Faatinoina o le Loto-Pulea

Ei ai so tatou lotofuatiaifo? Ioe, o se mea na tuuina mai, o se uiga faale- Atua, lea e tuuina atu i tagata uma e malamalama, i le lagi ma le lalolagi,— le mana lea e taliaina ai pe teenaina ai foi (DBY, 264).

Afai e manatunatu i tagata i soo se vaega o le olaga, o o latou faanaunauga e sili ma taua. E mafai ona e mauaina ma taitaiina lagona o tagata, ae le mafai ona e faafefeina i latou, pe sasa i latou, pe susunuina i latou ina ia faia le mea sao e le fetaui ma o latou lotofuatiaifo. O tagata uma o le a feoti i latou i le faamalieina o o latou lotofuatiaifo. O lea ia aoao ai e faasaosaoina na lotofuatiaifo, ma e mafai ona e faatonutonuina le aafiaga ma le malosiaga o tagata (DBY, 264).

Ua tuuina e le Atua i totonu o i tatou se lotofuatiaifo, ma e tatau ona faamalieina i tatou i lo tatou puleaina lea e ala i le finagalo o le Silisiliese. Ia gauai atu le lotofuatiaifo o le tagata mo le mea tonu. Ua avea pea ma se tu ma aga a matua le faaleaogaina o le lotofuatiaifo seia oo lava ina vaivai, ma o mana mamalu faale-Atua o se tamaitiiti ua faaitiitia i se tulaga o le faavalevalea ma le palaai. Ia tausia faalelei lena lotofuatiaifo na fanauina i le lagi e ni tagata ma ia taitaiina ma le atamai, nai lo le taitaiina i le isi itu, ma o le a faasagatau mai i le mea moni. Aua nei faalotovaivaia le agaga o soo se tasi, ae ia taitaiina ina ia ona lagonaina o lona fiafiaga ma mea silisili e naunau i ai e puleaina lea e faaaliga a Iesu Keriso, ona avea ai lea o le lotofuatiaifo o le tagata e faapei o le Atua i le faatoilaloina o le leaga o loo tuuina i le tino, seia oo ina nofotupu le Atua i totonu o i tatou ina ia puleaina o tatou lotofuatiaifo ma faia mea lelei o loo ia naunau i ai (DBY, 264).

Aoao ina ia puleaina outou lava; aoao ina ia iai i aao o le Atua e pei o se ele i lima o le fai ipu omea (DBY, 265).

Ia fuafua tagata uma taitoatasi, i le suafa o Iesu Keriso, ina ia faatoilaloina ia faaosoosoga uma—ina ia avea ma matai o ia lava, ina ia pulea e le Agaga na tuuina atu i ai e le Atua outou tino; ona mafai lea ona outou ola, galulue, feoai solo, faia lenei po o lena, ma talanoa ma feutagai ma tagata o le Au Paia outou uso e pei ona tatau ai (DBY, 265—66).

O le vave lava e teenaina ai e se tasi se faaosoosoga e faia, tautala, po o le mafaufau sese, ao loo ia te ia le malamalama e faasao ai lana faamasinoga, o le vave foi lena o le a ia maua ai le malosiaga ma le mana e faatoilalo ai faaosoosoga uma i le leaga (DBY, 266).

O le vave lava O le faitau afe ma le fia sefulu afe o mea e tutupu lea e matele i ai le olaga faaletagata, e tusa lava pe mo le lelei po o le leaga, e faalagolago lava lea i le vave ona mataituina ma taulimaina (DBY, 267).

E le mafai ona e mauaina le ola e faavavau, seiloga e ogatasi mea e te faia ma le agaga o loo ia te oe, le agaga lena na tuuina atu e lo tatou Tama o i le Lagi ia te oe. O le Tama lea o o tatou agaga, o agaga na sa ia tuuina i totonu o nei tino. E tatau i tino ona tuuina atu i le agaga le atoatoa, a leai e le mafaia e outou tino ona mauaina le ola e faavavau… . Saili ma le maelega, seia aumaia mea uma ina ia tusa ai ma le tulafono a Keriso (DBY, 266).

