1 Ma sa oo ina poloai atu Iesu i ona soo ia latou aumai ni areto ma se uaina ia te ia.

2 Ma a o latou o atu mo le areto ma le uaina, sa ia poloai atu i le motu o tagata ia latou nonofo i lalo i luga o le eleele.

3 Ma ina ua o mai ona soo ma areto ma le uaina, sa tago o ia i le areto ma tofitofi ma faamanuia; ma sa ia avatu i le au soo ma poloai atu ia latou aai.

4 Ma ina ua uma ona latou aai ma maoona, sa ia poloai atu ia latou avatu i le motu o tagata.

5 Ma ina ua uma ona aai ma maoona le motu o tagata, sa ia fetalai atu i le au soo: Faauta, e i ai se tasi o outou o le a faauuina, ma o ia o le a ou tuu atu i ai le mana e tofitofi ai e ia le areto ma faamanuia i ai ma avatu i tagata o la’u ekalesia, ia i latou uma o ē o le a talitonu ma papatisoina i lo’u igoa.

6 Ma ia outou tausisi e faia lenei mea e le aunoa, e pei lava ona ou faia, e pei lava ona ou tofitofi le areto ma faamanuia i ai ma avatu ia te outou.

7 Ma ia outou faia lenei mea i le faamanatuina o lo’u tino, lea ua ou faaali atu ia te outou. Ma o le a avea lea o se molimau i le Tamā ua outou manatua pea a’u. Ma afai tou te manatua pea a’u o le a outou maua lo’u Agaga e faatasi ma outou.

8 Ma sa oo ina ua uma ona ia fetalai atu o nei upu, sa ia poloai atu i ona soo ia latou ave se uaina mai le ipu ma feinu ai, ma ia latou avatu foi i le motu o tagata ina ia latou feinu ai.

9 Ma sa oo ina faapea ona latou faia, ma sa latou feinu ma ua malilie ai; ma sa latou avatu i le motu o tagata, ma sa latou feinu, ma sa latou malilie ai.

10 Ma ina ua uma ona faia e le au soo lenei mea, sa fetalai atu Iesu ia te i latou: Amuia lava outou ona o lenei mea ua outou faia, aua o lenei mea o le faataunuuina lea o a’u poloaiga, ma o lenei mea ua molimau atu ai i le Tamā ua outou loto e fai le mea ua ou poloaiina ai outou.

11 Ma o lenei mea ia outou faia e le aunoa ia te i latou o e e salamo ma papatiso i lo’u igoa; ma ia outou faia e faamanatu ai lo’u toto, lea ua ou faamaligiina mo outou, ina ia outou molimau atu ai i le Tamā ua outou manatua pea a’u. Ma afai tou te manatua pea a’u o le a outou maua lo’u Agaga e faatasi ma outou.

12 Ma ou te tuu atu ia te outou se poloaiga ia outou faia nei mea. Ma afai tou te faia pea nei mea, amuia lava outou, ona ua outou atia’e i luga o la’u papa.

13 Ae o soo se tasi e i totonu ia te outou na te faia se mea e sili atu pe itiiti ifo i lo nei mea, ua le atia’e i luga o la’u papa, a ua atia’e i luga o se faavae oneone; ma pe a to mai uaga, ma oo mai lologa, ma agi mai matagi, ma taia ai i latou, o le a pa’u’ū ifo i latou, ma ua uma ona talaia faitotoa o seoli e talia i latou.

14 O lea amuia lava outou pe afai tou te tausia a’u poloaiga, ia na poloaiina ai a’u e le Tamā ia ou tuu atu ia te outou.

15 E moni, e moni, ou te fai atu ia te outou, e ao ina outou mataala ma tatalo e le aunoa, nei faaosoosoina outou e le tiapolo, ma ta’ita’i ese atu ai outou faatagataotaua e ia.

16 Ma e pei ona sa ou tatalo faatasi ma outou ia faapea lava ona outou tatalo i la’u ekalesia, faatasi ma o’u tagata o ē e salamo ma ua papatiso i lo’u igoa. Faauta, o a’u o le malamalama; ua ou faatuina se faataitaiga mo outou.

17 Ma sa oo ina ua uma ona fetalai atu e Iesu o nei upu i ona soo, sa toe liliu atu o ia i le motu o tagata ma fetalai atu ia te i latou:

18 Faauta, e moni, e moni, ou te fai atu ia te outou, e ao ina outou mataala ma tatalo e le aunoa nei outou ulu atu i faaosoosoga; ona ua manao Satani ia te outou, ina ia lūlū e ia outou e pei o saito.

19 O lea e tatau ai ona outou tatalo atu pea i le Tamā i lo’u igoa;

20 Ma o soo se mea tou te ole atu ai i le Tamā i lo’u igoa, e sa’o, ma talitonu o le a outou maua, faauta, o le a tuuina mai lava ia te outou.

