1 I teienei, i muri a’era, ’ua ha’amata Alama i te a’o atu i te parau a te Atua i te mau ta’ata, nā mua roa i te fenua ra nō Zarahemela, e mai reira atu i te mau fenua ē hope roa a’e.

2 ’E teie te mau parau tāna i parau atu i te mau ta’ata i roto i te ’ēkālesia i fa’ati’ahia i te ’oire nō Zarahemela, mai te au i tāna iho pāpa’a parau, i te nā-’ō-ra’a mai ē :

3 ’Ua fa’atōro’ahia vau, ’o Alama, e tō’u metua tāne e Alama ’ei tahu’a rahi i ni’a iho i te ’ēkālesia a te Atua ; ’e tei iāna ra ho’i te mana ’e te ha’amanara’a nō ’ō mai i te Atua ’ia rave i teie mau mea ; inaha, tē parau atu nei au ia ’outou na, ’ua ha’amata ’oia i te fa’ati’a i te ’ēkālesia i ni’a i te fenua i te mau ’ōti’a o te fenua ra nō Nephi ; ’oia ïa, i te fenua i parauhia te fenua nō Moromona ; ’oia ïa, ’e ’ua bāpetizo ’oia i tōna mau taea’e i roto i te mau pape o Moromona.

4 ’E inaha, tē parau atu nei au ia ’outou na, ’ua fa’aorahia rātou i te rima o te mau ta’ata o te ari’i ra ’o Noa, nā roto i te aroha ’e te mana o te Atua.

5 ’E inaha, i muri iho i te reira, ’ua fa’atītīhia rātou e te rima o te mau ’āti Lamana i roto i te mēdēbara, ’oia ïa, tē parau atu nei au ia ’outou na, tei roto rātou i te fa’atītīra’a, ’e ’ua fa’aora fa’ahou te Fatu ia rātou mai roto mai i te fa’atītīra’a nā roto i te mana o tāna ra parau ; ’e ’ua ’āfa’ihia mai tātou i teie nei fenua, ’e i’ō nei tātou i ha’amata ai i te fa’ati’a i te ’ēkālesia a te Atua i ni’a i teie nei fenua ē ’ati noa a’e.

6 ’E i teienei, inaha, tē parau atu nei au ia ’outou na, e tō’u mau taea’e, ’outou nō teie nei ’ēkālesia, ’ua tāmau māite ānei ’outou i te ha’amana’o i te fa’atītīra’ahia tō ’outou ra mau metua ? ’Oia ïa, ’ua tāmau māite ānei ’outou i te ha’amana’o i tōna ra aroha ’e te fa’a’oroma’ira’a roa ia rātou ? ’E ’oia ato’a, ’ua tāmau māite ānei ’outou i te ha’amana’o ē nāna tō rātou vārua i fa’aora mai roto mai i hade ?

7 Inaha, nāna ho’i tō rātou ’ā’au i fa’afāriu mai ; ’oia ïa, nāna i fa’aara ia rātou i te vare’a ta’oto rahi, ’e ’ua ara a’era rātou i te Atua ra. Inaha, tei roto roa rātou i te pōiri ; ’āre’a rā ’ua ha’amāramaramahia tō rātou ’ā’au i te māramarama o te parau mure ’ore ra ; ’oia ïa, ’ua ru’uru’uhia ho’i rātou e te mau tā’amu nō te pohe, ’e te mau fifi nō hade, ’e ’ua tīa’i ā te pohe mure ’ore ia rātou.

8 ’E i teienei tē ui atu nei au ia ’outou na, e tō’u mau taea’e, ’ua ha’amouhia ānei rātou ? Inaha, tē parau atu nei au ia ’outou na, ’Aita roa rātou i nā-reira-hia.

9 ’E tē ui fa’ahou atu nei au, ’ua motu ānei te mau tā’amu nō te pohe, ’e te mau fifi o hade i ru’uru’u ia rātou ra, ’ua matara ānei te reira ? Tē parau atu nei au ia ’outou na, ’oia ïa, ’ua matara ïa, ’e ’ua ’oa’oa tō rātou ’ā’au, ’e ’ua hīmene a’era rātou ma te aroha fa’aora. ’E tē parau atu nei au ia ’outou na ē ’ua fa’aorahia rātou.