O lea ou te taumafai ina ia avea au ma se tagata malamalama. Po o e taumafai ea ia e faapena? Afai e faamanuiaina i tatou i lea mea, ona tatou maua loa lea o le puleaina o a tatou upu ma o tatou uiga, ae le gata foi i lea, o o tatou aafiaga, i a tatou uo. Afai tatou te faamalamalamaina i tatou lava, e tatau ona tatou saunia ina ia tatou taliaina mea ua teuina e lo tatou Tama ma lo tatou Atua mo tagata uma e pei o le sauniaina o i latou lava e avea ma nisi e taliaina ana meaalofa filifilia—mo le fiafia, mo le atamai, mo le mamalu, mo le malosi, ma mo mea uma e agavaa ai ina ia tuuina atu i luga o lana fanau iinei i le lalolagi, ina ia saunia ai i latou e nonofo i maota o le malamalama e faavavau (DBY, 266–67).

Ua ou fai soo atu pea lava pea o le faamanuiaga silisili a le Atua ua tuuina atu i tagata o le iloa lelei, logoleleia, ma le malosi e iloa ai pe faapefea ona tatou puleaina i tatou lava (DBY, 265).

E leai se tagata ua ia pule, pe o le a pule foi ma le tonu i lenei lalolagi, faatasi ai ma le mamalu ia te ia lava ma le mamalu i lona Atua, sei vagana ua ia aoaoina muamua ina ia puleaina o ia lava. E tatau i se tagata ona aoao ina ia pulea o ia lava muamua ma le tonu ao lei faaaogaina ma le atoatoa lona malamalama mo le puleaina o se aiga, se nuu, se malo, i lona tiute e faatatau i ai e pulefaamalumalu ai (DBY, 265).

Sei vagana lava ua mafai ona tatou faamaualaloina o tatou lagona, ma aumaia lagona uma faaletagata ma faanaunauga ina ia ogatasi ma le finagalo o le Atua, o le a le mafaia lava ona tatou taitaiina ma puleaina isi i le atoatoaga o le manumalo i le Malo o le Atua. Ina ia faatoilaloina ma faamaualaloina, ma aoaoina i tatou lava ina ia aumaia mea uma ina ia ogatasi ma le tulafono a Keriso, o la tatou galuega lena (DBY, 267).

O loo tatou taumafai e puleaina i tatou lava, ma afai o le a faaauau pea ona tatou taumafai ma le le faavaivai, o le a mautinoa lava le faatoilaloina (DBY, 265).

Ua uma ona aoaoina outou i le tulaga o le mea tonu. O lea ia faatoilaloina nei loa o outou tuinanauga faatautee, ia aveesea mea uma tou te iloa pe tou te mafaufauina e sese, ae taliaina na o mea e lelei (DBY, 265).

I lenei olaga nofo vaavaaia, o loo i ai le leaga tatou te faafeagai, ma e tatau lava ona tatou faatoilaloina ia i tatou lava, po o lo tatou le mafaia lava ona faatoilaloina i se isi lava mea (DBY, 265).

O se tagata amiotonu o le a le faalotovaivaiina lava, ae o le a faatautava lava ma tuinanauga leaga, ma tetee atu i le leaga i lona aiga ma le nuu (DBY, 267).

E toatele tagata e faapea mai o latou e ita leaga tele, ma taumafai e sisio ai i latou mai mea o loo latou faalumaina ai. Ou te faapea atu, e leai lava ma se tagata o i totonu o lenei fale e sili atu le le taofiofia o lona ita nai lo au. Ae leai ma se tagata i lenei lalolagi na te le mafaia ona faatoilaloina ona tuinanauga, pe afai na te tauivi ma le maelega ina ia faatoilaloina. Afai ua e iloaina ua oo mai tuinanauga ia te oe, alu i se isi mea e le mafai ona e faalogoina ai; aua nei iloa pe faalogoina oe e se tasi o lou aiga, ao e feagai ai, ae tauivi seia oo lava ina alu ese ma oe; ma tatalo mo le malosiaga e faatoilaloina ai. E pei ona ou tauina soo atu i Toeaiina, tatalo i o outou aiga; ma afai e oo i le taimi e faia ai le tatalo, ae ua e le maua le agaga e tatalo ai, ma ua le mananao foi ou tulivae e tootutuli, ia e fai atu i ai, “Tulivae, tootutuli i lalo”; tago e faapipio, ma tumau ai pea iina seia oo lava ina e mauaina le Agaga o le Alii. Afai e le gauai atu le agaga i le tino, o le a faaleagaina; ae afai e gauai atu le tino i le agaga o le a avea ma se tino mama ma paia (DBY, 267).

Aua e te matuai ita ina nei le mafai ona e tatalo; aua nei outou faatagaina outou ina ia matuai feita ina nei le mafai ona outou fafaga i o outou fili—e oo lava i lou fili numera tasi, pe afai e maua se avanoa e oo mai ai. E i ai le ita amioleaga, ma e i ai foi le ita amiotonu. E le finagalo le Alii ia i ai le ita amioleaga i lona loto; ae e i ai pea le ita i lona fatafata, ma o le a ia te ia le finauga ma nuu ese, ma o le a ia luluina i latou, ma e leai se mana e taofia lona lima (DBY, 269).

