Taliaina o le Togiola a Iesu Keriso

E tusa ma le togiola, sa tusia e Peresitene Iaga le mataupu lenei i se tasi o ona atalii: “Ina ia maua le faamanuiaga atoatoa o lena togiola e le iu ua faia e lo tatou Alii ma le Faaola, o loo mafai ona tatou faia —e o tatou— tumu ma le atoatoa, ae le gata i lena, e tusa ai ma lo tatou faatuatua i le tausia o a tatou feagaiga ma tautinoga e tausia poloaiga faaleatua ua tuuina mai ia i tatou” (LBY, 259). Na aoao mai Peresitene Iaga o le faamoemoe uma o le faaolataga o loo maua i le Togiola o le Faaola, o Iesu Keriso.

Aoaoga a Polika Iaga

Ua ofoina atu e Iesu Keriso i tagata le Togiola e le iu.

Otagata o le Au Paia e talitonu i le togiola o le Faaola, ma e ou te manao i Toeaiina o Isaraelu e malamalama i le mea e sili ona oo iai i mataupu uma o le tulafono e tusa ma le togiolaina o le aiga o tagata, ina ia latou iloa le auala e talanoa ai ma faamatala ai (DNSW, 18 Aug. 1874, 2).

Na afio mai Iesu e faatuina lona malo faaleagaga, poo le amataina o se faatulagaga o amioga ina ia faaolaina ai agaga o tagata i le lelei ma le Atua, ina ia mafai ai ona faamautuina ia i latou lava le toe tutu mamalu ma le avanoa e pulea ai le lalolagi pe a avea malo o lenei lalolagi ma malo o lo tatou Atua ma lona Keriso. Sa ia afio mai foi e faailoa mai o ia lava o le Faaola o le lalolagi, e faamaligi lona toto mo le togiola, ma tatala ai le ala o le ola i e talitonu uma (DNW, 13 Aug. 1862, 1).

Sa tau mai e Iosefa Samita ia i tatou o Iesu o le Keriso—o le Puluvaga i le Atua ma tagata— ma o le Togiola o le lalolagi. Sa ia tau mai ia i tatou e leai se isi lava igoa i le lagi poo lalo o le lagi, pe iai lava se isi, e mafai ai ona faaolaina tagata i le afioaga o le Tama, sei vagana le ala i le suafa ma galuega a Iesu Keriso, ma le Togiola na ia faia i le Mauga o Kalevario. Sa tau mai foi e Iosefa ia i tatou ua manaomia e le Faaola le usiusitai atoatoa i poloaiga uma, sauniga ma tulafono e faatatau i le malo, ma pe afai tatou te faia nei mea, o le a mafai ona tatou talia faamanuiaga uma ua folafolaina i lana Talalelei (DNW, 22 Oct. 1862, 1).

O le taimi e aveeseina ai le togiola a le Faaola, o lena taimi, e tasi lava, o le faamoemoe mo le faaolataga sa taofi ai le lalolagi Kerisiano ua faaleaogaina, o le faavae o lo latou faatuatua ua aveesea, ma ua leai se mea o totoe mo i latou e faamoemoe iai. Pe a mavae o faaaliga uma na tuuina atu e le Atua i nuu o Iutaia, ma tagata o nuu ese, ma i tatou ua leai so latou aoga, ma o le faamoemoe uma ua aveesea mai ia i tatou i le taimi e tasi (DBY,27).

E mafai e le fanau a le Atua ona maua le malo o le mamalu, e ala mai i le meaalofa o le Togiola, lea e na o Keriso e mafai ona tuuina mai.

E talitonu tagata o le Au Paia i le Talalelei a le Alo o le Atua, ona e moni. Latou te talitonu i le papatisoga mo le faamagaloina o agasala, a le tagata lava ia poo le papatiso e fai ma sui o se isi ua maliu; latou te talitonu o Iesu o le Faaola o le lalolagi; latou te talitonu o i latou uma lava ua maua se mamalu poo le a lava, i soo se malo, ua mafai ona maua ona ua faatauina e Iesu i lana togiola (DBY, 30).

