Wase 3
Era sa tabaki ira na bete kei na ivakavuvuli ko ira na italatala qase ena veitabaki ni liga. Rauta na 401–421 S.K.
1 Na ivakarau ni nodratou lesi ira na bete kei na ivakavuvuli ko iratou na tisaipeli, ka ratou a vakatokai na italatala qase ni lotu—
2 Ni ratou sa masuta oti na Tamada ena yaca i Karisito, eratou sa tabaka na uludra e ligadratou ka kaya:
3 Ena yacai Jisu Karisito au sa tabaki iko kina mo bete (ia kevaka me ivakavuvuli, au sa tabaki iko kina mo ivakavuvuli) mo vunautaka na veivutuni, kei na vakabokoci ni ivalavala ca ena vuku i Jisu Karisito, ena vosota ena vakabauta na yacana me yacova na ivakataotioti. Emeni.
4 A sa vakaoqo na ivakarau ni nodratou tabaki na bete kei na ivakavuvuli, me vaka na isolisoli kei na veikacivi ni Kalou vei ira na tamata; eratou sa tabaki ira ena kaukauwa ni Yalo Tabu sa tiko vei iratou.