A oso ae ou lagona ma oo i le ita ona o ni mea mataga a nisi, ou te taofia i latou e pei o loo taofiofi se solofanua aivao, ma ou mauaina ai le manumalo. Fai mai nisi latou te maua se faalogona lelei pe a latou feita, e pei ona latou taua ai, ina ia faaalia ai lo latou feita i se gagana faasausili ma le le talafeagai. Ae peitai, o lenei mea, o se mea sese. Nai lo le faatupuina ai ia te oe o se lagona lelei, e atili ai ona e maua le leaga. Afai e te mafaufau i ai ma e tautala i ai e te maua ai se faalogona lelei, o lena ua tuuina atu se tulaga tauleleia i se taufaasese. A oo ina liua le loto ita ma le tiga o le tagata i ni upu ma oo ina tauaimisa ai ma le isi tagata, e aunoa ma se siakiina po o le faalavelaveina, o le a le pine ae faatuputeleina loa le ita ona o ni nai mea laiti, seia oo lava ina faamuina ai le olaga uma nei (DBY, 266).

O lea ou te toe luiina ai outou, ma ou te luiina foi au lava ina ia aua nei o’u toe ita. Aua lava nei outou faatupuina le ita i o outou loto. Leai, Polika, aua lava nei faatupu le ita i lou loto, aua, aua lava! E ui lava atonu e valaauina oe e te aoai atu i tagata ma e tautala atu ma le malosi ia i latou, aua lava nei outou faatagaina le ita e tupu ae i lou loto, e leai, leai lava! (DBY, 265).

Aveese lou ita, ma faatelegese lou ma’ema’ea, ma auauna atu i le Alii ma le fiafia, ma le loto e tasi. E le manaomia lou faamoemoeina o le faaolataga, seiloga e mafai ona e tuuina atu le faaolataga i isi, e le gata i upu ae o faataitaiga. Afai ua e faamoemoeina se faamafanafanaga mai ia te au, ia e tuuina mai foi lena faamafanafanaga ia te au. Afai e manao i ni upu agalelei ma le tausiga agalelei mai ia te au, ia e tuuina mai foi faamanuiaga na e te faananau i ai; ma o le auala lena o le a faaolaina ai oe (DBY, 268–69).

Afai e te gauai atu i ou lagona ita, o le a e faamuina ai le olaga uma nei, … ona e faamunuina ai foi lea o le afi ia i latou o loo outou tauaimisa. Afai ua e lagona e pei o le a pa, ia e fai atu i le masini vaivevela (lou ita) ia pa, ma ia tau lava ina e ata i le faaosoosoga e tautala i le leaga. Afai o le a e faia pea lena mea, o le a le pine ona mafai ona e puleaina oe lava, taofiofia lou laulaufaiva—mafai ona e tautala pe a tatau ai, ma filemu pe a tatau ai foi.

Tatou te mananao i le agaga, malamalama, mana ma mataupu faavae ina ia i ai i totonu o i tatou ina ia puleaina ma faatonutonuina o tatou lagona ita; e leai se leaga o le tele o le [ita] pe afai o le a tatou faatonutonuina e ala lea i le Agaga o le Silisiliese. Soo se tagata atamai lava i le lalolagi ua fuafuaina mo le mamalu, matagofie, atoatoa ma le malamalama iinei, ma le tino ola pea ma le ola e faavavau i lalolagi a sau. Ae o tagata uma lava e naunau ina ia maua lenei mea e tatau ona faapaiaina i luma o le Atua ma ia atoatoa i le taitaiga a lona Agaga. Afai e faatonutonuina au e le Agaga o le Silisiliese, o au o se tupu. E silisili atu au nai lo le puleaina o le tagata lava ia (DBY, 264–65).

Afai e te mauaina muamua le mana e puleaina ai au upu, o le a e mauaina ai le mana e puleaina ai lau faamasinoga, ma faapena ai foi ona e maua le mana e puleaina ai ou manatu ma ou uiga (DBY, 267–68).

E tatau ona faamanuiaina outou i le faatonutonuina lelei o o outou laulaufaiva, ina ia aua nei tautala i mea leaga, ina ia mafai ona latou usiusitai ma le atoatoa i lau faamasinoga ma le faatuatuaga ua tuuina atu e le Atua ia te oe, ma ia usiusitai ma le atoatoa o outou laulaufaiva i le faanaunauga o le Talalelei paia (DBY, 268).

