1 Me yibi buch ni Shez, ni gidiiʼ rokʼ Heth—ya Heth e yimʼ ko uyngol, nge gubin chon e tabnaew rokʼ ma kemus ni yigoʼ Shez e magey—ere, Shez e tabab i piiʼ e athamgil nga laniyaenʼ fapi gidiiʼ.

2 Me yibi buch ni Shez e yib ngaenʼ fapi gafgow ni tay e pi chitamangin, ere sunmiy ba gilʼelung nib matʼaw; ya ke yib ngaenʼ ko mang e rinʼ Somoel u napʼan ni fek Jared nge walagen ngar thʼaebew farengi day nib toʼar; ere yaen ko pi kanawoʼ rokʼ Somoel; me diyen ni pagael nge ppin.

3 Ma bin thʼabi ilal e pagael ni fak, ni fithingan e Shez, e togopluw ngakʼ; machane Shez e yimʼ ni liiʼ ba moroʼroʼ, ni bachan fini gel e falaʼab rokʼ, ma arame yib e gapas bayay ngakʼ e chitamangin.

4 Me yibi buch ni chitamangin e falʼeg e binaw ni yoʼor u dakean fare nam, me tabab fapi gidiiʼ ko garar bayay u dakean gaʼangin yang fare nam. Ere Shez e paer nga ri pilibthir; me diyen ni Riplakish. Me yimʼ, ere Riplakish yinʼ luwan ko lung.

5 Me yibi buch ni Riplakish e derinʼ e tin nib matʼaw u mit Somoel, ya boʼor leʼengin nge pi ppin ni yarif rokʼ, me piiʼ e muruwel ni gel ko gidiiʼ ni yibe gafgow i chibiy; arragon, me tomal nag e tax ngoraed; me muruwel ko pi tax nem nge toey bukun e naʼun ni fafalelʼ.

6 Me toey ni fan ngakʼ ba gilʼelung ni rib felʼ yaʼan; me toey e kalbus nib yoʼor, ma chaʼ ni de mʼagaenʼ ngay ni nge piiʼ e tax rokʼ e fek nge yinʼ nga kalbus; ma chaʼ ni deyog ni nge piiʼ e tax rokʼ e ki fek nge yinʼ nga kalbus; me guy rogon ni thingar ra muruwel gaed ni gubin e ngiyalʼ ni fan ko paer roraed; ma chaʼ ni dabi muruwel e guy rogon ngan liiʼ ngemʼ.

7 Ere yog ngakʼ gubin e muruwel rokʼ nib felʼ, arragon ni mus ko gol rokʼ ma kiguy rogon ni ngan beʼech nag doew u lan e kalbus; nge gubin mite muruwel nib felʼ salapen me guy rogon ni ngan falʼeg u lan e kalbus. Me yibi buch ni gafgow nag e gidiiʼ ko pi galong nge pi ngongol rokʼ nib kireb.

8 Ere napʼan ni gagyeg nag e lung u lan aningeg iragag nge lʼagruw e duw me togopluw fapi gidiiʼ ngakʼ; ma arame tabab e mael bayay u lan fare binaw, ni rib almarin ma arame yimʼ Riplakish, ma pi gidiiʼ rokʼ e ni tuluf raed nga wuruʼ fare binaw.

9 Me yibi buch u tomuren bukun e duw, ma Morianton, (niʼir beeʼ ni gidiiʼ rokʼ Riplakish) e kunuy nga taʼabang ba ulung i salthaw ni gidiiʼ ni kan fek yathiraed, ma ranoed iyaen ngar og niged e mael ngakʼ fapi gidiiʼ; me gel lungun u bukun e binaw; mari almarin e mael, ni bukun e duw nʼumngin i napʼan ni paer; me gel lungun u dakean gaʼangin yang fare nam, me pilung nag ir u dakean gaʼangin yang fare nam.

10 Ere tomuren ni ke pilung nag ir me waer nag e muruwel ngakʼ fapi gidiiʼ, niʼir e mʼagaenʼ fapi gidiiʼ riy ngakʼ, mar gapgep niged ni nge mang pilung roraed.

11 Me paer nib felʼ paʼ ngakʼ fapi gidiiʼ, machane ire de felʼ waʼathan ni bachan e pi galong nib yoʼor nibe rinʼ; ere ni chuweg u pʼoewchen Somoel.

12 Me yibi buch ni Morianton e sunmiy bukun e binaw, ma fapi gidiiʼ e rra falaʼab gaed u tane lung rokʼ, ni felʼ rograed ko naʼun, nge gol, nge silber, nge wuldug ni grain, nge gamanman, nge garbaw, nge ku boech banʼen ni kan sulweg ngoraed.

13 Ere Morianton e paer nga ri yoʼor e duw rokʼ, ma aram me yibi diyen ni Kim; ere Kim e yinʼ luwan e chitamangin ko lung; me paer ko lung ni meruk e duw, me yibi yimʼ e chitamangin. Me yibi buch ni Kim e de gagyeg ko lung nib matʼaw, ere de mʼagaenʼ Somoel ngakʼ.

14 Ere bay beeʼ nib pagael ni walagen ni togopluw ngakʼ, niʼir e yinʼ riy nga kalbus; me paer nib kalbus ni gubin e pi rran rokʼ; me yibi diyen ni pagael nge ppin u kalbus, ma napʼan ni ke pilibthir me yibi diyen ni Levi; ma aram me yimʼ.

15 Me yibi buch ni Levi e pigpig nib kalbus u tomuren ni ke yimʼ e chitamangin, u lan aningeg iragag nge lʼagruw e duw. Me yaen nag e mael ngakʼ fare pilung ko fare nam, niʼir e yog riy ngakʼ fare gilʼelung.

