Wase 27
Na veika sa vakatakilai vei Josefa Simici na Parofita, mai Amoni Penisilivenia, ena Okosita, 1830. Ni vakarautaki tiko e dua na soqoni vakalotu me na vakayacori kina na sakaramede ni kana madrai kei na gunu waini, a lako ko Josefa me vakasaqaqara waini mai. A rairai vua e dua na italai mai lomalagi ka ciqoma kina na ivakatakila oqo, a volai e dua na kena iwase ena gauna vata oqori, na kena vo a qai volai ena Sepiteba ka tarava. Ena gauna oqo sa dau vakayagataki na wai ena soqoni ni sakaramede ni Lotu.
1–4, Sa virikotori na ivakatakarakara me dau taurivaki ni vakayagataki na sakaramede; 5–14, Me ra na dau kania ka gunuva na sakaramede ena veitabagauna taucoko na Karisito kei ira na Nona italai; 15–18, Mo dou vakaiyaragi ena iyaragi kecega ni Kalou.
1 Dou rogoca na domo i Jisu Karisito, na nomudou Turaga, na nomudou Kalou, ka nomudou Dauveivueti, ko koya sa bula ka kaukauwa sara na nona vosa.
2 Ia, raica, au sa kaya vei kemudou, ni sega ni bibi na ka dou na kania se gunuva ena gauna dou kania se gunuva kina na sakaramede, kevaka dou sa vakayacora oqo ena mata sa vakatabakidua ki na noqu lagilagi—mo dou dau nanuma vua na Tamada na yagoqu ka a vakotori ena vukumudou, kei na noqu dra ka a vakadavei ena vakabokoci ni nomudou ivalavala ca.
3 O koya, au sa solia kina vei kemudou e dua na ivakaro, mo dou kakua ni volia na waini se na gunu kaukauwa ni nomudou meca;
4 O koya, mo dou kakua sara ni gunuva na waini tani, na waini vou ga dou sa cakava; io, ena matanitu oqo nei Tamaqu ka na tara cake e vuravura.
5 Raica, oqo na noqu lewa yalomatua; o koya, mo kakua ni kurabui kina, ni na yaco mai na gauna au na gunuva kina na vua ni vaini vata kei kemudou e vuravura, io kei Moronai tale ga ko koya ka’u a tala mai vei kemudou me vakatakila na iVola i Momani, sa volai tu kina na taucoko ni noqu kosipeli tawavakaiyalayala, ia sai koya tale ga au sa solia vua na idola ki na itukutuku se na ititoko i Ifireimi;
6 Kei Iliesa tale ga, ko koya au sa solia vua na idola me baleta na kena vakalesui mai na veika kecega era a tukuna na parofita yalododonu mai na ivakatekivu kei vuravura, me baleta na veisiga mai muri;
7 Ka vakatalega kina ko Joni na luvei Sakaraia, ia sai Sakaraia oqo a rairai vua (ko Iliesa) ka yalataka kina vua ni na sucu e dua na luvena tagane, ka me na vakayacani koya ko Joni, ia ena tiko vua na yaloi Iliesa;
8 Ia sai Joni oqo au a tala mai vei kemudrau, na noqu italai, Josefa Simici Lailai kei Oliva Kaudari me tabaki kemudrau ki na imatai ni ilesilesi vakamatabete drau sa ciqoma, me rawa ni drau kacivi ka tabaki kina me vakataki Eroni;
9 Kei Ilaija tale ga, o koya au sa solia vua na idola ni kaukauwa me vagolea na lomadra na qase vei ira na gone, kei na lomadra na gone vei ira na qase, io me kakua ni cudruvi kina na vuravura taucoko ena veivakarusai;
10 Kei Josefa tale ga, kei Jekope, kei Aisake kei Eparaama, ko iratou na nomudou qase ka’u a veiyalayalati kei iratou;
11 Kei Maikeli tale ga se ko Atama, na tamadra na tamata kecega, na ravouvou ni tamata kecega, io ko koya na itekitekivu ni veigauna kecega;
12 Kei Pita tale ga, kei Jemesa kei Joni, io ko iratou au sa tala yani vei kemudrau, kau sa tabaki kemudrau ka vakadeitaki kemudrau kina mo drau iapositolo mai vei iratou, ka mo drau ivakadinadina digitaki kina ni yacaqu, ka taurivaka na idola ni nomudrau veiqaravi ka vakayacora na nomudrau ilesilesi ena veika vata ga au sa vakatakila vei iratou;
13 Vei kemudrau au sa solia kina na idola ni noqu matanitu kei na dua na itabagauna ni kosipeli ena iotioti ni gauna; ka vakakina ena taucoko ni gauna, ni sa voleka na gauna me’u vakasoqona vata kina na ka kecega, mai lomalagi kei vuravura;
14 Kei ira tale ga sa solia vei au ko Tamaqu e vuravura.
15 O koya, mo dou reki e lomamudou ka marau, dou vakadreta na ivau ni tolomudou ka vakaiyaragi ena noqu iyaragi kecega, mo dou vorata rawa kina na siga ca, ia mo dou kitaka kece oqo, mo dou tudei kina.
16 O koya mo dou qai tudei, ni sa vauci tu na tolomudou ena dina, ka sa tu e lomaseremudou na peleti ni sere ni buladodonu, ka sa vakaivava na yavamudou ena cakacaka ni kosipeli ni vakacegu, io me vaka ka’u sa talai ira yani na noqu agilosi me ra lesi kemudou kina;
17 Ia mo dou kauta na vakabauta me isasabai mo dou na bokoca rawa kina na nodra gasau vidi waqa kecega na dau caka ca;
18 Dou kauta na veivakabulai me ivakaruru ni ulu, kei na iseleiwau ni Yaloqu, ka’u na sovaraka vei kemudou, io kei na noqu vosa ka’u sa vakatakila vei kemudou, ka dou sa duavata ena ka dou sa kerea vei au, ka yalodina tiko ga me yacova ni’u sa lesu tale mai, dou na laveti cake mo dou tiko tale ga ena vanua au sa tiko kina. Emeni.