Jebta 5
Saraia ej ellotaane Liai—Erro jim̧or rej m̧ōņōņō kōn ro̧o̧ltok eo an ļōm̧aro nejierro—Rej katok katok ko—Pileij brass ko ewōr ie jeje ko an Moses im rikanaan ro—Pileij ko rej kwaļo̧k kadkadin Liai bwe e ej juon bwijjin Josep—Liai ej kanaan kōn ineen im kōjparok eo an pileij ko. Iturinļo̧k 600–592 M.K.
1 Im ālikin men kein, ke em̧ōj am kar wanlaļļo̧k ilo āne jem̧aden ippān jemām, lo, eaar obrak kōn m̧ōņōņō, im barāinwōt jinō, Saraia, eaar lan̄lōn̄ otem lan̄lōn̄, bwe eaar lukkuun būrom̧ōj kōn kōm.
2 Bwe eaar kōtmāne bwe kōm ar mej ilo āne jem̧aden; im eaar barāinwōt ņotaik jema, im jiron̄ e bwe eaar juon m̧aan in ellolo visōn ko; im ba: Lo kwaar tōl tok kōj jān āneen jolōt eo ad, im ļōm̧aro nejū rejako, im jejako ilo āne jem̧aden.
3 Im ilo wāween kōnono rot in jinō eaar ellotaane jema.
4 Im jema eaar kōnono n̄an e, im ba: Ijeļā ke n̄a juon m̧aan in lolo visōn ko; bwe n̄e iaar jab lo men ko an Anij ilo juon visōn ij jamin naaj kar jeļā em̧m̧an eo an Anij, ak naaj kar pād ilo Jerusalem im mej ippān ro jeiū im jatū.
5 A lo, em̧ōj aō bōk juon āneen kallim̧ur, eo ilo men kein ij m̧ōņōņō; aaet, im ijeļā Irooj enaaj kōjparok ļōm̧aro nejū jān pein Leban, im bar bōk laļtak er n̄an ipped ilo āne jem̧aden.
6 Im kōn wāween kajin rot in jema, Liai, eaar kaenōm̧m̧an jinō, Saraia, kōn kōm, ke kōm ar ito-itak ilo āne jem̧aden lōn̄ļo̧k n̄an āneen Jerusalem, n̄an būki ļo̧o̧k ko an riJu ro.
7 Im ke kōm ar ro̧o̧lļo̧k n̄an im̧ōn kōppād eo an jema, lo m̧ōņōņō eo aer eaar iio, im jinō eaar aenōm̧m̧an.
8 Im eaar kōnono, im ba: Kiiō ijeļā ilo ejjeļo̧k pere bwe Irooj eaar jiron̄ ļeo pālleō n̄an ko n̄an āne jem̧aden; aaet im ibarāinwōt jeļā bwe Irooj eaar oņaake ļōm̧arein nejū, im kōjo̧o̧r er jān pein Leban, im leļo̧k n̄an er kajoor bwe ren maron̄ kōtōprak men ko Eaar jiron̄ er. Im kōn wāween kajin rot in eaar kōnono.
9 Im ālikin men kein, raar kanooj lan̄lōn̄, im raar leļo̧k katok im joortak ilo kijeek ko n̄an Irooj; im raar leļo̧k kam̧m̧oolol n̄an Anij in Israel.
10 Im ālikin aer kar leļo̧k kam̧m̧oolol n̄an Anij in Israel, jema, Liai, eaar bōk ļo̧o̧k ko im kar m̧wijit ioon pileij brass ko, im eaar lin̄ōri jān jinoier.
11 Im eaar lo bwe eaar wōr bok ko an Moses ļalem ie, ko im raar kwaļo̧k wāween ejaak eo an laļ, im barāinwōt kōn Adam im Iv, ro raar jemād im jined m̧oktata.
12 Im barāinwōt juon ļo̧o̧k an riJu ro jān jinoin, aaet laļtak n̄an jinoin iien irooj ko an Zedekaia, kiin̄ in Juda;
13 Im barāinwōt kanaan ko an rikanaan ro rekwōjarjar, jān jinoin, aaet laļtak n̄an jinoin iien irooj ko an Zedekaia; im barāinwōt elōn̄ kanaan ko im kar kōnono jān lo̧n̄iin Jeremaia.
14 Im ālikin men kein, jema, Liai, eaar barāinwōt lo ilo pileij brass kein juon menmenbwij an ro jemān; kōn menin eaar jeļā bwe e bwijjin Josep; aaet, ejja Josep m̧aan eo kar nejin Jekab, eo kar wiakake ilo Ijipt, im eo kar oņaake kōn pein Irooj, bwe en maron̄ kōjparok Jemān, Jekab, im aolepān m̧weo im̧ōn jān jako kōn n̄ūta.
15 Im kar barāinwōt tōlļo̧k er jān kōm̧akoko im jān āneen Ijipt, jān ejja Anij eo eaar oņaake er wōt.
16 Im āindein jema, Liai, eaar lo menmenbwij eo an ro jemān. Im Leban eaar barāinwōt juon bwijjin Josep, kōn menin e im ro jemān raar lali ļo̧o̧k kein.
17 Im kiiō ke jema eaar lo men kein eaar obrak kōn jetōb, im eaar jino kanaan kōn ineen—
18 Bwe pileij brass kein ren etal n̄an aolep laļ ko, bwij ko, lo ko, im armej ro raar jān ineen.
19 Kōn menin, eaar ba pileij brass kein reaikuj jab jorrāān; rebarāinwōt aikuj jab marokļo̧k kōn iien. Im eaar kanaan elōn̄ men kōn ineen.
20 Im ālikin men kein, m̧aantak n̄an tōre in n̄a im jema kōm ar kōjparok kien ko Irooj eaar jiron̄ kōm.
21 Im kōm ar būki ļo̧o̧k kein Irooj eaar jiron̄ kōm kaki, im lin̄ōri im lo bwe raar lukkuun kāitoktok-limo; aaet, em̧ool aer aorōk eaar ļap n̄an kōm, jon̄an kōm ar maron̄ oņaaki kien ko an Irooj n̄an ajri ro nejim.
22 Kōn menin eaar mennin mālōtlōt ilo Irooj bwe kōmin būki ippām, ke kōmij ito-itak ilo āne jem̧aden ļo̧k n̄an āneen kallim̧ur.