Te Mana o te Taraehara no Tatou

Tei ia tatou te imiraa i teie nei … eaha tei ravehia e te taraehara.

A tahi, te Ti‘a-faahouraa. Te faautuaraa no te ture tei ofatihia i te tau o Adamu o te pohe ïa; i reira to te pohe taeraa i ni‘a i te mau taata atoa. Teie te parau a te Fatu, “I te mahana e amu ai oe i te reira, e pohe mau â oe.” [Genese 2:17; a hi‘o atoa Mose 3:17]. Na te taraehara ta Iesu Mesia i rave i hopoi mai i te ti‘a-faahouraa mai te pohe mai, e ua faaho‘i faahou mai i te ora. No reira Iesu i parau ai e: “Tei ia‘u te ti‘a-faahouraa e te ora, o te faaroo mai ia‘u ra, pohe noâ oia e ora â ïa;” [Ioane 11:25] e ua riro mai Iesu iho ei matamua no te feia tei mairi i te ta‘otora.

Te uiraa i muri iho, teie ïa, eaha te aanoraa o teie nei parau, e no vai ho‘i teie nei parau? No te mau fetii taata atoa ïa, e no te mau taata atoa i roto i te mau nunaa atoa.⁴

E hope paatoa te taata i te haere mai i rapae i te menema, i tera taime e tera taime, i roto i te tino tei mauhia na e ratou a ora ai ratou i ni‘a i te fenua nei. E au ïa mai ta Ezekiela i faaite ra—e haafatata mai te mau ivi, te tahi ivi e to’na ti‘aatiraa, e tapo‘i te i‘o e te uaua i te tino ivi, e i roto i te faaueraa a te Fatu, e tomo te aho i roto i te tino, e i reira tatou e ti‘a mai ai, e rave rahi o tatou, ma te maere ia tatou iho [a hi‘o Ezekiela 37:1–14].

I te hoê taime te ô ra Iosepha Semita i te hoê apoo hunaraa i Nauvoo, ua faaroo vau ia’na i te parauraa e, ia tae i te taime e ti‘a-faahou mai ai te taata mai te pohe mai, e hinaaro oia e ti‘a mai e ia apa i to’na metua tane e to’na metua vahine, e ia aroha rima i to’na mau hoa. Ua papa‘i oia e, ia pohe noa’tu oia, e ite te tahi mau hoa maitai no’na e, ua tanuhia oia i pihaiiho i to’na mau hoa rarahi roa, e ia ti‘a-faahou mai ho‘i oia e ratou atoa ra i te po‘ipo‘i no te ti‘a-faahouraa matamua, ia nehenehe ia’na ia apa ia ratou, ma te parau e, “Papa! Mama!”

Aue te hau i roto i te feia tei oto i to ratou mau hoa tei reva i te pohe, ia ite e, e farerei faahou â tatou ia ratou! Aue te au no te feia atoa e haapa‘o i te mau parau tumu o te parau mau i heheuhia mai, e hau roa’tu no te feia tei fatata te oraraa i te hope, tei faaoromai maite e tae roa’tu i te hopea, ia ite e, eita e maoro roa e vavahi tatou i te paruru o te menema, a ti‘a mai ai ei mau varua ora e te tahuti ore, no te parahi ma te oaoa i rotopu i to tatou mau hoa papu e te ti‘aturihia, ma te ore e pohe faahou, e no te faaoti i te ohipa ta te Metua i faaue mai ia tatou ia rave!⁵

Te faanahoraa a te Atua no te taata nei maori râ, ia hi‘a oia e ti‘ai, e ia hi‘a oia e ia ite i te maitai e te ino, (inaha, eita taua iteraa ra e noaa noa ia’na mai te mea e, aita oia iho e tuu ia’na i roto i taua ti‘araa ra), i reira e titauhia ai ia’na ia ite i te parau no te taraehara e te faaoraraa o te horo‘ahia mai na roto i te arairaa a Iesu Mesia.⁶

