Lwelah in etweyuck nuh sin muhtuhnfacl, kain in mwet, kahs, ac mwet nuhkwewa, suc orekma se inge ac fah tuhkuh nuh yohroh: Lah kuht, ke kuhlwacng luhn God suc Pahpah, ac Leum lasr Jisus Kraist, liye plwet ma nein ma sihmlac inge, suc pa sie ma sihmlac ke mwet lal Nephi, ac oacyacpac mwet lal Laman, mwet wiyaclos, ac oacyacpac ke mwet lal Jared, suc tuhkuh liki tower se ma sruhmuhnyuck ah. Ac kuht oacyacpac etuh lah ma inge kwewa luhngasyucklac ke mwe sang ac kuh luhn God, tuh puhsrwacl fahkwack ma inge nuh sesr; ke ma inge kuht etuh na pwacye lah orekma se inge pwacye. Ac kuht oacyacpac fahkwack lah kuht liye kihl ma oan ke plwet ah; ac ma inge kwewa oreklac kuht in liye ke kuh luhn God, ac tiac ke mwet. Ac kuht fahkwack ke kahs in nguhsrihk, lah sie lipufacn luhn God el oactume liki inkuhsrao, ac el sang ac fihliyac ye muhtahsr, tuh kuht tuh liye ac liyacack plwet ah, ac kihl kac ah; ac kuht etuh lah ke luhng kuhlwacng luhn God suc Pahpah, ac Leum lasr Jisus Kraist, tuh kuht tuh liye ac ahklohye lah ma inge kwewa pwacye. Ac ma inge ma wolacna nuh ke muhtahsr. Ne ohinge, puhsren Leum sapkihn nuh sesr tuh kuht enenuh in ahklohye ke ma inge kwewa; ke ma inge, in ahkos masap luhn God, kuht fahkwack luhlahlfongi ke ma inge kwewa. Ac kuht etuh lah kuht fin oaru in Kraist, kuht ac fah eislah liki nuknuk lasr srahn mwet nuh kwewa, ac sukokyak nwacsnwacs ye muhtuhn siyah in nuhnuhnkuh luhn Kraist, ac fah muhta yohrohl ne tok ma pahtpaht inkuhsrao. Ac kaksak nuh sin Pahpah, ac nuh sin Wen, ac nuh sin Nguhn Muhtahl, suc pa sie God. Amen.