10 ’E i teienei tē ui atu nei au ia ’outou na, e mea nāhea rātou i te fa’aorahia ? ’Oia ïa, e mea nāhea tō rātou ti’aturira’a ’ia fāri’i i te fa’aorara’a ? E aha atu ā ho’i te mea i matara ai rātou i te mau tā’amu nō te pohe, ’oia ïa, ’e i te mau fifi nō hade ra ?

11 Inaha, ’ua ti’a ho’i iā’u ’ia fa’a’ite atu ia ’outou na ē—’aita ānei tō’u ra metua tāne ’o Alama i ti’aturi i te mau parau i parauhia e te vaha o Abinadi ? E ’ere ānei ’oia i te hō’ē peropheta mo’a ? ’Aita ānei ’oia i parau i te mau parau a te Atua, ’e ’ua ti’aturi tō’u metua tāne o Alama i te reira ?

12 ’E mai te au i tōna ra fa’aro’o ’ua tupu te hō’ē tauira’a rahi i roto i tōna ra ’ā’au. Inaha tē parau atu nei au ia ’outou na ē, e parau mau ana’e te reira.

13 ’E inaha, ’ua a’o atu ’oia i te parau i tō ’outou ra mau metua, ’e ’ua tupu ato’a te mau tauira’a rahi i roto i tō rātou mau ’ā’au, ’e ’ua fa’aha’eha’a rātou ia rātou iho ’e ’ua tu’u i tō rātou ti’aturira’a i mua i te Atua ora mau ra. ’E inaha, e feiā ha’apa’o maita’i rātou ē tae roa atu i te hope’a ra ; nō reira ’ua fa’aorahia rātou.

14 ’E i teienei, inaha, tē ui atu nei au ia ’outou na, e tō’u mau taea’e nō te ’ēkālesia, ’ua fānau-vārua-hia ānei ’outou i tā te Atua ra ? ’Ua fāri’i ānei ’outou i tōna hōho’a i roto i tō ’outou nā mata ? ’Ua ’itea ānei ia ’outou teie tauira’a rahi i roto i tō ’outou na ’ā’au ?

15 Tē fa’a’ohipa ra ānei ’outou i te fa’aro’o i roto i te fa’aorara’a nāna ’o tei hāmani ia ’outou ? Tē hi’o ātea ra ānei ’outou ma te mata fa’aro’o, ’e tē ’ite atu ra ānei ’outou i teie tino tāhuti i te fa’ati’ara’ahia ’ei tino tāhuti ’ore, ’e teie nei tino pohe noa i te fa’ati’ara’ahia ’ei tino pohe ’ore, ’e i te ti’ara’a i mua i te Atua ia ha’avāhia mai te au i te mau ’ohipa i ravehia i te tino tāhuti nei ?

16 Tē parau atu nei au ia ’outou na, tē mana’o na ānei ’outou i roto ia ’outou iho ē, tē fa’aro’o ra ’outou i te reo o te Fatu, i te nā-’ō-ra’a mai ia ’outou i taua mahana ra ē : ’A haere mai iā’u nei, ’o ’outou tei ha’amaita’ihia, inaha ho’i, ’ua riro tā ’outou mau ’ohipa i rave ’ei mau ’ohipa parauti’a i ni’a i te fenua nei ?

17 ’E ’aore rā tē mana’o ra ānei ’outou i roto ia ’outou iho ē, e ti’a ia ’outou ’ia ha’avare i te Fatu i taua mahana ra, ’a parau atu ai ē—E te Fatu, ’ua riro tā mātou mau ’ohipa i rave i ni’a i te fenua nei ’ei mea parauti’a—’e e fa’aora ïa ’oia ia ’outou ?

18 ’E ’aore rā, tē ’ite ra ānei ’outou ia ’outou iho i te ’āfa’ira’ahia i mua i te ha’avāra’a a te Atua ma te ’ā’au i ’ī i te ’oto ’e te taiā, ma te ha’amana’o i tā ’outou mau ’ohipa hape ato’a, ’oia ïa, ma te ha’amana’o pāpū i tā ’outou mau ’ohipa ’ī’ino ato’a, ’oia ïa, ma te ha’amana’o pāpū ē, ’ua pāto’i ’outou i te mau fa’auera’a a te Atua ?