Nahea, e eaha te rave‘a e ti‘a ai i te taata ia fana‘o i te taraehara e te ti‘a-faahouraa? Teie ïa, i te mea ho‘i e, ua faaho‘i faahou te taraehara i te taata i to’na ra huru mau i mua i te Fatu, ua ti‘a ïa ia’na ia farii i te faateiteiraa e te hanahana o te ore roa ho‘i e roaa ia’na ahiri e, aita taua taraehara ra; e ia riro atoa ei tamaiti na te Atua na roto i te faatavairaa; e tamaiti ra, e taata tuhaa atoa ïa i te Atua ra, e e taata tuhaa e Iesu Mesia [a hi‘o Roma 8:16–17]; i te mea atoa ho‘i e, ua upooti‘a te Mesia, ua faati‘a atoa ïa oia i te feia tei ti‘aturi Ia’na e ua tuu i te puai i roto ia ratou, ia upooti‘a atoa; e no te mea, na roto i To’na tino tahuti ua faati‘ahia Ia’na ia farii i te hanahana o To’na ra Metua tei vai na ho‘i i roto Ia’na hou a hamanihia ai te ao nei, no reira, na roto i te faatavairaa, e upooti‘a atoa tatou e e parahi ho‘i i pihaiiho Ia’na i ni‘a i To’na ra terono, mai Ta’na i upooti‘a ra e ua parahi i ni‘a i te terono o To’na ra Metua. …

… Na roto i Ta’na taraehara, te feia tei ti‘aturi i te Mesia, e tei haapa‘o i Ta’na ture, e farii ïa ratou i To’na hanahana e te faateiteiraa, e e feia tuhaa ratou i te Atua; area te feia te ore e haapa‘o i Ta’na ture, ti‘a noâ ratou, e ore ïa e roaa ia ratou teie faateiteiraa; e faati‘ahia ratou mai te pohe mai, eita râ e roaa ia ratou te basileia tiretiera ma te ore e haapa‘o i te ture tiretiera. … Na o atura Iesu, “I na reirahia taua parau ra i te papa‘i, e ia na reirahia to te Mesia pohe e ti‘a‘i, e ia ti‘a faahou mai te pohe mai i te rui toru ra: e ia poro-haere-hia te tatarahapa e te faaoreraa i te hara i to’na ra i‘oa, na Ierusalema’tu nei â, e ati noa‘e te mau fenua atoa e ti‘a‘i.” [Luka 24:46–47].⁷

Na te Faaora iho i parau atu i Ta’na ra mau pipi, a ora ai Oia i te tino nei …, “E tuu mai i te tamarii rii ia haere noa mai na ia‘u nei, eiaha e faaorehia’tu: mai ia ratou atoa ho‘i to te basileia o te Atua. Oia mau ta‘u e parau atu ia outou nei, o te ore e farii i te basileia o te Atua ma te tamaiti iti ra, e ore roa’tu ïa e ô i roto.” [Luka 18:16–17] I muri a‘e i To’na faatatauroraahia e To’na ti‘a-faahou-raa mai, ua faahiti faahou â oia i teie nei haapiiraa i Ta’na ra mau pipi no te Ati Nephi: “E parau faahou atu vau ia outou, ia tatarahapa outou e ia bapetizohia i to‘u ra i‘oa, e ia faariro ia outou iho mai te tamarii rii ra e ti‘a‘i; e aore ïa, e ore outou e ô i te basileia o te Atua ra.” [3 Nephi 11:38].

Ahiri aita te hara a Adamu, aita atoa ïa e tamarii; na roto i te taraehara ua roaa te ora i te tamarii rii ma te ore ratou e rave noa a‘e i te hoê mea. Ia au i te feia matutu, ua hau atu i te afaraa o te fetii taata nei i roto i te reira faito matahiti, tei roaa ho‘i to ratou ora na roto noa i te arairaa e te taraehara a te Faaora. No reira, mai tei faahitihia i roto i te tahi mau parau huru taa‘e e te taa ore atoa, ua amo Iesu i te hopoi‘a a Adamu; tera râ, na roto ana‘e i Ta’na arairaa e tupu ai te reira, e na roto atoa i te raveraa i ni‘a Ia’na iho i to ratou mauiui, ma te amo i ta ratou mau hopoi‘a, e ma te hopoi ê i ta ratou mau ofatiraa ture e aore râ, ta ratou mau hara.

