1 Maloba maye Yakobo, ndeko mobali wa Nefi, alobaki epai ya bato ba Nefi, nsima ya liwa lya Nefi:

2 Sikawa, bandeko balingami ba ngai, ngai, Yakobo, engebene na mokumba moye nazwi epai ya Nzambe, mpo ya kokumisa mosala mwa ngai na limemia, mpe ete nakoka kobikisa bilamba bya ngai na masumu ma bino, nayei o tempelo o mokolo moye ete nakoka kosakola epai ya bino maloba ma Nzambe.

3 Mpe binomei boyebi ete kina sikawa nazalaki na etingia o mosala mwa ebiangi ya ngai; kasi o mokolo moye nalembisami na mposa nzike mpenza mpe bobangi mingi mpo ya bolamu bwa bozo bwa bino koleka nazalaki kina sikawa.

4 Mpo tala, kina sikawa, bozali na botosi epai ya liloba lya Nkolo, liye napesaki epai ya bino.

5 Kasi tala, yokani epai ya ngai, mpe yebani ete na lisalisi lya Mokeli wa bokasi-bonso wa lola mpe mabele, nakoki kolobela bino makambo matali makanisi ma bino, boniboni ete bobandi kosala o lisumu, liye lisumu limononi lya nsomo mpenza epai ya ngai, iyo, mpe lya nsomo epai ya Nzambe.

6 Iyo, eyokisi mpasi bozo bwa ngai mpe esali ngai kozonga nsima na nsoni liboso lya miso mya Mozalisi wa ngai, ete esengeli natatola epai ya bino mpo ya nkuna ya mitema mya bino.

7 Mpe lisusu epesi ngai mpasi ete nasengeli nasalela mpiko mpenza ya bolobi botali bino, liboso lya basi ba bino mpe bana ba bino, mingi ya mayoki ma bango mazali ma boboto mpenza mpe bo ngondo mpe ma bokengi liboso lya Nzambe, lyango likambo lizali elengi epai ya Nzambe;

8 Mpe ebanzi ngai ete bayaki likolo awa mpo ya koyoka liloba lya elengi lya Nzambe, iyo, liloba liye likobikisa bozo bozoka.

9 Yango wana, ekakemi bozo bwa ngai ete nakosengisama, na ntina ya motindo mwa sikisiki moye nazwaki uta na Nzambe, mpo ya kopalela bino engebene na mabe ma bino, mpo ya koyeisa enene mpota ya baye bazokisami kala, o esika ya kobondisaka mpe kobikisaka mpota ya bango; mpe baye bazokisami te, o esika ya kosalaka limpati likolo lya liloba lya elengi lya Nzambe bazali na mbeli etiami mpo ya kotubola bozo bwa bango mpe kozokisa mayele ma bango ma bolembu.

10 Kasi, ata bonene bwa mosala, nasengeli kosala engebene na mitindo mya sikisiki mya Nzambe, mpe koyebisa bino etali nkuna mpe bonsomo bwa bino, o miso mya bapeto o mitema, mpe ba motema mobukana, mpe o nse ya botali bwa liso likotubola lya Nzambe wa Bokasi Bonso.

11 Yango wana, nasengeli kolobela bino bosolo engebene na polele ya liloba lya Nzambe. Mpo tala, lokola nasengaki na Nkolo, boye liloba liyaki epai ya ngai, kolobaka: Yakobo, mata o kati ya tempelo o mokolo mwa nsima, mpe sakola liloba liye nakopesa yo epai ya bato baye.

12 Mpe sikawa tala, bandeko ba ngai, eye liloba liye nasakoli epai ya bino, ete mingi ya bino babandi koluka wolo, mpe mpauni , mpe ndenge inso ya mabanga ma motuya, na yango mokili moye, moye mozali mboka yoko ya elako epai ya bino mpe epai ya mabota ma bino, motondi mingi koleka.

13 Mpe loboko la libanela losekeki likolo lya bino na elengi mingi koleka, ete bozwaki bozwi mingi; mpe zambi basusu ya bino bazwaki mingi koleka eye ya bandeko ba bino botombwani likolo o lolendo la mitema mya bino, mpe bolati nkingo ikasi mpe mito likolo na ntina ya monzele mwa bino, mpe boniokoli bandeko ba bino zambi bobanzi ete bozali balamu koleka bango.

14 Mpe sikawa, bandeko ba ngai, bokanisi ete Nzambe akoyengebene bino o likambo liye? Tala, nayebisa bino, Te. Kasi akokitisa bino, mpe soko bokobi o makambo maye masambisi ma ye makoya noki epai ya bino.

15 O ete alinga kolakisa bino ete akoki kotubola bino, mpe na botali boko bwa liso lya ye akoki kotuta bino o mputulu!

16 O ete alinga kobikisa bino uta o bobe mpe bonsomo boye. Mpe, O ete bolinga koyokemela epai ya liloba lya mibeko mya ye, mpe botika te lolendo la mitema mya bino lobebisa bozo bwa bino!

