Na Kaukauwa ni Veisorovaki vei Keda Yadudua

E sa noda itavi me da vakaqaqa … se cava e a rawati mai na veisorovaki.

iMatai na vakaturicake. Na itotogi ni talaidrede e na gauna nei Atama na mate; kei na mate e a soli ki na tamata kece. Na vosa ni Turaga e na gauna ko ya, “Ni ko na mate vakaidina e na siga ko sa kana kina.” [Vakatekivu 2:17; raica talega Mosese 3:17.] Na veisorovaki ka a vakavuna ko Jisu Karisito a vu mai kina na vakaturicake mai na mate, ka vakalesuya mai na bula. E a mani kaya kina ko Jisu: “O ki au na vu ni tucaketale, kei na vunibula: ko koya sa vakabauti au, kevaka sa mate e na bula ga;” [Joni 11:25] ia o Jisu Vakaikoya a yaco me imatai vei ira me a vakaturicaketale.

Na taro ka tarava, e yaco sara ki vei na ivakavuvuli oqo kei cei e na tarai koya? E na yaco ki na kawatamata taucoko; i na tamata kece e vuravura raraba.⁴

Na tamata kece e na duricake mai na ibulubulu, e na dua na gauna se dua tale, e na yago ga era a tawana e na bula e vuravura. E na vaka ga a vakamacalataka o Isikeli—ka ra dui veitorovi na sui ki na kena isa, na lewe kei na ua e na ubia na sui, kei mai na ivakaro ni Turaga na icegu e na curu ki na yago, eda na qai kune, e vuqa vei keda, eda kurabui vakaikeda [Isikeli 37:1–14].

Au rogoca ni tukuna o Josefa Simici, ni a tara tiko e dua na ibulubulu e Nauvoo, ni nanuma, e na gauna ni vakaturicake, o koya e na duricake ka mokota na tamana kei na tinana, ka lululu kei ira na nona itokani. E na nona itukutuku volai ni gauna e sa na mate kina, me so na itokani loloma me ra buluti koya volekata na nona itokani dredre duadua, e baleta ni gauna era na vakaturicake kina e na mataka ni imatai ni vakaturicake, o koya e na mokoti ira ka kaya, “I tamaqu! I nau!”

Oqo e veivakacegui vei ira na colata na vakalolokutaki ni nodra mate na itokani dredre, ni kilai ni da na sota vata tale kei ira! E veivakauqeti vei ira kece era bula ka vakamuria na ivakavuvuli dina ka sa vakaraitaki, e rawa ni vakabibitaki sara vei ira era sa vo- leka ni yacova na icavacava ni nodra ilakolako, ka ra a rarawa vakadede ka vosota me yacova na kena tinitini, ni ra kila ni sa voleka na vakaturicake, ka basika mai na bula vakatukatuka, ka bula vata kei ira era itokani vakadinati, ni sa oti na rarawa ni mate, ka da vakaotia na ilesilesi ka a solia vei keda na Tamada!⁵

E na ituvatuva ni Kalou na tamata me na lutu, ia ni sa lutu oti me qai rawata na kilaka e vakaduiduitaka na vinaka mai na ca, (na kila o ya e sega ni rawa ni rawata kevaka a sega na lutu), ni oti o ya e sa dodonu me kila na veika e baleta na veisorovaki kei na turicake ka rawa walega mai na veisemati vata kei Jisu Karisito.⁶

