Tsir 21
Jesse no dusin (Christ) bobu atsɛn tsenenee—Nyankopɔn ho nyimdzee bɛkata asaase do wɔ Mfe Apem no mu—Ewuradze bɛma frankaa do na ɔakã Israel aboa ano—Fa to Isaiah 11 ho. Bɛyɛ mfe 559–545 Ansaana wɔbɔwo Christ.
1 Na mfɛwee bi befi Jesse dusin no mu afɛw na abaw efi no ndwow mu efir:
2 Na Ewuradze no Sunsum besi no do, nyansa ɔnye ntseasee sunsum no, apam ɔnye ahoɔdzen sunsum, na nyimdzee ɔnye Ewuradze noho suro sunsum;
3 Na Ewuradze ho suro mu na ɔbɛfa n’enyika, na onnkedzi dza n’enyiwa hu no ekyir, ebu atsɛn, eso onnkedzi dza n’asowa tse no ekyir akã enyim.
4 Na obobu ehiafo atsɛn tsenenee, ɔnam pɛrpɛr do akã enyim ama hɔn a wɔdwe wɔ asaase no do, na ɔdze n’ano abaa bɔhwe asaase no, na ɔdze n’anomu ahom eku omumuyɛnyi.
5 Na ndzeyɛtsenenee bɛyɛ n’asen abɔdo, na nokwardzi ayɛ n’abɔyamu.
6 Na pataku nye eguambaa bɛtsena, na ɔsebɔ nye apɔnkyeba ada hɔ, na nantwiba nye awendadzeba na nantwiba a ɔadɔ seradze atsena fakor; na abɔdomaba egya hɔn.
7 Na ɔnantwiber nye osisi bedzidzi; na hɔn mba abɔmu ada fakor; na awendadze bɔwe efuw dɛ ɔnantwi.
8 Na enumfoanoba bɔgor ehurutsia tu ano, na ɔba a oetwa enumfo dze ne nsa ato ɔkyerben no bɔn mu.
9 Wɔnnkɛyɛ bɔn eso wɔnnkɛsɛɛ wɔ me bepɔw krɔnkrɔn nyina do, na Ewuradze ho nyimdzee bɛhyɛ asaase mã, dɛ mbrɛ esu kata po do.
10 Na ɔbɛba wɔ dɛm da no mu dɛ Jesse ndwow a osi hɔ dɛ frankaa ma aman no; n’ekyir kwan na Amanamamfo bɔhwehwɛ; na n’ahomgyebea bɛyɛ enyimnyam.
11 Na ɔbɛba wɔ da no mu dɛ Ewuradze dze ne nsa bosuo mu bio ne mprɛnu agye ne man nkaa efi Assyria na Egypt, na Pathros na Cush na Elam na Shinar na Hamath, na po nsupruw no.
12 Na obesi frankaa ama amanaman, na ɔapon Israel tokyenfo no aboa ano, na ɔama Judahfo a wɔapetse no wofi asaase mfɛndzanan mu ebehyia.
13 Ephraim n’enyitan so befi hɔ akɔ, hɔn a wotsia Judah no, wobotwa hɔn akyen; Ephraim n’enyi nnkɛber Judah, Judah so nnkehiahia Ephraim ho.
14 Mbom wobesi Philistiafo abatsir do etu akɔ anee; wɔbɔbɔ mu akɔ bokamba afo; Wɔdze hɔn nsa bɔto Edom ɔnye Moab do; na Ammon mba ayɛ setsie ama hɔn.
15 Na Ewuradze bɛsɛɛ Egypt po ɔdoɛɛ no huntuhuntu na ɔdze ne hyew mframa apopo ne nsa ho egu esutsen no do, na ɔabɔ no ma ɔadan nsubansuba esuon, na nkorɔfo dze nsokota edua mu wesee.
16 Na ɔtsempɔn bi bɛda hɔ ama me man nkaa a wɔaka efi Assyria, dɛ mbrɛ ɔdaa hɔ maa Israel wɔ da a ofii Egypt asaase do bae no.