E masani ona tatou faalogo i o tatou tagata o faia ni ‘alofaga mai i lo latou lå mafaufau ma gagana le taupulea, e ala lea i le faapea mai “E le o au o se tagata faafiaamiotonu,” ina ia latou maua ai se tauleleia lea e le talafeagai ma i latou. A oso ae le leaga i totonu ia te au, ia aua lava nei o’u gauai atu i ai, ia faafilemuina, nai lo le taumafai e faatinoina i luga o le talitonuga sese e faapea o au ou te faamaoni ma ou te le faafiaamiotonu. Aua nei tuuina mai e lou laulaufaiva se faamatalaga i le leaga o loo i lou loto, ae ia poloaiina lou laulaufaiva ina ia filemu seia oo lava ina pulea e le lelei le leaga, seia oo ai lava ina alu ese lou ita ma o le Agaga lelei o le a taitaiina atu lou laulaufaiva i faamanuiaga ma upu agalelei (DBY, 266).

Afai e i ai se tasi o outou o loo fai ma ana amio le ta’u fua o le suafa o le Atua, ia taofia loa i le taimi nei le faia o lena mea, ma taeao ma le vaiaso atoa o le a sau, ma faaauau ai pea, ma o le a le pine ona e mauaina le malosiaga e foiaina ai lena amioga atoa; o le a e mauaina le mana i au upu (DBY, 268).

O nisi ua i ai i le amio lea o le faia o tala o o latou tuaoi, o le faalauaiteleina atu lea o tala e leai ma so latou malamalama i ai, e na o le faapea lava na fai mai Lafai e faapea o Pai na tauina atu ia Pesi se mea po o se isi, po o se tasi foi na fai sana miti; ma e oo i le taimi ua taunuu atu ai le tala po o le miti ia te oe, ua faafoliga mai e pei lava e moni, ma e matuai faavalevalea lava le faaaluina o lou taimi i le talanoa e uiga i mea e leai sona aoga, po o le leai foi o sou popolega i ai. O se lipoti e amataina i se sese ua faia e se tasi, ma e oo atu i le taimi ua faalauaitele ai, ua avea ma tala sese ona o i latou e taufaaleaga i isi ma i latou e faitala faatupu—ua foafoaina i o latou agaga. E faaopoopo atu le tasi i le isi ma faapea atu, “E sao lelei lava—e faamaonia lava lau faamatalaga, e sao lelei oe, ma e moni lava e sese le isi,” pe a latou le iloa ma se mea e uiga i le mataupu, o lea ua latou faatupuina ai ni lagona le faamaonia o le tasi i le tasi. Ae tatou te lei faasalaina atu, e tatau ona tatou faatali sei faaali manino mai e le lagi se sese i se tama, uso, tuafafine, ava, tane, po o se tuaoi. Ma afai e faailoaina mai e le lagi se sese, faatali seia faailoa atu e le Agaga Paia ia te oe o lena mea o se sese. Tuu atu i le Tama na te faaali atu ia te oe o le tagata o loo e mafaufau ma talanoa e uiga i ai e matuai sese lava. Aua nei faia ni tuuaiga sese e faasaga i isi. A e iloaina le mea e moni, ma e mafai ona e faasa’oina se tagata ua sese, ona lava ai lea o le taimi mo oe e te faamasino ai (DBY, 268).

E leai se alii po o se tamaitai i le lalolagi e i ai le mausa o le gaoi, ae o ai se tasi e mafai ona teena lea mea … pe afai ua latou masani ai. E faapea foi i le tagata pepelo, e mafai ona taofi lona pepelo, ma le toe pepelo ai, ae ta’u le mea moni. [O ia] lava e na te manaomia le faanaunauga e fai ai, ma [o lenei naunautaiga] e mafai ai e le tagata pepelo ona tautala sao, ma le tagata gaoi ina ia faamaoni, ma le tagata palauvale ina ia taofia lona tautala leaga (DBY, 264).

Ao tatou maua le faamanuiaga o le talanoa o le tasi i le isi, e ao ona tatou tautala i upu e faamafanafana ma faalaeiau. Afai ua uunaia outou e le Agaga o le paia ma le mama, ia pupula atu lo outou malamalama, ae pe a faaosoosoina outou ma faafefeteina e Satani, ia taofi o outou mafaufauga ia te outou lava—tapuni o outou fofoga; aua o le tautala e maua mai ai fua, o le amio lelei po o le leaga (DBY, 166).

