1 Na cadra tale ni Lotu i Karisito ena veisiga e muri oqo, ni sa oti e dua na udolu walu na drau ka tolusagavulu na yabaki mai na gauna a sucu kina vakayago e vuravura na noda Turaga ka iVakabula ko Jisu Karisito, ka a tauyavutaki ka cokonaki ena kena sala vakalawa ena neimami vanua, me vaka na lomana kei na Nona ivakaro na Kalou, ena ikava ni vula, ena ikaono ni siga ni vula ka vakatokai me Epereli—

2 Na ivakaro ka soli vei Josefa Simici Lailai, ka a kacivi mai vua na Kalou, ka tabaki me dua na iapositolo i Jisu Karisito, ka imatai ni italatala qase ni lotu oqo;

3 Kei Oliva Kaudari, ka a kacivi talega mai vua na Kalou, me dua na iapositolo i Jisu Karisito, ka ikarua ni italatala qase ni lotu oqo, ka tabaki mai na ligana;

4 Sa yaco oqo ena loloma soli wale ni Turaga na noda iVakabula ko Jisu Karisito, ko koya me nona na lagilagi, ena gauna oqo ka sega ni mudu. Emeni.

5 Ni oti na kena vakaraitaki vakaidina vua na imatai ni italatala qase oqo ni sa bokoci na nona ivalavala ca, sa qai vakataotaki koya tale na veika tawayaga vakavuravura;

6 Ia ni sa oti na nona veivutuni, ka vakamalumalumutaki koya vakaidina sara, ena vakabauta, sa mai vunau vua na Kalou mai vua e dua na nona agilosi tabu, ia sa serau sara na matana me vaka na livaliva, ka sa uasivia na veika vulavula kecega na savasava ni nona isulu;

7 Ka solia vua na ivakaro sa vakauqeti koya sara;

8 Ka solia vua na kaukauwa mai lagi, ena kena sala sa vakarautaki tu mai, me vakadewataka kina na iVola i Momani;

9 Ka tiko kina na kedra ivolatukutuku e dua na matatamata era sa rusa, kei na taucoko ni kosipeli i Jisu Karisito vei ira na Matanitu Tani kei ira tale ga na Jiu;

10 Ka a soli ena veivakauqeti, ka vakadeitaki vei ira tale eso mai na veiqaravi ni agilosi, ka qai kacivaki ki vuravura mai vei ira—

11 Me vakadinadinataka ki vuravura ni sa dina na ivolanikalou tabu, ka ni sa dau uqeti ira na tamata na Kalou ka kacivi ira ki na nona cakacaka tabu ena itabayabaki kei na itabatamata oqo, ka vakakina vei ira na itabatamata e liu;

12 Ka vakaraitaka kina ni sai koyakoya tiko ga na Kalou ena siga sa oti, ena siga edaidai ka sega ni mudu. Emeni.

13 O koya gona sa vuqa sara na kena ivakadinadina, ena vukudra sa na lewai kina ko vuravura, sa dina sara ni lewevuqa era na qai kila e muri na cakacaka oqo.

14 Kei ira na ciqoma ena vakabauta, ka caka dodonu tiko ga, era na rawata na isala ni bula tawamudu;

15 Ia ko ira sa vakaukauwataka na lomadra ena tawa vakabauta, ka sega ni ciqoma, ena vuki me ra na cudruvi—

16 Me vaka sa kaya na Turaga na Kalou; ka keirau, sa rogoca ka vakadinadinataka na italatala qase ni lotu, na vosa lagilagi ni Tui sa Cecere Sara, ko koya sa nona na lagilagi tawamudu ka sega ni mudu. Emeni.

