“Ko e Ngaahi ‘Ekitivitī Maʻá e Fānaú ‘i he ʻInitanetí mo e Ngaahi Meʻangāue To‘otoʻó mo e Ngaahi Fakataha ʻoku Fakahoko Faka-ʻIlekitulōniká” Tohi Fakahinohino ki he ʻEkitivitī Faka-ʻIlekitulōniká Ma‘á e Toʻu Tupú (2020)
“Ko e Ngaahi ‘Ekitivitī maʻá e Fānaú ‘i he ʻInitanetí mo e Ngaahi Meʻangāue To‘otoʻó mo e Ngaahi Fakataha ʻoku Fakahoko Faka-ʻIlekitulōniká” Tohi Fakahinohino Faka-ʻIlekitulōniká ki he ʻEkitivitī Maʻá e Toʻu Tupú
Ko e Ngaahi ‘Ekitivitī Maʻá e Toʻu tupú ʻi he ʻInitanetí mo e Ngaahi Meʻa Ngāue Toʻotoʻó mo e Ngaahi Fakataha ʻoku Fakahoko Faka-ʻIlekitulōniká
ʻE lava ʻe he kau taki e kalasi e toʻu tupú, kōlomú, mo e kakai lalahí ʻo fakaʻaongaʻi e fakamatala ko ʻení ke tokoni ʻi hono palani e ngaahi ʻekitivitī ngāue tokoni e toʻu tupú ‘oku poupouʻi ‘e he Siasí pea pehē ki he ngaahi ʻekitivitī angamaheni he ngaahi ʻaho lolotonga e uiké mo e ngaahi ʻekitivitī kehe fakatokolahí. ʻOku lava foki ke ma‘u e ngaahi ma‘uʻanga tokoni ki hono poupou‘i e fakalakalaka fakatāutahá ‘o fakafou he tekinolosiá.
Ngaahi tefitoʻi moʻoní
ʻOku totonu ke palani mo fakahoko e ngaahi ʻekitivitií ʻe he kau taki fakakōlomú mo e fakakalasí, ʻi he poupou mei he kau ʻetivaisa kakai lalahí. Ko e ngaahi ʻekitivitií ʻoku totonu ke:
-
Tuku taha e tokangá ʻi hono fakalato e ngaahi fiemaʻu ʻa e fakafoʻituituí, fāmilí, mo e fakafeituʻú.
-
Faka‘aongaʻi e ngaahi tekinolosia ‘oku lava ke maʻu ‘i homou feituʻú.
-
Fakaʻatuʻi maʻu pē ʻa e toʻu tupu ʻoku ʻikai lava ke maʻu ha faingamālie ki he meʻangāue fakaʻilekitulōniká.
-
Muimui ki he ngaahi tefito‘i moʻoni mo e ngaahi founga lelei taha ‘oku maʻu ‘i he “Service and Activity Guidelines for Youth [Ngaahi Fakahinohino ki he Ngāueʻofa mo e ʻEkitivitī maʻá e Toʻu Tupú].”
-
Muimui ki he ngaahi tuʻutuʻuni mo e ngaahi fakahinohino kehe mo lelei taha kotoa ʻa e Siasí ki he tuʻunga malú (vakai safety.ChurchofJesusChrist.org).
Ngaahi Founga Malú
ʻE lava ke liliu e ngaahi fakahinohino ko ʻení ki he ngaahi tūkunga fakalotofonuá, ʻi he malumalu ʻo e fakahinohino ʻa e kau taki fakalotofonuá.
-
Fealēlea‘aki fakataha mo fekumi ki ha fakahā ki hono liliu e ngaahi ‘ekitivitií koeʻuhi ke nau lava ʻo fakahoko fakaʻilekitulōnika ia. ‘E faʻa ‘i ai ha ngaahi founga ʻa e to‘u tupú.
-
Muimui ‘i he ngaahi founga malu ʻi he ‘initanetí:
-
Faka‘aongaʻi e ngaahi tuʻuaki mo e ngaahi saiti ʻoku angamaheni mo malu.
-
Faka‘ehiʻehi mei hono vahevahe ‘i he ʻinitanetí ʻa e fakamatala fakatāutahá—ʻa e ni‘ihi kehé mo e ʻa‘aú.
-
Faka‘ehiʻehi mei hono vahevahe ‘o ha ngaahi ʻīmisi ʻo e ni‘ihi kehé taʻemaʻu ha ngofua meiate kinautolu.
-
Faka‘ehiʻehi mei hono fakaava e ngaahi meʻa ‘oku tānaki mai mei he ngaahi maʻu‘anga tokoni taʻe‘iloá.
-
‘Oua te ke ʻave ha paʻanga pe fakamatala ʻakauni.
-
Muimui ʻi he ngaahi tuʻutuʻuni ʻa e Siasí ʻi he ngaahi naunau kuo ʻoatú.
-
Fakapapau‘i ʻoku kau ‘a e kau takí ʻi he ngaahi ‘ekitivitī fakaʻilekitulōnika kotoa pē.
-
ʻAi ke ʻilo ʻe he matuʻá ʻa e ngaahi ʻekitivitií koeʻuhi ke nau lava ʻo fatongia ʻaki e malu fakaʻinitaneti ʻa ʻenau toʻu tupú.
-
-
Palani mo ke fakakaukau ki he ngaahi fetuʻutaki fakaʻilekitulōniká. He ʻikai ke ola lelei e ngaahi ʻekitivitī sio mata ki he mata kotoa pē ʻi he ngaahi ʻātakai fakaʻilekitulōniká. ‘Oku totonu ke fakakaukauʻi ‘e he kau taki toʻu tupú mo e kakai lalahí e ngaahi ‘ekitivitī ʻoku nau fakafaingamālieʻi e ngaahi feinga fakafoʻituituí ke vahevahe pe fakatahaʻi ʻi he ʻinitanetí.