1 Ita napasamak iti maikanem a tawen ti panagturay dagiti ukom kadagiti tattao ni Nephi, awan ti panagsususik wenno gubgubat iti daga a Zarahemla;

2 Ngem nagrigat dagiti tattao, wen, nalabes a panagrigat iti pannakapukaw dagiti kabsatda, ken kasta met ti pannakapukaw dagiti arban ken dagiti pangenda, ken kasta met ti pannakapukaw dagiti kinelleng a bukbukelda, a nabaddekbaddekan ken dinadael dagiti Lamanita.

3 Ket nalabes unay ti pannakaparigatda isu a nagladingit ti tunggal kararua; ket namatida nga isu ti panangukom ti Dios a naiyeg kadakuada gapu iti kinadakesda ken dagiti kinarimonda; ngarud nariingda iti panglaglagip iti pagrebbenganda.

4 Ket rinugianda a binangon a naan-anay ti simbaan; wen, ket adu ti nabuniagan iti dandanum ti Sidon ken kimmappon iti simbaan ti Dios; wen, nabuniaganda iti ima ni Alma, a nakonsagraran a nangato a saserdote kadagiti tattao ti simbaan, babaen ti ima ti amana a ni Alma.

5 Ket napasamak iti maikapito a tawen ti panagturay dagiti ukom adda agarup a tallo ribu ken lima gasut a kararua a nangikappon iti bagbagida iti simbaan ti Dios ket nabuniaganda. Ket kasta ti panaggibus ti maikapito a tawen ti panagturay dagiti ukom kadagiti tattao ni Nephi; ket nagtultuloy ti kappia iti dayta a panawen.

6 Ket napasamak iti maikawalo a tawen a panagturay dagiti ukom, a nagbalin a palangguad dagiti tattao ti simbaan, gapu iti aglaplapusanan a kinabaknangda, ken dagiti napino a sedada, ken dagiti nalamuyot ti pannakaabelna a lino, ken gapu iti adu nga arban ken pangenda, ken ti balitok ken pirakda, ken amin a kita ti napateg a banagda, a naalada kadagiti pamastrekanda; ket dagitoy a bambanag ti namagtangig iti kinapalanguad kadagiti matmatada, agsipud ta rinugianda ti nagaruat iti nangina a kawes.

7 Ita daytoy ti gapu ti adu a panagrigat ni Alma, wen, ken iti adu pay tao a nakonsagraran ni Alma nga agbalin a maestro, ken saserdote, ken elder iti simbaan; wen, adu kadakuada ti limdaang unay gapu iti kinadakes a nakitada a nangrugin kadagiti tattaoda.

8 Ta nakita ken naimatanganda nga addaan iti nakaro a ladingit a nangrugi a nagpangato iti kinapalanguad ti matmata dagiti tattao ti simbaan, ken naituon dagiti pusoda iti kinabaknang ken kadagiti awan kaes-eskanna a bambanag iti lubong, ta nangrugida a mananglais, iti tunggal maysa, ket rinugianda ti nangidadanes kadagiti saan a mamati iti maitutop iti kayat ken pakaragsakanda.

9 Ket kasta, iti daytoy a maikawalo a tawen ti panagturay dagiti ukom, nangrugi ti nalabes a panagsusussik dagiti tattao ti simbaan; wen, adda dagiti innapal, ken riri, ken pammadakes, ken panangidadanes, ken kinapalangguad, a nangrimbaw pay ti kinapalangguad dagidiay saan a kameng ti simbaan ti Dios.

10 Ket kasta ti naggibusan ti maikawalo a tawen ti panagturay dagiti ukom; ken ti kinadakes iti simbaan ti dakkel a lapped kadagiti saan a kameng ti simbaan; ket kasta ti nangrugian ti pannakatubeng ti irarang-ay ti simbaan.

11 Ket napasamak iti nangrugian ti maikasiam a tawen, nakita ni Alma ti kinadakes iti simbaan, ken nakitana met a nangrugi nga inturong ti pagwadan ti simbaan dagiti saan a mamatpati manipud iti maysa a kinadangkes a maiturong iti sabali, kasta ti pannakayeg ti pannakadadael dagiti tattao.

12 Wen, nakitana ti nalabes a saan a panagpapatas dagiti tattao, intangig dagiti sumagmamano dagiti bagbagida iti kinapalanguadda, umsienda dagiti dadduma, tallikudanda dagiti agkasapulan ken dagiti lamulamo ken dagiti mabisin, ken dagiti mawaw, ken dagiti masakit ken marigatan.

13 Ita dakkel daytoy a gapu ti panagladingit dagiti tattao, idinto nga agpakumbaba dagiti dadduma, tumultulong kadagiti agkasapulan iti tulongda, a kas iti panangiburay iti kinabaknangda kadagiti napanglaw ken agkasapulan, panangtaraon kadagiti mabisin, ken panagibtur iti amin a kita ti rigrigat, a para ken ni Crsito ti gapuna, a nasken nga umay a mayannurot iti espiritu ti pammadto;

14 Mangnamnama iti dayta nga aldaw, iti kasta mamagtalinaed iti pannakapakawan dagiti basolda; ta napnoda iti nalaus a rag-o gapu iti panagungar dagiti natay, a mayannurot iti pagayatan ken bileg ken panangisalakan ni Jesucristo manipud kadagiti bedbed ni patay.

15 Ket ita napasamak a ni Alma, gapu ta nakitana ti rigrigat dagiti napakumbaba a pasurot ti Dios, ken ti pannakaidadanes a naigabsuon kadakuada babaen dagiti nabati a taona, ken pannakakitana ti amin a saan a panagpapatasda, nangrugi nga agladingit iti napalalo; nupay kasta saan a pinaay ti Espiritu ti Apo.

16 Ket pinilina ti masirib a lalaki a maibilang kadagiti panglakayen ti simbaan, ken inikkanna iti pannakabalin a mayannurot iti timek dagiti tattao, tapno maikkan iti bileg a mangipaulog kadagiti linteg a mayannurot kadagiti linteg a naiteden, ken ipatungpalna a mayannurot iti kinadakes ken dagiti krimen dagiti tattao.

17 Ita Nephihah ti nagan daytoy a lalaki, ket natudingan a pangulo nga ukom; ket nagtugaw iti pangukoman tapno mangukom ken mangituray kadagiti tattao.

18 Ita saan nga inted ni Alma kenkuana ti saad a kas nangato a saserdote ti simbaan, ngem pinagtalinaedna ti saad ti nangato a saserdote kenkuana; ngem intedna ti pangukoman ken ni Nephihah.

19 Ket inaramidna daytoy tapno isuna mismo ti agsursor kadagiti taona, wenno kadagiti tattao ni Nephi, tapno maikasabana ti balikas ti Dios kadakuada, tapno riingenna ida ti panglaglagip iti pagrebbenganda, ken tapno ibabana, babaen ti balikas ti Dios, amin a kinapalangguad ken kinasikap ken amin a panagsusussik nga adda kadagiti taona, ta makitkitana nga awan ti pamuspusan a mangalaw kadakuada malaksid ti panangibinglayna iti natarnaw a pammaneknek a mangtubngar kadakuada.

20 Ket kasta ti naggibusan ti maikasiam a tawen ti panagturay dagiti ukom kadagiti tattao ni Nephi, intalek ni Alma ti pangukoman ken ni Nephihah, ket impamaysana a mismo ti bagina iti nangato a kinasaserdote ti nasantuan nga orden ti Dios, iti pammaneknek iti balikas, a mayannurot iti espiritu ti paltiing ken pammadto.