17 Ena veika oqo keirau sa kila kina ni tiko e dua na Kalou mai lomalagi, io sa tawayalani na nona gauna ia sa tawamudu, mai na tawavakaiyalayala ki na tawavakaiyalayala na Kalou sa sega ni veisau rawa vakadua, sa bulia na lomalagi kei na vuravura, kei na veika kecega sa tu kina;

18 Sai koya sa bulia na tamata, na tagane kei na yalewa, me ucui koya ka itovo vata kaya, sa buli ira ko koya;

19 Ka solia vei ira na ivakaro me ra lomani koya ka qaravi koya, na Kalou bula ka dina duadua ga, ka sai koya taudua ga me ra qarava.

20 Ia mai na talaidredre ki na veilawa tabu oqo sa mai dau garogaro ka lewai rau na tevoro, ka rau sa muduki tani kina.

21 O koya sa solia kina na Luvena e Duabau ga, na Kalou Kaukauwa, me vaka sa volai tu ena ivolanikalou ka mai solia ko koya.

22 A mai temaki ko Koya ia a sega ni rawai.

23 A lauvako ki na kauveilatai, mate, ka tucake tale ena ikatolu ni siga;

24 Sa lako cake ki lomalagi, ka laki tiko ena liga imatau i Tamana, me dabe vakatui ena kaukauwa vakalou me vaka na lewa i Tamana;

25 Ia ko ira kecega sa vakabauta ka papitaisotaki ena yacana tabu, ka vosota ena vakabauta me yacova na ivakataotioti, sa dodonu me vakabulai—

26 E sega walega ni ko ira sa vakabauta ni oti na lako mai ena ituvuka ni gauna ena bula vakayago, ia ko ira kece mai na ivakatekivu, ko ira talega na lewelevu ni se bera ni lako mai ko koya, era sa vakabauta na nodra vosa na parofita tabu, ka ra a vosa ena veivakauqeti ni isolisoli ni Yalo Tabu, ka ra vakadinadinataki koya vakaidina ena veika kecega, e dodonu me ra rawata na bula tawamudu,

27 Era na vakakina ko ira era qai bula e muri, ko ira era sa vakabauta na isolisoli kei na veikacivi ni Kalou mai na Yalo Tabu, ko koya sa tukuni Tamada kei na Luvena;

28 Ia na Tamada, Luvena, kei na Yalo Tabu eratou sa duavata va-Kalou, raica sa tawayalani ka tawamudu, sega ni vakaicavacava. Emeni.

29 Keitou sa kila ni sa dodonu me veivutuni na tamata kecega ka vakabauta na yacai Jisu Karisito, io me ra qarava na Tamada ena yacana, ka vosota ena vakabauta na yacana ki na ivakataotioti, kevaka e sega, era na sega ni vakabulai ena matanitu ni Kalou.

30 Ia eda sa kila ni veivakadodonutaki ena loloma soli wale ni noda Turaga na iVakabula ko Jisu Karisito, e dodonu ka dina;

31 Eda sa kila talega, ni veivakatabui ena loloma soli wale ni noda Turaga na iVakabula ko Jisu Karisito e dodonu ka dina, kivei ira kece era lomana ka qarava na Kalou ena yalodra taucoko, nodra vakasama, kei na nodra kaukauwa.

32 Ia e se rawa tikoga ni lutu na tamata mai na loloma soli wale ka vuki tani mai vua na Kalou bula;

33 O koya sa kilikili sara me rogoca matua na isoqosoqo lotu ka dau masu tiko ga, me kakua ni ra temaki kina;

34 Io, me ra rogoca talega ko ira era sa vakatabui.

35 Eda sa kila ni sa dina sara na veika oqo me vaka na ivakatakila i Joni, io sa sega na vosa e vakaikuritaki se kau tani mai na nona ivola ni parofisai oqo, na ivolanikalou tabu, se na ivola ni parofisai ni Kalou ka na qai vakatakilai mai e muri ena isolisoli kei na kaukauwa ni Yalo Tabu, ena domo ni Kalou, ena nodra veiqaravi na agilosi.