19 Tē parau atu nei au ia ’outou na ē, e ti’a ānei ia ’outou ’ia hi’o atu i ni’a i te Atua i taua mahana ra ma te ’ā’au parauti’a ’e te rima mā ? Tē parau atu nei au ia ’outou na ē, e ti’a ānei ia ’outou ’ia hi’o atu i ni’a, ma te hōho’a o te Atua i ’ō’otihia i ni’a i tō ’outou ra mata ?

20 Tē parau atu nei au ia ’outou na ē, e ti’a ānei ia ’outou ’ia mana’o ē, e fa’aorahia ’outou ’e i tu’u na ho’i ’outou ia ’outou iho ’ei mau tāvini nō te diabolo ?

21 Tē parau atu nei au ia ’outou na ē, e ’ite ’outou i taua mahana ra ē, ’aita ’outou e ti’a ’ia fa’aorahia, nō te mea ’aita roa te hō’ē ta’ata e fa’aorahia, maori rā ’ua horoihia tōna mau ’ahu ’e ’ua teatea ; ’oia ïa, e mea ti’a roa i tōna mau ’ahu ’ia tāmāhia, ’e ’ia horoihia te mau tāfetafeta ato’a nā roto i te toto nōna o tō tei parauhia e tō tātou mau metua, ’o tē haere mai nō te fa’aora i tōna mau ta’ata i tā rātou mau hara.

22 ’E i teienei, tē ui atu nei au ia ’outou na, e tō’u mau taea’e, e aha ïa tō ’outou mana’o, ’ia ti’a atu ’outou i mua i te ha’avāra’a a te Atua, ma tō ’outou mau ’ahu i tāfetafeta i te toto ’e te mau huru ’ohipa vi’ivi’i ato’a ra ? Inaha, e aha tā teie mau mea e fa’a’ite fa’ahapa mai ia ’outou i reira ?

23 Inaha, ’aita ānei te reira e fa’a’ite pāpū mai ē, e mau ta’ata taparahi ta’ata ’outou, ’oia ïa, ’e ’ua rave ato’a i te mau huru ’ohipa ’ī’ino ato’a ?

24 Inaha, e tō’u mau taea’e, tē mana’o ra ānei ’outou ē, e vāhi tō taua mau huru ta’ata ra nō te pārahi i te bāsileia o te Atua, i pīha’i iho ia Aberahama, ’e ia Isaaka, ’e ia Iakoba, ’e i te mau peropheta mo’a ato’a ho’i, ’o tei mā tō rātou mau ’ahu ’e te pōra’o ’ore, ’e te vi’ivi’i ’ore ’e te teatea ?

25 Tē parau atu nei au ia ’outou na ē, ’Aita roa ; maori rā ’ia fa’ariro ’outou i Tei Hamani ia tātou nei ’ei ta’ata ha’avare mai te mātāmua mai ā ; ’e ’aore rā ’ia mana’o ’outou ē, e ta’ata ha’avare ’oia mai te mātāmua mai ā ; ’aita e ti’a ia ’outou ’ia mana’o ē, e vāhi tō taua huru ta’ata ra i te bāsileia o te ao ra ; ’āre’a rā e ti’avaru-’ē-hia rātou i rāpae nō te mea e mau tamari’i rātou nō te bāsileia o te diabolo.

26 ’E i teienei, inaha, tē parau atu nei au ia ’outou na, e tō’u mau taea’e, mai te mea ē ’ua ’itea ānei ia ’outou te tauira’a o tō ’outou ’ā’au, ’e mai te mea ē ’ua tupu tō ’outou hina’aro ’ia hīmene i te hīmene nō te aroha fa’aora, tē ui atu nei au ia ’outou ē, ’ua ti’a ānei ia ’outou i te hina’aro i te reira i teienei ?

27 Tē haere ra ānei ’outou ma te hapa ’ore i mua i te Atua ? E ti’a ānei ia ’outou ’ia parau i roto ia ’outou iho, mai te mea ē ’ua fa’ata’ahia ’outou ’ia pohe i teie nei taime, ’e ’ua nava’i tō ’outou huru ha’eha’a ? ’E ’ua tāmāhia ’e ’ua fa’ateateahia tō ’outou ra mau ’ahu i te toto o te Mesia, ’o tē haere mai e fa’aora i tōna ra mau ta’ata i tā rātou mau hara ?

