1 Ia ni sa oti na nona tucake tale mai na mate na Karisito ena qai vakaraitaki Koya vei kemudou na luvequ, kei kemudou na wekaqu lomani; ia na vosa ena tukuna vei kemudou sai koya na lawa mo dou na muria.

2 Ia raica, au sa kaya vei kemudou ni’u sa raica ni na takali yani e vuqa na itabatamata, ka na yaco na veivaluvaluti lelevu kei na veileti ena kedra maliwa na noqu tamata.

3 Ia ni sa lako oti mai na Mesaia ena soli vei ira na noqu tamata na ivakatakilakila ni nona sucu, na nona mate kei na nona tucake tale; ia ena levu ka rerevaki na siga ko ya vei ira na tamata daucaka ca, ni ra na mate kina; ia era sa na mate baleta ni ra sa vakasevi ira tani na parofita, kei ira na yalododonu, ka vakaviriki ira ena vatu, ka vakamatei ira; ia na tagi ni nodra dra na yalododonu ena rogo cake kina mai na qele vua na Kalou ka beitaki ira.

4 Ia, ko ira kece sa dokadoka, ka kitaka na ca, sa toro mai na siga ko ya era na kama kina me vaka na vu ni co, sa kaya na Turaga ni Lewevuqa.

5 Ia ko ira era na vakamatei ira na parofita, kei ira na yalododonu, ena tilomi ira na titobu ni vuravura, sa kaya na Turaga ni Lewevuqa; ena ubi ira na veiulunivanua, ka kauti ira tani na covulaca, ena lutuki ira na veivale me ra dasila ka qaqi ira me ra vurumemea.

6 Ia ena sikovi ira na kurukuru, kei na livaliva, kei na uneune, kei na ka ni veivakarusai kecega, ni na tutuvaki kina vei ira na bukawaqa ni nona cudru na Turaga, ka ra na vaka na vu ni co, ia na siga sa toro mai ena tilomi ira, sa kaya na Turaga ni Lewevuqa.

7 Isa na mosi kei na yaluma ni yaloqu ena vuku ni nodra sa yali na noqu tamata era sa vakamatei! Ni’u sa raica, koi au, ko Nifai, ka sa voleka ni’u yavu yani ena iserau ni Turaga; ia sa dodonu me’u tagicaka vua na noqu Kalou: Sa dodonu na nomuni sala.

8 Ia raica, ko ira na ivalavala dodonu era vakarorogo ki na nodra vosa na parofita, ka sega ni vakarusai ira, ia era sa vakanamata tiko ga vei Karisito ena yalodei me vakayacori na ivakatakilakila sa soli mai, ka vosota na veivakacacani kecega—raica, sai ira era na sega ni mate.

9 Ia ena rairai vei ira na Luve ni Valavala Dodonu; ka na vakabulai ira ko Koya, ka ra na veisaututaki kaya, me yacova ni sa takali yani e tolu na itabatamata; ia ena vuqa vei ira na ikava ni tabatamata era na takali yani ena ivalavala dodonu.

10 Ia ni ra sa na takali yani na veika oqo ena qai yaco kusarawa e dua na veivakarusai vei ira na noqu tamata; e dina ga sa mosi vakalevu na yaloqu, ia au a sa raica, o koya au sa kila kina ni na yaco vakaidina; ia era sa volitaki ira ena ka wale; ni ra na tamusuka na veivakarusai me isau ni nodra viavialevu kei na nodra lialia; ia ni ra sa soli ira vua na tevoro ka digitaka na vei cakacaka ni butobuto ka sega na rarama, era na lako sobu kina ki eli.

11 Ni na sega ni dau vakauqeta tiko ga na tamata na Yalo ni Turaga. Ia ni sa mudu ni vakamasuta na tamata na Yalo sa qai yaco kusarawa kina na veivakarusai, ka sa vakararawataka na yaloqu na ka oqo.

