Ang Panagna ni Nephi, nga Anak ni Helaman—Ang Dios mihulga sa katawhan ni Nephi nga siya moduaw kanila sa iyang kasuko, ngadto sa ilang hingpit nga kalaglagan gawas kon sila maghinulsol sa ilang pagkadaotan. Ang Dios mihampak sa katawhan ni Nephi og kamatay; naghinulsol sila ug mibalik ngadto kaniya. Si Samuel, usa ka Lamanita, nanagna ngadto sa mga Nephita.
Naglangkob sa mga kapitulo 7 ngadto sa 16.
Kapitulo 7
Si Nephi gisalikway didto sa amihanan ug mipauli sa Zarahemla—Nag-ampo Siya didto sa iyang tanaman nga tore ug unya mitawag sa katawhan aron maghinulsol o mamatay. Mga 23–21 B.C.
1 Tan-awa, karon nahitabo sa ikakan-oman ug siyam nga tuig sa pagmando sa mga maghuhukom sa katawhan sa mga Nephita, nga si Nephi, ang anak ni Helaman, mipauli sa yuta sa Zarahemla gikan sa amihanang bahin sa yuta.
2 Kay miadto siya sa katawhan nga anaa sa amihanang bahin sa yuta, ug misangyaw sa pulong sa Dios ngadto kanila, ug nanagna og daghang butang ngadto kanila;
3 Ug ilang gisalikway ang iyang tanan nga pulong, nga niana siya dili na makapabilin uban kanila, apan mibalik na usab siya sa iyang yutang natawhan.
4 Ug nakakita nga ang katawhan anaa sa kahimtang sa ingon ka makalilisang nga pagkadaotan, ug kadto nga mga tulisan ni Gadianton mipuli sa mga hukmanan—kay nakaangkon sa gahom ug katungod sa yuta; misalikway sa mga sugo sa Dios, ug bisan gamay dili matarong sa iyang atubangan; wala magbuhat og kaangayan ngadto sa katawhan;
5 Nanghimaraot sa mga matarong tungod sa ilang pagkamatarong; nagtugot sa mga malapason ug sa mga daotan nga dili masilotan tungod sa ilang salapi; ug dugang pa aron mapahimutang diha sa katungdanan ang pagpangulo sa gobyerno, aron modumala ug mobuhat sumala sa ilang mga kabubut-on, nga makaangkon sila og bahandi ug himaya sa kalibotan, ug, dugang pa, aron mas dali ra kanila ang pagpanapaw, ug pagpangawat, ug pagpatay, ug sa pagbuhat sumala sa ilang kaugalingon nga mga kabubut-on—
6 Karon kining hilabihan nga kadaotan miabot sa mga Nephita, sulod sa dili daghan nga katuigan; ug sa diha nga si Nephi nakakita niini, ang iyang kasingkasing napuno sa kasubo sulod sa iyang dughan; ug misinggit siya sa hilabihan nga kasakit sa iyang kalag:
7 O, nga unta ang akong mga adlaw mao ang mga adlaw nga ang akong amahan nga si Nephi sa sinugdanan mibiya sa yuta sa Jerusalem, nga ako unta nakaangkon og kamaya uban kaniya didto sa gisaad nga yuta; niana nga panahon nga ang iyang katawhan sayon nga hangyoon, lig-on nga nagsunod sa mga sugo sa Dios, ug dili dali nga madala sa pagbuhat og daotan; ug sila dali nga mamati sa mga pulong sa Ginoo—
8 Oo, kon ang akong mga adlaw nakaabot pa unta niadtong mga adlawa, nan ang akong kalag unta nakaangkon og kamaya sa pagkamatarong sa akong kaigsoonan.
9 Apan tan-awa, gikatakda na ngari nako nga mao kini ang akong mga adlaw, ug nga ang akong kalag mapuno sa kasubo tungod niining pagkadaotan sa akong kaigsoonan.
10 Ug tan-awa, karon nahitabo nga didto kadto sa usa ka tore, nga anaa sa tanaman ni Nephi, nga anaa sa daplin sa dako nga dalan paingon sa kinadak-an nga taboan, nga anaa sa siyudad sa Zarahemla; mao nga, si Nephi nagyukbo didto sa tore nga anaa sa iyang tanaman, nga ang mao nga tore duol usab sa ganghaan sa tanaman paingon sa dako nga dalan.
11 Ug nahitabo nga dihay mga tawo nga nangagi ug nakakita kang Nephi samtang gibu-bo niya ang iyang kalag ngadto sa Dios didto sa tore; ug nanagan sila ug misulti sa katawhan unsa ang ilang nakita, ug ang katawhan miabot uban sa pundok sa mga tawo aron unta sila masayod sa hinungdan sa hilabihan nga pagbangotan tungod sa pagkadaotan sa katawhan.
12 Ug karon, diha nga mibarog si Nephi iyang nakita ang pundok sa katawhan nga nagkatapok.
13 Ug nahitabo nga iyang gibuka ang iyang ba-ba ug miingon ngadto kanila: Tan-awa, ngano nga nagpundok man kamo? Aron ba ako mosulti kaninyo sa inyong mga pagkadaotan?