E na sala kei na ituvatuva cava e yaga kina vua na tamata na veisorovaki kei na turicake? Na veisorovaki e vakasuka na tamata ki na nona itutu taumada e mata ni Turaga, e sa biuti koya e na dua na itutu ka rawa kina vua me taura na bula vakalou kei na lagilagi ko ya na itagede a sega ni rawa me yacova kevaka e a sega na veisorovaki; ko ya me wili me luve ni Kalou vakacabecabe; ni sa luve na sa rawa talega me na taukena na veika ni Kalou, ka rawa me wili me taukena vata kei Jisu Karisito [raica Roma 8:16–17]; me vaka, ni a rawata na Karisito, e sa vakavuna o Koya me rawa, ka sa vakarawarawataka kina vei ira na vakabauti Koya, mera rawata; ni sa soli Vua na lewa me taukena na lagilagi ni Tamana ka a sa tu mada ga Vua ni a bera na vuravura oqo, vata kei na yagona vakaturicake, me rawa kina vei keda mai na ilesilesi vakacabecabe, meda rawata ka cewa vata kei Koya e na Nona idabedabe vakatui, me vaka a sa vakaraitaka ko Koya e na Nona cewa e na idabedabe vakatui nei Tamana. …

… E tekivu mai na Nona veisorovaki, ko ira era vakabauti Karisito, kei ira era talairawarawa ki na nona lawa, ka ciqoma na Nona lagilagi kei na Nona itutu vakalou, era na taukena na Lewetolu Vakalou; ia ko ira era talaidredre ki na Nona lawa e dina era na vakaturicake era na sega ni taukena na itutu vakalou; era vakaduri mai na mate, ia era na sega ni taukena na lagilagi selesitieli ni ra sega ni talairawarawa ki na lawa selesitieli. … E a kaya o Jisu, “Sa volai vakaoqo, ni sa kilikili kei koya na Karisito me vosota vakakina, me tucake talega mai na mate e na ikatolu ni siga; me vunautaki talega na veivutuni kei na vakabokoci ni ivalavala ca, e na vuku ni yacana, vei ira na lewe ni veivanua kecega, me vakatekivu e Jerusalemi.” [Luke 24:46–47.]⁷

E a kaya o Koya Vakaikoya na Dauveivueti vei ira na nona tisaipeli, ni a se bula e vuravura…, “Laivi ira na gonelalai mera lako mai vei au, kakua ni tarovi ira; ni sa vakataki ira na lewe ni matanitu ni Kalou. Au sa kaya vakaidina vei kemudou, O koya e na sega ni vakabauta na matanitu ni Kalou me vaka na gonelalai, e na sega sara ni curu kina.” [Luke 18:16–17.] Ni oti na Nona vakamatei e na kauveilatai kei na vakaturicake e a vakaruataka na nona veivakadodonutaki vei ira na Nona tisaipeli Nifaiti: “Ia au sa kaya vei kemudou, mo dou veivutuni ka papitaisotaki e na yacaqu me vaka na gonelalai; ia kevaka e sega, dou na sega ni rawata na matanitu ni Kalou.” [3 Nifai 11: 38.]

Kevaka e a sega na talaidredre nei Atama o ira na gonelalai era na sega ni a bula rawa; mai na veisorovaki era sa yalataki i na itutu ni veivakabulai ka sega ni ra cakacakataka. Era wili eke na gonelalai, mai na ivakasala ni so na kena daunifika, e sivia vakalailai na veimama ni lewe ni matavuvale ni kawatamata, ka ra rawa ni rawata na nodra vakabulai mai na veivakasalataki kei na veisorovaki ni iVakabula. O koya gona me vaka e tukuni e na dua tale na tabana, e na ivakaraitaki e veivakurabuitaki ka sega ni rawa ni vakamacalataki, a cola ko Jisu na ilesilesi ka a dodonu me itavi nei Atama; ia e a rawa wale sara ga e na Nona dauniveivakasalataki o Koya Vakaikoya, e na Nona a taura Vakaikoya na rarawa, colata na ilesilesi ka dreketa na nodra talaidredre se ivalavala ca.