Na tofia Iesu, mai le amataga, e maliu mo lo tatou Faaolataga, ma sa mafatia o ia i se maliu tiga i luga o le satauro (DBY, 27).

E mafai ona ou fai atu ia te outou e uiga ia Iesu ma le Togiola (ua tusia, ma ua ou talitonu iai), ua maliu Keriso mo tagata uma. Ua ia totogi atoa le aitalafu, tusa pe e te maua le meaalofa pe leai. Ae afai e faaauau pea lo tatou agasala, pepelo, gaoi, molimau pepelo, ua tatau ona tatou salamo ma tuu a tatou agasala ina ia maua le atoatoa o le toto o Keriso. A aunoa ma lenei, o le a leai se aoga; e ao ona oo mai le salamo, ina ia faamaonia ai le faamanuiaga o le togiola ia i tatou. Ia tuu nei loa le faia o mea sese e i latou uma o e o fai mea sese; aua nei toe ola i le solitulafono, tusa poo le a le ituaiga; ae ia ola i aso uma o o outou olaga e tusa ai ma faaaliga ua tuuina mai, ina ia agavaa ai a outou faataitaiga e mulimuli i ai. E ao ona tatou manatua e le mafai ona sili atu i tatou i le faatulagaga o lo tatou talitonuga – e le mafai, e le mafai! (DBY, 156–57).

O le a aumaia e Iesu i luma, i lana togiola, atalii ma afafine uma o Atamu, sei vagana ai atalii o le malaia, o le a lafoaiina i seoli … E moni o tagata uma lava e le lafoaia le alofa mutimutivale o le Atua ona o le le agasala, ma avea ma agelu a le Tiapolo, o le a aumaia i luma e maua le malo o le mamalu (DBY, 382).

O Iesu o le ulumatua o e ua oti, e pei ona o le a outou malamalama iai. E oo ia Enoka, Elia, Mose, poo se isi lava tagata sa soifua muamua mai i le fogaeleele, tusa poo le a le atoatoa o lona soifuaga, e le mafai ona maua le faaolataga sei vagana ai ua uma ona toe faatuina mai le tino o Iesu Keriso mai le tuugamau e le agelu. O ia o le ulumatua o e ua oti. O ia o le Matai o le Toetu— o le uluai tagata na soifua i le lalolagi ina ua maea ona ia maua le mamalu o le toetu (DBY, 374).

E le o se vavega lenei mea ia te ia. Sa ia te ia le tulaga o le ola poo le oti i lana pule; sa ia te ia le pule e tuuina atu ai ma le pule e toe aumai ai. O lana saunoaga lea, ma e ao ona tatou talitonu i lenei pe a fai tatou te talitonu i talafaasolopito o le Faaola ma saunoaga a Aposetolo o loo faamaumauina i le Feagaiga Fou. O Iesu sa iai le pule ia te ia lava; sa tuuina atu e le Tama ia te ia; o lana meatotino lea, ma e sa ia te ia le pule e tuuina atu ai lona soifua ma toe aumaia (DBY, 340–41).

O le Togiola a Keriso ua avanoa ai le Faamagaloga o i latou e faatuatua, salamo ma usitai i le Atua.

Sa faatagaina le pogisa ma le agasala e oo mai i lenei lalolagi. Sa ai e le tagata le fua o le laau faasaina e tusa ai ma le ata na fuafua mai le faavavau, ina ia mafai ai ona fesootai le tagata ma mataupu faavae ma le mana o le pogisa, ina ia latou iloa ai le oona ma le suamalie, le lelei ma le leaga, ma ia mafai ai ona iloa le malamalama ma le pouliuli, ina ia mafai ai ona latou maua le malamalama faifaipea (DBY, 61).