28 Inaha, ’ua fa’a’ore ānei ’outou i te te’ote’o ? Tē parau atu nei au ia ’outou na ē, mai te mea ē ’aita ’outou i nā reira, ’aita ato’a ïa ’outou i ineine nō te fārerei atu i te Atua. Inaha, e mea ti’a ia ’outou ’ia fa’aineine vave ; tē fātata mai ra ho’i te bāsileia o te ao, ’e ’aita o taua ta’ata ra e ora mure ’ore.

29 Inaha, tē ui nei au ē, tē vai ra ānei te hō’ē i rotopū ia ’outou ’o tei ’ore i fa’a’ore i te nounou ? Tē parau atu nei au ia ’outou na ē, ’aita ïa ’oia i ineine ; ’e ’ua hina’aro vau ’ia fa’aineine vave ’oia, tē fātata mai nei ho’i te hora ; ’e ’aita i ’itea iāna te taera’a mai o taua tau ra ; ’e ’aita roa ’oia e ’iteahia ma te hapa ’ore.

30 ’E teie fa’ahou ā tē parau atu nei au ia ’outou na ē, tē vai ra ānei te hō’ē i rotopū ia ’outou ’o tei vahavaha atu i tōna ra taea’e, ’e ’aore rā ’o tei ha’apu’e i te mau hāmani-’ino-ra’a i ni’a iāna ra ?

31 ’Auē ho’i ē terā ra huru ta’ata ē, ’aita ’oia i ineine, ’e tē fātata mai ra te tau e mea ti’a roa iāna ’ia tātarahapa, ’e ’aore rā e ’ore ’oia e fa’aorahia !

32 ’Oia ïa, ’auē ho’i ’outou ato’a e te mau ta’ata rave i te mau ’ohipa ’ī’ino ē ; ’a tātarahapa, ’a tātarahapa, e nā te Fatu te Atua i parau mai i te reira.

33 Inaha, tē fa’atae mai ra ’oia i te parau anira’a i te mau ta’ata ato’a, ’oia ho’i tē fa’atorohia ra te rima o te aroha ia rātou ra ; ’e tē nā ’ō mai ra ho’i ’oia ē : ’A tātarahapa, ’e e fāri’i au ia ’outou.

34 ’Oia ïa, tē nā ’ō mai ra ’oia : ’A haere mai ’outou iā’u nei ’e e fāri’i ’outou i te mā’a nō te tumu rā’au nō te ora ; ’oia ïa, e ’amu ’outou i te pāne nō te ora, ’e e inu ho’i i te mau pape nō te ora ma te ti’amā.

35 ’Oia ïa, ’a haere mai ’outou iā’u nei ’e ’a fa’atupu i te mau ’ohipa parauti’a, ’ia ’ore ’outou ’ia tāpūhia i raro ’e ’ia hurihia i roto i te auahi ra—

36 Inaha ho’i, tē fātata mai nei te tau, ’e ’oia ’o tei ’ore i fa’ahotu mai i te mā’a maita’i, ’e ’aore rā ’o tei ’ore i rave i te mau ’ohipa parauti’a, e fāri’i ïa ’oia i te autā ’e te ’oto.

37 ’O ’outou e te mau ta’ata rave i te mau ’ohipa ’ī’ino ē, ’e tei fa’ateiteihia i roto i te mau mea faufa’a ’ore o teie nei ao, ’e ’o ’outou tei fa’ahua ’ite i te mau ’ē’a nō te parauti’a ’āre’a rā tei haere ’ē nā te ’ē’a mai te māmoe tīa’i ’ore ra, ’ua ti’aoro noa mai te tīa’i māmoe ia ’outou, ’e tē ti’aoro noa mai nei ā ia ’outou na, ’aore rā ’outou e fa’aro’o i tōna ra reo !

38 Inaha, tē parau atu nei au ia ’outou na ē, tē ti’aoro noa mai nei te tīa’i māmoe maita’i ia ’outou na, ’oia ïa, tē ti’aoro nei ho’i ’oia ia ’outou i tōna iho i’oa, ’oia ho’i, i te i’oa o te Mesia ; ’e mai te mea ē ’aita ’outou e fa’aro’o i te reo o te tīa’i māmoe maita’i ra, i te i’oa i pi’ihia ai ’outou ra, inaha, e ’ere ïa ’outou i te māmoe nā te tīa’i māmoe maita’i ra.

