwm tus. Yog koj txhawb nqa cov tub hluas ntxhais hluas kom koom tes pab hauv lawv tej chav kawm hauv lub Koom Txoos thiab kawm lawv ib leeg xwb ces yuav pab lawv zaj lus tim khawv txog qhov uas lawv yog Vajtswv cov me nyuam.

Yog cov tub hluas ntxhais hluas muaj cov tshuab uas siv hluav taws xob, nco ntsoov tias cov tshuab no yog tej cuab yeej kom pab txhawb nqa lawv txoj kev kawm vaj lug kub. Cia li qhia lawv paub siv cov vaj lug kub hauv tej tshuab no thiab lwm yam uas muaj nyob hauv Txoj Moo Zoo cov Ntawv. Koj kuj xa tej zaj lus thiab tej kev txuas rau cov tub hluas ntxhais hluas kom pab lawv npaj rau ib zaj lus qhia.

Daim Duab

Hnub Caiv kev kawm vaj lug kub

Cov neeg laus txawj ua ntau yam rau lawv tus kheej thaum lawv kawm txog txoj moo zoo (saib 2 Nifais 2:26). Caw lawv kom npaj sib tham txog txoj moo zoo thaum koj hais kom lawv kawm ib yam dab tsi ua ntej, thiab txhawb nqa lawv kom qhia tias tus Ntsuj Plig qhia dab tsi rau lawv. Tej zaum koj yuav xav nug lawv seb lawv xav siv sij hawm kawm txog tej lub ntsiab cai ntawm txoj moo zoo twg.

Yauj hais tias, “Tej neeg laus muaj tswv yim … [thiab] muaj kev txawj ntse” (Yauj 12:12). Feem ntau, yuav tsum ua neej tau ntev thiaj li muaj tswv yim thiab to taub sab ntsuj plig. Thaum koj qhia cov neeg laus, caw lawv qhia tej yam uas tau txhawb nqa lawv txoj kev ntseeg Leej Txiv Saum Ntuj Ceeb Tsheej thiab Yexus Khetos. Qhov no yuav ua rau lawv muaj cib fim ua tim khawv txog qhov uas lawv tau ua li cas thiaj paub tias tej ntsiab cai ntawm txoj moo zoo muaj tseeb. Qhov uas sawv daws qhia txog lawv lub neej li no yuav pab cov uas koj qhia sib raug zoo, thiab pab “sawv daws ib leeg yuav txhawb zog ib leeg” (Lus Qhuab Qhia thiab Kev Khi Lus 88:122).

Cov neeg laus uas koj qhia los tej zaum lawv muaj tej lub luag hauj lwm ntau thaum lawv ua hauj lwm, nyob hauv zej zog, hauv lub Koom Txoos, thiab hauv lawv tsev neeg. Thaum lawv kawm txoj moo zoo, lawv pheej xav tias lawv yuav ua li cas kom siv tej yam uas lawv kawm kom pab lawv ua lawv tej lub luag hauj lwm ntawd. Cia li caw lawv kom pom tias Vajtswv txoj lus muaj nqis rau lawv tej xwm txheej. Koj ua li no thaum koj nug lawv seb vim li cas tej lub ntsiab cai ntawm txoj moo zoo muaj nqis thiab yuav ua li cas kom siv hauv lawv lub neej.

Vim tias lawv tau ua neej tau ntev thiab muaj kev txawj ntse ntau, cov laus paub tias tej lub sij hawm tsis yooj yim teb tej lus nug txog txoj moo zoo. Lawv paub tias ib nqe vaj lug kub yuav muaj ob peb lub ntsiab, thiab lawv txawj siv ib lub ntsiab cai txog txoj moo zoo hauv lawv lub neej uas txawv lwm tus. Cia li caw lawv kom xav txog qhov uas ib lub ntsiab cai txuas rau lwm lub thiab txuas rau tej yam uas lawv raug hauv lawv lub neej. Hais kom lawv hais lus thiab sib tham lawv thiaj li yuav kawm ua ke los ntawm txhua tus txoj kev xav uas sib txawv.

Joseph Smith qhia hais tias, “Txhua lub paj hlwb thiab cov ntsuj plig uas Vajtswv tau txib los nyob hauv ntiaj teb no yog ib yam uas txawj loj hlob tuaj mus” (Teachings of Presidents of the Church: Joseph Smith [2007], 210). Cia li xav tias tag nrho Vajtswv cov me nyuam muaj peev xwm kawm kev txawj ntse thiab vam meej. Thov tus Tswv kom pab koj paub tias yuav ua li cas kom pab txhua tus neeg.