O lenei Talalelei na te faaolaina le aiga o tagata uma; o le toto o Iesu o le a faamagalo ai a tatou agasala, pe afai tatou te talia tuutuuga ua ia faia; ae ao ona tatou talia na tuutuuga aua afai e leai, o le a leai se mea e maua e i tatou (DBY, 7–8).

O le avea ai ma tagata o le Au Paia e manaomia ai le aveesea o aafiaga sese uma o ia i latou o ni tagata taitoatasi, seia vagana ua aveesea uma manaoga faatiapolo, ma o manaoga uma o o latou loto ua faatulagaina e tusa ai ma le finagalo o Keriso (DBY, 91).

E manaomia le togiola uma a Keriso, o le alofa tunoa o le Tama, o le alofa mutimutivale o agelu ma le alofa tunoa o le Alii o Iesu Keriso ia ia i tatou i taimi uma, ma ia fai le mea e sili ona tatou mafaia, ina ia aveesea lenei agasala ma i tatou, ina ia tatou sosola ese mai le lalolagi ma agai atu i le malo selesitila (DBY, 60).

Fautuaga mo Suesuega

Ua ofoina atu e Iesu Keriso i tagata le Togiola e le iu.

Aisea na afio mai ai Iesu i le lalolagi ma faatuina Lona malo faaleagaga”? E iai se isi mafuaaga na Ia afio mai ai i le lalolagi? E faapefea ona “tatala e Iesu le ala o le ola mo tagata uma e talitonu”? E faapefea ona aoaoina o tatou aiga ina ia “faaeaina o latou agaga… . i le faaleatua ma le Atua”?
E faapefea ona “faasaoina i tatou i le afioaga o le Tama” ma “talia faamanuiaga uma ua folafolaina mai i lana Talalelei”?
E tusa ai ma le saunoaga a Peresitene Iaga, o le a le mea e tupu i le lalolagi kerisiano pe a na leai le Togiola a Iesu Keriso? (Vaai 2 Nifae 9:6–9.)
Suesue mau o loo tuuina atu i lalo ina ia aoao ai i isi vaega o le Togiola: Mosaea 13:28, 32–35; Alema 7:11–12; 34:9–12; Moronae 8:8–12; MFF 88:6.

E mafai e le fanau a le Atua ona maua le malo o le mamalu, e ala mai i le meaalofa o le Togiola, lea e na o Keriso e mafai ona tuuina mai.

Sa filifilia Iesu i le muai olaga e “maliu mo le faaolataga.” Ua ia faaolaina i tatou mai le tuu eseeseina o le tino ma le agaga mai le Atua. Ua taua lenei o le Togiola. Sa taua e Peresitene Iaga o le Togiola a Keriso ua “totogi atoa ai le aitalafu, tusa pe e te maua le meaalofa pe leai.” (Vaai Helamana 14:15–18.) E faapefea ona tatou maua le faamanuiaga atoatoa mai le Togiola?
Na aoao mai Peresitene Iaga o i latou uma e maua le mamalu i soo se malo o le a faapea ona fai ona ua faatauina e Iesu i Lana Togiola. E faapefea ona Ia totogi le agasala a Atamu? Sa faapefea ona Ia totogi a tatou agasala? (Vaai 2 Nifae 2:8–10.)
Sa faapefea ona avea Iesu ma “Matai o le toetu”?

O le Togiola a Keriso ua avanoa ai le Faamagaloga o i latou e faatuatua, salamo ma usitai i le Atua.

Aisea na faatagaina ai le “pogisa ma le agasala e oo mai i le lalolagi”? O a iuga o le pau o Atamu? (Vaai 2 Nifae 2:22–25.)
O le togiola ua maua ai le faaolataga mai a tatou agasala i tuutuuga ua faataatia e lo tatou Togiola. O a ia tuutuuga? (Vaai 2 Nifae 2:26, MFF 18:44.)
O le a se fesoasoani faalelagi tatou te toomaga i ai ina ia mafai ona “sola ese mai le lalolagi ae agai atu i le malo selesitila”? O le a le mea e manaomia ona tatou faia?