1 Ug karon, tan-awa, akong kaigsoonan, namulong ako kaninyo, sumala sa giaghat kanako sa Espiritu; mao nga, ako nahibalo nga mahitabo gayod kini.

2 Ug ang mga butang nga masulat gikan sa maong basahon bililhon kaayo ngadto sa mga anak sa katawhan, ug ilabi na sa atong binhi, nga salin sa balay ni Israel.

3 Kay mahitabo nga niana nga adlaw ang mga simbahan nga gitukod, ug dili alang sa Ginoo, sa higayon nga ang usa moingon ngadto sa lain: Tan-awa, ako iya sa Ginoo; ug ang uban moingon: Ako, ako iya sa Ginoo; ug mao kana ang isulti sa tanan nga nagtukod og mga simbahan, ug dili alang sa Ginoo—

4 Ug makiglalis sila sa usag usa; ug ang ilang mga pari makiglalis sa usag usa, ug motudlo sila gamit ang ilang kinaadman, ug molimod sa Espiritu Santo, nga nag-aghat sa unsay ipamulong.

5 Ug ilimod nila ang gahom sa Dios, nga Balaan sa Israel; ug moingon sila sa katawhan: Patalinghogi kami, ug paminaw kamo sa among mga lagda; kay tan-awa walay Dios karon, kay ang Ginoo ug ang Manunubos nakahuman na sa ilang buhat, ug mihatag na siya sa iyang gahom ngadto sa katawhan;

6 Tan-awa, patalinghogi ninyo ang akong mga lagda; kon moingon sila nga adunay milagro nga gihimo pinaagi sa kamot sa Ginoo, ayaw kini tuohi; kay niini nga adlaw dili siya Dios sa mga milagro; siya nakahuman na sa iyang buhat.

7 Oo, ug daghan ang moingon: Kaon, inom, ug paglipay, kay ugma kita mamatay; ug maayo kini alang kanato.

8 Ug adunay daghan usab nga moingon: Kaon, inom, ug paglipay; bisan pa, kahadloki ang Dios—hatagan niya og katarongan ang pagbuhat og gagmayng sala; oo, pamakak og gamay, pahimusli ang tawo pinaagi sa iyang mga gipanulti, pagkalot og gahong alang sa imong silingan; walay daotan niini; ug buhata kining tanan, kay ugma kita mamatay; ug kon kita nasayop man, ang Dios molatigo kanato og pipila lang ka latos, ug sa kataposan maluwas kita sa gingharian sa Dios.

9 Oo, ug daghan ang magatudlo sa ingon niini nga paagi, sa sayop ug walay bili ug binuang nga mga doktrina, ug magmapahitas-on sa ilang mga kasingkasing, ug maningkamot nga ililong gikan sa Ginoo ang ilang mga laraw; ug ang ilang mga buhat maanaa sa kangitngit.

10 Ug ang dugo sa mga santos mosudya gikan sa yuta batok kanila.

11 Oo, silang tanan wala na magsubay sa dalan; nangahimo silang limbongan.

12 Tungod sa garbo, ug tungod sa mini nga mga magtutudlo, ug mini nga doktrina, ang ilang mga simbahan puno sa sayop nga mga binuhatan, ug ang ilang mga simbahan puno sa garbo; tungod sa garbo nahimo silang mapahitas-on.

13 Ilang gikawatan ang mga kabos tungod sa ilang matahom nga mga santuwaryo; ilang gikawatan ang mga kabos tungod sa ilang matahom nga mga sapot; ug ilang gilutos ang mga maaghop ug timawa sa kasingkasing, tungod sa ilang garbo sila nagmapahitas-on.

14 Ilang gipatikig ang ilang mga liog ug gipataas ang mga ulo; oo, ug tungod sa garbo, ug kadaotan, ug kasalawayon, ug mga binayran nga pakighilawas, silang tanan nahisalaag gawas sa pipila, kinsa mapainubsanong mga sumusunod ni Kristo; bisan pa, nagiyahan sila, nga sa daghang higayon nasayop sila tungod kay gitudloan sila sa mga lagda sa katawhan.

15 O ang maalamon, ug ang makinaadmanon, ug ang adunahan, nagmapahitas-on tungod sa garbo diha sa ilang kasingkasing, ug kadtong tanan nga nagsangyaw og mga mini nga doktrina, ug niadtong tanan nga mibuhat sa binayran nga pakighilawas, ug mituis sa matarong nga paagi sa Ginoo, alaot, alaot, sila, miingon ang Ginoong Dios nga Labing Makagagahom, kay itambog sila sa impyerno!

16 Alaot sila nga misalikway sa mga makiangayon alang sa usa ka butang nga walay hinungdan ug mibiaybiay batok niana nga maayo, ug miingon nga kini walay bili! Kay ang adlaw moabot nga ang Ginoong Dios kalit nga moduaw sa mga lumulupyo sa yuta; ug niana nga adlaw nga mahingpit na ang ilang kahinog sa pagkadaotan sila mamatay.

