Pi Prophecy ni tay Nephi, fare Pagael ni fak Helaman—Got e makʼar murus ngakʼ fapi gidiiʼ ku Nephi ni yoeg ni bay yib ngoraed u fithikʼ e damomuw rokʼ, ni nge gatheayraed ma kemus ni faʼan yaedra kalngaenʼ ko pi ngongol roraed ni kireb. Got e gechig nag fapi gidiiʼ ku Nephi ko mʼar ni ubchiyaʼ; ra kalgaed ngaenʼraed mar sap gaed ngakʼ. Samuel, nib Lamanite, e prophesy ngakʼ fapi Nephites.
Bay morngaʼagen ko guruy ni 7 nge madaʼ ko 16.
Guruy Ni 7
Nephi e ni fek yathin ko binaw u leluʼoch me sul nga Zarahemla—I meybil u dakean e wulyang ni bay u dakean e mileayʼ rokʼ me yoeg ko gidiiʼ ni ngar kalgaed ngaenʼraed ara yaedra yimʼ. Napʼan 23–21 M.K.
1 Musap gaed, ere yibi buch u lan e bin nelʼ i ragag nge mereb e duw ko fare lung ko fapi tapuf-oloboch ko fapi gidiiʼ ko Nephites, ni Nephi, fare pagael ni fak Helaman, e sul ko fare binaw ni bay nga leluʼoch nge yaen ko fare binaw nu Zarahemla.
2 Ya ir immoy u fithikʼ fapi gidiiʼ ni ur moyed u lan fare binaw nib kan nga leluʼoch, ni i machib nag fare thin ku Got ngoraed, me prophesy nag boʼor banʼen ngoraed.
3 Mar feked yathin gubin e thin rokʼ, ni arame dakiyog ni nge paer u fithikʼraed, me sul bayay ko binaw rokʼ.
4 Ma napʼan ni guy fapi gidiiʼ ni kar awgaed nga ba dodow ni ubchiyaʼ ko kireb, nge fapi moroʼroʼ ku Gadianton ni kar pired ko fapi gilʼ e tapuf-oloboch—ni dematʼaw rogon ni kar feked fare gelingin nge matʼawon ko fare nam; ni kar feked yathin fapi motochiyel rokʼ Got, ma dariy buchʼuw banʼen nib matʼaw ni yaed be rinʼ u pʼoewchen; ma darur rinʼed e tin nib matʼaw ngakʼ beeʼ.
5 Mar ululiyed i gafgow ngakʼ e piʼin nib matʼaw ni bachan e yaed ba matʼaw; ma yaed be pag e piʼin nib buch e rokʼ nge piʼin nib kireb nga ranoed ni danur gechig nagraed ni bachan e salpiy roraed; ma boech ngan tay raed u lan e office ko tochuch ko am, ni ngar gagyeg gaed mar rinʼed nrogon ni yaed baʼadag, ni gomanga yog ni felʼ rograed me yog e rir ngoraed ko fayleng, nge ku boech, ni gomanga yog ni moem ngoraed ni nga ur pired e piʼin gathi mabgol roraed, ma yaed be moroʼroʼ, nge cham ni yamʼ, mar rinʼed gubin banʼen nrogon ni yaed baʼadag—
6 Ere chiney e re denen ney ni ubchiyaʼ e ke yibi aw nga dakean fapi Nephites, u bingyalʼ i banʼen ni de yoʼor e duw napʼan; ere napʼan ni guy Nephi ni aray rogon, me oeb gumʼirchaʼen u lan ngorngoren ko kirbaenʼ; me yoer u fithikʼ e amith u laniyaenʼ:
7 O, kari moʼdab ni gomanga ugpaer u lan e pi rran ni sommʼon ni yib e chitamag i Nephi nga wuruʼ fare binaw nu Jerusalem, ya gura un ngakʼ ko falfalaenʼ u lan fare nam nni michmicheg; ya gidiiʼ rokʼ e ngiyalʼ nem e ba moem i yoeg banʼen ngoraed, ma yaed ba miyulyul i koel falan e pi motochiyel rokʼ Got, mab sasagaʼal i wawliyraed i rinʼ e denen; ma yaed bagur ko motoyil nge fol ko fapi thin rokʼ Somoel—
8 Arragon, faʼan gomanga pi rran rog e immoy u lan e tinem e rran, ma gag ni poloʼ e kar gu falfalaenʼ ni bachan fini matʼaw pi walageg.
9 Machane musap gaed, kan dugliy ni ireray e tirog e rran, me gag nge laninʼug e ke sug ko kirebaenʼ ni bachan e re ngongol ney ni kireb rokʼ pi walageg.
10 Ere musap gaed, chiney e yibi buch nu pʼebugul ba wulyang, ni immoy u lan farengi mileayʼ ku Nephi, ni immoy u charen e kanawoʼ nib gaaʼ nib sor iyaen nga ba tagilʼ e folchuwaeyʼ ni thʼabi gaaʼ, ni immoy u lan fare binaw nu Zarahemla; ere, Nephi e ragbug nga butʼ u pʼebugul e re wulyang nem ni immoy u lan e mileayʼ rokʼ, nib wulyang nib chugur nga langan e garog ko mileayʼ nib yaen e kanawoʼ ni gaaʼ u charen.
11 Me yibi buch ni immoy ini gidiiʼ ni yaed be yaen mar guyed Nephi nibe piiʼ laniyaenʼ u dakean e meybil ngakʼ Got u pʼebugul fare wulyang; mar miil gaed nga ranoed roeged ngakʼ fapi gidiiʼ ko mang e kar guyed, me yib fapi gidiiʼ nga taʼabang ni yu ulung ni gomanga ra nanged tapgin e mayoer ni ubchiyaʼ ni fan ko denen ko fapi gidiiʼ.
