Tokanga Taha ki he Kau Taautaha Lalahi kei Talavoú
“Tokanga Taha ki he Kau Taautaha Lalahi kei Talavoú,” Tokanga Taha ki he Kau Taautaha Lalahi kei Talavoú (2023)
“Tokanga Taha ki he Kau Taautaha Lalahi kei Talavoú,” Tokanga Taha ki he Kau Taautaha Lalahi kei Talavoú
Tokanga Taha ki he Kau Taautaha Lalahi kei Talavoú
Vīsoné
ʻĪmisi
Palesiteni Russell M. Nelson
“ʻOku ou tāpuakiʻi kimoutolu ke fakatupulaki hoʻomou fakamoʻoní. Pea ʻoku ou tāpuakiʻi kimoutolu ke mou maʻu ʻa e holi mo e mālohi ke tauhi hoʻomou ngaahi fuakavá. ʻI hoʻomou fai iá, ʻoku ou palōmesi atu te mou aʻusia ha tupulaki fakalaumālie, tauʻatāina mei he ilifiá, mo ha loto-falala ʻoku ʻikai ke mou faʻa mafakakaukaua he taimí ni. Te mou maʻu ʻa e mālohi ke maʻu ha ivi tākiekina lelei ʻoku mahulu atu ʻi homou tuʻunga malava fakanatulá.”
—Russell M. Nelson (“Choices for Eternity” [fakataha lotu fakamāmanilahi maʻá e kakai lalahi kei talavoú, Mē 15, 2022], Gospel Library)
ʻI hoʻomou hoko ko e kau taki ʻo e kau taautaha lalahi kei talavoú, ʻoku uiuiʻi koe ke ke tokoni ki he kau taautaha lalahi kei talavou ʻi homou uōtí mo e siteikí ke nau ongoʻi e ʻofa ʻa e Tamai Hēvaní mo Hono ʻAlo ko Sīsū Kalaisí pea muimui kiate Kinaua. Kuo pau ke ke tokoni ki he kau taautaha kei talavou kotoa pē ke nau fakahoko mo tauhi ʻa e ngaahi fuakava toputapú pea fakaloloto ʻenau ongoʻi kau atu ki he Siasi ʻo e Fakamoʻuí.
Leʻo ʻo e Kau Taautaha Lalahi kei Talavoú
ʻI he vahevahe ʻe he kau taautaha lalahi kei talavoú (taʻu 18 ki he 30) fekauʻaki mo ʻenau aʻusia ʻi he Siasí, ʻoku vahevahe ʻe ha tokolahi ʻoku nau:
Maʻu ha fiemaʻu lahi ke ongoʻi ʻoku fakamahuʻingaʻi pea mahino kiate kinautolu pea kau ki ha ngāue ʻoku fakataumuʻa ke fakahoko mo tokoniʻi e fānau ʻa e ʻOtuá.
Ongoʻi ʻoku fakamāuʻi kinautolu pea ʻoku ʻikai ke nau feʻunga pe kau ʻi he anga fakafonua lolotonga ʻo e Siasí.
Ongoʻi “hē” koeʻuhí ʻoku ʻikai ke nau mali.
Maʻu ha ʻofa ki he ongoongoleleí pea ongoʻi te nau lava ʻo tokoni ki he ngāue ʻo e fakamoʻuí mo e hakeakiʻí.
Founga Fakahokó
ʻE tupulaki hoʻo malava ke tokoniʻi mo tāpuekina ʻa e kau taautaha lalahi kei talavoú (YSA) ʻi hoʻo:
Fokotuʻu ha kōmiti YSA ʻi homou siteikí (fakavahaʻa siteiki ʻo ka fiemaʻu).
Uiuiʻi pea fakaʻatā ʻa e kau YSA ke nau tataki ʻa e kōmití.
Tukutaha e tokanga ʻa e kōmití ki hono tokoniʻi kotoa ʻo e kau taautaha lalahi kei talavoú ke nau kau ʻi he ngāue ʻo e fakamoʻuí mo e hakeakiʻí.