E a colata o Koya na icolacola bibi kece ni ivalavala ca ni vuravura taucoko, e na itavi ka sega ni vakasamataki se vakamacalataki rawa; sega walega ni cala nei Atama, kei ira na nona kawa; ia ni a cakava o ya e a dolava na matanitu vakalomalagi, sega walega vei ira era vakabauta kei ira na talairawarawa i na lawa ni Kalou, ia ki na sivia na veimama ni lewe ni kawatamata ka ra a mate ni bera ni yacova na yabaki ni bula ni kila vakaikoya, ka vaka kina vei ira na tawa lotu, ka ra a mate ni ra sega ni kila na lawa, e yaco vei ira mai na vuku ni Nona veivakasalataki, era na turicake e na taudaku ni lawa, ka ra lewai e na taudaku ni lawa, ka ra na vakaitavi, ka vakatau mai na nodra dui rawaka, e na cakacaka kei na nodra kilikili, e na veivakalougatataki ni Nona veisorovaki.⁸

E a nakiti, e na nona gauna e vuravura na iVakabula, me a temaki e na veika kece sara me vakataki keda, ka rawa kina me “lomani keda e na noda malumalumu,” [Iperiu 4:15] ni sa kila na noda ivakatagedegede ni malumalumu kei na kaukauwa, na yasada cecere sara kei na kena veibasai na malumalumu. Ia ni sa mai vakaotia rawa na nona ilesilesi na nona itavi me mai vakayacora e vuravura, e na nona a sotava na sasaga dredre e kune kina na veidabui; lasulasu, malumalumu, yalowai ni tamata; ni a sotava na veitemaki kei na lomaocaoca e na kena veivakaraitaki kece sara, ka rawata vakavinaka; e a sa yaco me “bete levu yalo dina” [Iperiu 2:17] me noda daunivakasala e na matanitu tawamudu ni Tamana.

E kila vinaka o Koya na ivakarau ni tamata vakayago, ni a sa mai bula vakatamata, e kila na noda malumalumu kei na veika ni veivakaleqai eda dau sota, ka kila vinaka na kena raba kei na titobu, na bibi, kei na cere ni veivakatovolei kei na veitameki ni tamata e sotava e na bula oqo.⁹

Ni da sa kunea na veivakalougatataki lelevu, veivakadonui, kaukauwa kei na bula vakalou ka sa vakaraitaki vua na tamata, e rawa mai na veisorovaki i Jisu Karisito, e sa noda itavi me da vakatataro se cava e vinakati vua na tamata me rawa kina me taukena. …

Na lalawa e vinakati i na matavuvale ni kawatamata me rawata kina na inakinaki cecere ka yalataka na veisorovaki, na: iMatai, Vakabauta na Kalou ni Tamada ka Tui Cecere Duadua ni vuravura kei lomalagi; e tu e ligana na icavavaca ni matavuvale ni ka- watamata; ni da sa bula vei koya, ka yavala, ka rawata mai vua na noda bula. Kei na Luvena o Jisu Karisito, ni a Lami ka a vakamatei ni a bera ni tauyavu na vuravura, ka a Dauveivakasalataki levu ka solibula tabu e na veisorovaki ni a solia vaka kina na Tamana ni bera na veibuli ni vuravura, ka vakacerecerei e na nona a soli Koya e na kauveilatai. Ni sa volai “Ni sa lomani ira na kai vuravura vaka oqo na Kalou, me solia kina na Luvena e dua bau ga sa vakatubura, me kakua ni rusa ko ira yadua era sa vakabauti koya me ra rawata ga na bula tawamudu.” [Joni 3:16.] Se, me vaka e vosa kina na tui ni Nifaiti o Penijamini:

“Mo ni vakabauta na Kalou; mo ni vakabauta ni sa bula tiko ka sa bulia na ka kece ga mai lomalagi kei vuravura; mo ni vakabauta ni sa nona kece na lewa kei na kaukauwa mai lomalagi kei vuravura; mo ni vakabauta ni sa sega ni kila rawa na tamata na ka sa kila na Turaga.” [Mosaia 4:9.]

Se me vaka e vola o Paula; “O koya sa torova na Kalou e dodonu me vakabauta ni sa bula ko koya, ni sa saumi ira talega era sa dauvakasaqarai koya.” [Iperiu 11:6.]

