Upoko 6
Ka rumakina, ā, ka whakahoahoatia te hunga rīpenetā—Ka murua ngā mema o te hāhi e rīpenetā ana—Ka whakahaerehia ngā hui e te mana o te Wairua Tapu. Takiwā T.A. 401–421.
1 Ināianei ā, ka paku kōrero au e pā ana ki te rumakanga. Nana, i rumakina ngā erata, ngā pirihi me ngā kaiako; ā, kīhai rātou i rumakina ki te kore e whakaputaina ake he hua e rite ana kia tau ai rātou ki taua mea.
2 Kīhai rānei rātou i whakawhiwhi i ētahi ki te kore rātou e haere mai i runga i te ngākau marū me te wairua iro, me te whakaatu atu ki te hāhi kua tino rīpenetā i ō rātou hara katoa.
3 Ā, kāore tētahi i whakawhiwhia ki te rumakanga ki te kore rātou e tango ki runga i a rātou te ingoa o te Karaiti, he hiahia kaha anō tōna ki te mahi ki a ia tae noa atu ki te mutunga.
4 Ā, whai muri iho i tā rātou whiwhi i te rumakanga, ā, ka haria mai rātou, ā, ka meatia, ā, ka whakamākia e te mana o te Wairua Tapu, ka tatauria rātou ki waenganui i te iwi o te hāhi o te Karaiti; ā, ka tīkina ō rātou ingoa, kia mahara i a rātou, ā, kia whāngaia rātou ki te kupu pai a te Atua, kia puritia rātou ki te ara tika, kia mataara tonu rātou i runga i te inoi, e whakawhirinaki anake ana ki runga i ngā painga o te Karaiti, koia te kaituhi me te kaiwhakaoti o tō rātou whakapono.
5 Ā, i huihui putuputu tahi te hāhi, kia nohopuku, ā, kia inoi, me te kōrero tētahi ki tētahi e pā ana ki te oranga o ō rātou wairua.
6 Ā, i huihui putuputu tahi rātou kia kai ai i te taro me te waina, hei whakamaharatanga ki te Ariki a Ihu.
7 Ā, i kaha ū tā rātou tirotiro kei ai he kino ki waenganui i a rātou; ā, ko te tangata i kitea ai e mahi kino ana, ā, ka whakahēngia rātou e ngā kaiwhakaatu tokotoru o te hāhi i mua i ngā erata, ā, mehemea kīhai rātou i rīpenetā, mehemea kīhai i whāki hara, kua murua atu ō rātou ingoa, ā, kīhai rātou i tatauria ki waenganui i te iwi o te Karaiti.
8 Engari ka murua rātou i ngā wā katoa i rīpenetā ai, ā, i rapua ai i runga i te tino hiahia te murunga.
9 Ā, i whakahaerehia ō rātou hui e te hāhi i runga i te ritenga o ngā mahinga a te Wairua, i runga anō i te mana o te Wairua Tapu; nā te mea i meatia kia rite pū anō ki tā te Wairua Tapu ārahi i a rātou ki te kauhau, ki te akiaki rānei, ki te inoi rānei, ki te tuohu iho rānei, ki te waiata rānei.