Nephi Nwoma a Otsĩa Ebien No

1 Na afei ɔbaa dɛ emi, Nephi, muwiee mo nuanom kyerɛkyerɛ no, hɛn egya, Lehi, so kãa nsɛm pii kyerɛɛ hɔn, na ɔpaapaa nsɛm bi do kyerɛɛ hɔn a ɔfa ndzɛmba akɛse a Ewuradze ayɛ ama hɔn, dɛ ɔdze hɔn efi Jerusalem asaase do aba.

2 Na ɔkãa hɔn etuatsew wɔ nsu no do ho nsɛm, na Nyankopɔn n’ehumbɔbɔr a ɔkyerɛe wɔ hɔn do ma wɔannhwer hɔn nkwa, dɛ ɔamma po no ammen hɔn.

3 Na ɔkãa anohoba asaase no a hɔn nsa akã no so ho nsɛm kyerɛɛ hɔn—mbrɛ Ewuradze n’ayamuyie ntsi ɔnam kɔkɔbɔ do maa yetui fii Jerusalem asaase do.

4 Na ɔsee dɛ, hwɛ, mehu enyido-adzehu. No mu na muhun dɛ wɔasɛɛ Jerusalem, na sɛ yɛtsenaa hɔ a nkyɛ hɛn so yɛahera.

5 Ɔsee dɛ mbom yehu amandze dze, naaso yenya anohoba asaase no, asaase a ɔbɔ asaase nyina do mu; asaase a Ewuradze Nyankopɔn nye me edzi ahyɛmu dɛ ɔnyɛ egyapadze asaase mma m’asefo. Nyew, Ewuradze nye me edzi ahyɛmu wɔ asaase yi ho na ɔdze ama emi na me mba afebɔɔ, nye hɔn so a Ewuradze dze ne nsa beyi hɔn efi aman bi mu no.

6 Dɛm ntsi, mara Lehi, menam Sunsum a odzi dwuma wɔ mo mu no do hyɛ nkɔm dɛ, obiara remmba asaase yi do gyedɛ hɔn a Ewuradze dze ne nsa eyi hɔn no.

7 Dɛm ntsi, woehyira dɛm asaase yi do ama hɔn a ɔdze hɔn bɛba do no. Na sɛ ɔba no dɛ wɔbɔsom no dɛ mbrɛ mbrasɛm a ɔdze ama hɔn no se a, ɔno ɔbɛyɛ ahotɔ asaase ama hɔn; dɛm ntsi wɔremmba ndɔmmum mu da; sɛ dɛm a, ɔnam emumuyɛ ntsi ɔbɛyɛ hɔ; na sɛ emumuyɛ dɔɔ sõ a ɔno ɔbɛyɛ ndom asaase ama hɔn, na mbom atseneneefo dze ɔbɛyɛ nhyira asaase ama hɔn afebɔɔ.

8 Na hwɛ, wɔnam nyansa do dze asaase yi bɛda ho esuma aman nkaa no; na hwɛ, aman pii botwuw afa asaase no do ma aba no dɛ worinnya beebi mpo nnyɛ egyapadze asaase.

9 Dɛm ntsi, emi Lehi, meenya anohoba dɛ, susuampaara dɛ hɔn a Ewuradze Nyankopɔn beyi hɔn efi Jerusalem asaase no do aba no bedzi ne mbrasɛm no do, wɔbɛyɛ prɔmprɔm wɔ asaase yi enyi do, na wobeyi hɔn efi aman nkaa no mu, ama wɔaabɛfa asaase no ayɛ hɔn dze. Na sɛ ɔba no dɛ wobedzi ne mbrasɛm do a, wobehyira hɔn wɔ asaase yi enyi do, na obiara renntseetsee hɔn anaaso ɔrenngye asaase a ɔyɛ hɔn egyapadze no; na wɔbɛtsena do asomdwee mu afebɔɔ.

