Il‑Ktieb ta’ Għeter
L‑istorja tal‑Ġarediti, meħuda mill‑erbgħa u għoxrin pjanċa li nstabu min‑nies ta’ Limħi fi żmien is‑sultan Mosija.
Kapitlu 1
Moroni jiġbor fil‑qosor il‑kitbiet ta’ Għeter—Ippreżentat l‑arblu tar‑razza ta’ Għeter—Fit‑Torri ta’ Babel ilsien il‑Ġarediti baqa’ ma tħawwadx—Il‑Mulej iwiegħedhom li kien se jmexxihom lejn art aqwa minn kull art oħra u li se jagħmel minnhom ġens kbir.
1 U issa jiena, Moroni, se nkompli billi nikteb rakkont ta’ dawk l‑abitanti tal‑qedem li kienu jgħammru f’dan ir‑reġjun tat‑tramuntata li ġew meqruda permezz ta’ id il‑Mulej.
2 U r‑rakkont tiegħi se nieħdu mill‑erbgħa u għoxrin pjanċa li kienu nstabu min‑nies ta’ Limħi, liema rakkont jissejjaħ il‑Ktieb ta’ Għeter.
3 U għax nimmaġina li l‑ewwel parti ta’ din l‑istorja, li titkellem dwar il‑ħolqien tad‑dinja, kif ukoll dwar Adam, u li hi rakkont minn dak iż‑żmien sewwasew sa żmien it‑torri l‑kbir, u dwar dak kollu li seħħ fost ulied il‑bnedmin sa dak iż‑żmien, tinsab f’idejn il‑Lhud—
4 Għalhekk jien m’iniex se nikteb dawk il‑ħwejjeġ li seħħew minn żmien Adam sa dak iż‑żmien; iżda huma ġew mitkubin fuq il‑pjanċi; u min isibhom, ikun jista’ jkollu r‑rakkont sħiħ.
5 Iżda araw, jiena m’iniex se nikteb ir‑rakkont kollu, iżda se nikteb biss parti mir‑rakkont, minn żmien it‑torri sa żmien il‑qerda tagħhom.
6 U hu sewwasew dwar dan ir‑rakkont li se nikteb. Dak li kiteb din l‑istorja kien Għeter, u hu kien ġej min‑nisel ta’ Kurjantor.
7 Kurjantor kien bin Moron.
8 U Moron kien bin Għetem.
9 U Għetem kien bin Aħa.
10 U Aħa kien bin Set.
11 U Set kien bin Xiblon.
12 U Xiblon kien bin Kom.
13 U Kom kien bin Kurjantu.
14 U Kurjantu kien bin Amnigadda.
15 U Amnigadda kien bin Aron.
16 U Aron kien ġej min‑nisel ta’ Ħet, li kien bin Ħartom.
17 U Ħartom kien bin Lib.
18 U Lib kien bin Kix.
19 U Kix kien bin Korom.
20 U Korom kien bin Levi.
21 U Levi kien bin Kim.
22 U Kim kien bin Morjanton.
23 U Morjanton kien ġej min‑nisel ta’ Riplakix.
24 U Riplakix kien bin Xeż.
25 U Xeż kien bin Ħet.
26 U Ħet kien bin Kom.
27 U Kom kien bin Kurjantu.
28 U Kurjantu kien bin Għemer.
29 U Għemer kien bin Omer.
30 U Omer kien bin Xule.
31 U Xule kien bin Kib.
32 U Kib kien bin Oriħa, li kien bin Ġared;
33 Liema Ġared ġie mit‑torri l‑kbir, flimkien ma’ ħuh u l‑familji tagħhom, u ma’ xi oħrajn u l‑familji tagħhom, fiż‑żmien li fih il‑Mulej kien ħawwad ilsien in‑nies u fil‑qilla tiegħu kien ħalef li huma kellhom jispiċċaw imxerrdin ma’ wiċċ l‑art kollha; u skont il‑kelma tal‑Mulej in‑nies spiċċaw imxerrdin ma’ kullimkien.
34 U Ġared qal lil ħuh, li kien raġel ta’ statura kbira u b’saħħtu, u li kien ukoll bniedem imbierek bil‑kbir mill‑Mulej: Għajjat lill‑Mulej, biex lilna ma jħawwadniex ma mmorrux nispiċċaw lanqas biss kapaċi nifhmu kliemna.
35 U ġara li ħu Ġared għajjat lill‑Mulej, u l‑Mulej kellu ħniena minn Ġared; għalhekk huwa ma ħawwadx ilsien Ġared; u Ġared u ħuh baqgħu ma tħawdux.
36 Imbagħad Ġared qal lil ħuh: Erġa’ għajjat lill‑Mulej, forsi jerġa’ jraġġa’ lura l‑għadab tiegħu minn dawk li huma sħabna, biex ilsienhom huwa ma jħawwadx.
37 U ġara li ħu Ġared għajjat lill‑Mulej, u l‑Mulej kellu ħniena minn sħabhom kif ukoll mill‑familji tagħhom, u huma baqgħu ma tħawdux.
38 U ġara li Ġared reġa’ kellem lil ħuh u qallu: Mur u staqsi lill‑Mulej jekk huwiex se jkeċċina mill‑pajjiż, u jekk hu sejjer ikeċċina ’l barra mill‑pajjiż, staqsieh fejn għandna mmorru. U min jaf jekk il‑Mulej huwiex se jmexxina lejn xi art aqwa minn kull art oħra fid‑dinja? U jekk huwa jagħmel dan, ejjew inkunu fidili lejn il‑Mulej, ħalli nkunu nistgħu nirċevu l‑art bħala wirtna.
39 U ġara li ħu Ġared għajjat lill‑Mulej skont il‑kliem li kien ġie mlissen minn fomm Ġared.
40 U ġara li l‑Mulej sema’ lil ħu Ġared, u wera ħniena miegħu, u qallu:
41 Mur u iġbor flimkien merħlietek, ta’ kull għamla, sew irġiel u sew nisa; u iġbor ukoll kull għamla ta’ żerriegħa tal‑art; u iġbor flimkien anke l‑familji tiegħek; kif ukoll lil ħuk Ġared u l‑familja tiegħu; u anke lil sħabek u l‑familji tagħhom, u l‑sħab Ġared u l‑familji tagħhom.
42 U meta tagħmel dan għandek tmur fuq quddiem biex lilhom inti tmexxi lejn il‑wied li jinsab fin‑naħa tat‑tramuntana. U jien niltaqa’ miegħek hemm, u lilek immexxi lejn art li hija aqwa minn kull art oħra tad‑dinja.
43 U hemmhekk lilek jiena mbierek flimkien ma’ nislek, u nqajjem għalija ġens kbir minn fost nislek u minn fost nisel ħuk, u minn fost dawk li se jmorru miegħek. U l‑ebda ġens, fuq wiċċ l‑art kollha, mhu se jkun akbar mill‑ġens li jiena se nqajjem minn fost nislek. U jien se nagħmel miegħek dan għax ilek dan iż‑żmien kollu ssejjaħli.