Tuku ki he ngaahi kōmiti YSA ke nau lava ʻo liliu ʻa e ngaahi maʻuʻanga tokoni kuo fakangofuá ke feau e ngaahi fiemaʻu makehe ʻa e YSA ʻi honau ʻēliá.
Faleʻi e kau mēmipa ʻo e kōmiti YSA ke nau fokotuʻu mo poupouʻi e ngaahi konifelenisi ʻa e YSA mo e ngaahi feituʻu tānakiʻanga YSA.
Tokoniʻi e kau taki YSA ke nau muimui ki he founga ngāue ʻo e:
Fakafanongo ki he kau taautaha lalahi kei talavoú.
Fealēleaʻaki fakataha mo liliu e ngaahi founga ki hono fakaleleiʻí
Fakaʻaongaʻi e ngaahi founga ki hono fakaleleʻiʻí.
Founga ʻOku Ngāue ai e Palani ʻa e YSA
ʻĪmisi
Fakatātā ʻo e Palani YSA
Ko e niʻihi ʻo e ngaahi sīpinga ʻo e ngaahi polokalama mo e ngaahi ʻekitivitī ʻe lava ke liliú ko e ngāue fakatemipalé mo e hisitōlia fakafāmilí, ko e houa hono ua ʻo e lotú, ngaahi konifelenisí, ngaahi fakataha lotú, ngaahi ʻekitivitī fakasōsialé, ʻinisititiutí, ngaahi konifelenisi Ki Hono Fakamālohia ʻo e Toʻu Tupú, uelofeá mo e moʻui fakafalala pē kiate kitá, JustServe, mo hono vahevahe ʻo e ongoongoleleí.
Palani Ngāue ʻa e Kau Taautaha Lalahi kei Talavoú
Ko e fakamatala ko ʻení ko ha fakamatala fakanounou ia ʻo e founga ke tokoniʻi ai e kau YSA kotoa ke fakaloloto ʻenau fehokotaki mo Sīsū Kalaisí pea mo ʻenau ongoʻi kau ʻi Hono Siasí. Ko e ngaahi ngāue ʻoku fakamatalaʻi atu ʻi laló ko ha fakamatala fakanounou ia ʻo e ngaahi fakahinohino ʻoku ʻoatu ʻi he Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, vahe 14, mo e Fakamālohia ʻo e Kau Taautaha Lalahi Kei Talavoú 2022), Gospel Library.
Fakataha Alēlea Fakauōtí
Ngaahi ʻiuniti fakasiokālafí mo e YSA fakatouʻosi
Fakapapauʻi ʻoku maʻu ʻe he kau taki ʻo e kōlomu kaumātuʻá, Fineʻofá, mo e YSA ʻi ho ʻiunití ha lisi ʻo e YSA kotoa pē ʻoku ʻi ai honau ngaahi lekooti ʻi homou uōtí pe koló.
Fakamuʻomuʻa ʻa e fetuʻutaki ki he YSA kotoa pē ʻoku ʻi ai honau ngaahi lekooti ʻi homou ʻiunití.
ʻOku mahuʻinga ke ke fakafanongo ki he kau YSA, ʻi hoʻo fengāueʻaki mo kinautolú. ʻIloʻi mo mahuʻingaʻia moʻoni ʻi honau ngaahi faingataʻaʻiá, fehuʻí, lavameʻá, ʻamanakí, mo e fakakaukaú.
Talitali lelei fakataautaha mo loto-māfana ʻa e YSA ki he kōlomu ʻo e kaumātuʻá mo e Fineʻofá, ʻo fakapapauʻi ʻoku takitaha ʻi ai hono fatongia ne tataki fakalaumālie pea ʻiloʻi ko hai ʻenau pīsopé, palesiteni ʻo e kōlomu ʻo e kaumātuʻá, mo e palesiteni ʻo e Fineʻofá.