10 Mbom hwɛ, sɛ ɔba no dɛ wɔwodow wɔ gyedzi mu ber a woenya Ewuradze ne nsamu nhyira kɛse—dɛ woenya nyimdzee wɔ mbrɛ wosii bɔɔ wiadze yi ho, nye nyimpa nyinara, wobohu Ewuradze n’anwanwadwuma akɛse fitsi wiadze ne mbɔe; wɔnam tum a wɔdze ama hɔn no do bɛyɛ ndzɛmba nyinara wɔ gyedzi mu, wobedzi mbrasɛm nyinara do fitsi ahyɛse no, na ɔnam ne papayɛ a ɔmmbɔadze da no do dze hɔn aba anohoba asaase a ɔsom bo yi do—hwɛ, mese, sɛ mber bi ba ma wɔpow Israel Krɔnkrɔnnyi no, nokwar Messiah no, hɔn Pomfo na hɔn Nyankopɔn no a, hwɛ nyia obua asɛntsenenee no bobua hɔn atsɛn.

11 Nyew, ɔdze aman binom bɛba hɔn do, na ɔbɛma hɔn tum, na wɔagye asaase no a ɔyɛ hɔndze no efi hɔn nsamu, na ɔbɛma wɔabɔ hɔn apetse na woekunkum hɔn.

12 Nyew, bɔgya bogu fitsi ebusuasantsen kor do ekodu kor so do, na ɔhaw kɛse aba hɔn do; dɛm ntsi, me mbabanyin, mebɛpɛ dɛ hom bɛkaa; nyew, mebɛpɛ dɛ hom betsie me nsɛm.

13 O nkyɛ hom enyan; enyan efi hom nda heii no mu, nyew, efi hɛl nda mpo mu, na hom atsetsew mpokyerɛ a wɔdze atoto hom, dza wɔdze atoto adasamba dze soa hɔn kɔ ndɔmmum mu kogu onnyiewiei awerɛhow na mbusu bun mu no.

14 Nyan na soɛr fi huntuma no mu, na hom ntsie ndze a ofi ɔwofo a noho wosow a ɔrennkyɛr biara na hom dze ne mbiew ekogu nda a no mu yɛ kɔnn na ɔyɛ nwin so mu, bea a ɔkwantunyi biara kɔ a onntum nnsan n’ekyir; aka mber kumaabi na makɔ asaase nyina kwan no.

15 Mbom hwɛ, Ewuradze apon me kra efi hɛl; mehu n’enyimnyam no, na no dɔ abasa no etwa moho ehyia dze kɔ onnyiewiei mu.

16 Na mepɛ dɛ hom kaa na hom hyɛ Ewuradze n’ahyɛdze na n’atsɛmbu no nsew; hwɛ, ofitsi ahyɛse nyina iyi nye me kra n’ahwehwɛdze.

17 Yaw ahyɛ me kra do fi ber to ber, na musuro, annyɛ dɛm a hom akomadzen ntsi Ewuradze hom Nyankopɔn n’ebufuhyew ne mãhyɛ bɛdzɛw hom do, oetwa hom akyen na ɔasɛɛ hom afebɔɔ;

18 Anaa dɛ ndom bɛba hom nye hom ebusuasantsen pii do; na wɔdze nkrantsee na ɔkɔm bɛba abɛsera hom, na wɔbɛtan hom, na abɔnsam atwe hom akɔ ndɔmmum mu dɛ mbrɛ ne pɛ tse.

19 O me mbabanyin, nkyɛ dɛm ndzɛmba yi mpar hom na mbom hom ayɛ Ewuradze no dɔ mba a ɔasan mu eyi hom. Mbom hwɛ, ne pɛ nyɛ hɔ; osiandɛ n’akwan yɛ tsenenee afebɔɔ.

20 Na ɔakã dɛ: Susuampaara a hom bɛda ho edzi me mbrasɛm do no hom bɛyɛ prɔmprɔm wɔ asaase no do; mbom mbertsentsen biara a hom nnkedzi me mbrasɛm do no wobotwa hom efi m’enyim akyen.

21 Na afei mbrɛ ɔbɛyɛ a me kra benya enyigye wɔ hom mu, na m’akoma edzi dɛw wɔ homho ber a orifi wiadze, mennkɛfa yaw na awerɛhow akɔ nda mu no, hom nsoɛr mfi huntuma mu, me mbabanyin, na hom nyɛ mbarimba na hom nsi nketse wɔ adwen kor na akoma kor mu, koryɛ wɔ adze nyinara mu, amma hom annkɔ ndɔmmum mu.

