1 Anajwan ut k’ehomaq reetal, ninye eere naq jo’q’e tixk’oxla li Qaawa’ rik’in xchaab’ilal xna’leb’ naq us naq li yehom a’in taawulaq rik’ineb’ laj Gentil jo’ chanru li raatin, rik’in a’an naru teenaw naq li sumwank li kixk’uub’ li Yuwa’b’ej rik’ineb’ li ralal xk’ajol laj Israel, chirix xk’ojob’ankileb’ wi’chik sa’ xch’och’il li reechanihomeb’, ak xtikla xtz’aqob’resinkil ru.

2 Ut naru teenaw naq li raatin li Qaawa’, li yeeb’il xb’aaneb’ li santil profeet, taatz’aqloq ru chixjunil, ut moko na’aje’ ta ru naq teeye naq li Qaawa’ naxb’ay chaq xk’ulunik rik’ineb’ li ralal xk’ajol laj Israel.

3 Ut moko na’aje’ ta ru naq teek’oxla sa’ eech’ool naq maak’a’ xyaalal li aatin kiyeeman chaq, xb’aan naq k’ehomaq reetal, li Qaawa’ taajultiko’q re lix sumwank li kixk’uub’ choq’ re lix tenamit re lix junkab’al laj Israel.

4 Ut naq teeril li yehom a’in chi k’utmank sa’ eeyanq, rik’in a’an moko na’aje’ ta chik naq teetz’eq cherix lix b’aanuhom li Qaawa’, xb’aan naq li yok’leb’ ch’iich’ re lix raqb’a-aatin wan sa’ xnim uq’, ut k’ehomaq reetal, sa’ li kutan a’an, wi neketz’eq cherix lix b’aanuhom, tixk’e re textawe’q sa’ junpaat xb’aan.

5 Rahilal sa’ xb’een li ani natz’eqok chirix lix b’aanuhom li Qaawa’, relik chi yaal, rahilal sa’ xb’een li ani taatz’eqtaananq re xyaalal li Kristo ut lix k’anjel!

6 Relik chi yaal, rahilal sa’ xb’een li ani natz’eqtaanank re xyaalal lix k’utb’esihom li Qaawa’, ut li taayehoq re naq li Qaawa’ ink’a’ chik nak’anjelak rik’in li k’utb’esinb’il na’leb’, chi moko rik’in profeetil aatin, chi moko rik’ineb’ li maatan, chi moko rik’ineb’ li jalanil aatinob’aal, chi moko rik’ineb’ li k’irtesink, chi moko rik’in xwankil li Santil Musiq’ej!

7 Relik chi yaal, rahilal ut sa’ xb’een li ani taayehoq re sa’ li kutan a’an, re xk’ulb’al xtumin, naq maajun sachb’a-ch’oolej naru nawan chi k’anjelanb’il xb’aan li Jesukristo, xb’aan naq ani nab’aanunk re a’in taawanq chanchan li alalb’ej re li sachk, li moko kiwan ta ruxtaanankil ru, jo’ chanru li raatin li Kristo!

8 Relik chi yaal, ut moko na’aje’ ta chik ru naq texhasb’aq, chi moko naq teetz’eq cherix, chi moko naq teeb’atz’unleheb’ laj Judio, chi moko yalaq ani chik xkomon li rela’ lix junkab’al laj Israel; xb’aan naq k’ehomaq reetal, li Qaawa’ najultiko’ re lix sumwank choq’ reheb’, ut tixb’aanu reheb’ jo’ chanru li k’a’ru kixxaqab’ wi’ aatin.

9 Jo’kan naq moko na’aje’ ta ru naq teek’oxla naq texruuq chixsutq’isinkil lix nim uq’ li Qaawa’ sa’ lix tz’e, re naq a’an ink’a’ tixk’anjela li raqb’a-aatin choq’ re xtz’aqob’resinkil ru li sumwank li kixk’uub’ choq’ re lix junkab’al laj Israel.