Na veivutuni e ikarua ni ivakavuvuli ni Kosipeli ni veivakabulai. Oqo na rarawa vakalou vakaidina ni veikaliraki mai na ivalavala ca, ka salavata kei na yalodina me talairawarawa i na ivunau ni Kalou. Me vaka e vola na Parofita o Aisea: “Me biuta mada na nona itovo na tamata ca, kei na nona vakanananu na tamata daucaka cala; ka me lesu mai ko koya vei Jiova, e na yalololoma vua, io vei koya na noda Kalou, ni sa gugumatua ni [veivosoti].” [Aisea 55:7.] Ka me ia na vosacavu mai Na iVola i Momani:

“Mo ni vakabauta ni sa dodonu mo ni veivutunitaka na nomuni ivalavala ca ka biuta tani sara, ka vakamalumalutaki kemuni e na mata ni Kalou; mo ni kerea e na yalodina me vosoti kemuni; ia kevaka ko ni sa vakabauta na veika kece oqo, mo ni vakayacora sara vakakina.” [Mosaia 4:10.]

Na kena ikatolu, Papitaiso me bokoci na ivalavala ca, kei na noda itovo malumalumu vakaikeda, e bokoci vakadua e na sala oqo, ka soli mai e na loloma tabu, ka vu mai na veisorovaki. Ni vakayagataki eke na vosa nei Paula: “O koya eda sa bulu vata kaya kina, ni da sa papitaisotaki ki na nona mate: me vaka sa vakaturicake tale mai na mate na Karisito e na kaukauwa ni Tamana, me da sa ivalavala vaka talega kina e na bula vou. Ia kevaka eda sa duavata me da vakataki koya e na nona mate, eda sa vakataki koya talega e na nona tucake mai na mate.” [Roma 6:4–5.]

E tarava, na ciqomi ni Yalo Tabu e na veitabaki mai vei ira era sa taura na Matabete Tabu, ka ra sa vakadonui, tabaki, ka soli vei ira na kaukauwa me ra solia na veivakalougatataki: Me vaka a vunautaka o Pita e na siga ni Penitiko:

“Dou veivutuni, ka papitaisotaki ko i kemudou yadua, e na yaca i Jisu Karisoto, me bokoci kina na nomudou ivalavala ca, ka dou na rawata na Yalo Tabu me isolisoli. Ni sa caka vei kemudou na vosa ni yalayala, vei ira talega na nomudou gone, kei ira vakayadua era sa vakayawa, io vei ira vakayadua ga e na kacivi ira vua na Turaga na noda Kalou.” [Cakacaka 2:38–39.]

Oqo na tekitekivu se imatai ni veivakavuvuli ni Kosipeli tawamudu ka sega ni veisau ni noda Turaga ka iVakabula o Jisu Karisito, o koya o ya ka sega ni veisau I na tamata kece ga, na veimatanitu, e na veitaba gauna kece sara, e na veigauna, se veivanua e sa vakavulici kina mai na lewa mai lomalagi. E vuna eda wilika: E a “vunautaki … mai na itekitekivu; raica sa vunautaka ko Koya kei ira na nona agilosi yalosavasava sa talai ira mai na Kalou, ka sa vakatakilai talega e na isolisoli ni Yalo Tabu. A sa vakadeitaki kina na lawa sa soli vei Atama; io ni na vunautaki na itukutuku vinaka ka kacivaki yani ki na veivanua me yacova na iyalayala kei vuravura; a sa yaco vakakina.” [Raica Mosese 6:58–59.]¹⁰

Na isoro, ka ra a vakacabori me tekivu mai na gauna nei Atama …, era a [ivakaraitaki] ni isoro bibi ka me a vakacabora o Koya e na nona soli Koya Vakaikoya. E a levu na kena ivakaraitaki, ivakatakarakara kei na kena ituvatuva ka a kena itekivu o Koya—na ibalebale dina, na kena dina ka vakaraitaki e na veisoro ka ra vakacabori mai na itekivu ni soli isoro era ivakatakarakara. …

