1 Ao ngkai e koro bukina bwa Ngai, Nibwaai, i mwin ae I a tia ni wareki bwaai aikai, ake a koreaki i aon bwaatua aika buraati, ao a nakoiu tariu ao n taku nakoiu: Tera nanon bwaai aika ko a tia ni wareki aikai? Nooria, e riai bwa ti na maataata n nanoia ae bon taekan bwain te tamnei, aika a na koro bukiia n te maiu n tamnei ao tiaki n te maiu n rabwata?

2 Ao Ngai, Nibwaai, I taku nakoia: Nooria a tia ni kaotaki nakon te burabeti ni bwanaan te Tamnei; bwa mai iroun te Tamnei ao bwaai ni kabane a bon kaotaki nakoia burabeti, bwaai ake a na roko nako aoia natia aomata ake a kaineti nakon te maiu n rabwata.

3 Mangaia ae bwaai ake I a tia ni wareki bon bwaai aika kaineti ma bwaai aika bwain te rabwata ao te tamnei; bwa e tara n ae te bata are Iteraera, n te tai aei ke rimwi riki, a na kamaenakoaki i aon te aonaba ni kabuta, ao i buakoia naba botanaomata nako.

4 Ao nooria, a mwaiti ake a tia ni bua taekaia mai irouia ake a mena i Ierutarem. Eng, angiia kaain baronga nikabane a tia ni kairaki nako; ao a tia ni kamaenakoaki n tiotio nako nakon aon aban marawa; ao a mena ia akea mai iroura ae e ataia, ma ti ti ataia bwa a tia ni kairaki nako.

5 Ao ngkai a tia ni kairaki nako, ao bwaai aikai a bon tia n taetae ni burabetiaki ibukiia, ao ibukiia naba ake a na kamaenakoaki ma ni kamangaoaki i mwin aio, ibukin Atuaia Iteraera ae Tabu; ibukin kaitaraana a na kamatoai nanoia mai irouna; mangaia ae, a na kamaenakoaki i buakoia botanaomata nako ao a na ribaki irouia aomata ni kabaneiia.

6 Ma e ngae n anne, ao i mwin tararuakia irouia Tientaire, ao ngkana e tia te Uea n tabeka baina nako aoia Tientaire ma ni kateia bwa te buraeki, ao a tia n uotaki natiia i nanon baia, ao natiia aine a tia ni karoaki i aon angaia, nooria bwaai aika a tia n taekinaki aikai bon ibukin te maiu aio; bwa bon taekan ana berita ae tabu te Uea ma ara bakatibu; ao ti kananonaaki iai ni boong aika a na roko, ao tarira naba ni kabane aika kaain te bata are Iteraera.

7 Ao nanona bwa ngkana e roko te tai are a na tia ni kamaenakoaki ma ni kamangaoaki iai te bata are Iteraera, bwa te Uea ae te Atua e na kateirakea te botanaomata ae korakora i buakoia Tientaire, eng, i aon te aba aio; ao irouia a na kamaenakoaki kanoara.

8 Ao ngkana a tia ni kamaenakoaki kanoara ao e na waaki te Uea ae te Atua ni karaoa te mwakuri ae kamimi i buakoia Tientaire, are e na korakora bonganana nakoia kanoara; mangaia are, e a kabootauaki iai ma aron kaikawakia irouia Tientaire ao ni uotaki i nanon baia ao i aon angaia.

9 Ao e na kakawaki naba nakoia Tientaire; ao tiaki ti nakoia Tientaire ma nakoia te bata are Iteraera ni kabane, are e na kaotaki iai kanoan ana berita ae tabu Taman karawa nakon Aberaam, ni kangai: I nanon kanoam a na bane botanaomata i aon te aonaba ni kakabwaiaaki.

10 Ao I tangiria, tariu, bwa kam na ataia bwa botanaomata ni kabane n te aonaba a na bon aki kona ni kakabwaiaki ti ngkana e kaota baina nako mataia botanaomata ni kabane.

11 Mangaia ae te Uea ae te Atua e na waki ni kaota baina nako mataia botanaomata ni kabane, ni kakoroa nanon ana berita ae tabu ma ana euangkerio nakoia ake kaain te bata are Iteraera.

12 Mangaia ae e na manga kaotinakoia riki man te tautoronaki, ao a na bane ni botaki n aban rikiia; ao a na kaotinakoaki mai nanon te roo ma te rootongitong; ao a na ataia ae te Uea bon aia Tia Kamaiu ao aia Tia Kabomwi, ae Atuan Iteraera ae Korakora.

13 Ao raraan te ekaretia ae korakora man ribaki, are kabekaaun te aonaba ni kabane, e na oki nako aon atuuia; bwa a na bubuaka imarenaia, ao oin aia kabaang a na bwaka nako aon oin atuuia, ao a na manging n oin raraaia.

14 Ao aaba ni kabane ake ana buakaniko, O te bata are Iteraera a na manga rairaki ni kaitaraiia imarenaia, ao a na bwaka nako nanon te rua are a kekenna bwa a na kamwaneia iai ana botanaomata te Uea. Ao ni kabane ake a buakana Tion a na kamaunaki ao te kabekaau are e korakora, are e a tia ni kaburei kawain nako te Uea aika a eti, eng ae bon te ekaretia ae korakora man ribaki, e na bwaka nakon bubun te tano ao e na korakora bwakana.

