1 Ug karon, hinigugma ko nga kaigsoonan, tan-awa, ako mopahayag kaninyo nga gawas kon kamo maghinulsol ang inyong mga balay ipabilin kaninyo nga biniyaan.

2 Oo, gawas kon kamo maghinulsol, ang inyong kababayen-an adunay dakong hinungdan nga magsubo sa adlaw nga sila magpasuso; kay kamo mosulay sa paglayas ug walay dapit nga kadangpan; oo, ug alaot ang mga nagsabak, kay dili gayod sila makalayas tungod sa kabug-at sa ilang lawas; busa, pagatunob-tunoban sila ug mapasagdan sila nga mamatay.

3 Oo, alaot kini nga katawhan nga gitawag nga katawhan ni Nephi gawas kon sila maghinulsol, sa higayon nga sila makakita sa tanan niini nga mga timailhan ug mga katingalahan nga ipakita ngadto kanila; kay tan-awa, sila ang katawhan nga pinili sa Ginoo; oo, ang katawhan ni Nephi nga iyang gihigugma, ug usab siya mipanton kanila; oo, sa mga adlaw sa ilang pagkadaotan siya mipanton kanila tungod kay siya nahigugma kanila.

4 Apan tan-awa akong kaigsoonan, ang mga Lamanita iyang gidumtan tungod kay ang ilang mga buhat kanunay nga daotan, ug tungod kini sa kadaotan sa tradisyon sa ilang mga amahan. Apan tan-awa, ang kaluwasan midangat ngadto kanila pinaagi sa pagsangyaw sa mga Nephita; ug tungod niini ang Ginoo naglugway sa ilang mga adlaw.

5 Ug ako manghinaot nga kamo motan-aw nga ang mas daghan nga bahin kanila anaa sa dalan sa ilang katungdanan, ug sila naglakaw nga nagmatngon sa atubangan sa Dios, ug sila naninguha sa pagsunod sa iyang mga sugo ug sa iyang mga balaod ug sa iyang mga paghukom sumala sa balaod ni Moises.

6 Oo, sultihan ko kamo, nga ang mas daghan nga bahin kanila naghimo niini, ug sila naningkamot uban sa walay kaluya nga kakugi nga ilang madala ang nahibilin sa ilang kaigsoonan ngadto sa kasayoran sa kamatuoran; mao nga adunay daghan nga nadugang sa ilang gidaghanon matag adlaw.

7 Ug tan-awa, kamo nasayod sa inyong mga kaugalingon, kay kamo nakasaksi niini, nga kutob sa mga nadala ngadto sa kasayoran sa kamatuoran, ug sa pagkasayod bahin sa daotan ug salawayon nga mga tradisyon sa ilang mga amahan, ug gigiyahan aron motuo sa balaan nga mga kasulatan, oo, sa mga panagna sa balaan nga mga propeta, nga nahisulat, nga mao ang nagdala kanila ngadto sa hugot nga pagtuo sa Ginoo, ug ngadto sa paghinulsol, nga ang mao nga pagtuo ug paghinulsol ang nagdala og kausaban sa kasingkasing ngadto kanila—

8 Busa, kutob sa mihangop niini, kamo nasayod sa inyong mga kaugalingon nahimo nga lig-on ug makanunayon sa pagtuo, ug sa butang diin sila nahimo nga gawasnon.

9 Ug kamo usab nasayod nga sila milubong sa ilang mga hinagiban sa gubat, ug nahadlok sila nga mokuha niini kay tingali unya og makasala sila; oo, kamo nakakita nga nahadlok sila sa pagpakasala—kay tan-awa sila motugot nga tunob-tunoban sila ug patyon sa ilang mga kaaway, ug dili sila mobakyaw sa ilang mga espada batok kanila, ug tungod kini sa ilang pagtuo ni Kristo.

10 Ug karon, tungod sa ilang pagkamakanunayon sa higayon nga sila motuo niana nga butang nga ilang gituohan, kay tungod sa ilang kalig-on sa higayon nga sila mapasabot, tan-awa, ang Ginoo mopanalangin kanila ug molugway sa ilang mga adlaw, bisan pa sa ilang kadaotan—

11 Oo, bisan kon sila mokunhod tungod sa pagkawalay pagtuo ang Ginoo molugway sa ilang mga adlaw, hangtod moabot ang panahon nga gipamulong sa atong mga amahan, ug usab ni propeta Zenos, ug sa daghan pa nga laing mga propeta, kabahin sa pagpahiuli sa atong kaigsoonan, ang mga Lamanita, pag-usab ngadto sa kasayoran sa kamatuoran—

12 Oo, sultihan ko kamo, nga sa ulahing mga panahon ang mga saad sa Ginoo itanyag ngadto sa atong kaigsoonan, ang mga Lamanita; ug bisan pa sa daghan nga kasakit nga modangat kanila, ug bisan pa kon sila pagaabogon ngadto ug nganhi sa ibabaw sa yuta, ug pagagukdon, ug pagahampakon ug magkatibulaag, nga walay dapit nga kadangpan, ang Ginoo gayod magmaluluy-on ngadto kanila.

13 Ug kini sumala sa panagna, nga sila dad-on pag-usab ngadto sa tinuod nga kasayoran, nga mao ang kasayoran sa ilang Manunubos, ug ang ilang halangdon ug tinuod nga magbalantay,ug pagaiphon uban sa iyang mga karnero.

14 Busa ako moingon kaninyo, nga mas maayo pa sila kay sa kaninyo gawas kon kamo maghinulsol.

15 Kay tan-awa, kon unta ang mahinungdanon nga mga buhat napakita ngadto kanila, kadtong gipakita nganha kaninyo, oo, kanila nga mikunhod tungod sa pagkawalay pagtuo tungod sa mga tradisyon sa ilang mga amahan, kamo mismo sa inyong kaugalingon makakita nga dili na gayod sila mokunhod pa ngadto sa pagkawalay pagtuo.

16 Busa, miingon ang Ginoo: Ako dili molaglag kanila sa hingpit, apan ako mosugo nga sa adlaw sa akong kaalam sila mobalik pag-usab ngari kanako, miingon ang Ginoo.

17 Ug karon tan-awa, miingon ang Ginoo, kabahin sa katawhan sa mga Nephita: Kon sila dili maghinulsol, ug maninguha sa pagbuhat sa akong kabubut-on, ako molaglag kanila sa hingpit, miingon ang Ginoo, tungod sa ilang pagkadili matuohon bisan pa sa ka daghan sa mahinungdanon nga mga buhat nga akong gibuhat taliwala kanila; ug sa pagkatinuod ingon nga ang Ginoo buhi mahitabo kini nga mga butang, miingon ang Ginoo.