Wase 21
Na veika sa vakatakilai vei Josefa Simici na Parofita, mai Feieti e Niu Ioka, ena 6 ni Epereli, 1830. A soli na ivakatakila oqo ena tauyavu ni Lotu ena tiki ni siga sa cavuti e cake, ena vale nei Pita Witima Levu. Eratou a vakaitavi talega kina e ono na tamata ka ratou se qai papitaiso oti. Eratou a vakaraitaka ko iratou oqori ni ratou sa gadreva ka nakita sara me ratou tauyavutaka, me vaka na ivakaro ni Kalou (raica na wase 20). Eratou a lomavata ka tokona tale ga me rau sa vakailesilesi vakatulewa ni Lotu o Josefa Simici Lailai kei Oliva Kaudari. Ena veitabaki ni liga sa qai tabaka na ulu i Oliva ko Josefa ka lesi koya me dua na italatala qase ni Lotu, oti sa qai kitaka talega vakakina vei Josefa ko Oliva. Ni sa vakayacori oti na sakaramede, erau sa qai tabaki iratou yadua na vakaitavi tiko ko Josefa kei Oliva ena kena soli na Yalo Tabu, ka ra vakadeitaki yadua me ra sa lewe ni Lotu.
1–3, Sa kacivi ko Josefa Simici me daurairai, dauvakavakadewa, parofita, iapositolo ka italatala qase; 4–8, Na nona vosa ena dusimaka na inaki kei Saioni; 9–12, Era na vakabauta na nona vosa na Yalododonu ni vosa ena kaukauwa ni Dauveivakacegui.
1 Raica, me dua na ivolatukutuku mo dau maroroya tiko; ia ko na vakatokai kina mo daurairai, dauvakavakadewa, parofita ka iapositolo i Jisu Karisito, io mo dua na italatala qase ni lotu me vaka na inaki ni Kalou ko Tamada, kei na loloma soli wale ni nomu Turaga ko Jisu Karisito.
2 Ni ko sa vakauqeti ena Yalo Tabu mo tura na kena yavu, ka tara cake ena vakabauta savasava duadua.
3 Na lotu a mai tauyavutaki ka vakaduri ena ikaduanaudolu, walunadrau tolusagavulu ni yabaki ni nomu Turaga, ena ikava ni vula, kei na ikaono ni siga ni vula ka vakatokai ko Epereli.
4 O koya sa kilikili kina ki na lotu me muria na vosa kei na ivakaro kecega sa vakatakilai vua me tukuna vei kemudou, io mo dou caka dodonu kina e mataqu;
5 Ni dou na rogoca na nona vosa, me vaka ga ni dou rogoca mai gusuqu, ena yalovosota kei na vakabauta.
6 Ni kena vakayacori na veika oqo, ena sega kina ni rawai kemudou na matamata mai eli; ia na Turaga na Kalou ena vakatalabusesetaka na kaukauwa ni butobuto e matamudou; ka na vakavuna me yavavala ko lomalagi ena vukumudou, me vakalagilagi kina na yacana.
7 Ni sa kaya vakaoqo na Turaga na Kalou: Ko koya au sa vakauqeta me tosoya na inaki kei Saioni ena kaukauwa levu kei na inaki yaga, niu sa kila na nona gugumatua, kau sa rogoca na nona masu.
8 Io, na nona tagicaki Saioni kau sa raica, kau na vakavuna me kakua tale ni lolositaki koya vakadua; ni sa yaco mai na nona siga ni reki ena bokoci ni nona ivalavala ca, ka vakatakilai na noqu veivakalougatataki ena nona cakacaka.
9 Ia, raica, au na vakalougatataki ira era sa cakacaka ena noqu were ni vaini ena dua na veivakalougatataki qaqa, ka ra na vakabauta na nona vosa, ka soli yani vua mai vei au, mai vei koya na Dauveivakacegui, ka vakatakilai kina ni a vakamatei ena kauveilatai ko Jisu mai vei ira na tamata ivalavala ca me baleta na ivalavala ca ni vuravura, io, me baleta na vakabokoci ni ivalavala ca vei ira na yalo raramusumusu.
10 Raica au sa lewa mo tabaki koya ko iko Oliva Kaudari na noqu iapositolo;
11 Ni sai koya oqo e dua na cakacaka vakalotu vei iko, ni ko sa dua na italatala qase e rukuna, ni sa liu vei iko ko koya, me qai rawa kina mo dua na italatala qase ko iko ena lotu oqo i Karisito, ka vakatokai ena yacaqu—
12 Ka mo imatai talega ni dauvunau ena lotu ki vei ira na lewena, ka vakakina ki vuravura, io, vei ira na kai Matanitu Tani; ka sa kaya vakaoqo na Turaga na Kalou, io, io! kivei ira talega na Jiu. Emeni.