Sib tham nrog cov neeg kawm los sis lawv niam lawv txiv los sis cov uas saib xyuas lawv. Kawm tias txhua tus kawm ntawv li cas thiab yuav siv tej txheej txheem twg thiaj pab tau zoo tshaj. Tej zaum koj kuj yuav xav sib tham nrog lwm tus thawj coj thiab cov xib hwb uas tau qhia ntev lawm thiab muaj tswv yim qhia rau koj. Yog xav tau tej txheej txheem qhia uas pab tau, saib disabilities.ChurchofJesusChrist.org.

Cia li tsim ib qho chaw zoo rau sawv daws paub tias muaj kev nyab xeeb thiab kev hlub. Tsis txhob xav tias txhua tus neeg uas xiab oob qhab zoo ib yam, thiab hlub thiab saib taus txhua tus neeg rau nqi. Hais kom lwm tus ua siab zoo thiab lees yuav lwm tus.

Koj hloov koj zaj lus qhia los tau kom ua tib zoo pab txhua tus neeg kawm, tsis hais cov uas xiam oob qhab los sis nyuaj rau lawv kawm vaj lug kub. Piv txwv hais tias, yog tias zaj lus qhia hais tias yuav tso duab rau txhua tus saib, tej zaum koj yuav xav hu ib zaj nkauj thiab kom pab cov uas pom tsis tau kev.

Ib txoj kev kom tsim tej txheej txheem yog kev kos duab uas muaj ib daim teem sij hawm. Koj daim teem sij hawm tej zaum yuav qhia thaum twg yuav thov Vajtswv, qhia ntawv, thiab ua yam ntxim saib ntxim ua. Kev ua raws li kev teem sij hawm yuav pab ib txhia kom tsis txhob txhawj xeeb thiab pab nplij lawv lub siab.

Cia li kawm txog tej kev xiam oob qhab los sis tej xwm txheej uas ua rau ib tug neeg ua tej yam tsis tsim nyog. Ua tib zoo tsom ntsoov rau tej yam uas tshwm sim thaum cov neeg coj cwj pwm uas nyuaj ua. Thov Vajtswv seb koj yuav hloov koj txoj kev qhia li cas thiaj li yuav txhawb nqa cov neeg kawm zoo dua.

Yog xav kawm ntxiv txog kev qhia cov neeg uas xiam oob qhab, saib disabilities.ChurchofJesusChrist.org.

Ua ntej koj qhia los yog muaj kev sib ntsib, siv sij hawm kom paub siv tej txuj ci technology. Sim seb koj yuav siv li cas, xws li kev muab cov vidi-aus los sis cov duab tso rau lwm tus saib. Xav seb koj puas yuav sim sib ntsib ua ntej nrog koj tsev neeg los sis phooj ywg.

Tej pawg ntseeg thiab ceg txheem ntseeg feem ntau muaj ib tug txawj pab siv txuj ci technology. Tej zaum koj kuj paub lwm tus uas txawj qhib kev sib ntsib ntawm koospistawj. Thov kom lawv qhia los sis coj koj txoj kev.

Yog ua taus, nrhiav ib qho chaw ntsiag to rau koj txoj kev sib ntsib. Tej lub suab nyob ib puag ncig tej zaum yuav meem txom tib neeg. Hais kom cov neeg uas kawm ua ib yam li ntawd los sis tua suab thaum twg lawv tsis hais lus.

Yog ua taus, qhib koj lub koob yees duab cia cov neeg uas kawm pom koj lub ntsej muag. Caw (tiam sis tsis txhob yuam) cov neeg uas kawm qhib lawv lub koob yees duab thiab. Yog ua li no ces yuav pab nej koob siab koom ntsws thiab pab ib leeg txhawb nqa ib leeg.

Ntau qhov program rau kev sib ntsib ntawm koospistawj cia tib neeg ntaus ntawv nyob hauv ib qho chaw sib tham. Tej zaum muaj ib qho uas cia cov neeg siv koospistawj los tsa tes. Cia cov neeg uas kawm paub txog tej no. Tej zaum koj yuav xav txib ib tug saib puas muaj leej twg xav hais lus los sis tsa tes kom koj thiaj li tsom ntsoov rau nej txoj kev sib tham.

Tej lub sij hawm kev kawm ntawm koospistawj ua nyuaj rau cov neeg xav tias muaj neeg pom thiab hnov lawv. Ua tib zoo kom pab cov uas xav koom tes. Tej lub sij hawm yuav tsum tsim tej pawg me zog (piv txwv hais tias, muab ib chav kawm loj faib ua ob pawg). Tej lub sij hawm yuav tsum thov cov neeg kawm ua ntej kom koom tes ua ib yam dab tsi. Tsis txhob cia tej kev siv txuj ci technology ua rau koj tsis nco qab cov neeg uas muaj siab xav kawm.