Aita tatou i taa e, mai te aha râ te huru, tera râ, ua amo oia i te teimaha o te hara a to te ao atoa nei; eiaha ta Adamu ana‘e ra, ta to’na atoa râ hua‘ai, e no to’na na reiraraa, ua matara te basileia o te ao, eiaha no te feia faaroo ana‘e e tei haapa‘o i te ture a te Atua, no te mau fetii taata atoa râ tei pohe hou to ratou paariraa, ua hau atu ratou i te afaraa, e no te mau etene atoa, i te mea e, ua pohe ratou ma te ture ore, e ti‘a-faahou mai ïa ratou ma te ture ore, na roto i Ta’na arairaa, e e haavahia ratou ma te ture ore, e e farii ho‘i i te mau haamaitairaa o te taraehara, ia au i to ratou ite, te ohipa tei ravehia e ratou, e to ratou haapa‘o.⁸

A ora ai te Faaora i ni‘a i te fenua nei, e mea titauhia ia faahemahia oia i roto i te mau mea atoa, mai ia tatou atoa nei, e ia “aroha mai oia ia tatou i to tatou mau paruparu nei,” [Hebera 4:15] i reira oia e haro‘aro‘a ai i te ino e te puai, te maitai roa e te maitai ore roa o te huru veve e te hi‘a o te taata nei. E ia oti te ohipa ta’na i haere mai e rave i te ao nei; e to’na aroraa i te haavarevare, te taviri, te ino, e te maamaa o te taata; e to’na ûraa i te faahema e te tamataraa e rave rau te huru, e ua upooti‘a râ oia; ua riro oia ei “tahu‘a rahi parau mau” [Hebera 2:17] ei ti‘a no tatou i roto i te basileia mure ore o to’na Metua.

Ua ite oia e nahea ia faaau e ia tuu i te faufaa tano i ni‘a i te huru o te taata, e no te mea e, ua ti‘a na oia i roto i teie huru to tatou nei, ua ite ïa oia e, nahea ia amo i to tatou mau ino e to tatou mau paruparu, e e taa hope roa ia’na te hohonu, te mana e te puai o te ati e te mau tamataraa ta te taata e farerei nei i roto i teie nei ao. E no reira, e hopoi ê oia i te reira ma te maramarama e te ite papu.⁹

No teie mau haamaitairaa rarahi, te mau fana‘oraa, e te mau mana e te mau faateiteiraa te ti‘a i te taata nei ia farii, na roto i te taraehara o Iesu Mesia, tei ia tatou ïa i teie nei te imiraa i te mea i titauhia i te taata ia rave e noaa ai ia’na te reira mau mea. …

Teie te mau mea i titauhia i te fetii taata nei ia rave e roaa ai ia ratou te faateiteiraa rahi na roto i te taraehara: A tahi, te Faaroo i te Atua to tatou Metua e te Faatere Hope rahi o te ao nei; tei roto ho‘i i to’na na rima te haere‘a o te fetii taata nei, no’na ho‘i to tatou ora, e i hahaere ai, e i parahi ai ho‘i. Te faaroo atoa i Ta’na Tamaiti ia Iesu Mesia, te Arenio taparahihia hou te faatumuraahia o teie nei ao, te Araivaovao rahi e te tusia taraehara rahi tei horo‘ahia mai e te Metua hou te hamaniraahia te fenua nei, e te faariro-raa-hia ei mea maitai roa na roto i te pûpûraa Oia Ia’na iho i ni‘a i te tatauro. No te mea, “I aroha mai te Atua i to te ao, e ua tae roa i te horo‘a mai i ta’na Tamaiti fanau tahi, ia ore ia pohe te faaroo ia’na, ia roaa râ te ora mure ore.” [Ioane 3:16] E aore râ, ia au i te parau a te Arii o te Ati Nephi o Beniamina:

“A faaroo i te Atua; a faaroo e, te vai ra oia, e na’na iho i hamani i te mau mea atoa ra, tei te ra‘i e te ao atoa ho‘i; a faaroo e, tei ia’na te paari hope, e te mana atoa i te ao nei, e i te ra‘i atoa ho‘i; a faaroo e, aita e ti‘a i te taata ia haro‘aro‘a i te mau mea mai ta te Atua e haro‘aro‘a ra.” [Mosia 4:9].