36 Oqori na veika sa tukuna na Turaga na Kalou; na vakarokoroko, kaukauwa kei na lagilagi me soli tikoga ki na yacana tabu, ena gauna oqo ka sega ni mudu. Emeni.

37 Oqo tale, me ivakaro ki na lotu me baleta na ivalavala ni papitaiso—Ko ira kecega era sa vakayalomalumalumutaki ira vua na Kalou, ka gadreva me papitaiso, ka lako mai ena yalo raramusumusu kei na yalo e bibivoro, ka vakadinadinataka ki na lotu ni ra sa veivutunitaka vakaidina na nodra ivalavala ca kecega, ka sa lomadra me ra taura na yacai Jisu Karisito, ka sa tiko na inaki dei ni ra na qaravi koya me yacova na ivakataotioti, ka ra sa vakaraitaka dina ena nodra cakacaka ni ra sa rawata na Yalo i Karisito me bokoci kina na nodra ivalavala ca, me ra na ciqomi ki na nona lotu ena papitaiso.

38 Na nodra itavi na italatala qase, bete, ivakavuvuli, dikoni, kei ira na lewe ni lotu i Karisito—Na iapositolo e italatala qase, ka sa nona itavi me veipapitaisotaki;

39 Ka me tabaki ira na italatala qase, bete, ivakavuvuli kei na dikoni tale eso;

40 Io me lotutaka na madrai kei na waini—na ivakananumi ni yago kei na dra i Karisito—

41 Me vakadeitaki ira era sa papitaisotaki mai ki na lotu, ena veitabaki ni liga me baleta na veipapitaisotaki ena bukawaqa kei na Yalo Tabu, me vaka sa volai ena ivolanikalou;

42 Me veivakavulici, veituberi, veivunauci, veipapitaisotaki ka vakatawai ira na lewe ni lotu;

43 Me vakadeitaka na lotu ena veitabaki ni liga, ka solia na Yalo Tabu;

44 Me liutaka na veisoqoni kecega.

45 Na italatala qase me ra liutaka na veisoqoni me vaka sa uqeti ira kina na Yalo Tabu, io me vaka na ivakaro kei na vakatakila mai vua na Kalou.

46 Sa itavi ni bete me vunau, veivakavulici, veituberi, veivunauci, ka veipapitaisotaki, ka me lotutaka na sakaramede,

47 Me dausikova na nodra vuvale na lewenilotu yadudua, ka vunauci ira me ra daumasu ena masu votu kei na masu vuni ka vakayacora vakavinaka na nodra itavi kece sara ni matavuvale.

48 Sa rawa tale ga vua me tabaki ira na bete, ivakavuvuli, kei na dikoni.

49 Io ko koya me dau liutaka na veisoqoni kevaka e sega ni tiko e dua na italatala qase;

50 Ia kevaka sa tiko e dua na italatala qase, sa nona itavi ga me vunau, veivakavulici, veituberi, veivunauci ka veipapitaisotaki,

51 Io me dausikova na nodra veivale na lewenilotu yadudua, ka vakauqeti ira me ra daumasu ena masu votu kei na masu vuni ka me ra vakayacora vakavinaka na nodra itavi kece sara ni matavuvale.

52 Na bete me na dau vukea na italatala qase ena itavi kece sara oqo kevaka ena dau gadrevi.

53 Sa itavi ni ivakavuvuli me dau vakatawai ira na lewe ni lotu ena veigauna kece sara, dauvukei ira ka vakaukauwataki ira;

54 Ka raica me kakua na caka ca ena lotu, me kua na veicudruvi vakataki ira, kua na lasu, veikaseti vuni, se vosa vakacacataki ira na tani;

55 Ka raica me ra dausoqoni wasoma na lewe ni lotu, ka raica tale ga me ra vakayacora vakavinaka na nodra itavi na lewenilotu.