39 ’E i teienei mai te mea e ’ere ’outou i te māmoe nā te tīa’i māmoe maita’i ra, nō teihea nana māmoe ïa ’outou ? Inaha, tē parau atu nei au ia ’outou na ē, ’o te diabolo ïa tō ’outou tīa’i māmoe, ’e nō tāna nana māmoe ho’i ’outou ; ’e i teienei, ’o vai tē ti’a ’ia huna i teie ? Inaha, tē parau atu nei au ia ’outou na ē, ’o ’oia tē huna i teie nei mau parau, e ta’ata ha’avare ’oia ’e e tamari’i ho’i ’oia nā te diabolo.

40 ’E tē parau atu nei ho’i au ia ’outou na ē, ’o te mau mea maita’i ra nō ’ō mai ïa i te Atua ra ; ’e te mau mea ’ino ra nō ’ō mai ïa i te diabolo ra.

41 Nō reira, ’ia fa’atupu te hō’ē ta’ata i te mau ’ohipa maita’i, tē fa’aro’o ra ïa ’oia i te reo o te tīa’i māmoe maita’i, ’e tē pe’e atu ra ïa ’oia iāna ; ’āre’a rā te ta’ata ’o tē fa’atupu ra i te mau ’ohipa ’ī’ino, ’ua riro ïa ’oia ’ei tamari’i nā te diabolo, ’e ’ua fa’aro’o ’oia i tōna ra reo ’e tē pe’e atu ra ’oia iāna.

42 ’E ’o ’oia ’o tē nā reira e fāri’i ïa ’oia i tāna mau utu’a nō ’ō mai iāna ra ; nō reira, te mau utu’a e roa’a i te ta’ata ’o tei nā reira ’o te pohe ïa i tā te mau mea nō te parauti’a ra, ’o ’oia i pohe i te mau ’ohipa maita’i ato’a.

43 ’E i teienei, e tō’u mau taea’e, tē hina’aro nei au ’ia fa’aro’o mai ’outou iā’u nei, tē parau nei ho’i au ma te pūai o tō’u nei vārua ; inaha ho’i, ’ua parau pāpū atu vau ia ’outou na ’ia ’ore ’outou ’ia hape, ’oia ho’i ’ua parau atu vau mai te au i te mau fa’auera’a a te Atua.

44 ’Ua pi’ihia ho’i au ’ia parau atu mai teie te huru, mai te au i te fa’anahora’a mo’a a te Atua tei roto ia Iesu Mesia ra ; ’oia ïa, ’ua fa’auehia vau ’ia ti’a atu ’e ’ia fa’a’ite pāpū atu i teie nei feiā i te mau mea i parauhia e tō tātou mau metua nō ni’a i te mau mea e tupu a muri atu.

45 ’E ’eiaha te reira ana’e. ’Aita ānei ’outou i mana’o ē, ’ua ’ite au iho nei i teie nei mau mea ? Inaha, tē fa’a’ite pāpū atu nei au ia ’outou na ē, ’ua ’ite mau vau ē e parau mau ana’e teie mau mea ’o tā’u i parau iho nei. ’E i tō ’outou mana’ora’a, e mea nāhea vau i ’ite ai i te parau mau nō te reira ?

46 Inaha, tē parau atu nei au ia ’outou na ē, ’ua fa’a’itehia mai te reira iā’u nā roto i te Vārua Mo’a o te Atua. Inaha ho’i, ’ua ha’apae a’enei au i te mā’a ’e ’ua pure a’enei ho’i au e rave rahi mau mahana, ’ia ’ite au iho nei i teie nei mau mea. ’E i teienei ’ua ’ite māite au ē, e parau mau ïa ; nā te Fatu te Atua ho’i i fa’a’ite mai i te reira iā’u nei nā roto i tōna ra Vārua Mo’a ; ’e ’o teie ïa te vārua nō te heheura’a i roto iā’u nei.

47 ’E ’oia fa’ahou, tē parau atu nei au ia ’outou na ē, ’ua heheuhia mai iā’u nei ē, e parau mau te mau parau i parauhia mai e tō tātou mau metua ; ’e i nā reira-mau-hia mai te au i te vārua nō te tohu i roto iā’u nei, ’o tē fa’a’ite-ato’a-hia mai e te Vārua o te Atua.