E aore râ, mai ta Paulo i papa‘i ra; “O te haamori i te Atua ra, e faaroo oia e, e Atua, e ti‘a‘i, e o oia te faautua i te feia i imi papu ia’na ra.” [Hebera 11:6].

Te piti o te parau tumu o te Evanelia o te faaoraraa, o te tatarahapa ïa. O te oto papu ïa e tei au ho‘i i te Atua, e te faaru‘eraa i te hara, apitihia i te aau opua mau i te haapa‘o i te mau faaueraa a te Atua. Mai tei papa‘ihia e te Peropheta Isaia: “E faaru‘e te paieti ore i to’na haere‘a, e te taata parau-ti‘a ore i to’na mana‘o: a ho‘i ai oia ia Iehova, e na’na oia e aroha mai; e ho‘i i to tatou Atua, te rahi ra ho‘i ia’na te faaore i te hara.” [Isaia 55:7] E te na o ra i roto i te Buka a Moromona:

“E tena na, a faaroo outou e, ia tatarahapa outou i ta outou mau hara e ti‘a‘i, e ia haapae i te reira, e ia faahaehaa ia outou iho i mua i te Atua ra; a ani ai ma te aau tae ia faaorehia ta outou e ana ra; e tena na, te faaroo na outou i taua mau mea ra, e haapa‘o ïa outou” [Mosia 4:10].

Te toru, o te Bapetizoraa ïa ia matara te hara no ta tatou iho mau ohipa ino, o te paraihia ho‘i na roto i teie rave‘a ta te aroha i pûpû mai na roto i te taraehara. Ia au i te mau parau a Paulo: “E teie nei, ua tanuhia tatou e oia atoa, i te bapetizoraahia i roto i to’na ra pohe; mai te Mesia i faati‘ahia e te mana o te Metua i te poheraa ra, ia haapa‘o atoa tatou i te haere‘a e au i te ora apî. I apiti- atoa-hia ho‘i tatou ia’na i te huru o to’na ra pohe, e apiti-atoa-hia ïa tatou i te huru o to’na ra ti‘a- faahouraa i ni‘a.” [Roma 6:4–5].

Next, the reception of the Holy Ghost through the laying on of hands of those who have received I muri iho, te fariiraa ïa i te Varua Maitai na roto i te tuuraa rima o te feia tei horo‘ahia te Autahu‘araa Mo‘a ia ratou, tei faati‘a-mau-hia, tei faatoro‘ahia, e tei horo‘ahia te mana ia ratou no te horo‘a i teie haamaitairaa. I haapii ai Petero i te mahana Penetetote e:

“E tatarahapa, e ia bapetizohia outou atoa i roto i te i‘oa o Iesu Mesia ia matara te hara, e horo‘ahia mai ïa te Varua Maitai ia outou. No outou ho‘i tei parauhia maira, e no to outou tamarii, e no te feia atoa ho‘i i te atea ê ra, ta te Fatu ta to tatou Atua e parau atu.” [Ohipa 2:38– 39].

Teie ïa te mau parau tumu omuaraa e aore râ, te mau parau tumu matamua o te Evanelia mure ore e te tauiui ore a to tatou Fatu e to tatou Faaora o Iesu Mesia, tei horo‘ahia i te taata atoa, i roto i te mau nunaa atoa, i te mau u‘i atoa, i te mau taime atoa, e aore râ, i te mau vahi atoa i haapiihia ai te reira na roto i te mana o te ra‘i ra. I tai‘o ai tatou e: “E o te haamataraa ïa o te pororaa o te Evanelia mai te matamua mai, o tei faaitehia e te mau melahi mo‘a i tonohia no ô mai i te aro o te Atua, e i faaite-atoahia e to’na iho reo, e na roto ho‘i i te horo‘araa a te Varua Maitai. E inaha, ua haamauhia te mau mea atoa ia Adamu, na roto i te oro‘a mo‘a, ua porohia te evanelia, e ua tuuhia’tu te ture ia vai te reira i roto i te ao nei e tae noa’tu i to’na ra hopea: e oia mau atura.” [A hi‘o Mose 5:58–59].¹⁰

