1 Ug karon nahitabo nga sa ikatulo ka gatos ug kan-uman ug tulo nga tuig ang mga Nephita misulong uban sa ilang mga kasundalohan aron makiggubat sa mga Lamanita, gikan sa yuta sa Desolation.

2 Ug nahitabo nga ang mga kasundalohan sa mga Nephita gipapahawa pag-usab balik ngadto sa yuta sa Desolation. Ug samtang nangaluya pa sila, ang lagsik nga mga sundalo sa mga Lamanita misulong kanila; ug sila dihay mapintas nga gubat, nga niana nailog sa mga Lamanita ang siyudad sa Desolation, ug mipatay sa daghan nga Nephita, ug daghan ang gibilanggo.

3 Ug ang nahibilin milayas ug miipon sa mga lumulupyo sa siyudad sa Teancum. Karon ang siyudad sa Teancum nahimutang sa mga utlanan dapit sa baybayon; ug duol usab kini sa siyudad sa Desolation.

4 Ug kadto tungod kay ang mga kasundalohan sa mga Nephita misulong sa mga Lamanita nga nagsugod sila sa pagkalaglag; kay kon dili pa tungod niana, ang mga Lamanita unta walay gahom batok kanila.

5 Apan, tan-awa, ang mga paghukom sa Dios mobuntog sa mga daotan; ug pinaagi sa mga daotan nga ang mga daotan pagasilotan; kay ang mga daotan mao ang moaghat sa mga kasingkasing sa katawhan ngadto sa pagpaagas sa dugo.

6 Ug nahitabo nga ang mga Lamanita nangandam sa pagsulong sa siyudad sa Teancum.

7 Ug nahitabo nga sa ikatulo ka gatos ug kan-uman ug upat nga tuig ang mga Lamanita misulong sa siyudad sa Teancum, aron mailog usab nila ang siyudad sa Teancum.

8 Ug nahitabo nga sila napasibog ug napapahawa sila sa mga Nephita. Ug sa dihang nakita sa mga Nephita nga ilang napapahawa ang mga Lamanita nanghambog na usab sila sa ilang kaugalingong kusog; ug misulong sila pinaagi sa ilang kaugalingong gahom, ug miilog na usab sa siyudad sa Desolation.

9 Ug karon ang tanan niini nga butang nahitabo, ug dihay liboan nga napatay sa duha ka habig, sa mga Nephita ug sa mga Lamanita.

10 Ug nahitabo nga ang ikatulo ka gatos ug kan-uman ug unom nga tuig milabay, ug ang mga Lamanita misulong na usab sa mga Nephita aron makiggubat; ug ang mga Nephita wala maghinulsol sa daotan nga ilang gihimo, apan nagpadayon gihapon sa ilang pagkadaotan.

11 Ug ang dila dili makahulagway niini, o masulat sa tawo ang hingpit nga paghulagway sa makalilisang nga talan-awon sa dugo ug pagpamatay nga nahitabo taliwala sa katawhan, sa mga Nephita ug sa mga Lamanita; ug ang matag kasingkasing gipatig-a, mao nga gikahimuot nila ang padayon nga pagpaagas sa dugo.

12 Ug walay sama ka hilabihan nga pagkadaotan taliwala sa tanang anak ni Lehi, wala bisan gani sa tibuok balay ni Israel, sumala sa mga pulong sa Ginoo, sama niini nga katawhan.

13 Ug nahitabo nga nailog sa mga Lamanita ang siyudad sa Desolation, tungod kay ang ilang gidaghanon milabaw sa mga Nephita.

14 Ug nagmartsa usab sila paingon sa siyudad sa Teancum, ug gipapahawa ang mga lumulupyo didto, ug midala sa daghang binilanggo nga mga babaye ug mga bata, ug mihalad kanila isip mga halad ngadto sa ilang mga dios-dios.

15 Ug nahitabo nga sa ikatulo ka gatos ug kan-uman ug pito nga tuig, ang mga Nephita nasuko tungod kay ang mga Lamanita mihalad sa ilang mga babaye ug sa ilang mga bata, hinungdan nga gisulong nila ang mga Lamanita uban sa hilabihan gayod nga kasuko, hangtod nga napildi na usab nila ang mga Lamanita, ug mipapahawa kanila sa ilang mga yuta.

16 Ug ang mga Lamanita wala mosulong pag-usab sa mga Nephita hangtod sa ikatulo ka gatos ug kapitoan ug lima nga tuig.

17 Ug niini nga tuig gisulong nila ang mga Nephita uban sa tanan nila nga gahom; ug dili sila maihap tungod sa grabe nila nga gidaghanon.

18 Ug sukad niini nga panahon ang mga Nephita wala na makaangkon og gahom batok sa mga Lamanita, apan nagsugod sa pagkapuo pinaagi kanila gani sama sa yamog sa atubangan sa adlaw.

19 Ug nahitabo nga gisulong sa mga Lamanita ang siyudad sa Desolation; ug dihay hilabihan ka mapintas nga gubat sa yuta sa Desolation, diin ilang napildi ang mga Nephita.

20 Ug milayas na usab sila gikan kanila, ug miabot sila sa siyudad sa Booz; ug didto nakigharong sila batok sa mga Lamanita sa hilabihan nga kaisog, nga niana ang mga Lamanita wala makapildi kanila hangtod sa ilang ikaduhang pagsulong.

21 Ug sa ilang ikaduhang pagsulong, ang mga Nephita gipapahawa ug gipamatay sa hilabihan ka daghan nga pagpatay; ang ilang mga babaye ug ang ilang mga anak gihalad na usab ngadto sa mga dios-dios.

22 Ug nahitabo nga ang mga Nephita milayas na usab gikan kanila, gidala ang tanang lumulupyo uban kanila, nga anaa sa mga lungsod ug sa mga balangay.

23 Ug karon ako, si Mormon, nakakita nga hapit na mailog sa mga Lamanita ang yuta, busa mitungas ako ngadto sa bungtod sa Shim, ug gikuha ang tanang talaan nga gitipigan ni Ammaron alang sa Ginoo.