48 Tē parau atu nei au ia ’outou na ē, ’ua ’ite māite au ē, e parau mau roa te mau mea tā’u e parau atu ia ’outou na nō ni’a i te mau mea e tae mai ; ’e tē parau atu nei au ia ’outou na ē, ’ua ’ite au ē, e tae mai Iesu Mesia, ’oia ïa, te Tamaiti, te Tamaiti fānau tahi a te Metua, tei ’ī i te maita’i, ’e te aroha, ’e te parau mau. ’E inaha, ’o ’oia tē tae mai nō te hōpoi ’ē atu i te hara a tō te ao nei ; ’oia ïa, te mau hara a te mau ta’ata ato’a ’o tē tāmau māite i te ti’aturi i tōna ra i’oa.

49 ’E i teienei, tē parau atu nei au ia ’outou na ē, ’o te fa’anahora’a teie i pi’ihia ai au, ’oia ïa, ’ia a’o atu i tō’u ra mau taea’e herehia, ’oia ïa, ’e i te mau ta’ata e pārahi ra i ni’a i te fenua nei ; ’oia ïa, ’ia a’o atu i te mau ta’ata ato’a, i te ta’ata pa’ari ’e te ta’ata ’āpī, i te feiā tītī ’e te feiā ti’amā ; ’oia ïa, e parau atu vau ia ’outou na e te feiā ruhiruhiā, ’e te feiā huru pa’ari, ’e te u’i ’āpī ; ’oia ïa, ’ia ti’aoro atu ia rātou ’ia tātarahapa ’e ’ia fānau-fa’ahou-hia.

50 ’Oia ïa, tē nā ’ō mai ra te Vārua : ’A tātarahapa, e tō te mau hope’a o te fenua nei, tē fātata mai ra te bāsileia o te ao ra ; ’oia ïa, tē haere mai ra te Tamaiti a te Atua ma tōna ra hanahana, e tōna pūai, ’e te hinuhinu, ’e te mana, ’e te hau. ’Oia ïa, e tō’u mau taea’e here, tē parau atu nei au ia ’outou na ē, tē nā ’ō mai ra te Vārua : ’A hi’o na i te hanahana o te Ari’i o te ao ato’a nei ; ’e ’oia ato’a ’ua fātata roa te Ari’i o te ra’i i te ’ana’ana mai i rotopū i te mau tamari’i a te ta’ata nei.

51 ’E ’oia ato’a ’ua parau mai te Vārua iā’u nei, ’oia ïa, i te pi’ira’a mai iā’u nei ma te reo pūai, i te nā-’ō-ra’a mai ē : ’A haere ti’a atu na ’oe ’e ’a parau atu i teie nei mau ta’ata ē—’A tātarahapa, ’ia ’ore ’outou e tātarahapa, e ’ore roa ’outou e fāri’i i te bāsileia o te ao ra.

52 ’E teie fa’ahou ā tē parau atu nei au ia ’outou na ē, tē nā ’ō mai ra te Vārua : Inaha, tē vai nei ho’i te ’ōpahi i te a’a o te tumu rā’au i teienei ā ; nō reira te mau tumu rā’au ato’a ’aore i fa’ahotu mai i te mā’a maita’i ra, e tāpūhia ïa i raro ’e e hurihia i roto i te auahi ; ’oia ïa, te auahi pohe ’ore ’e ’o tē ’ore e ti’a ’ia tinaihia. Inaha, ’e ’a ha’amana’o ē, nā Tei Mo’a i parau mai i te reira.

53 ’E i teienei, e tō’u mau taea’e here, tē parau atu nei au ia ’outou na ē, ’ua ti’a ānei ia ’outou ’ia pāto’i i teie nei mau parau ; ’oia ïa, ’ua ti’a ānei ia ’outou ’ia ha’apae i teie nei mau mea, ’e ’a ta’ata’ahi ai i Tei Mo’a i raro a’e i tō ’outou ’āvae ; ’oia ïa, ’ua ti’a ānei ia ’outou ia fa’aahaaha i te te’ote’o o tō ’outou ’ā’au ; ’oia ïa, e tāmau noa ānei ’outou i te fa’a’ahu ia ’outou iho i te ahu moni rahi ’e te tu’ura’a atu i tō ’outou ’ā’au i ni’a i te mau mea faufa’a ’ore nō teie nei ao, ’oia ho’i i tā ’outou mau tao’a rahi ?

