1 U tassew, tassew, ngħidilkom li jien għandi nagħaġ oħra li mhumiex minn din l‑art, lanqas mill‑art ta’ Ġerusalemm, lanqas mill‑inħawi ta’ madwar l‑art fejn jien mort biex naqdi.

2 Għax dawk li qed nitkellem dwarhom huma dawk li għadhom ma semgħux leħni; u fl‑ebda ħin ma wrejt lili nnifsi lilhom.

3 Iżda jiena ngħatajt kmandament mill‑Missier li għandi mmur fosthom, u li jeħtieġ li huma jisimgħu leħni, u li għandhom jingħaddu man‑nagħaġ tiegħi, sabiex ikun hemm merħla waħda u ragħaj wieħed; għalhekk jiena sejjer nuri lili nnifsi lilhom.

4 U nordnalkom sabiex tiktbu dak li qed ngħid wara li jiena nkun tlaqt, ħalli f’każ li l‑poplu tiegħi f’Ġerusalemm, dawk li rawni b’għajnejhom u kienu miegħi fil‑ministeru tiegħi, ma jitolbux lill‑Missier f’ismi, huma jkunu jistgħu jsiru jafu dwarkom permezz tal‑Ispirtu s‑Santu, u jsiru jafu wkoll dwar it‑tribujiet l‑oħra li dwarhom huma ma jafux, u li l‑kliem li intom se tiktbu għandu jiġi mħares u għandu jiġi żvelat lill‑Ġentili, ħalli permezz tal‑milja tal‑Ġentili, il‑fdal ta’ nisilhom, li sejjer jitferrex fuq wiċċ l‑art minħabba n‑nuqqas ta’ fidi tagħhom, ikun jista’ jinġieb lura, jew aħjar ikun jista’ jinġieb lura għall‑għarfien tiegħi, il‑Feddej tagħhom.

5 U mbagħad jiena niġborhom mill‑erba’ rkejjen tad‑dinja; u mbagħad jiena nġib fis‑seħħ il‑patt li l‑Missier għamel mal‑poplu kollu tad‑dar ta’ Iżrael.

6 U henjin huma l‑Ġentili, minħabba l‑fidi tagħhom fija, permezz tal‑Ispirtu s‑Santu, li jixhed magħom dwari u dwar il‑Missier.

7 Araw, minħabba l‑fidi tagħhom fija, jgħid il‑Missier, u minħabba n‑nuqqas ta’ fidi tagħkom, O dar ta’ Iżrael, fl‑aħħar żminijiet il‑verità sejra tasal għand il‑Ġentili, biex il‑milja ta’ dawn il‑ħwejjeġ tkun żvelata lilhom.

8 Iżda ħażin ikun għalihom, jgħid il‑Missier, dawk il‑Ġentili li ma jemmnux—għax minkejja li huma ġew fuq wiċċ din l‑art, u xerrdu lill‑poplu tiegħi li ġej mid‑dar ta’ Iżrael; u l‑poplu tiegħi li ġej mid‑dar ta’ Iżrael sefa’ mkeċċi minn fosthom, u spiċċa mgħaffeġ taħt saqajhom;

9 U minħabba l‑ħniena ta’ Alla mal‑Ġentili, kif ukoll minħabba l‑ħaqq tal‑Missier fuq il‑poplu tiegħi, li ġej mid‑dar ta’ Iżrael, tassew, tassew, ngħidilkom, li wara dan kollu, u jien wassalt sabiex il‑poplu tiegħi li ġej mid‑dar ta’ Iżrael jisfa’ kkastigat, mgħakkes, u maqtul, u mkeċċi ’l barra minn fosthom, u jsir ukoll poplu mibgħud minnhom, u jkun ta’ għajb u f’ilsien kulħadd—

10 U dan hu li l‑Missier ordnali biex ngħidilkom: F’dak il‑jum li fih il‑Ġentili jidinbu kontra l‑evanġelju tiegħi, u jwarrbu l‑milja tal‑evanġelju tiegħi, u jkunu minfuħin fil‑kburija ta’ qalbhom aktar minn kull ġens ieħor, u aktar min‑nies tad‑dinja kollha, u fosthom ma jsaltan xejn għajr gideb, u qerq, u kattiverja, u kull tip ta’ ipokresija, u qtil, u frodi saċerdotali, u żína, u għemejjel mistkerrha u sigrieti; u jekk huma jwettqu dawk il‑ħwejjeġ kollha, u jwarrbu l‑milja tal‑evanġelju tiegħi, araw, jgħid il‑Missier, jiena nieħu minn fosthom il‑milja tal‑evanġelju tiegħi.

11 U mbagħad jiena niftakar fil‑patt li jien għamilt mal‑poplu tiegħi, O dar ta’ Iżrael, u jiena nwassal l‑evanġelju tiegħi għandhom.

12 U lilek nurik, O dar ta’ Iżrael, li l‑Ġentili mhu se jkollhom l‑ebda kontroll fuqkom; iżda jien se niftakar fil‑patt tiegħi magħkom, O dar ta’ Iżrael, u intom se taslu biex tagħrfu l‑milja tal‑evanġelju tiegħi.

13 Iżda jekk il‑Ġentili jindmu u jduru lejja, jgħid il‑Missier, araw huma se jkunu magħduda mal‑poplu tiegħi, O dar ta’ Iżrael.

14 U jien ma nħallix li l‑poplu tiegħi, li ġej mid‑dar ta’ Iżrael, jgħaddi minn fosthom, u jgħaffiġhom taħt saqajh, jgħid il‑Missier.

15 Iżda jekk huma ma jdurux lejja, u jisimgħu kliemi, jiena lin‑nies tiegħi, O dar ta’ Iżrael, inħallihom jgħaddu minn fosthom, u jgħaffġuhom taħt saqajhom, u huma jsiru bħall‑melħ li qata’, li ma baqa’ tajjeb għal xejn ħlief biex jintrema barra, u jintrifes mill‑poplu tiegħi, O dar ta’ Iżrael.

16 Tassew, tassew, ngħidilkom, dan hu li ordnali l‑Missier—li lil dan il‑poplu jien għandi nagħtih din l‑art bħala wirtu.

17 Imbagħad ikun ġie fis‑seħħ kliem il‑profeta Isaija, li jgħid:

18 L‑għassiesa tiegħek jgħollu leħenhom; lkoll flimkien huma jgħannu, għax huma jaraw b’għajnejhom lill‑Mulej rieġa’ lura f’Sijon.

19 Intom, ħerbiet ta’ Ġerusalemm, għannu lkoll bil‑ferħ; għax farraġ il‑Mulej il‑poplu tiegħu, huwa feda lil Ġerusalemm.

20 Kixef il‑Mulej id‑driegħ tiegħu qaddis, quddiem il‑ġnus kollha; u raw it‑truf kollha tal‑art is‑salvazzjoni ta’ Alla.