Ni bera ni a soli Koya Vakaikoya, e na veisorovaki cecere, ni a talairawarawa i na lawa ka nakita me vakarokorokotaki, ni a sa solia oti na Kosipeli, e a sotavata kei iratou na Nona tisaipeli … e na Kana ni Lakosivia. E a tukuna vei iratou, “Au gadreva vakalevu me’u ia mada e liu kei kemudou na kana vata ni lakosivia oqo, me’u qai mate e muri.” [Luke 22:15.] Me kania na cava kei kemuni? Na kana ni lakosivia. Me kania na cava kei kemuni? Na Sakaramede ni Vakayakavi ni Turaga. … Na soqo ruarua e baleti Koya, o Koya na ivakaraitaki bula ni soqo ruarua, o Koya na iSoro ka a soli ni bera me buli na vuravura, ka ra parofisaitaka na tamata e na veitabagauna kece mai liu; e na vukuna talega era vakacabori kina na veiisoro kece a sa dau vakacabori mai vei ira na italai ni Turaga, mai na lutu nei Atama me yacova na Nona gauna; kei na veiisoro kece e vakacabori me tekivu oqo ka lako yani era dusi kece ga Vua, era a caka kece me baleti Koya ka vaqara kece Vua. E na dua tale na yasana, o Koya a tekivuna na lawa cecere duadua, e na soli Koya Vakaikoya vakadua e na veisorovaki tawayalani, me baleta kece na tamata, o Koya, e na isoro oqo, a vakaotia kina na ilesilesi ka a nakita na Kalou Cecere ni a bera na buli ni vuravura, ka ra a kena ivakatakarakara na dra ni pulumakau, ni me kei na lami.

Ni a kila na veika e sa vakarau me yaco, e a tauyavutaka sara na sakaramede ni iVakayakavi ni Turaga me ivakananumi ni veivueti cecekia ka idusidusi talei. E na teveli ni kana, “A sa taura na madrai, ka vakavinavinaka, ka dovia, ka solia vei ira, ka kaya, Oqo na yagoqu sa soli e na vukumudou; dou cakava oqo mo dou vakananumi au kina;” [Luke 22;19.] ni oti, “Sa qai taura na bilo ko koya, ia ni sa vakavinavinaka oti, sa solia vei ira, ka kaya, Dou gunu kece kina; Oqo na noqu dra ni veiyalayalati vou sa liviraki e na vukudra e lewe vuqa, me bokoci na ivalavala ca.” [Maciu 26:27–28.] …

Mai na ivakatekivu ni vuravura i na gauna a tauyavu kina na Kanavata ni Lakosivia, na vakacabo isoro e a tauyu me ivakananumi se ivakaraitaki ni sorovaki ni Luve ni Kalou; ia mai na gauna ni Kanavata ni Lakosivia me yacova na gauna e a soli Koya kina Vakaikoya, na veiisoro kece oqori era ivakaraitaki ka ra a vakamurimuria na Parofita kei ira na Peteriaki; me vaka na ivakaro ka a soli vei Mosese kei ira tale na tisaipeli ni Turaga. E a vakatalega kina o Koya Vakaikoya e na nona vakamuria na veiira vakaro oqo, ka dauvakayagataka na Kana ni Lakosivia me vaka era kitaka na kena vo; e vaka kina o keda edaidai, ni sa oti na cabo isoro ce- cere duadua, ni da vakananuma e na noda vakayagataka na Sakaramede ni iVakayakavi ni Turaga. Oqo gona na isema bibi e baleta na gauna makawa kei na gauna e se bera mai; o Koya e sa vakacavara na lawa, walia na inaki ni ituvatuva dodonu; ka talairawarawa ki na ivakaro ni Tamana Vakalomalagi.¹¹