Ginpapahibaro ngadto han ngatanan nga mga nasud, mga katulinan, mga pinulungan, ngan katawhan, ngan ngadto han igkakahibalag hine nga libro: Nga kami, pinaagi han grasya han Diyos Amay, ngan han aton Ginoo nga hi Jesucristo, nagpakakita han mga lamina nga ginkuhaan hine nga sinurat, nga sinurat mahitungod han katawhan nira Nephi, ngan han mga Lamanite liwat, nga ira kabugtoan, ngan an mga tawo liwat ni Jared, nga tikang didto han tore nga nahidabihan hine dinhe. Ngan kami liwat maaram nga ine ginhubad pinaagi han gasa ngan gahum han Diyos, kay an iya tingog in nagsiring ha amon; salit maaram kami ngan sigurado nga ine nga libro tinuod. Ngan kami liwat nagpapamatuod nga amon nakita an mga gin-ukit dida han mga lamina; nga ine iginpakita ha amon pinaagi han gahum han Diyos, ngan dire han tawo. Ngan amon ginpapahayag ha mahimurayaw nga mga pulong, nga an anghel han Diyos linusad tikang ha langit, ngan iya gindara ngan ginpakita ha atubangan han amon mga mata, ngan amon gintan-aw ngan nakita an mga lamina, ngan an mga inukit dida hito; ngan kami maaram nga dara han grasya han Diyos Amay, ngan han Ginoo Jesucristo, nga amon nakit-an ngan nagsusumat nga ine nga mga butang tinuod. Nga ine in urusahon ha amon mga mata. Pero, an tingog han Ginoo nagsugo ha amon nga igsumat ine; salit, dara han pagkamasugot han mga sugo han Diyos, kami nagpapamatuod hine nga mga butang. Ngan maaram kami nga kun magmamatinumanon kami kan Cristo, malilimpyohan an amon mga panapton han dugo han ngatanan nga tawo, ngan mahiaagian nga waray mantsa dida han linkuranan nga paghurukman ni Cristo, ngan makag-ukoy upod ha iya hin waray katapusan ha kalangitan. Ngan an dungog mahingadto han Amay, ngan han Anak, ngan han Espiritu Santo nga uusa la nga Diyos. Amen.