Wase 131
Na ivakaro mai vei Josefa Simici na Parofita, a soli mai Reimasi, Ilinoi, ena 16 kei na 17 ni Me 1843.
1–4, E gadrevi na vakamau vakasilesitieli me da bula vakacerecerei kina ena lomalagi cecere duadua; 5–6, Sa vakamacalataki na sala ena vauci kina na tamata ki na bula tawamudu; 7–8, Sa vakavatukana na yalo kecega.
1 E tolu na lomalagi se na ivakatagedegede ena lagilagi vakasilesitieli;
2 Me rawata na ivakatagedegede e cake sara, sa dodonu vua e dua na tamata me na curu ena ivakarau oqo ni matabete [na kena ibalebale na veiyalayalati vou ka tawamudu ni vakamau];
3 Ia kevaka e sega, ena sega sara ni rawata.
4 Ena rawa beka ni curu ki na dua tale, ia sa yala ga e keri na nona matanitu; sa na sega ni rawa ni vakawa.
5 (17 ni Me, 1843.) Na vosa ni parofisai veivakadeitaki e kena ibalebale na nona kila e dua na tamata ni sa vauci ki na bula tawamudu, ena ivakatakila kei na yalo ni parofisai, ena kaukauwa ni Matabete Tabu.
6 Raica sa ka dredre me vakabulai na tamata ena nona lecaika.
7 E sega ni dua na ka e sega na vatukana. Raica sa vakavatukana na yalo kecega, ia sa rui savasava ka uasivi sara, a sa rawa wale ga me raici ena mata sa savasava sara;
8 Eda sega ni raica rawa; ia ni sa vakasavasavataki na yagoda, sa qai rawa ni da raica na vatukadra.