E i ai se faaupuga tuai e faapea, ma e fetaui lelei i le tele o tulaga. O le,“Mafaufau faalua ae e te lei tautala atu, ae faatolu ae e te lei gaoioi.” Afai tatou te aoaoina i tatou lava ina ia mafaufau i mea o le a tatou faia, ma i ai se malamalamaaga ina ia iloa ai, ma le mana e faia ai le lelei, o le a mafai ai loa ona tatou teenaina le … leaga (DBY, 268).

O se meaalofa taua foi, lea e foliga mai o loo umiaina e isi, ina ia lava le malamalama e aua ai nei talanoa seiloga e mafai ona latou tauina atu se mea e faamanuiaina ai ma aoga mo i latou, po o isi, po o tagata uma foi (DBY, 268).

• Na aoao mai Peresitene Iaga o le lotofuatiaifo o “se uiga faaleAtua.” Na ia faapea mai foi o lo tatou lotofuatiaifo o se mea na tuuina mai, po o se meaalofa, mai le Atua. O le a le faagasologa e mafai ai ona avea le lotofu- atiaifo o le tagata e faapei o le Atua? (Vaai foi Mosaea 3:1919). E mafai faapefea e taitai ma matua ona “taitaiina ma le tonu” lotofuatiaifo o fanau ma isi “ae aua nei afaina ai le agaga o soo se tagata”? Na mafai faapefea e ou matua po o taitai ona taitaiina lou lotofuatiaifo ma le manuia i le auala sao?

• O le a le uiga o le i ai i “aao o le Atua e pei o le ele i lima o le fai ipu omea”? E mafai faapefea ona tatou naunau atu ma le atoatoa i le finagalo o le Alii ma tumau ai pea lo tatou tulaga tutoatasi?

• E faapefea ona faateleina lo tatou malosi e tetee atu ai i faaosoosoga uma pe a mafai ona tatou teenaina se faaosoosoga se tasi? Na aoao mai Peresitene Iaga e faapea o le aumaia o o tatou faanaunauga ina “ia ogatasi ma le agaga” e moomia ona “atinaeina ina ia maua ai le ola e faavavau.”

• O a “meaalofa filifilia” ia e saunia ai i tatou e le loto pulea e mauaina mai le Atua?

• Aisea e tatau ai ona tatou maua le loto pulea ao lei mafai ona tatou taitaiina isi?

• O le a sou manatu o le a le uiga o le saunoaga a Peresitene Iaga ina ua ia aoao mai e faapea “o le mea silisili ua tuuina mai e le Atua i le tagata o se faautaga lelei, logoleleia, ma mautu lea ina ia iloa ai ona pulea i tatou”? E mafai faapefea ona tatou puleaina i tatou ae o le taimi foi lava lea e tasi o loo tatou gauai atu ai i le faia na o le finagalo o le Tama?

• O a nisi o “lagona faatautee” e tatau ona tatou faatonutonuina? E mafai faapefea ona faamanuiaina i tatou i le faafilemuina o na ituaiga lagona ma uiga?

• E mafai faapefea ona tatou iloagofie le eseesega i le va o le “ita amiotonu,” e pei ona faaalia e le Faaola i le tele o taimi, ma le “ita amioleaga”? (Vaai foi 2 Nifae 1:26.)

• O a ni taunuuga o le gauai atu i o tatou lagona ita? (Vaai foi Iakopo 3:5–6.) O le a le fautuaga a Peresitene Iaga e faatatau i le faatonutonuina o le ita? E faapefea ona fesoasoani lo tatou gauai atu i le Faaola ina ia faatonutonuina ai lo tatou ita?

• E mafai faapefea ona tatou mauaina le mana e “puleaina ai o [tatou] manatu ma lagona”?

• Na faapefea ona fautuaina e Peresitene Iaga i latou e faapea mai latou te tautatala faatiga atu ina ia foia ai lo latou avea ma tagata faafiaamiotonu?

• E mafai faapefea ona tatou faatonutonuina o tatou laulaufaiva pe a faaosoosoina i tatou (1) e tau fua le suafa o le Atua, (2) fai tala e uiga i o tatou tuaoi, (3) saili sese po o le tauleagaina o uiga o se tasi (vaai foi MFF 136:23–24), po o le (4) faamaasiasi pe faalumaina se tasi o le aiga po o se uo foi? (Vaai foi MFF 52:16.)

• O le a le mea e tatau ona tatou faia pe a i ai ni o tatou lagona le lelei e uiga i isi?