12 Ere chiney, e napʼan ni puw Nephi ngalang me guy fapi yu ulung i gidiiʼ ni kar mukun gaed nga taʼabang.
13 Me yibi buch ni bing lʼugun me gaʼar ngoraed: Musap gaed, mangfan ni kam kunuyed gimed nga taʼabang? Ya nge yog ni ngug weliy ngomed morngaʼagen e pi denen romed?
14 Arragon, ya bachan e kug paer nga pʼebugul e wulyang rog ni nggu piiʼeg ni poloʼ u dakean e meybil ngakʼ Got, nge bachan e kirbaenʼ ni ke tay gumʼirchaʼeg, ni bachan e pi denen romed!
15 Ma bachan e mayoer nge gelʼgelʼ rog, ma kam kunuyed gimed nga taʼabang, make balyangaenʼmed; arragon, mab tʼuf ni nge balyangaenʼmed; arragon, thingari balyangaenʼmed ni bachan e kam piiʼed gimed ngakʼ fare moʼoniyanʼ ni ke longbiy paʼ nga gumʼirchaʼmed.
16 Arragon, mang e ke rinʼ ma kam paged gimed, kam gabliyed gimed ngakʼ niʼir e be gay rogon ni nge taymed ni poloʼ nga butʼ, nga fithikʼ e kirbaenʼ nge gafgow ni dabimʼay?
17 O mu kalgaed ngaenʼmed, mu kalgaed ngaenʼmed! Mangfan ni ngam mʼaed? Muchel gaed, muchel gaed ngakʼ Somoel ni Got romed. Mangfan ni ke pagmed?
18 Ri bachan e kam ʼelʼel niged gumʼirchaʼmed; arragon, dam motoyil gaed nga laman fachaʼ nib mangil ni ma gafaliy e saaf; arragon, kam kʼaringed ke damomuw ngomed.
19 Ere musap gaed, dabi kunuymed, ya faʼanra dab mu kalgaed ngaenʼmed, ma ra weregmed iyaen ni ngam manged thumʼag ko pilis nge gamanman ni malboch.
20 O, mang e rinʼ ma kam paged talin e Got romed u lan e re rran ni thapegmed?
21 Ya musap gaed, ri bachan e nge yog ni felʼ rogmed, ni nge yoeg e gidiiʼ e soerokʼ ngomed, arragon, ni nge yog ngomed e gol nge silber. Ma kam tayed gumʼirchaʼmed nga dakean e pi falaʼab nge pinʼen nib mʼayfan ko re fayleng ney, niʼir e gimed be mathang pogofan, nge matgael, nge moroʼroʼ, nge dumʼthin nga dakean e piʼin bugul yoror romed ni bachan, ere arfan ni gimed be rinʼ gubin mit e denen.
22 Ere biney e gagyeg e ra yib nag e gafgow ngomed ma kemus ni faʼan gimed ra kalngaenʼ. Ya faʼanra dab mu kalgaed ngaenʼmed, ma musap gaed, re binaw ney, nge ku tin baʼaram e binaw nib liyeg, ni bay nga lan fare binaw ni tafadaed, e yira fek nge chuw rodaed me yaeni aw ni dakuriy gilʼmed riy; ya musap gaed, fare Somoel e dabi piiʼ gelingmed, ni boed ni ke rinʼ iyib ke madaʼ ko ngiyalʼ ney, ni ngam gelgaed ngakʼ e pi toʼogor romed.
23 Ya musap gaed, i gaʼar fare Somoel: Dab gudag ngakʼ e piʼin kireb buchʼuw i gelingig, ni nge thil nge yoʼor ngakʼ beeʼ me lich ku beeʼ, ma kemus ni piʼin yaedra kalngaenʼ ko pi denen roraed, mar motoyil gaed ko thin rog. Ere chiney, e gubaʼadag ni ngam sap gaed, gimed pi walageg, ri kab felʼ boech fapi Lamanites ngomed ma kemus ni faʼan gimed ra kalngaenʼ.
24 Ya musap gaed, kuyaed ba matʼaw boech ngomed, ya dawor ra denen gaed nib togopluw ko fare nangaenʼ niʼir e bay romed; ere fare Somoel e ra wurengaenʼ ngoraed; arragon, ra nʼuw nag napʼan e pi rran roraed me yoʼor nag e gidiiʼ roraed, u napʼan ni bay ni gatheaymed ma kemus ni faʼan gimed ra kalngaenʼ.
25 Arragon, nge buch waʼathmed ni bachan fare fananikan ni ubchiyaʼ ni ke yibi aw nga fithikʼmed; ma kam kunuyed gimed ngay, arragon, ko fare ulung nib miith morngaʼagen ni yarmiy Gadianton!
26 Arragon, nge buch waʼathmed ni bachan fare ufʼuf ni kam paged nge rich nga lan gumʼirchaʼmed, niʼir e ke nʼufmed ngalang nge thumʼ nga wuruʼ e felʼ ni bachan e pi falaʼab romed!
27 Arragon, nge buch waʼathmed ni bachan e pi ngongol ni kireb nge pi ngongol ko fananikan romed.
28 Ma faʼanra dab mu kalgaed ngaenʼmed ma gimed ra yimʼ; arragon, ni mus ko pi binaw romed ma yira fek romed, ma yira thang oewchmed u dakean e fayleng.
29 Ere musap gaed e chiney, dagur yoeg e pinnʼey ni thin rog, ni nge paer riy ni aray rogon, ya gathi gagrog e yuggu nang e pinnʼey; ya musap gaed, gumnang ni pinnʼey e ba riyulʼ ni bachan fare Somoel ni Got e ke dag ngog, ere gube micheg ni nge paer riy ni aray rogon.