56 Ko koya me na liutaka na soqoni kevaka e sega ni tiko e dua na italatala qase se na bete—

57 Io sa na dauvukei koya tiko ga, ena nona itavi kece vakalotu na dikoni, kevaka ena dau gadrevi.

58 Ia e sega ni tiko vei rau na ivakavuvuli kei na dikoni na kaukauwa ni veipapitaisotaki, lotutaki ni sakaramede, se veitabaki ena liga;

59 Ia, me rau veivakasalataki, veituberi, veivunauci, ka veivakavulici, ka veisureti ki na tamata kecega me ra lako mai vei Karisito.

60 Ko ira kece na italatala qase, bete, ivakavuvuli se dikoni me ra tabaki me vaka na isolisoli kei na veikacivi ni Kalou vei ira; ka me tabaki ena kaukauwa ni Yalo Tabu, ka sa tiko vei koya ka veitabaki.

61 Ko ira kece na italatala qase ena loma ni lotu i Karisito me ra dau sota ena koniferedi vakayadua ena veivula tolu, se ena veigauna sa digitaki ka vakadonui mai na koniferedi;

62 Ia na koniferedi me na vakayacori kina na veicakacaka vakalotu me qaravi ena gauna ko ya.

63 Ko ira na italatala qase me ra na ciqoma na veivakadonui mai vei ira na italatala qase tale eso, mai na veitokoni ni lotu ka ra wili kina, se mai na koniferedi.

64 Ko ira yadua na bete, ivakavuvuli, se dikoni; ka a tabaki mai vua e dua na bete, me taura e dua na sitivikiti mai vua ena gauna ko ya, na sitivikiti oqori, ni sa na soli vua e dua na italatala qase, sa na rawa ni soli kina vua e dua na ivola, ka sa na vakadonui kina na nona vakayacora na itavi ka sa kacivi kina, se sa na rawa ni qai taura mai na dua na koniferedi.

65 Ena sega ni dua na tamata me na tabaki ki na dua na itutu ena lotu oqo, ka sa tauyavutaki vinaka tu kina e dua na tabana, ka sega ni ra veitokoni kina na lewenilotu;

66 Ia ko ira na italatala qase vakatulewa, bisopi dauveilakoyaki, lewe ni matabose e cake, bete levu, kei na italatala qase, e rawa ni ra veitabaki, ke sega na taba ni lotu ka na gadrevi kina na veitokoni.

67 Ko ira kece na peresitedi ni matabete levu (se italatala qase vakatulewa), bisopi, lewe ni matabose e cake, kei na bete levu, me ra na dau tabaki ena veidusimaki ni dua na lewe ni matabose e cake se koniferedi raraba.

68 Na nodra itavi na lewenilotu ni ra sa ciqomi oti ena papitaiso—Me tiko e dua na gauna vei ira na italatala qase se bete me ra vakamacalataka vakavinaka na veika me baleta na lotu i Karisito me ra kila vinaka, ni se bera ni ra kania na sakaramede ka vakadeitaki ena veitabaki ni ligadra na italatala qase, me rawa ni vakayacori na veika kece oqo ena ituvatuva virikotori.

69 Ia ko ira na lewenilotu me ra vakaraitaka raraba ki na lotu, ka vakatalega kina vei ira na italatala qase, ena nodra itovo vakalou kei na nodra ivosavosa ni ra sa bula kilikili, ka na tiko na cakacaka kei na vakabauta ka sala vata kei na ivolanikalou tabu—ka ra yalodina ka ivalavala dodonu ena mata ni Turaga.

70 Ko ira kece na lewenilotu ni Karisito ka tiko na luvedra me ra kauti ira mai vei ira na italatala qase ki na lotu, io me ra tabaki ira e ligadra ena yaca i Jisu Karisito, ka vakalougatataki ira ena yacana.

71 Ena sega ni rawa ni dua me ciqomi ena lotu i Karisito vakavo ga kevaka sa yacova na yabaki ni saumi taro vakai koya ena mata ni Kalou, ka sa rawa ni na veivutuni.