14 Oo, tungod kay ako ania sa akong tore aron ako unta mobu-bo sa akong kalag ngadto sa akong Dios, tungod sa hilabihan nga kasubo sa akong kasingkasing, tungod sa inyong mga pagkadaotan!
15 Ug tungod sa akong pagbangotan ug hilabihan nga kasubo kamo nagkapundok, ug nahibulong; oo, ug kamo adunay dako nga panginahanglan nga mahibulong; oo, kamo angay lang nga mahibulong tungod kay gitugotan ninyo nga ang yawa makagamot og maayo sa inyong mga kasingkasing.
16 Oo, sa unsang paagi nga gitugotan man ninyo ang iyang pagpang-agni kinsa nagtinguha sa paglabay sa inyong mga kalag ngadto sa walay kataposang pagkauyamot ug walay kataposang kaalaot?
17 O paghinulsol kamo, paghinulsol kamo! Ngano nga kamo mamatay? Balik kamo, balik kamo ngadto sa Ginoo nga inyong Dios. Ngano nga siya mibiya kaninyo?
18 Tungod kay kamo nagpatig-a sa inyong mga kasingkasing; oo, kamo wala magpatalinghog sa tingog sa maayong magbalantay; oo, kamo mihagit kaniya aron masuko kaninyo.
19 Ug tan-awa, imbes pagapundokon kamo, gawas kon kamo maghinulsol, tan-awa, siya motibulaag kaninyo nga kamo mahimong mga kan-onon sa mga iro ug ihalas nga mga mananap.
20 O, sa unsang paagi nga kamo nahikalimot man sa inyong Dios nianang adlawa nga siya miluwas kaninyo?
21 Apan tan-awa, tuyo niini ang pag-angkon og bahandi, aron daygon sa mga tawo, oo, ug aron kamo makakuha og bulawan ug pilak. Ug gipahimutang ninyo ang inyong mga kasingkasing diha sa mga katigayonan ug sa walay kapuslanang mga butang dinhi sa kalibotan, kay tungod niini kamo mipatay, ug nanglungkab, ug nangawat, ug nagsaksi sa bakak batok sa inyong silingan, ug nagbuhat sa tanan nga matang sa kadaotan.
22 Ug tungod niini, kaalaotan ang modangat kaninyo gawas kon kamo maghinulsol. Kay kon kamo dili maghinulsol, tan-awa, kining dako nga siyudad, ug usab ang tanan niadtong dagko nga mga siyudad nga naglibot, nga ania sa yuta nga atong gipanag-iya, pagabawion aron kamo walay dapit diha niini; kay tan-awa, dili kamo tugyanan sa Ginoo og kusog, sama sa iyang gibuhat kaniadto, aron makabarog batok sa inyong mga kaaway.
23 Kay tan-awa, miingon ang Ginoo: Ako dili mopakita sa akong kusog ngadto sa mga daotan, ngadto sa usa nga labaw pa kay sa uban, gawas niadtong naghinulsol sa ilang mga sala, ug nagpatalinghog sa akong mga pulong. Mao nga karon, manghinaot ko nga tan-awon ninyo, akong kaigsoonan, nga mas maayo pa ang mga Lamanita kay kaninyo gawas kon kamo maghinulsol.
24 Kay tan-awa, mas matarong sila kay kaninyo, kay sila wala makasala batok nianang dako nga kahibalo nga inyong nadawat; mao nga ang Ginoo magmanggiluy-on kanila; oo, siya molugway sa ilang mga adlaw ug mopadaghan sa ilang mga binhi, bisan kon kamo hingpit nga pagalaglagon gawas kon kamo maghinulsol.
25 Oo, ang kaalaotan maanaa kaninyo tungod nianang hilabihan ka pagkasalawayon nga miabot kaninyo; ug kamo nagkahiusa niini, oo, nianang tinago nga pundok nga gitukod ni Gadianton!
26 Oo, ang kaalaotan modangat kaninyo tungod nianang garbo nga gitugotan ninyong makasulod sa inyong mga kasingkasing, nga mao ang nagbayaw kaninyo nga molabaw nianang unsay maayo tungod sa inyong hilabihan ka daghan nga katigayonan!
27 Oo, ang kaalaotan maanaa kaninyo tungod sa inyong pagkadaotan ug pagkasalawayon!
28 Ug gawas kon kamo maghinulsol kamo mamatay; oo, bisan ang inyong mga yuta pagakuhaon gikan kaninyo, ug kamo pagalaglagon sa ibabaw sa yuta.
29 Tan-awa karon, dili ko moingon nga kining mga butanga mahitabo gayod, sumala sa akong kaugalingong kahibalo, tungod kay dili kini sumala sa akong kaugalingong kahibalo nga nasayran ko kining mga butanga; apan tan-awa, ako nasayod nga kining mga butanga tinuod tungod kay ang Ginoong Dios mipahibalo niini kanako, mao nga mopamatuod ko nga kini mahitabo gayod.