12 Ia me vaka au a vosa kina me baleta na nodra na kila na Jiu ni sa Karisito dina sara ko Jisu, sa dodonu sara talega me ra kila na kai Matanitu Tani ni sa Karisito ko Jisu, na Kalou Tawamudu;

13 Ka sa vakaraitaki koya ki vei ira kece era sa vakabauti Koya, ena kaukauwa ni Yalo Tabu; io, ki vei ira kece na veimatanitu, veimataqali, duivosavosa kei ira na tamata, ka sa kitaka na cakacaka mana lelevu, na ivakatakilakila, kei na veika veivakurabuitaki, ena kedra maliwa na luve ni tamata me vaka na nodra vakabauta.

14 Ia raica, au sa parofisai vei kemudou me baleta na veisiga mai muri; me baleta na veisiga ena kauta mai kina na Turaga na Kalou na veika oqo ki vei ira na luve ni tamata.

15 Ni sa oti na nodra malumalumu sobu ena tawavakabauta ko ira na noqu kawa kei ira na nodratou kawa na tuakaqu, ka ra sa yaviti oti mai vei ira na kai Matanitu Tani; io, ni sa oti na nona vakavolivoliti ira ena ivalu na Turaga na Kalou, ka kabai ira mai na suva, ka tara cake na veikoro ni valu me saqati ira; ka ni sa oti na nodra kau sobu ki na kuvu ni soso, me yacova ni ra sa yali yani; ia ena volai ga na nodra vosa na ivalavala dodonu, ka na rogoci na nodra masu na yalodina, ia ko ira kece era sa malumalumu mai ena tawavakabauta era na sega ni guilecavi.

16 Ni ra vosa vei ira mai na qele ko ira era sa vakarusai, ka na toka e ra na nodra vosa mai na kuvu-ni-soso, ia na domodra ena vaka na domoi koya sa dau curumi; ni na solia vua na Turaga na Kalou na kaukauwa me vakasolokakanataka mai na ka e baleti ira, me vaka e lako mai na qele, ka na vakasolokakana mai na kuvu-ni-soso na nodra vosa.

17 Ni sa kaya vakaoqo na Turaga na Kalou: Era na vola na veika ena caka ena kedra maliwa, ka ra na volai ka dregati ena dua na ivola, ka ra na sega ni taura ko ira era a sa malumalumu sobu ena tawavakabauta, ni ra sa segata me ra vakarusa na veika ni Kalou.

18 Ia, me vaka ni ra a vakarusai vakatotolo ko ira era sa vakarusai; ia era na vaka na qa ni sila sa cagina ko ira na lewevuqa vei ira na nodra tamata rerevaki—io, sa kaya vakaoqo na Turaga na Kalou: Ena yaco vakasauri ga ka vakidacala—

19 Ka na yaco ni ra na yaviti ena ligadra na kai Matanitu Tani ko ira era sa malumalumu mai ena tawavakabauta.

20 Ka ra sa vakalevulevui ira na kai Matanitu Tani ena dokadoka ni matadra, ka ra sa tarabe, ni sa ka levu na nodra itatarabe, ka ra sa tara cake e vuqa na lotu; ia, era sa beca ga na kaukauwa kei na nona cakacaka mana na Kalou, ka ra vakacaucautaka vei ira vakaira na nodra yalomatua kei nodra kilaka, me ra rawa ka kina ka butuqaqia na matadra na dravudravua.

21 Ka ra sa tara cake e vuqa na lotu ka vakavuna na veivuvutaki, na veiqati, kei na loma ca.

22 Era sa tu talega na veisoqosoqo vuni, me vaka ena gauna makawa, me vaka na nona isoqosoqo na tevoro, ni sai koya na kena tauyavu na veika kece oqo; io, na tauyavu ni laba, kei na vei cakacaka butobuto; io, ka sa vakatuitui ira ena dali laino sa bukia ki domodra, me yacova ni sa vesuki ira ena nona dali kaukauwa ka sega ni mudu.