17 Apan tan-awa, kon ang mga lumulupyo sa yuta maghinulsol sa ilang pagkadaotan ug mga pagkasalawayon dili sila pagalaglagon, miingon ang Ginoo sa mga Panon.

18 Apan tan-awa, kana nga dako ug salawayon nga simbahan, ang namaligya og dungog sa tanan nga yuta, mahugno gayod sa yuta, ug hilabihan ang pagkahagsa niini.

19 Kay ang gingharian sa yawa kinahanglan nga matay-og, ug sila nga nahisakop niini kinahanglan nga maaghat sa paghinulsol, o ang yawa mogapos kanila sa iyang walay kataposang mga kadena, ug sulsolan sila ngadto sa pagkasuko, ug mangamatay;

20 Kay tan-awa, niana nga adlaw siya mopaulbo og kayugot diha sa kasingkasing sa mga anak sa mga tawo, ug mosulsol kanila ngadto sa pagkasuko batok niana nga maayo.

21 Ug ang uban iyang hupayon, ug anam-anamon sila sa pagguyod ngadto sa kalibotanong kaharuhay, nga sila moingon: Ang tanan maayo ra sa Zion; oo, ang Zion nag-uswag, ang tanan maayo ra—ug sa ingon niana ang yawa molingla sa ilang mga kalag, ug modala kanila sa mabinantayong paagi paubos sa impyerno.

22 Ug tan-awa, ang uban iyang ulog-ulogan, ug moingon kanila nga walay impyerno; ug moingon siya ngadto kanila: Dili ako yawa, kay walay yawa—ug sa ingon niana mohunghong siya sa ilang mga dunggan, hangtod nga siya mogapos kanila gamit ang iyang makalilisang nga mga kadena, nga gikan niana walay makalingkawas.

23 Oo, magapos sila sa kamatayon, ug sa impyerno; ug ang kamatayon, ug ang impyerno, ug ang yawa, ug ang tanan nga kaubang gigapos niini seguradong mobarog sa atubangan sa trono sa Dios, ug hukman sumala sa ilang mga buhat, nga diha niana sila seguradong maadto sa dapit nga giandam alang kanila, gani sa lim-aw nga kalayo ug asupre, nga mao ang walay kataposang paghasol.

24 Busa, alaot siya nga nagpakahamugaway sa Zion!

25 Alaot siya nga nagsinggit: Maayo ra ang tanan!

26 Oo, alaot siya nga nagapatalinghog sa mga lagda sa katawhan, ug nagalimod sa gahom sa Dios, ug sa gasa sa Espiritu Santo!

27 Oo, alaot siya nga moingon: Kami nakadawat, ug kami wala na magkinahanglan pa og dugang!

28 Ug sa kataposan, alaot sila nga nanagpangurog, ug nanagkasuko tungod sa kamatuoran sa Dios! Kay tan-awa, siya nga natukod diha sa bato midawat niini nga malipayon; ug siya nga natukod sa balason nga tukoranan mangurog basin unya og siya mahugno.

29 Alaot siya nga moingon: Kami nakadawat sa pulong sa Dios, ug wala na kami magkinahanglan og dugang pa nga pulong sa Dios, kay igo na kini kanamo!

30 Kay tan-awa, sa ingon niana miingon ang Ginoong Dios: Ako mohatag sa mga anak sa katawhan og pagtulon-an human sa usa ka pagtulon-an, sugo human sa usa ka sugo, diyotay dinhi ug diyotay didto; ug bulahan kadtong mopatalinghog sa akong mga sugo, ug mopatalinghog sa akong mga tambag, kay makaangkon sila og kaalam; kay siya nga modawat akong hatagan og dugang pa; ug gikan kanila nga magaingon nga, Igo na kini kanamo, gikan kanila pagabawion gani bisan kana nga anaa na kanila.

31 Tinunglo siya nga nagbutang sa iyang pagsalig diha sa tawo, o mihimo sa tawhanong kusog nga iyang kalig-on, o mopatalinghog sa mga lagda sa katawhan, gawas kon ang ilang mga lagda gihatag pinaagi sa gahom sa Espiritu Santo.

32 Alaot ang mga Hentil, miingon ang Ginoong Dios sa mga Panon! Kay bisan og ako molugway sa akong kaugalingon nga bukton ngadto kanila sa matag adlaw, sila molimod kanako; bisan pa niana, magmanggiluy-on ako kanila, miingon ang Ginoong Dios, kon sila maghinulsol ug moduol kanako; kay ang akong bukton nakalugway sa tibuok adlaw, miingon ang Ginoong Dios sa mga Panon.