1 Epi kounyeya, gade, m ap fè yon ti pale avèk rès pèp sa a ki pa t mouri a, si Bondye vle ba yo pawòl mwen yo, pou yo kapab konnen zèv zansèt yo; wi, m ap pale avèk nou, nou menm rès kay Izrayèl la; Epi men pawòl m ap pale a.

2 Konnen nou fè pati nan kay Izrayèl la.

3 Konnen nou dwe vini nan repantans, san sa, nou pa kapab sove.

4 Konnen nou dwe depoze lèzam pou lagè nou yo, pou nou pa janm pran plèzi ankò nan fè san koule, e pou nou pa pran zam yo ankò, eksepte si Bondye kòmande nou.

5 Konnen, nou dwe vin gen konesans konsènan zansèt nou yo, nou dwe repanti pou tout peche ak inikite nou yo, nou dwe kwè nan Jezikri, nou dwe kwè li se Pitit Gason Bondye a, e Juif yo te touye l, e avèk pouvwa Papa a, li te leve ankò, pou l te kapab gen viktwa sou tonm lan; epi tou doulè lanmò a menm anglouti l.

6 Epi li pote rezirèksyon pou mò yo, pou lèzòm kapab leve kanpe devan fotèy jijman an.

7 Epi li pote redanmsyon pou mond lan, pou moun ki inosan devan l nan jou jijman an kapab gen pèmisyon pou rete nan prezans Bondye, nan wayòm li a, pou chante louwanj san fen avèk koral nan syèl la, pou Papa a, ak Pitit Gason an, ak Sentespri a, ki se yon sèl Bondye a, nan yon eta bonè ki san fen.

8 Se poutèt sa, repanti, e batize nan non Jezi, epi kenbe levanjil Kris la fèm, k ap vin plase devan nou, non sèlman nan rejis sa a, men, nan rejis k ap vin jwenn Janti yo, sòti nan men Juif yo, k ap sòti nan men Janti yo vin jwenn nou tou.

9 Paske gade, bagay sa a ekri nan entansyon pou nou kapab kwè lòt la; e si nou kwè lòt la, n ap kwè sa a tou; e si nou kwè sa a, n ap gen konesans konsènan zansèt nou yo, ak zèv mèveye pouvwa Bondye te manifeste nan pami yo.

10 Epi tou n ap konnen nou se desandan pèp Jakòb la; se poutèt sa n ap konte nan pami pèp premye alyans la; Epi si nou kwè nan Kris la, e nou batize, premyèman avèk dlo, apre sa, avèk dife epi avèk Sentespri a, nou suiv egzanp Sovè a, daprè jan li te kòmande nou an, l ap bon pou nou nan jou jijman an. Amèn.