Ta x-alat ta scotol banamil, ta scotol jnaclejetic, ta scotol c’opetic, xchi’uc ta scotol lumetic, ti boch’otic ta xc’ot ta stojolalic ti li’ abtelal meltsanbile: Ja’ vu’uncutic ta sbenticion Riox Totil, xchi’uc Cajvaltic Jesucristo, la jquilcutic ti c’usitic ts’ibabil tee, ti ja’ spoco’ lo’ilal slumal Nefi, xchi’uc Lamanitaetic, xchi’uc xchi’iltac, xchi’uc slumal Jared ti bu talic ta muc’ta tec’ubal ti bu yich’oj o no’ox alele. Xchi’uc jna’ojcutic ti yich’oj jelubtasel ta yan c’op ta svu’el xchi’uc ta stsatsal Riox yu’un ja’ jech ta ye la jyalbuncutic; ja’ jech jna’ojcutic o lec ti ja’ ta bats’imelel ti yabtele. Xchi’uc ta xcalcutic ta jamal ti yu’un quilcutic ti c’usitic ts’ibabil ti ta sba taq’uin vunetique; la jq’uich’ ac’bel quilcutic ta svu’el jtotic Riox yu’un ma’uc ta svu’el no’ox jun vinic. Xchi’uc ta xcalcutic ta jamal ta lequil c’op ti yu’un jun yaj almantal Riox yaltal ta vinajel, ti la jyich’tal la jyac’ ta satcutic, ti c’uxi xu’ ta xquilcutic o c’u x-elan ti taq’uin vunetique, ja’ jech ti c’u x-elan oy ti ts’ibiletique; jna’ojcutic ti ja’ vocol iyal ti Riox Totil, xchi’uc ti Cajvaltic Jesucristo, ti jech la jquilcutic xchi’uc ti jech ta xcalcutic ta jamal ti c’usitic li’ ti ja’ ta bats’imelele. Ti jech alac’ xa sba ta jsattique. Ja’ to, la jyaltal ti Cajvaltic ti jech ac’o xcalcutic ta jamale: Ti ja’ jechuc, c’uxi chc’ot ta ch’unel smantaltac ti Rioxe, chcalcutic ta jamal ti c’usitic li’e. Xchi’uc jna’ojcutic ti me lec jch’unej mantalutic yu’un ti Jesucristoe, ti jc’u’tique sacuben chcom ta xch’ich’al chalic scotol viniquetic, jech muyuc xa quic’ubaltic ta stojolal ti Jesucristoe, Ja’ ta jchi’intic sbatel osil te ta vinajel, Ja’ uc no’ox me la’ quich’tic ta muc’ Riox, xchi’uc Nich’onil, xchi’uc Ch’ul Espíritu ti ja’ junic Rioxe, “Jechuc”.