17 Kanisani bandeko ba bino bo binomei, mpe zalani na momeseno elongo na bato banso mpe na likabo o biloko bya bino, ete bakoka kozala na bozwi bo bino.

18 Kasi yambo boluka mpo ya bozwi, lukani mpo ya bokonzi bwa Nzambe.

19 Mpe esili bino kozwa elikia na Klisto bokozwa bozwi, soko boluki bwango; mpe bokoluka bwango mpo ya mokano mwa kosala bolamu—kolatisa baye bazali botaka, mpe koleisa baye bazali na nzala, mpe kobikisa bakangemi, mpe kopesa lisalisi na bakoni mpe batungisami.

20 Mpe sikawa, bandeko ba ngai, nalobi epai ya bino etali lolendo; mpe bango ba bino baye batungisaki moto wa penepene na bino, mpe baniokolaki ye zambi bozalaki na lolendo o mitema mya bino, o biloko biye Nzambe apesaki bino, nini bolobi mpo ya yango?

21 Ebanzi bino te ete makambo ma lolenge lona mazali ma nsomo epai ya ye oyo akelaki mosuni monso? Mpe mozali moko azali na motuya o miso mya ye lokola mosusu. Mpe mosuni monso mozali mwa mputulu; mpe mpo ya ntina kaka yoko akelaki bango, ete babatela mitindo mya ye mpe bakembela ye libela.

22 Mpe sikawa natii nsuka yoko ya kolobaka epai ya bino etali lolendo loye. Mpe ezalaki te ete nasengelaki koloba epai ya bino etali mabe maleki manene, motema mwa ngai molingaki kosepela mpenza na ntina ya bino.

23 Kasi liloba lya Nzambe likakemi ngai na ntina ya mabe maleki manene ma bino. Mpo tala, boye elobi Nkolo: Bato baye babandi kokola o bobe; basosoli te nkomi, mpo baluki komilimbisa na kosalaka pite, na ntina ya makambo makomamaki matali Dawidi, mpe Solomo mwana wa ye.

24 Tala, Dawidi mpe Solomo ya solo bazalaki na basi mingi mpe bamakango, liye likambo lizalaki lya nsomo liboso lya ngai, elobi Nkolo.

25 Yango wana, boye elobi Nkolo, nakambaki bato baye libanda lya mboka ya Yelusaleme, na nguya ya loboko la ngai, ete nakoka kotelemisa epai ya ngai etape sembo uta o mbuma ya nketo ya Yosefe.

26 Yango wana, ngai Nkolo Nzambe nakotika te ete bato baye basala bo bango ba kala.

27 Yango wana, bandeko ba ngai, yokani ngai, mpe yokemelani o liloba lya Nkolo: Mpo mobali o ntei ya bino akozala na mwasi te longola se moko; mpe akozala na bamakango te;

28 Mpo ngai, Nkolo Nzambe, nakosepela o bongondo bwa basi. Mpe pite ezali bonsomo boko liboso lya ngai; boye elobi Nkolo wa Bibele.

29 Yango wana, bato baye bakobatela mitindo mya ngai, elobi Nkolo wa Bibele, to mboka ekolakelama botutu mpo ya ntina ya bango.

30 Mpo soko nalingi, elobi Nkolo wa Bibele, kotelemisa nkona epai ya ngai, nakotinda bato ba ngai; soko te bakoyokemela epai ya makambo maye.

31 Mpo tala, ngai, Nkolo, namoni mawa, mpe nayoki eleli ya bana basi ba bato ba ngai o mboka ya Yelusaleme, iyo, mpe o mboka inso ya bato ba ngai, na ntina ya nkuna mpe bonsomo bwa balongani ba bango.

32 Mpe nakotika te, elobi Nkolo wa Bibele, ete bogangi bwa bana basi banzenga ba bato baye, baye nakambaki libanda lya mboka ya Yelusaleme, bomata epai ya ngai likolo lya babali ba bato ba ngai, elobi Nkolo wa Bibele.

33 Mpo bakokamba te mosika bana basi ba bato ba ngai bakangemi na ntina ya boboto bwa bango, longola se soko nakobimela bango elongo na botutu bwa nsomo, kutu kina o bobebisami; mpo bakosala pite te, bo bango ba kala basalaki, elobi Nkolo wa Bibele.

34 Mpe sikawa tala, bandeko ba ngai, boyebi ete mitindo miye mipesamaki na tata wa biso, Lehi; yango wana, boyebaki miango yambo; mpe boyaki epai ya etumbu enene; mpo bosalaki makambo maye bosengelaki te kosala.

35 Tala, bosalaki masumu manene koleka Balamani, bandeko ba biso. Bozokisaki mitema mya basi ba bino ba boboto, mpe bobungisaki bolikii bwa bana ba bino, na ntina ya ndakisa ya bino ibe liboso lya bango; mpe bileli bya mitema mya bango mimati na Nzambe likolo lya bino. Mpe na ntina ya sikisiki ya liloba lya Nzambe, liye likiti o nse likolo lya bino, mitema mingi mikufaki, mitubolamaki na mpota ya mozindo.