Nakabatan komon na amin a bansa, sankakanayon, salita, tan totoo, a dia ed sikara saya a kimey so makasabi: A sikami, dia ed panamegley na gracia na Dios Ama, tan Katawan mi a Jesu Cristo, anengneng mi so saray piligo a lugan to so saya a kasulatan, a saya so kasulatan nipaakar ed saray totoo nen Nephi, tan ontan met na saray Lamanite, ya agagi da, tan ontan met ed saray totoo nen Jared, a nanlapu ed tori ya asalita la. Tan kabat mi met a saraya so impatalus ed panamegley na palabo tan pakapanyari na Dios, tan say voces to so añgibalikas ed saya ed sikami; kanian kabat mi ya angapo so panduarua a saya a kimey so tua. Tan paneknekan mi met ya anengneng mi so saray akatatak a wala ed saray piligo; tan saraya so nipanengneng ed sikami ed panamegley na pakapanyari na Dios, tan aliwa a too. Tan ibawag mi ed saray salita na kaolimekan, a sakey ya angel na Dios so linmeksab a nanlapu ed tawen, tan inawit to tan iniarap to ed saray mata mi, ya amuria mi tan anengneng mi so saray piligo, tan saray akatatak diman; tan kabat mi a dia ed gracia na Dios Ama, tan Katawan mi a Jesu Cristo, kanian anengneng mi tan tasian mi a saraya ya a beñgatla so tua. Tan saya so makapakelaw ed saray mata mi. Angaman ontan, say voces na Katawan so añgigangan ed sikami a tasian mi so saya; dia ed ontan, pian naunor mi so saray gangan na Dios, iter mi so paneknek ed saraya a beñgatla. Tan kabat mi a no manmaliw kami a matuor ed si Cristo, nalinisan mi so saray kawes mi ed dala na amin a totoo, tan sikami so narumog ya angapo so mansa ed arap na yuroñgan na panañgokoman nen Cristo, tan miayam kami ed sikato ed saray andi-angaan a katawenan. Tan say kagalañgan wala ed Ama, tan say Anak, tan dia ed Espiritu Santo, a saksakey a Dios. Amen.