Mbueienyi

Mormon Nwoma no yɛ kyerɛwsɛm krɔnkrɔn tse dɛ Bible so. Ɔyɛ kyerɛwsɛm a ɔfa mbrɛ Nyame sii nye tsetsemba a nna wɔtse America no nantsewee ho, daapem asɛmpa ne mãhyɛ no na ɔwɔ mu.

Tsetse nkɔnhyɛfo pii na wɔnam nkɔnhyɛ sunsum na nyikyerɛ do kyerɛɛw nwoma yi. Nkɔnhyɛnyi-abakɔsɛmkyerɛwfo bi a wɔfrɛ no Mormon na ɔfaa hɔn nsɛm a wɔakyerɛw wɔ sika mprɛtse do no na otwitwaa do esinesin kyerɛwee. Nkyerɛwee no kã enyibue akɛse ebien bi ho asɛm. Kor fii Jerusalem wɔ mfe ahaesia a nna wonnyaa nnwoo Christ no mu na ɔno ekyir wɔkyɛɛ hɔn mu aman ebien a edzin a ɔdeda hɔn do nye Nephifo na Lamanfo. Dza ɔkã ho no dzii kan bae wɔ aber a Ewuradze daan hɔn kasaa wɔ aber a worisi Abantsentsen wɔ Babel no. Dɛm kuw yi na wɔfrɛ hɔn Jaredfo no. Mfe mpempem ekyir no wɔsɛɛ hɔn nyinara ma ɔkaa Lamanfo, na wɔkã America Indiafo no hɔn egyanom ho.

Dza ɔkrɔn a wɔkyerɛwee a ɔwɔ Mormon Nwoma no mu no nye Ewuradze Jesus Christ ne ɔsomdwuma wɔ maa Nephifo no wɔ mu No wusoɛr ekyir ara no. Ɔda asɛmpa no ne nkyerɛkyerɛ no edzi, ɔda nkwagye ho nhyehyɛɛ edzi na ɔkã dza sɛ nyimpa yɛ a ɔnam do benya asomdwee wɔ dɛm asetsena yi mu na oenya nkwagye a onnyiewiei wɔ asetsena a ɔreba no mu.

Mormon wiei no, ɔdze maa ne ba Moroni ma no so ɔdze noara ne nsɛm kakra kãa ho na ɔdze mprɛtse no kɛhyɛɛ Koko Cumorah mu. Fankwa 21, 1823 mu na dɛm Moroni no a aber no na ɔasoɛr efi ewufo mu na wɔahyɛ no enyimnyam no yii noho kyerɛɛ Nkɔnhyɛnyi Joseph Smith na ɔkãa tsetse kyerɛwsɛm na mbrɛ wobesi akyerɛ ase akɔ borɔfokasa mu ho asɛm.

Ne ber sõe no woyii mprɛtse no maa Joseph Smith ma no so nam Nyankopɔn n’akyɛdze na no tum do kyerɛɛ ase. Seseiara woetsintsim kyerɛwee yi akɔ kasa horow mu dɛ wɔdze regye dase fofor bio dɛ Jesus Christ yɛ Tsease Nyankopɔn ne Ba na hɔn a wɔbɛba No hɔ na woedzi N’asɛmpa no ho mbra na ayɛdze do no wɔbɛgye hɔn nkwa.

Dza Nkɔnhyɛnyi Joseph Smith kãe wɔ dɛm kyerɛwee yi ho nye dɛ: “Mekãa kyerɛɛ enuanom no dɛ Mormon Nwoma no dzi mu kyɛn nwoma biara a ɔwɔ asaase do, na ɔyɛ hɛn asɔr yi no botantsim, na obiara a obedzi no mu nsɛm do no ɔbɛbɛn Nyankopɔn kyɛn dɛ obedzi nwoma biara no mu nsɛm do.”

Sɛ yeyi Joseph Smith si nkyɛn a, Ewuradze daa sika mprɛtse no edzi kyerɛɛ nyimpa dubiako so, ama wɔayɛ adasefo soronko wɔ nokwar no na Mormon Nwoma no krɔnkrɔnyɛɛ ho. Hɔn dasegye no na wɔakyerɛw no wɔ nwoma yi mu dɛ “Nyimpa Baasa Hɔn Dasegye” na “Nyimpa Baawɔtwe Hɔn Dasegye” no.

Yɛto nsa frɛ nyimpa a wɔwɔ mbea nyinara dɛ wɔnkenkan Mormon Nwoma no na wɔndwendwen no mu nsɛm no ho wɔ hɔn akoma mu, na wombisa Nyankopɔn, Onnyiewiei Egya, wɔ Christ ne dzin mu dɛ ana nwoma no yɛ nokwar. Hɔn a wɔfa dɛm kwan yi do na wobisa wɔ gyedzi mu no nam Sunsum Krɔnkrɔn no tum do benya no nokwar na no krɔnkrɔnyɛ ho dase (Hwɛ Moroni 10:3–5.)

Hɔn a wonya dɛm dasegye krɔnkrɔn a ofi Sunsum Krɔnkrɔn no hɔ yi nam dɛm tum no ara so do bohu dɛ Jesus Christ nye wiadze Agyenkwa, na Joseph Smith yɛ oyikyerɛfo na nkɔnhyɛnyi wɔ dɛm nda a aka ekyir yi mu, na dɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo yɛ Ewuradze n’ahenman a wɔdze aba asaase do bio dze robɔbɔ kwan ato hɔ ama Messiah ne Mbae a Otsĩa Ebien no.