54 ’Oia ïa, e tāmau noa ānei ’outou i te mana’o ē, e mea maita’i a’e ’outou i te tahi atu ; ’oia ïa, e tāmau noa ānei ’outou i te hāmani ’ino i tō ’outou mau taea’e ’o tei fa’aha’eha’a ia rātou iho, ’e tei haere ho’i mai te au i te fa’anahora’a mo’a a te Atua, i fa’aōhia mai ai rātou i roto i te ’ēkālesia nei, ’e i ha’amo’ahia ho’i rātou e te Vārua Mo’a, ’e ’ua fa’atupu rātou i te mau ’ohipa maita’i i tei au i te tātarahapa—

55 ’Oia ïa, e tāmau noa ānei ’outou i te huri atu i tō ’outou tua i te feiā veve, ’e te nava’i ’ore, ’e i te tāpe’a noa i tā ’outou faufa’a ia rātou ?

56 ’E i te pae hope’a, ’o ’outou ato’a o tē tāmau noa ā i roto i tā ’outou mau ’ohipa ’ī’ino, tē parau atu nei au ia ’outou na ē, ’o rātou ïa teie ’o tē tāpūhia i raro ’e ’o tē hurihia i roto i te auahi, maori rā ’ia tātarahapa vave rātou.

57 ’E i teienei tē parau atu nei au ia ’outou na ē, ’o ’outou ato’a ’o tei hina’aro māite ’ia pe’e mai i te reo o te tīa’i māmoe maita’i ra, ’a haere mai ’outou mai rotopū mai i te mau ta’ata ’ī’ino, ’e ’a fa’ata’a ’ē mai ia ’outou, e ’eiaha ’outou e rave noa atu i tā rātou mau mea vi’ivi’i ra ; ’e inaha, e paraihia tō rātou mau i’oa, ’e ’aita roa ho’i te i’oa o te mau ta’ata parauti’a ’ore e tai’ohia i rotopū i te i’oa o te feiā parauti’a ; ’ia tupu te parau a te Atua, ’o tei nā ’ō mai ē : E ’ore roa te i’oa o te mau ta’ata ’ī’ino e ’āmuihia i te i’oa o tō’u ra mau ta’ata.

58 ’E e pāpa’ihia ho’i te i’oa o te feiā parauti’a i roto i te buka nō te ora, ’e e hōro’a atu vau ia rātou i te hō’ē pārahira’a i tō’u ra rima atau. ’E i teienei, e tō’u mau taea’e, e aha tā ’outou parau nō te pāto’i mai i teie ? Tē parau atu nei au ia ’outou na ē, mai te mea e pāto’i mai ’outou i te reira, ’aita roa ïa e pe’ape’a, nō te mea ’ia fa’atupuhia te parau a te Atua e ti’a ai.

59 Nō te mea ’o vai ïa tīa’i māmoe i rotopū ia ’outou na e rave rahi tāna māmoe, ’e ’aita ’oia e tīa’i māite ia rātou ’ia ’ore te mau luko e ō mai ’e ’a ’amu ai i tāna nana māmoe ? ’E inaha, mai te mea e ō mai te luko i roto i tāna ra nana māmoe, ’aita ānei ’oia e tīahi ’ē atu iāna ? ’Oia ïa, mai te mea e ti’a iāna, e taparahi ïa ’oia iāna.

60 ’E i teienei tē parau atu nei au ia ’outou na ē, e pi’i noa mai te tīa’i māmoe maita’i ia ’outou na ; ’e ’ia fa’aro’o ’outou i tōna reo, e hōpoi mai ’oia ia ’outou i roto i tāna ra nana, ’e e māmoe ’outou nāna i reira ; ’e tē fa’aue mai nei ’oia ia ’outou, ’eiaha ’outou e vaiiho i te luko taehae ia ō mai i rotopū ia ’outou na, ’ia ’ore ’outou ’ia ha’amouhia.

61 ’E i teienei, tē fa’aue atu nei au, ’o Alama, ’ia ’outou nā roto i te reo nōna ’o tei fa’aue mai iā’u nei, ’ia ha’apa’o ’outou i te mau parau tā’u i parau atu ia ’outou na.

62 Tē parau atu nei au ia ’outou i tō te ’ēkālesia nā roto i te fa’auera’a ; ’e ’ia ’outou e ’ere i tō te ’ēkālesia tē parau atu nei au nā roto i te anira’a, i te nā-’ō-ra’a ē : ’A haere mai ’e ’ia bāpetizohia nō te tātarahapara’a, ’e ’ia ’amu ato’a ’outou i te mā’a nō te tumu rā’au nō te ora.