15 Bwa nooria, e taku te burabeti, e waekoa n roko te tai are e na akea iai mwaakan Tatan iaon nanoia natiia aomata; bwa ane e na waekoa n roko te bong are a na riki iai aika kamoa ni kabane ao aika karaoi bwaai aika buakaka a na riki n aiaron te kai ae mwauu; ao e na roko te bong are a na riai ni kabuekaki iai.

16 Bwa ane e na waekoa n roko te bong are e na bwaro iai unin nanon te Atua nako aoia natiia aomata ni kabane; bwa e na aki kariaia bwa aika a buakaka a na tiringia aika a raoiroi.

17 Mangaia ae, e na kamaiuia aika raoiroi ni mwaakana, e ngae ngkana e riai ni kaota bwaninin unin nanona, ao a na kamaiuaki aika raoiroi, e ngae naba ngkana arona bwa e riai kabuekaia aia kairiribai n te ai. Mangaia ae, a na riai n aki maaku aika raoiroi; bwa e taku ana taeka te burabeti, a na kamaiuaki, e ngae ngkana arona bwa man te ai.

18 Nooria, tariu, I tuangkami, bwa a na waekoa ni koro bukin bwaai aikai; eng, n aiaron te raraa, ma te ai, ma buanen te bubu a riai n roko; ao e riai bwa e na riki i aon te aonaba aei; ao e na roko nakoia aomata n te maiu n rabwata ngkana arona bwa a kamatoai nanoia nakon Atuaia Iteraera ae Tabu.

19 Bwa nooria, a na bon aki mate aika raoiroi; bwa e na riai n roko te tai are ni kabane ake a buaka ni kaitaraa Tion a na kamaunaki.

20 Ao te Uea e na bon katauraoa te kawai ibukiia ana botanaomata, are e na koro iai bukin ana taeka Mote, ake e taekin ni kangai: E na kateirakea te burabeti te Uea ae te Atua i buakomi, n ai arou; ao mai irouna are kam na ongo iai taekan bwaai ni kabane, ni bwaai ni kabane ake e na taekin nakoimi. Ao e na koro bukina bwa are ni kabane ake a aki kan ongo iroun te burabeti anne a na bon bane ni kamaunaki mai i buakoia te botanaomata.

21 Ao ngkai Ngai, Nibwaai, I taekinna nakoimi, bwa te burabeti are taekinna Mote bon Atuaia Iteraera ae Tabu; mangaia ae e na karaoa te motiki taeka i nanon te raoiroi.

22 Ao a riai n aki maaku aika raoiroi, bwa tiaki ngaia aika a na kamangaoaki. Bwa bon uean te riaboro, are e na tia ni kateaki i buakoia natiia aomata, are ueana e kateaki i buakoia aika maiu n te maiu n rabwata—

23 Bwa e na waekoa n roko te tai are ekaretia ni kabane ake a kateaki ibukin karekean te raka, ao ni kabane ake a tia ni kateaki ibukin karekean te mwaaka i aon te maiu n rabwata, ao ake a tia ni kateaki ibukin te kan ataaki imatan te aonaba, ao ake a ukoukora kaibwabwarun te maiu n rabwata ao bwain te aonaba, ao ni karaoi makuri ni kabane aika buakaka; eng, ni kakimototoa, ni kabane ake a kaaina uean te riaboro ngaia aika a riai ni maaku, ao n ruru; ngaiia aika a na karinanoaki i nanon te bubu; ao ngaiia aika a na riai n urarake n aiaron taian kai aika mwau; ao aio n aron ana taeka te burabeti.

24 Ao e na waekoa naba n roko te tai are aika raoiroi a na riai ni kairaki rake n ai aroia kao ataei n te nne ni man, ao Atuaia Iteraera ae Tabu e na riai n tautaeka n akea totokoana, ma te korakora, ma te mwaaka, ao te mimitong ae korakora.

25 Ao e na botiia natina man mwakoron te aonaba aika aua; ao e na nambwan ana tiibu, ao a kinaa, ao e na ti teuana te nanai ao temanna te tia kaawakin tiibu; ao e kamwarakeia ana tiibu, ao irouna a na kunea te tawaana.

26 Ao ibukin korakoran raoiroia ana botanaomata, Tatan akea mwaakana; mangaia ae e na aki kabwaraki i nanon i nanon te maan ae ririki aika mwaiti; bwa bon akea mwaakana i aon nanoia aomata ngkai a maeka i nanon te raoiroi, ao e tautaeka Atuaia Iteraera ae Tabu.

27 Ao ngkai nooria, Ngai, Nibwaai, I tuangkami bwa a na bane n roko bwaai aikai n te maiu n rabwata.

28 Ma, nooria, ni kabane aaba, reeti, neewe, ao aomata ni kabaneia a na maeka ma te rau i nanon Atuaia Iteraera ae Tabu ngkana arona bwa a na rairinanoia.

29 Ao ngkai, Ngai, Nibwaai, I katoka au koroboki; bwa I aki kona n taekin bwaai riki tabeua n te tai aio ni kaineti ma bwaai aikai.

30 Mangaia ae tariu, I tangiria bwa kam na iangoia bwa bwaai ake a tia ni koreaki i aon bwaatua aika buraati a bon koaua; ao a kakoaua bwa e riai te aomata n ongeaba nakon ana tua te Atua.

31 Mangaia ae kam riai n aki iangoia bwa ti ngai ma tamau aika ti a tia ni kaoti koauaia ao n reireinia naba. Mangaia ae ngkana kam na ongeaba nakon taian tua, ao n teimatoa ni karokoa te toki, kam na kamaiuaki n te kabanea ni bong. Ao bon aei arona. Amen.