1 Ug dayon mag-awit ako ngadto sa akong labing pinalangga og usa ka kanta sa akong pinalangga, bahin sa iyang ubasan. Ang akong labing pinalangga adunay ubasan dapit sa usa ka mabungahon kaayo nga bungtod.

2 Ug iya kining gikoral, ug gipanangtang ang mga bato niini, ug gitamnan kini og labing maayong ubas, ug gitukoran og tore sa tunga-tunga niini, ug gihimoan usab og intosan diha niini; ug naglaom siya nga mamunga kini og mga ubas, ug namunga kini og mga ihalas nga ubas.

3 Ug karon, O mga lumulupyo sa Jerusalem, ug kalalakin-an sa Juda, mohangyo ako kaninyo, hukmi ako ug ang akong ubasan.

4 Unsa pa kaha unta ang angay nakong gihimo sa akong ubasan nga wala nako mahimo niini? Sa unsang rason, nga sa dihang akong gilaoman nga mamunga kini og mga ubas, namunga man kini og ihalas nga mga ubas.

5 Ug karon, dali; sultihan ko kamo kon unsay akong buhaton sa akong ubasan—Akong panangtangon ang gipang-ali diha niini, ug pangkaonon kini sa mga hayop; ug akong gub-on ang koral niini, ug kini pagatunob-tunoban;

6 Ug ako moguba niini; dili na kini pul-ongan o habokan; apan tugkan kini og mga sampinit ug mga tunok; ako mosugo usab sa mga dag-om nga kini dili mopaulan diha niana.

7 Kay ang ubasan sa Ginoo sa mga Panon mao ang balay ni Israel, ug ang katawhan sa Juda mao ang iyang makapahimuot nga tanom; ug naglaom siya nga mohimo sila og matarong nga paghukom, ug nakita ang pagpanlupig; alang sa pagkamatarong, nakita hinoon ang pagdangoyngoy.

8 Alaot sila nga nagkahugpong sa balay ngadto sa laing balay, hangtod nga wala nay dapit, nga sila mapahiluna nga mag-inusara dinhi sa tibuok bahin sa yuta!

9 Sa akong mga dalunggan, miingon ang Ginoo sa mga Panon, sa pagkatinuod daghang balay ang pagabiyaan, ug mga dagko ug maanindot nga mga dakbayan ang walay managpuyo.

10 Oo, ang upat kapin ka ektarya nga ubasan moani og kawhaan og duha ka litro, ug ang usa ka piho nga gidaghanon sa binhi mamunga og kap-atan ka litro nga lugas.

11 Alaot sila nga mobangon og sayo sa buntag, aron ilang ipadayon ang isog nga ilimnon, nga magpadayon hangtod sa gabii, ug ang bino mohubog kanila!

12 Ug ang alpa, ug ang biyolin, ang tambulin, ug ang plahota, ug ang bino anaa sa ilang mga bangkete; apan wala nila panumbalinga ang buhat sa Ginoo, ni mitagad sa buhat sa iyang mga kamot.

13 Busa, ang akong katawhan nabihag, kay sila walay kahibalo; ug ang ilang mga tawo nga halangdon nangamatay sa gutom, ug ang mga panon sa ilang katawhan nag-antos sa labihan nga kauhaw.

14 Busa, ang impyerno mipadako sa iyang kamandoan, ug mibuka og dako sa iyang ba-ba; ug sa ilang himaya, ug sa ilang dakong panon, ug sa ilang kamapagarbohon, ug siya nga nagmaya, manaog didto.

15 Ug ang tawo nga kasarangan ipaubos, ug ang tawo nga gamhanan magmapainubsanon, ug ang mga mata sa mapahitas-on magmapainubsanon.

16 Apan ang Ginoo sa mga Panon pagahimayaon pinaagi sa paghukom, ug ang Dios nga balaan pagabalaanon sumala sa pagkamatarong.

17 Unya ang mga karnero manibsib sigon sa naandan nila nga paagi, ug ang biniyaang mga dapit nga sibsibanan sa tambok nga mga hayop maoy kaonon sa mga langyaw.

18 Alaot sila nga moguyod sa pagkadaotan pinaagi sa mga higot sa pagka-asyoso, ug sa sala sama nga kini usa ka giguyod og pisi nga kariton;

19 Nga nag-ingon nga: Padalia siya, ipadali ang iyang buluhaton, aron ato kining makita; ug itugot nga ang tambag sa Balaan sa Israel ipaduol ug ipaabot na, aron ato kining mahibaloan.

20 Alaot sila nga naghunahuna nga ang pagkadaotan matarong, ug ang pagkamatarong daotan, kinsa moingon nga ang kangitngit kahayag, ug ang kahayag kangitngit, nga moingon sa pait nga tam-is, ug ang tam-is pait!

21 Alaot kadtong naghunahuna sa ilang mga kaugalingon nga maalamon ug mabinantayon sa ilang kaugalingong panan-aw!

22 Alaot kadtong kusog moinom og bino, ug mga tawong kusog mosagol og isog nga ilimnon;

23 Kinsa mopawalay sala sa mga daotan tungod sa suhol, ug dili moila sa pagkamatarong kaniya nga matarong!

24 Busa, sama nga ang kalayo mosunog sa dagami, ug ang hinungaw sa kalayo mougdaw sa mga tahop, ang gamot niini mangalata, ug ang mga bulak niini mangalaya sama sa abog; tungod kay gisalikway nila ang balaod sa Ginoo sa mga Panon, ug mitamay sa pulong sa Balaan sa Israel.

25 Busa, ang kapungot sa Ginoo misilaob batok sa iyang katawhan, ug nakalugway sa iyang kamot batok kanila, ug misakit kanila; ug ang kabungtoran nangatay-og, ug ang ilang mga patay nangadugmok taliwala sa kadalanan. Tungod niining tanan, ang iyang kasuko wala mahunong, apan ang iyang kamot nakalugway sa gihapon.

26 Ug mopakayab siya og usa ka bandila ngadto sa lagyong mga nasod, ug motawag kanila gikan sa kinatumyan sa yuta; ug tan-awa, moanhi sila nga managdali; walay usa kanila nga kapuyon o madagma.

27 Walay usa nga makatagpilaw o makatulog; o bakos sa ilang mga bat-ang nga mangluag, o liston sa ilang mga sapatos nga mabugto;

28 Kansang mga panâ mahait, ug ang tanan nilang gapasan mangabawog, ug ang mga kuko sa ilang kabayo mahisama sa usa ka santik, ug ang ilang mga ligid sama sa alimpulos, ang ilang mga pagngulob sama sa usa ka leon.

29 Mongulob sila sama sa mga nati nga leon; oo, mongulob sila, ug mogunit sa bihag, ug modala niini sa laing dapit nga luwas, ug walay makalingkawas.

30 Ug niana nga adlaw mongulob sila batok kanila sama sa dahunog sa dagat; ug kon motan-aw sila sa yuta, tan-awa, ang kangitngit ug ang kasubo, ug ang kasanag niini magkangitngit diha sa mga kalangitan niini.