Ua riro te mau tusia tei pûpûhia mai te anotau mai o Adamu …, ei [mono] no te tusia taraehara rahi tei titauhia Ia’na ia rave na roto i te pûpûraa Ia’na iho ei tusia. E rave rahi te mau taipe, te mau tapa‘o e te mau hoho‘a tei faahoho‘ahia i ni‘a i To’na hoho‘a tumu—te ora, e mau tapa‘o ana‘e ïa no To’na faatusiaraa. …

Area râ, hou to’na pûpûraa Ia’na iho ei tusia taraehara rahi, i muri a‘e i to’na faati‘araa e te faaturaraa i te ture, e to’na faaiteraa i te Evanelia, ua putuputu a‘era oia e Ta’na ra mau pipi … no te amu i te Pasa. Na o atura oia ia ratou, “Hinaaro rahi roa to‘u i te amu i teie nei pasa, o vau e outou atoa, a pohe atu ai au.” [Luka 22:15]. Ia amu e o outou i te aha? I te Pasa. Ia amu e o outou i te aha? I te Oro‘a mo‘a o te amuraa maa a te Fatu. … Ua faatumuhia teie na oro‘a i ni‘a Ia’na, No’na teie na oro‘a, o Oia tei horo‘ahia mai hou te faatumuraahia teie nei ao, e ta te feia no te Atua i tohu i tahito ra; e no’na atoa i pûpû ai te mau tavini o te Fatu i te mau tusia mai te anotau o te hi‘araa o Adamu e tae roa mai i teie tau; e te mau huru tusia atoa tei pûpûhia e tae roa mai i teie nei, ua te‘ahia ïa i ni‘a ia’na, no’na i ravehia ai te reira e ua hope paatoa i te faatumuhia i ni‘a Ia’na. Taa‘e noa’tu te reira, Na’na i tuu mai i te ture tei hau roa i te maitai, e na roto i To’na pûpûraa Ia’na iho no te mau taata atoa, oia te hoê taraehara faito ore, ua faatupu oia, na roto i teie tusia, i te ohipa i opuahia e te Manahope hou te faatumuraahia teie nei ao, ua riro te toto o te mau puaatoro, to te mau puaaniho e to te mau arenio ra, ei tapa‘o noa no te reira tusia.

No te ohipa e fatata ra i te tupu i haamau ai Oia i te oro‘a mo‘a no te amuraa maa a te Fatu ei haamana‘oraa i taua ohipa faaoraraa teitei rahi ra. I ni‘a i te amuraa maa, “Ua rave ihora oia i te pane, haamaitai atura i te Atua, vavahi ihora, tuu atura ia ratou ra, na ô atura, o ta‘u tino teie e horo‘ahia na outou nei, e na reira outou ei mana‘oraa ia‘u;” [Luka 22:19] e i muri iho, “Ua rave ihora oia i te au‘a, haamaitai atura i te Atua, tuu atura ia ratou ra, na ô atura, A inu outou atoa; o to‘u ïa toto, e toto no te faufaa apî, i haamaniihia no te taata e rave rahi ia matara te hara.” [Mataio 26:27–28]. …

Mai te haamataraa mai o teie nei ao e tae roa mai i te tau a haamauhia ai te oro‘a Pasa, ua pûpû- noa-hia te tusia ei haamana‘oraa e aore râ, ei taipe no te tusia o te Tamaiti a te Atua; e no reira, mai te tau o te oro‘a Pasa e tae roa’tu i te tau a haere mai ai Oia e pûpû Ia’na iho, ua haapa‘o maite te mau Peropheta e te mau Patereareha i teie mau tusia, te mau taipe e te mau tapa‘o; ia au i te faaueraa tei horo‘ahia ia Mose ra e i te tahi atu mau pipi na te Fatu. I haapa‘o atoa ai Oia i teie nei titauraa, e ua haapa‘o i te oro‘a Pasa mai tei na reirahia e vetahi ê ra; e i teie nei, ia oti te tusia rahi i te ravehia, te amu nei ïa tatou i te Oro‘a mo‘a o te amuraa maa a te Fatu ei haamana‘oraa i te reira. Ua riro teie nei ohipa ei taamuraa i na tau, te tau tahito e te tau no ananahi; no reira, na’na i faati‘a i te ture, ua haamaha i te titauraa a te parau-ti‘a, e ua haapa‘o i te mau titauraa a To’na Metua i te Ao ra.¹¹