ʻOange ha ngaahi faingamālie ki hono ako ʻo e ongoongoleleí, ngāue tokoní, moihuú, mo e ngaahi ʻekitivitī fakasōsiale ʻoku feʻunga mo e ngaahi fiemaʻu ʻa e YSA (vakai, Ko Hono Fakamālohia ʻo e Kau Taautaha Lalahi kei Talavoú
Fakaongoongoleleiʻi ʻa e kau YSA ki he kau palesitenisī fakasiteikí ke kau ʻi he kōmiti YSA ʻa e siteikí.
Fakataha maʻu pē mo e kau mēmipa ʻo e kōmiti YSA ʻa e siteikí mei homou ʻiunití. ʻAi ke ke maheni mo e ngaahi ngāue ʻa e YSA pea fai ha poupou ʻo ka fiemaʻu.
Kau Palesitenisī Fakasiteikí
Ngaahi siteiki fakasiokālafí mo e YSA fakatouʻosi
ʻOange ki he kōmiti YSA fakasiteikí ha lisi ʻo e YSA kotoa pē ʻoku ʻi ai hanau ngaahi lekooti ʻi homou siteikí.
Fakamuʻomuʻa hono fai ha fetuʻutaki ki he YSA kotoa pē ʻoku ʻi ai honau ngaahi lekooti ʻi homou siteikí.
Tukuange ʻa e kakai lalahi ʻosi mali kotoa pē mei he kōmiti YSA ʻa e siteikí.
Ui mo vaheʻi ʻa e YSA mei he uooti takitaha (ko e tangata mo e fefine pē ʻe taha) ki he kōmiti YSA fakasiteikí.
Ui mo vaheʻi ha tangata ʻe taha mo ha fefine ʻe taha ko e sea ʻo e kōmiti YSA ʻa e siteikí.
ʻI he ngaahi feituʻu ʻoku ngāue ai ha fakataha alēlea ʻa e ʻinisititiutí, fakatahaʻi ʻa e fakataha alēlea ʻa e ʻinisititiutí mo e kōmiti YSA pe fakakau ha kau fakafofonga mei he kōmiti YSA ʻi he fakataha alēlea ʻa e ʻinisititiutí.
Vahe ha tokoni ʻe taha ʻi he kau palesitenisī fakasiteikí mo ha mēmipa ʻo e kau palesitenisī ʻo e Fineʻofá he siteikí ko ha ongo ʻetivaisa ki he kōmiti ko ʻení.
Akoʻi ki he kau mēmipa ʻo e kōmiti YSA ʻa e siteikí honau fatongia ke tokoniʻi ʻa e YSA kotoa pē ke fakamālohia ʻenau tui kia Sīsū Kalaisí mo ʻEne feilaulau fakaleleí. Fakaʻaongaʻi e folofolá, Tohi Tuʻutuʻuni Fakakātoá, vahe 14, mo e Ko Hono Fakamālohia ʻo e Kau Taautaha Lalahi kei Talavoú.
Akoʻi ki he kau mēmipa ʻo e kōmiti YSA ʻa e siteikí fekauʻaki mo e mahuʻinga ʻo e fakafanongo ki he kau YSA pea mo e faingamālie ke liliu e ngaahi polokalama ʻa e Siasí kuo fakangofuá ke feau e ngaahi fie maʻu ʻa e YSA. Fakaʻaongaʻi e Ko Hono Fakamālohia ʻo e Kau Taautaha Lalahi kei Talavoú
ʻOku totonu ke fakafekauʻaki ʻe he kau palesitenisī fakasiteiki ʻo e YSA mo e kau palesitenisī fakasiteiki fakasiokālafí fekauʻaki mo e YSA ʻoku nau fili ke ʻalu ki ha ʻiuniti fakasiokālafi mo ngāue fakaetauhi ki he kau Taautaha Lalahi Kei Talavou ʻoku ʻikai maʻulotú.