72 Na papitaiso me na vakayacori vakaoqo kivei ira kece era sa veivutuni—

73 Ko koya sa kacivi mai vua na Kalou ka sa tiko vua na kaukauwa mai vei Jisu Karisito me veipapitaisotaki, me sobu ki loma ni wai vata kei koya na tamata ka sa soli koya me papitaiso, ka na kaya, kacivi koya ena yacana: Sa lesi au ko Jisu Karisito meu papitaisotaki iko ena yaca ni Tamada, kei na Luvena, kei na Yalo Tabu. Emeni.

74 Sa na qai tabadromuci koya e wai, ka vakamatari koya cake tale mai wai.

75 Sa kilikili me ra dau soqoni vakawasoma na lewe ni lotu me ra kana madrai ka gunu waini me ra vakananuma kina na Turaga ko Jisu;

76 Me na qai lotutaka na italatala qase se bete; ka sa vakaoqo na kena icakacaka—ena tekiduru ko koya vata kei ira na ivavakoso ka masu vakaoqo vua na Tamada ena yalo e vakarokoroko, ka kaya:

77 Oi kemuni na Kalou, na Tamai keimami Tawamudu, keimami sa kerei kemuni ena yaca ni Luvemuni, ko Jisu Karisito, mo ni vakalougatataka ka vakatabuya na madrai oqo ki yalodra o ira kece era sa vakaivotavota kina, me ra kania ka vakananuma kina na yago ni Luvemuni, ka vakadinadinataka vei kemuni, na Kalou, na Tamai keimami Tawamudu, ni sa lomadra me ra taura na yaca ni Luvemuni, ka dau nanumi koya tiko ga, ka muria na nona ivakaro sa solia vei ira; me tiko ga kina kei ira na Yalona. Emeni.

78 Sa vakaoqo na icakacaka ni kena lotutaki na waini—me taura talega na bilo, ka kaya:

79 Oi kemuni na Kalou, na Tamai keimami Tawamudu, keimami sa kerei kemuni ena yaca ni Luvemuni, ko Jisu Karisito, mo ni vakalougatataka ka vakatabuya na waini oqo ki yalodra o ira kece era sa gunuva, me ra kitaka ka vakananuma kina na dra ni Luvemuni, sa vakadavei ena vukudra; me ra vakadinadinataka kina vei kemuni, na Kalou, na Tamai keimami Tawamudu, ni ra na dau nanumi koya tiko ga, me tiko kina kei ira na Yalona. Emeni.

80 Kevaka e dua na lewenilotu i Karisito sa talaidredre se ivalavala ca, me na vakadodonutaki me vaka sa dusimaki ena ivolanikalou.

81 Sa itavi ni veitabana yadua ena lotu i Karisito, me tala e dua se vuqa na nona ivakavuvuli me tiko ena bose era dau kaciva na italatala qase ni lotu.

82 Ia me ra kauta tiko yani na kedra itukutuku kece na a qai curu vou ki na lotu me tekivu mai na gauna ni koniferedi sa oti; se me vakau yani mai na ligadra eso na bete; raica sa vinakati na ka oqo me rawa ni maroroi tu e dua na itukutuku tudei ni yacadra na lewe ni lotu, ia me dau qarava na kena ivola e dua na italatala qase sa lesi me qarava na cakacaka oqo;

83 Ia me kau tale ga yani na yacadra na lewe ni lotu era sa vakasivoi, me bokoci mai na ivola levu ni yaca ni lotu.

84 Ia ko ira na lewe ni lotu era sa toki ki na dua tale na vanua, me ra kauta tiko e dua na ivola me vakadinadinataka ni ra lewe ni lotu ka qarava vakavinaka tiko na nodra itavi vakalotu, ia na ivola oqori me sainitaka e dua na italatala qase se bete e kilai koya vinaka, sa rawa tale ga me ra sainitaka na ivakavuvuli se dikoni ni lotu.