23 Ia raica, oi kemudou na wekaqu lomani, au sa kaya vei kemudou ni sa sega ni cakacaka ena butobuto na Turaga na Kalou.

24 Sa sega ni kitaka ko Koya e dua na ka, ka vakavo kevaka me na vinaka kina ko vuravura; ni sa lomani ira na kai vuravura, o koya ka sa solia kina na nona bula me vakayarayarataki ira kina na tamata kecega ki vua. Ia, sa sega ni vakarota e dua me kakua ni vakaivotavota mai na nona veivakabulai.

25 Raica, sa tagi li vua e dua ka kaya: Mo lako tani vei au? Raica, au sa kaya vei kemudou, E segai; ia sa kaya ga: Dou lako mai vei au koi kemudou kecega mai na iyalayala kei vuravura, dou mai volia na sucu kei na oni, ka segai ena ilavo se na isau.

26 Raica, sa vakarota li e dua me lako tani mai na vei valenilotu, se mai na vale ni sokalou? Raica, au sa kaya vei kemudou, E segai.

27 Sa vakarota li e dua me kakua ni vakaivotavota mai na nona veivakabulai? Raica au sa kaya vei kemudou, E segai; ia sa solia wale ko koya vei ira na tamata kecega; ka sa vakaroti ira na nona tamata me ra vakauqeti ira na tamata kecega me ra veivutuni.

28 Raica, sa vakarota li e dua na Turaga me kakua ni vakaivotavota mai na nona vinaka? Raica au sa kaya vei kemudou, E segai; ia sa soli vakatautauvata vei ira na tamata kecega na galala, ka sega ni dua me vakatabui kina.

29 Sa vakarota ko koya me kakua na bete vakailasu; raica, na bete vakailasu sai ira era sa vunau ka vakaturi ira cake me ra rarama kei vuravura, me ra rawa ka kina ka dokai ira ko vuravura; ia era sa sega ni segata na vinaka kei Saioni.

30 Raica, sa vakatabuya na ka oqo na Turaga; o koya sa solia kina e dua na ivakaro na Turaga na Kalou me tu vei ira na tamata kecega na loloma uasivi, sai koya na loloma dina. Ka kevaka sa sega vei ira na loloma uasivi era sa ka wale ga. Ia, kevaka sa tu vei ira na loloma uasivi era na sega ni laivi ira na dau cakacaka e Saioni me ra mate.

31 Ia ko ira na dau cakacaka e Saioni me ra cakacaka ena vukui Saioni; ni kevaka era na cakacaka ena vuku ni ilavo era na rusa.

32 Ka dua tale, sa vakarota na Turaga na Kalou me kakua ni laba na tamata; me ra kakua ni lasu; me ra kakua ni butako; me ra kakua ni cavuta wale ga na yaca ni Turaga na nodra Kalou; me ra kakua ni vuvu; me ra kakua ni loma ca; me ra kakua ni veiqati; me ra kakua ni ia na veibutakoci; ka me ra kakua ni kitaka e dua vei ira na veika oqo; ia ko koya sa kitaka ena rusa.

33 Ni sa sega ni vu mai vua na Turaga e dua na caka cala oqo; ni sa kitaka ko Koya na ka ga sa vinaka ena kedra maliwa na luve ni tamata; ka sa sega ni kitaka e dua na ka, ka vakavo ke sa na matata vinaka vei ira na luve ni tamata; ka sa sureti ira kecega me ra lako mai vua ka vakaivotavota ena nona vinaka; ka sa sega ni bureitaka vua e dua sa lako mai vua, na tamata loaloa kei na tamata vulavula, na bobula kei na galala, na tagane kei na yalewa; ka sa nanumi ira na tawa lotu; ka ra sa tautauvata na tamata kecega vua na Kalou, ko ira na Jiu kei ira na kai Matanitu Tani.