16 Ma tomuren ni yog ngakʼ fare gilʼelung me rinʼ e tin nib matʼaw u mit Somoel; ere monʼog fapi gidiiʼ u lan fare nam; me paer nge mos rogon fini pilibthir, me yibi diyen ni pagael nge ppin; maki diyen ni Corom, niʼir e ni gapgep nag ni mang pilung ni ke yinʼ luwan.

17 Me yibi buch ni Corom e rinʼ e tin nib matʼaw u mit Somoel ni gubin e pi rran rokʼ; me yibi diyen nib yoʼor ni pagael nge ppin; ma tomuren ni ke guy e rran nib yoʼor me yibi yimʼ, ni boed e piʼin kar pired boech u fayleng; me yinʼ Kish luwan ko lung.

18 Me yibi buch niki yimʼ Kish, me yinʼ Lib luwan ko lung.

19 Me yibi buch ni Lib e ki rinʼ e tin nib matʼaw u mit Somoel. Ere lan e pi rran rokʼ Lib e nliiʼ fapi porchoyog ni yub riy. Ere ranoed iyaen nga lan e binaw ni sor ko yimuch, ni mogow ggan ni fan ngakʼ fapi gidiiʼ ko fare binaw, ya re binaw nem e rib sug ko gamanman nu mapan. Ere Lib e ir beeʼ ni ki salap ko mokol gamanman.

20 Ere ra falʼeged lan binaw nib gaaʼ u charen fachiyang i binaw nib achichig radan, nib chugur nga bangi banʼen ni bay e day riy nibe kiiʼeg e nam.

21 Ere ratayed farengi nam ni bay ko yimuch ni nge paer ni wuruʼ e binaw, ni nga ur feked garaed riy. Ma farengi nam ni poloʼ e bay nga leluʼoch e ke suguy e gidiiʼ dakean.

22 Mar manged bogi gidiiʼ nib tama muruwel, ma yaed be chuwiʼiy e chugum ma yaed be piiʼ ni chuwaeyʼ, ma yaed be folchuwayʼ ngoraed roraed, ni nge yog ni felʼ rograed.

23 Mar muruwel gaed ko gubin mite e ore, mar falʼeged e gol, nge silber, nge iron, nge brass, nge gubin mite wasey; ma yaed be ker ngar feked u fithikʼ e butʼ ngalang; ere, ra kired bangi butʼ ngalang ni bangi butʼ nib gaaʼ ngar feked e ore ni gol, nge silber, nge iron, nge copper riy. Ere, ra falʼeged gubin mite muruwel nib felʼ rogon.

24 Me yog e mad ngoraed, nge mad ni falelʼ ni kan firgiy; mar falʼeged gubin mite mad, ni nge yog ni ngar upnguyed doewraed.

25 Mar falʼeged gubin mite talin e muruwel ni ngar fuʼoged e butʼ ngay, ni ngan giiʼ min yuw ngay, ni ngan tagbey ma ngan kerker e butʼ ngay, ma ngkun pirdiʼiy e butʼ ngay.

26 Mar falʼeged gubin mite talin e muruwel ni nge ayuweg e pi gamanman roraed ko muruwel.

27 Mar falʼeged gubin mite pi talin e mael. Mar muruwliyed gubin mite muruwel nib thil nib felʼ rogon.

28 Ma dariy bingyalʼ ni kan tawaʼath nag buʼulung i gidiiʼ nib felʼ rogon ngoraed, ma ke monʼog nagraed Somoel. Ma yaed bay u lan bangi nam nib melʼeg u fithikʼ gubin e pi nam, ya fare Somoel e ke yoeg.

29 Me yibi buch ni Lib e paer nib yoʼor e duw, me diyen ni pagael nge ppin; maki yibi diyen ni Hearthom.

30 Me yibi buch ni Hearthom e yinʼ luwan e chitamangin ko lung. Ma napʼan ni ke paer Hearthom ko lung u lan riliwʼ nge aningeg e duw, musap gaed, fare gilʼelung e ni fek rokʼ. Me pigpig ni bukun e duw ni kalbus, arragon, ni gubin e tin ni magaey ko pi rran rokʼ.

31 Me diyen ni Heth, me paer Heth nib kalbus u lan gubin e pi rran rokʼ. Me yibi diyen Heth ni Aaron, me paer Aaron ni kalbus u lan gubin e pi rran rokʼ; me diyen ni Amnigaddah, ere kipaer Amnigaddah nib kalbus u lan gubin e pi rran rokʼ; me yibi diyen ni Coriantum, me paer Coriantum nib kalbus u lan gubin e pi rran rokʼ; me yibi diyen ni Com.

32 Me yibi buch ni Com e miliy nga orel barbaʼ fare lung. Me gagyeg nga dakean fare rabaʼ i lung u lan aningeg iragag nge lʼagruw e duw; me yaen ko mael ngakʼ fare pilung, i Amgid, mar cham gaed ni bukun e duw, ni ireram e ngiyalʼ ni gel Com ngakʼ Amgid, me gel lungun nga dakean e baʼan ni ke magaey ko fapi gidiiʼ ko fare lung.

33 Ma lan e pi rran rokʼ Com e sum e moroʼroʼ riy nga lan fare nam; ma kuranoed ko fapi wok ni kakrom, mar gagyeg niged e michmich ni boed ni rinʼ pi kakrom, mar gayed rogon bayay ni ngar gatheayed fare gilʼelung.

34 Ere chiney e Com e yaen nag e mael ngoraed nib almarin; machane, deyog ni gel ngoraed.