21 Ia tatalo atu e le aunoa i le Tamā, i o outou aiga, i lo’u igoa, ina ia faamanuiaina a outou ava ma a outou fanau.

22 Faauta foi, ia outou potopoto faatasi e le aunoa; ma ia aua nei o outou faasaina soo se tagata e sau ia te outou pe a outou potopoto faatasi, a ia tuu i latou ia mafai ona latou o mai ia te outou ma aua le faasaina i latou.

23 Ae ia outou tatalo mo i latou, ma ia lē tutulia i latou i fafo; ma afai latou te o mai e le aunoa ia te outou ia outou tatalo i le Tamā mo i latou, i lo’u igoa.

24 O lea, ia tuu i luga lo outou malamalama ina ia susulu atu i le lalolagi. Faauta, o A’u o le malamalama lea e tatau ona outou tuu i luga—mea ia na outou vaai ua ou faia. Faauta sa outou vaai sa ou tatalo atu i le Tamā, ma sa outou molimauina uma.

25 Ma ua outou vaai sa ou poloaiina ia aua nei i ai se tasi o outou e alu ese atu, ae sa ou poloai atu ia outou o mai ia te a’u, ina ia outou tagotago ma vaai; ia faapea lava ona outou faia i le lalolagi; ma o soo se tasi na te solia lenei poloaiga ua ia tuu o ia lava ia taitaiina atu i faaosoosoga.

26 Ma o lenei sa oo ina ua uma ona fetalai e Iesu o nei upu, sa ia toe liliu atu ona fofoga i luga o soo o e na ia filifilia, ma fetalai atu ia te i latou:

27 Faauta e moni, e moni, ou te fai atu ia te outou, ou te tuu atu ia te outou se tasi poloaiga, ona tatau ai lea ona ou alu atu i lo’u Tamā ina ia mafai ona ou faataunuuina isi poloaiga ia na ia tuuina mai ia te a’u.

28 Ma o lenei faauta, o le poloaiga lenei ou te tuu atu ia te outou, ia outou le tuuina ma le iloa soo se tasi e taumafa ma le faaletatau i lo’u tino ma lo’u toto, pe a outou tufatufaina atu;

29 Aua o soo se tasi e ’ai i lo’u tino ma inu i lo’u toto ma le faaletatau ua ’ai ma inu e ia le faasalaga i lona agaga; o le mea lea, afai tou te iloa ua le agavaa se tagata e ’ai ma inu i lo’u tino ma lo’u toto ia outou faasa ia te ia.

30 Ae ui i lea, aua tou te tuli ese o ia i fafo mai ia te outou, a ia outou auauna ia te ia, ma tatalo mo ia i le Tamā, i lo’u igoa; ma afai e salamo o ia ma papatiso i lo’u igoa, ona outou talia lea o ia, ma tufatufa atu ia te ia lo’u tino ma lo’u toto.

31 Ae afai e le salamo o ia, ia le faitauina o ia faatasi ma o’u tagata, ina ia le faaumatia e ia o’u tagata, aua faauta, ua ou iloa a’u mamoe, ma ua faitaulia i latou.

32 Ae ui lava i lea, aua tou te tulia o ia i fafo mai o outou sunako, po o o outou nofoaga o tapuaiga, aua o tagata faapena ia outou galulue pea i ai; ona tou te le iloa pe o le a latou toe foi mai ma salamo, ma o mai ia te a’u ma le faamoemoe atoa o le loto, ma o le a ou faamaloloina ai i latou; ma o le a avea outou ma ala e aumai ai le faaolataga ia te i latou.

33 O lea, ia outou tausia nei upu ua ou poloaiina ai outou ina ia outou le oo ifo i le faasalaga; ona oi talofa ia te ia o lē e faasalaina e le Tamā.

34 Ma ua ou tuu atu ia te outou nei poloaiga ona o finauga ia sa i ai i totonu ia te outou. Ma amuia lava outou pe afai e leai ni finauga i totonu ia te outou.

35 Ma o lenei o le a ou alu atu i le Tamā, aua e tatau ona ou alu atu i le Tamā mo outou.

36 Ma sa oo ina ua uma ona faaiu atu e Iesu o ia fetalaiga, sa ia pa’i atu lona aao i soo, taitoatasi, o e na ia filifilia, seia pa’i atu o ia ia te i latou uma, ma fetalai atu ia te i latou a o pa’i atu o ia ia te i latou.

37 Ma sa le lagona e le motu o tagata upu ia na ia fetalai ai, o lea na latou le molimauina ai; ae ua molimau le au soo sa ia tuuina mai ia te i latou le mana e tuu atu ai le Agaga Paia. Ma o le a ou faaali atu ia te outou i se taimi o mulimuli mai ua moni lenei molimau.

38 Ma sa oo ina ua uma ona pa’i atu o Iesu ia i latou uma, sa oo mai se ao ma ua faamalumalu ifo i le motu o tagata sa le mafai ai ona latou vaai atu ia Iesu.

39 Ma a o faamalumaluina i latou sa alu ese atu o ia mai ia i latou, ma afio ae i le lagi. Ma sa vaai le au soo ma molimau sa toe afio ae o ia i le lagi.