1 Manje bhekani, bafowethu abathandekayo, ngizokhuluma kini; ngokuba mina, Nefi, anginakuvuma ukuthi nicabange ukuthi nilunge kakhulu kunalokho abeZizwe abayoba yikho. Ngokuba bhekani, ngaphandle kokuthi nigcine imiyalelo kaNkulunkulu nonke ngokufanayo niyolahleka; futhi ngenxa yamazwi akhulunyiwe akudingi nicabange ukuthi abeZizwe babhujisiwe baphela nya.

2 Ngokuba bhekani, ngithi kini ngangobuningi babeZizwe abayophenduka bayokuba ngabantu besivumelwano beNkosi; futhi ngobuningi bamaJuda abangeyukuphenduka bayolahlwa; ngokuba iNkosi ayenzi sivumelwano namunye ngaphandle kwalabo abaphendukayo futhi bakholwe kuyo iNdodana yayo, engoNgcwele ka-Israyeli.

3 Manje, sengizophrofetha ikakhulukazi mayelana namaJuda kanye nabeZizwe. Ngokuba emva kokuba incwadi engikhulume ngayo iyovela, futhi ibhalelwe abeZizwe, futhi iphinde ivalelwe eNkosini, kuyoba khona abaningi abayowakholwa lawo mazwi abhaliwe; futhi bayowathatha bawayise kuyo insalela yenzalo yethu.

4 Futhi emva kwalokho insalela yenzalo yethu iyokwazi mayelana nathi, ukuthi saphuma kanjani eJerusalema, futhi nokuthi yona iwuzalo lwamaJuda.

5 Futhi ivangeli likaJesu Kristu liyomenyezelwa phakathi kwabo; ngalokho-ke, bayobuyiselwa olwazini loyise, futhi ngokunjalo nasolwazini lukaJesu Kristu, owayekhona phakathi koyise.

6 Futhi emva kwalokho bayothokoza; ngokuba bayokwazi ukuthi kuyisibusiso kubo esivele esandleni sikaNkulunkulu; futhi izingqweqwe zabo zobumnyama ziyoqala ukuwa emehlweni abo; futhi eziningi izizukulwane aziyikudlula phakathi kwabo, ngaphandle kokuthi bayoba ngabantu abamsulwa futhi nabathandekayo.

7 Futhi kuyokwenzeka ukuthi amaJuda ahlakazekile nawo ayoqala ukukholwa kuKristu; futhi ayoqala ukubuthana phezu kobuso balelizwe; futhi ngangobuningi balabo abayokholwa kuKristu nabo bayokuba ngabantu abathandekayo.

8 Futhi kuyokwenzeka ukuthi iNkosi uNkulunkulu iyowuqala umsebenzi wayo phakathi kwazo zonke izizwe, imindeni, izilimi, nakubantu, ukuletha ukubuyiselwa kwabantu bayo emhlabeni.

9 Futhi ngokulunga iNkosi uNkulunkulu iyobahlulela abampofu, futhi isole ngokulingana abathobileyo bomhlaba. Futhi iyowushaya umhlaba ngenduku yomlomo wayo; nangomphefumulo wezindebe zayo iyobabulala ababi.

10 Ngokuba isikhathi siyeza masinyane lapho iNkosi uNkulunkulu iyokwenza ukwahlukana okukhulu phakathi kwabantu, futhi ababi iyobabhubhisa; futhi iyobasindisa abantu bayo, yebo, ngisho noma ngabe kungukuthi kufanele ibhubhise ababi ngomlilo.

11 Futhi ukulunga kuyoba yibhande lezinkalo zayo, nokuthembeka yibhande lamanyonga ayo.

12 Futhi ngaleso sikhathi impisi iyohlala nemvu; futhi ingwe iyolala phansi nomntwana, kanye nenkonyane, kanye nomntwana webhubesi, kanye nokukhuluphalisiweyo, ndawonye; futhi ingane encane iyozihola.

13 Inkomazi kanye nebhele kuyoklaba; abancane bazo bayolala phansi ndawonye; futhi ibhubesi liyodla utshani njengenkabi.

14 Umntwana oncelayo uyodlala emgodini webululu, futhi umntwana olunyuliweyo uyofaka isandla sakhe emhhumeni kamantshingeyana.

15 Abayikulimaza noma babhubhise kuyo yonke intaba yami engcwele; ngokuba umhlaba uyogcwala ulwazi lweNkosi njengamanzi emboze ulwandle.

16 Ngalokho-ke, izinto zezizwe zonke ziyokwembulwa; yebo, zonke izinto ziyokwembulwa kubantwana babantu.

17 Akukho lutho oluyimfihlo ngaphandle kokuthi luyovezwa; akukho msebenzi wobumnyama ngaphandle kokuthi uyokwenziwa ubonakale ekukhanyeni; futhi akukho lutho oluboshwe emhlabeni ngaphandle kokuthi luyokhululwa.

18 Ngalokho-ke, zonke izinto ezavezelwa abantwana babantu kuyokuthi ngalolo suku zambulwe; futhi uSathane akaseyikuba namandla phezu kwezinhliziyo zabantwana babantu, isikhathi eside. Manje, bafowethu abathandekayo, sengenza isiphetho senkulumo yami.