Kapitulo 29
Ang pag-abot sa Basahon ni Mormon mao ang usa ka timailhan nga ang Ginoo nagsugod na sa pagpundok sa Israel ug sa pagtuman sa Iyang mga pakigsaad—Kadtong mosalikway sa Iyang mga pagpadayag ug mga gasa sa ulahing mga adlaw pagatunglohon. Mga A.D. 34–35.
1 Ug karon tan-awa, sultihan ko kamo nga kon makita sa Ginoo nga haom sa iyang kaalam, nga kini nga mga pamahayag moabot ngadto sa mga Hentil sumala sa iyang pulong, nan inyong masayran nga ang pakigsaad nga gihimo sa Amahan ngadto sa mga anak ni Israel, kabahin sa ilang pagpahiuli ngadto sa mga yuta nga ilang panulondon, nagsugod na sa pagkatuman.
2 Ug inyong masayran nga ang mga pulong sa Ginoo, nga gipamulong sa balaan nga mga propeta, ang tanan matuman; ug kamo dili na kinahanglan nga moingon nga ang Ginoo naglangan sa iyang pag-anhi sa mga anak ni Israel.
3 Ug dili na kamo kinahanglan nga maghanduraw sa inyong kasingkasing nga ang mga pulong nga gipamulong walay kapuslanan, kay tan-awa, ang Ginoo mohinumdom gayod sa iyang pakigsaad nga iyang gihimo ngadto sa iyang katawhan sa balay ni Israel.
4 Ug kon kamo makakita nga kini nga mga pamahayag moabot taliwala kaninyo, nan kamo dili na kinahanglan nga motamay sa mga buhat sa Ginoo, kay ang espada sa iyang kaangayan anaa sa iyang tuo nga kamot; ug tan-awa, niana nga adlaw, kon kamo motamay sa iyang mga buhat, siya mosugo nga kini sa dili madugay mobuntog kaninyo.
5 Pagkaalaot kaniya nga nagtamay sa mga buhat sa Ginoo; oo, pagkaalaot kaniya nga molimod ni Kristo ug sa iyang mga buhat!
6 Oo, pagkaalaot kaniya nga molimod sa mga pagpadayag sa Ginoo, ug moingon nga ang Ginoo dili na mobuhat pinaagi sa mga pagpadayag, o pinaagi sa mga panagna, o pinaagi sa mga gasa, o pinaagi sa mga pinulongan, o pinaagi sa mga pagpang-ayo, o pinaagi sa gahom sa Espiritu Santo!
7 Oo, ug pagkaalaot kaniya nga moingon niana nga adlaw, aron makaangkon og bahandi, nga wala nay milagro nga mahimo ni Jesukristo; kay siya nga nagbuhat niini mahisama sa anak sa kapildihan, kang kinsa walay ihatag nga kaluoy, sumala sa pulong ni Kristo!
8 Oo, ug dili na kinahanglan nga ikaw mobiaybiay, ni motamay, ni mobugal-bugal sa mga Judeo, o ni bisan kinsa nga salin sa balay ni Israel; kay tan-awa, ang Ginoo mohinumdom sa iyang pakigsaad ngadto kanila, ug siya mobuhat ngadto kanila sumala sa iyang gipanumpa.
9 Busa kamo dili magdahom nga kamo makahimo sa pagliso sa tuo nga kamot sa Ginoo ngadto sa wala, nga siya dili mopahamtang og paghukom ngadto sa katumanan sa pakigsaad nga iyang gihimo ngadto sa balay ni Israel.