Llapa llaqtakunaman, ayllukunaman, simikunaman, runakunaman, piman kay ruway chayaqmanpas yachachisqa kachun: Noqayku, Tayta Yayaq grasianwan, Wiraqocha Jesucristoq grasianpiwan kay willayniyoq raphikunata rikusqaykuta; kaytaq Nephiq llaqtanpa, wawqenku lamanitakunaq, ña rimasqaña rumi qolqamanta hamuq Jaredpa llaqtanpa ima willaynin. Yachaykutaqmi Yayaq sumaq qoyninwan munayninpiwan kay raphikuna t’ikrasqa kasqanta, chhaynatan arun yachachiwarqanku; chhaynaqa, cheqaqtapunin yachayku kay ruway cheqaq kasqanta. Sut’inchallaykutaqmi raphikunapi kaq qelqakunata rikusqaykuta; Yayaq atiyninwantaq manataq runaqwanchu noqaykuman qhawachisqa karqan. Ancha allin yuyayniyoq rimaywantaq willayku hanaqpachamanta Yayaq huk kachan urayamusqanta, paytaq apamurqan ñawiykuq ñawpaqenmantaq churarqan, rikurqaykutaqmi raphikunata, chaypi kaq qelqakunatawan; yachallaykutaqmi Tayta Yayaq grasianwan, Wiraqochanchis Jesucristoq grasianpiwan rikusqaykuta; sut’inchaykutaqmi kay imaymanakuna cheqaq kasqanmanta. Ancha sumaqmi ñawiykupi. Chaypiwanpas, Wiraqochaq arunmi kamachiwarqanku kaymanta sut’inchanaykupaq, chhaynaqa, Yayaq kamachiyninkunaman uyakuq kanaykupaqmi kay imaymanakunamanta sut’inchayku. Yachallaykutaqmi, Jesucristopi iñiysapa kasaqku chayqa, llunp’aqmi p’achayku kanqa llapa runakunaq yawarninmanta, mana ima qhelliyoqtaq tarikusaqku Jesucristoq taripananpa ñawpaqenpi, Paywantaq wiñaypaq hanaqpachapi tiyasaqku. Taytapaq, Churipaq, Qollanan Nunapaqwan yupaychay kachun, paykunata huk Yayalla kanku. Hinataq kachun.