22 Amma wɔammfa ndom yaayaw anndom hom; na eso, pɛrpɛr Nyankopɔn n’ebufuw ammba hom do, amma hom annkɔ ɔsɛɛ mu, nyew, ɔkra na honandua mu ɔsɛɛ a onnyiewiei no mu.

23 Hom nyan, me mbabanyin; hom mfa tsenenee akotar no nhyɛ. Hom ntsetsew nkɔnsɔnkɔnsɔn a wɔdze ato hom mpokyerɛ mu no ngu, na hom mfi kusukusuyɛ hɔ, na hom nsoɛr mfi huntuma mu.

24 Mma hom nntsew etua bio wɔ hom nua a n’adwendwen ayɛ enyimnyam nko no no do bio, ɔno a oedzi mbrasɛm no do fitsi ber a yefii Jerusalem; ɔno ɔayɛ edwindadze wɔ Nyankopɔn ne nsamu dze hɛn aba anohoba asaase yi do; na sɛ nnyɛ ɔno a, nkyɛ ɔkɔm maa yɛheraa wɔ sar no do; naaso hom hwehwɛɛ dɛ hom beyi no nkwa efi hɔ; nyew, oedzi awerɛhow pii wɔ hom ntsi.

25 Na suro kɛse na ahopopo akã me osian hom ntsi, dɛ annhwɛ a obohu amandze bio; osiandɛ, hom akasa etsia no dɛ ɔrohwehwɛ tum na tumdzi edzi wɔ hom do; mbom minyim dɛ nnyɛ hom do tum anaa tumdzi na ɔrohwehwɛ edzi, mbom Nyankopɔn n’enyimnyam na homankasa hom onnyiewiei eyiedzi.

26 Na hom ehwinhwin osiandɛ wɔada ndzɛmba edzi pefee akyerɛ hom ntsi. Hom kã dɛ ɔayɛ ndam; hom kã dɛ no bo efuw hom; mbom hwɛ, ne ndamyɛ no yɛ Nyankopɔn n’asɛm no tum a ɔwɔ no mu; na dza hom frɛ no ebufuw no yɛ nokwar, dɛ mbrɛ ɔtse wɔ Nyankopɔn mu a onntum nnsiw do, na ɔdze ndam da hom bɔn edzi kyerɛ hom.

27 Na ɔsɛ na ohia dɛ Nyankopɔn no tum no bɛkã noho, koraa mpo wɔ ne hyɛ a ɔhyɛ hom dɛ hom nyɛ setsie no. Mbom hwɛ nnyɛ ɔno a, mbom Ewuradze no Sunsum a ɔwɔ no mu no a, ɔno na obue n’ano ma ɔkasa na onntum mmua n’ano.

28 Na afei me babanyin, Laman nye Lemuel na Sam, nye me mbabanyin a hom yɛ Ishmael ne mbabanyin, hom nhwɛ, sɛ hom ritsie Nephi ne ndze a nkyɛ hom rennhera. Na sɛ hom ritsie no a nkyɛ mibegya hom nhyira, nyew, me nhyira a odzi kan no mpo.

29 Mbom sɛ hom enntsie no a mibeyi me nhyira a odzi kan no efi hɔ, nyew, me nhyira no mpo, na ɔnye no atsena.

30 Na afei, Zoram, mekasa kyerɛ wo: Hwɛ, eyɛ Laban n’akowaa; kwan biara do no wɔdze wo efi Jerusalem asaase do aba, na minyim dɛ ebɛyɛ nyɛnko nokwafo ama me babanyin Nephi afebɔɔ.

31 Dɛm ntsi, osiandɛ edzi nokwar ntsi wɔdze w’asefo bɛkã n’asefo ho ehyira hɔn, ama wɔaatsena wɔ prɔmprɔmyɛ mu wɔ asaase yi do mber pii; na biribiara, gyedɛ wɔyɛ emumuyɛ, rimmpira anaa rennhaw hɔn prɔmprɔmyɛ wɔ asaase yi do afebɔɔ.

32 Dɛm ntsi sɛ ibedzi Ewuradze ne mbrasɛm do a, Ewuradze behyira asaase yi do ama w’asefo na me ba n’asefo wɔ hɔn bambɔ ho ntsi.