Wase 24
Na veika sa vakatakilai vei rau ko Josefa Simici na Parofita kei Oliva Kaudari mai Amoni, Penisilivenia, ena Julai, 1830. E dina ni sa bera ni oti vinaka e va na vula na tauyavu ni Lotu, ia sa kaukauwa sara na nodra vakacacani, era sa dro ka dau tiko vakavuni voli na iliuliu. A soli mai e tolu na ivakatakila oqo ena gauna oqo me vakaukauwataki ira, vakayaloqaqataki ira ka vakavulici ira.
1–9, Sa lesi ko Josefa Simici me vakadewataka, vunautaka, ka vakamacalataka na ivolanikalou; 10–12, Sa lesi ko Oliva Kaudari me vunautaka na kosipeli; 13–19, Sa vakatakilai na lawa me baleta na cakamana, na cudruvi kei na kuretaki laivi ni soso mai na yava, ka me kakua ni kau na taga ilavo se na ivaqa.
1 Raica ko sa lesi ka digitaki mo vola na iVola i Momani, ka vakakina ki na noqu cakacaka; kau sa vakacegui iko mai na nomu vakararawataki, kau sa vakasalataki iko, ni ko sa vagalalataki mai vei ira kece na kemu meca, ka ko sa vagalalataki mai na ivesu i Setani kei na butobuto!
2 Ia, ena sega ni raibaleti na nomu talaidredre; mo lako ka kakua ni ivalavala ca.
3 Mo vakalevulevuya na nomu ilesilesi; ia ni ko sa tea oti na nomu iteitei ka raica ni sa daumaka tu, mo lako kusarawa vei ira na lewe ni lotu mai Kolosivili, Feieti kei Menijesita, ka ra na tokoni iko; ia au na qai vakalougatataki ira, vakayalo ka vakayago talega.
4 Ia kevaka era sa sega ni ciqomi iko, au na tala vei ira na cudruvi ka sega na veivakalougatataki.
5 Ka mo dau masuta tiko ga na Kalou ena yacaqu, ka vola na veika sa vakatakila vei iko ko koya na Dauveivakacegui, ia mo vakamacalataka na ivolanikalou vei ira na lewe ni lotu.
6 Ka na soli vei iko ena gauna sara ga ko ya na ka mo tukuna kei na ka mo vola, ia e ra na muria, kevaka e sega, au na cudruvi ira ka sega ni vakalougatataki ira.
7 Mo vagoleya vakatabakidua na nomu veiqaravi ki Saioni; ena vuku ni ka oqo ko na vakaukauwataki kina.
8 Mo na vosota sara na veivakararawataki, ni na vuqa e yaco vei iko; ia mo vosoti ira vakadede, niu sa tikoga kei iko, me yacova ni sa oti na nomu veisiga.
9 Ka mo kakua ni vakaogai iko ena cakacaka vakayago, ni ko sa sega ni lesi kina. Ia mo qarava ga na nomu ilesilesi ka na soli vei iko na veika mo vakalevulevuya kina na nomu itavi, ka mo vakamacalataka na ivolanikalou kece sara, ka tomana tikoga na veitabaki ena liga ka vakadeitaki ira na lewenilotu.
10 Ia na wekamu ko Oliva, me vunautaka tiko ga na yacaqu ki vuravura, ka vakakina kivei ira na lewe ni lotu. Ka me kakua sara ni nanuma ena dua na gauna ni sa rauta na veika e sa tukuna me baleti au; ka raica, niu na tikoga vata kei koya ki na ivakataotioti.
11 Ena rawata na lagilagi ena vukuqu ka segai ena vukuna ga, se ni sa bula vinaka, se tauvimate, ni sa tiko vakabobula se sa sereki;
12 Ia ena veigauna kecega, kei na veivanua kecega, ena dau dolava na gusuna ka vunautaka na noqu kosipeli ena domo ka vaka na rorogo ni davui ena siga kei na bogi. Kau na solia vua na kaukauwa me vaka e se sega ni bau kilai vakadua vei ira na tamata.
13 Mo kakua ni kerea mo cakava na cakacaka mana, vakavo kevaka au sa vakaroti iko, vakavo ga na kena vakasavi tani na tevoro, nodra vakabulai na tauvimate, na vorati ni gata bati gaga, ka vakakina na vorati ni paisoni rerevaki;
14 Ka mo kakua sara ni cakava na veika oqo, vakavo ga kevaka era kerea mai o ira era gadreva, me vakayacori kina na ivolanikalou; mo vakayacora ga me vaka na ka sa volai.
15 Ia na veivanua kecega ko sa lako kina ka ra sega ni ciqomi iko ena vuku ni yacaqu, mo qai cudruva ka kua ni vakalougatataka, ena nomu kuretaka laivi na kuvu ni soso mai na yavamu me kena ivakadinadina, io dou qai savata na yavamudou ni dou sa lako yani.
16 Ka na qai yaco ni ko koya sa vakayacora vei kemudou na ivakarau kaukauwa, dou vakarota ena yacaqu me yaviti; raica, au na yaviti ira vakaidina me vaka na nomudou vosa, ena gauna au sa lewa.
17 Ia ko ira yadua sa beitaki kemudou ki na mataveilewai, era na cudruvi me vaka na lawa.
18 Dou kakua ni kauta na taga ilavo se na taga ivaqa, na ititoko, se rua na kote, raica ena vakarautaka vei kemudou na lotu na kemudou kakana, na nomudou isulu, na nomudou ivava, na ilavo kei na taga ivaqa ena gauna sara ga ko sa leqa kina.
19 Raica ko sa kacivi mo samaka na noqu were ni vaini ena dua na sasamaki levu, io, na iotioti ni sasamaki; io, kei ira kece ko sa tabaki ira, me ra na kitaka vakakina. Emeni.