Ginapahibalo sa tanan nga nasyon, kaliwat, lengguahe, kag katawhan, kon kay sin-o magadangat ini nga libro: Nga kami, paagi sa grasya sang Dios nga Amay, kag sang aton Ginuong Jesucristo, nakakita sang mga lamina nga nagaunod sini nga kasulatan, nga amo ang kasulatan sang katawhan ni Nefi, kag amo man sang mga Lamanhon, nga ila mga kauturan, kag amo man sang katawhan ni Jared, nga naghalin sa tore nga nasambit. Kag amon man nahibal-an nga ang mga ini ginlubad paagi sa dulot kag gahum sang Dios, kay ang iya tingug nagpahayag sini sa amon; gani nahibal-an namon sing pat-od nga ang libro matuod. Kag nagapamatuod man kami nga amon nakita ang mga kinurit nga yara sa mga lamina; kag ang mga ini ginpakita sa amon paagi sa gahum sang Dios, kag indi sang tawo. Kag amon ginapahayag sa mga pulong nga seryoso, nga isa ka anghel sang Dios ang nagpanaog halin sa langit, kag iya gindala kag ginbutang sa atubang sang amon mga mata, nga amon gintan-aw kag nakita ang mga lamina, kag ang mga nakurit diri; kag nahibal-an namon nga paagi sa grasya sang Dios nga Amay, kag sang aton Ginuong Jesucristo, nga amon nakita kag ginapamatud-an nga ining mga butang matuod. Kag ini dalayawon sa amon mga mata. Apang, ang tingug sang Ginuo nagsugo sa amon nga dapat kami magpamatuod sini; gani, agud magtuman sang mga kasugoan sang Dios, nagapahayag kami sang testimonya parte sining mga butang. Kag nahibal-an namon nga kon mangin tampad kami kay Cristo, makakasan namon ang amon mga biste sang dugo sang tanan nga tawo, kag makita nga wala’y mantsa sa atubang sang hukom-lingkuranan ni Cristo, kag magapuyo upod sa iya sing wala’y katapusan sa mga langit. Kag ang kadungganan mangin sa Amay, kag sa Anak, kag sa Balaan nga Espiritu, nga isa ka Dios. Amen.