1 Sannlega segi ég yður, vinir mínir: Sjá, ég gef yður opinberun og fyrirmæli, svo að þér vitið hvernig þér skuluð framfylgja skyldum yðar varðandi sáluhjálp og lausn bræðra yðar, sem dreifðir hafa verið í landi Síonar —

2 Óvinir mínir hafa hrakið þá og þjáð, en heilagri reiði minni mun ég úthella takmarkalaust yfir þá á sínum tíma.

3 Því að ég hef leyft þeim fram að þessu, að þeir fái að fylla mæli misgjörða sinna, svo að bikar þeirra verði fullur —

4 Og svo að skamma hríð mætti með sárri og þungbærri ögun aga þá, sem kenna sig við nafn mitt, vegna þess að þeir hlýddu ekki að fullu þeim boðum og fyrirmælum, sem ég gaf þeim.

5 En sannlega segi ég yður, að ég hef tekið ákvörðun, sem fólki mínu verður ljós, svo sem það frá þessari sömu stundu hlítir þeim ráðum, sem ég, Drottinn Guð þeirra, mun gefa því.

6 Sjá, það mun einmitt frá þessari stundu fara að sigrast á óvinum mínum, því að ég hef ákvarðað það.

7 Og með því að hlýða á og virða öll þau orð, sem ég, Drottinn Guð þeirra, mæli til þeirra, skal sigurgöngu þeirra aldrei linna fyrr en ríki heimsins eru lögð að fótum mér og jörðin verður afhent hinum heilögu til eignar, alltaf og að eilífu.

8 En sem þeir halda ekki boðorð mín og hlýða ekki á né virða öll mín orð, svo munu ríki heimsins sigrast á þeim.

9 Því að þeim var ætlað að verða heiminum ljós og mönnunum frelsarar —

10 Og sem þeir eru mönnunum ekki frelsarar, svo eru þeir sem salt er dofnað hefur, og því til einskis annars nýtt en að vera kastað út og fótum troðið af mönnum.

11 En sannlega segi ég yður, ég hef ákvarðað að bræður yðar, sem dreifðir hafa verið, snúi aftur til erfðalanda sinna og byggi upp eyðistaði Síonar.

12 Því að eftir mikið andstreymi kemur blessunin, eins og ég hef áður boðið.

13 Sjá, þetta er sú blessun, sem ég hef heitið yður eftir andstreymi yðar og andstreymi bræðra yðar — lausn yðar og lausn bræðra yðar, jafnvel endurreisn þeirra í Síonarlandi, sem skal uppbyggt og aldrei framar niður rifið.

14 Ef þeir eigi að síður vanhelga arfleifð sína, mun þeim kollvarpað, því að ég mun ekki hlífa þeim, ef þeir vanhelga arfleifð sína.

15 Sjá, ég segi yður, að lausn Síonar hlýtur að verða með mætti —

16 Þess vegna mun ég vekja mann fyrir fólk mitt, sem mun leiða það líkt og Móse leiddi börn Ísraels.

17 Því að þér eruð börn Ísraels og af niðjum Abrahams og yður verður að leiða úr ánauð af mætti og með útréttum armi.

18 Og á sama hátt og feður yðar voru í fyrstu leiddir, já, þannig mun endurlausn Síonar verða.

19 Látið þess vegna ekki hugfallast, því að ég segi ekki við yður eins og ég sagði við feður yðar: Engill minn mun fara fyrir yður, en ekki návist mín.

20 En ég segi við yður: Englar mínir munu fara fyrir yður og einnig návist mín, og er tímar líða munuð þér eignast hið góða land.

21 Sannlega, sannlega segi ég yður, að þjónn minn Joseph Smith yngri er sá maður, sem ég líkti þjóninum við, sem herra víngarðsins talaði til í dæmisögunni, sem ég hef gefið yður.

22 Þess vegna skal þjónn minn Joseph Smith yngri mæla hina ungu menn mína og þá miðaldra við styrk húss míns — Safnist saman á landi Síonar, á því landi, sem ég hef keypt fyrir það fé, er mér hefur verið helgað.

23 Og allir söfnuðirnir sendi hyggna menn með fé sitt og kaupi land, já, eins og ég hef boðið þeim.

24 Og sem óvinir mínir koma gegn yður og reka yður af hinu góða landi mínu, er ég hef helgað sem land Síonar, já, af yðar eigin löndum, eftir að þér hafið vitnað gegn þeim fyrir mér, svo skuluð þér formæla þeim —

25 Og hverjum, sem þér formælið, mun ég formæla, og þér skuluð ná rétti mínum á óvinum mínum.

26 Og návist mín verður með yður, já, við að ná rétti mínum yfir óvinum mínum, allt í þriðja og fjórða ættlið þeirra, sem forsmá mig.

27 Enginn maður skal óttast að fórna lífi sínu mín vegna, því að sá, sem leggur líf sitt í sölurnar mín vegna, mun finna það aftur.

28 Og hver sá, sem ekki er fús til að fórna lífi sínu mín vegna, er ekki lærisveinn minn.

29 Það er vilji minn, að þjónn minn Sidney Rigdon hefji upp raust sína yfir söfnuðunum í austurhlutum landsins og búi þá undir að halda þau boð, sem ég hef gefið þeim varðandi endurreisn og endurlausn Síonar.

30 Það er vilji minn, að þjónn minn Parley P. Pratt og þjónn minn Lyman Wight snúi ekki aftur til lands bræðra sinna, fyrr en þeir hafa náð tíu, tuttugu, fimmtíu eða hundrað manna hópum til að fara til Síonarlands, ekki fyrr en þeir hafa skipulagt fimm hundruð manns af styrk húss míns.

31 Sjá, þetta er vilji minn. Biðjið og yður mun gefast. En menn gjöra ekki alltaf vilja minn.

32 Ef þér getið því ekki náð fimm hundruðum, leitið þá af kostgæfni, svo að þér mögulega náið þremur hundruðum.

33 Og ef þér náið ekki þremur hundruðum, leitið þá af kostgæfni, svo að þér mögulega náið einu hundraði.

34 En sannlega segi ég yður: Þau fyrirmæli gef ég yður, að fara ekki til Síonarlands, fyrr en þér hafið náð einu hundraði af styrk húss míns til að fara með yður til Síonarlands.

35 Eins og ég því sagði yður, biðjið og yður mun gefast. Biðjið einlæglega að þjóni mínum Joseph Smith yngri megi auðnast að fara með yður og vera í forsæti meðal fólks míns og skipuleggja ríki mitt á hinu helgaða landi og koma börnum Síonar fyrir samkvæmt þeim lögum og boðum, sem hafa verið og gefin verða yður.

36 Allur sigur og öll dýrð fellur yður í skaut fyrir kostgæfni yðar, staðfestu og trúarbænir.

37 Lát þjón minn Parley P. Pratt fara með þjóni mínum Joseph Smith yngri.

38 Lát þjón minn Lyman Wight fara með þjóni mínum Sidney Rigdon.

39 Lát þjón minn Hyrum Smith fara með þjóni mínum Frederick G. Williams.

40 Lát þjón minn Orson Hyde fara með þjóni mínum Orson Pratt, hvert sem þjónn minn Joseph Smith yngri ræður þeim að fara, til uppfyllingar þeim boðum, sem ég hef gefið yður. En felið allt annað í mínar hendur. Já, vissulega. Amen.