Wase 33
Na veika sa vakatakilai vei Josefa Simici na Parofita me tukuni vei rau ko Esera Tea kei Nocorope Suiti mai Feieti e Niu Ioka, ena Okotova 1830. Ena nona vakamacalataka na ivakatakila oqo, a vakadeitaka kina vakaoqo na tukutuku makawa kei Josefa Simici ni “sa vakarau tu na Turaga me veidusimaki vei ira era sa vakasaqaqara vagumatua ena vakabauta.”
1–4, Era sa lesi na tamata cakacaka me ra vunautaka na kosipeli ena ikatinikadua ni auwa; 5–6, Sa tauyavutaki na Lotu, ka me ra na vakasoqoni vata na digitaki; 7–10, Veivutuni, ni sa voleka na matanitu vakalomalagi; 11–15, Sa tara cake na Lotu ena uluvatu ni kosipeli; 16–18, Me vakarautaki na nona yaco mai na Tagane sa qai Vakawati.
1 Raica, au sa kaya vei kemudrau, na noqu tamata ko Esera kei Nocorope, mo drau dolava na daligamudrau ka rogoca na domona na Turaga na nomudrau Kalou, ko koya, sa bula ka kaukauwa sara na nona vosa, sa gata vakalevu ka mucu ga na iseleiwau batirua, sa wasea rua na isema kei na uto ni sui, io na yago kei na yalo; ka sa kila na nanuma kei na inaki ni lomamudrau.
2 E dina, e dina au sa kaya vei kemudrau, drau sa lesi mo drau tabalaka cake na domomudrau me vaka na domo ni davui, mo drau vunautaka kina na noqu kosipeli vei ira e dua na itabatamata ivalavala ca ka yalo vakatani.
3 Raica sa matua tu na were ka sa vakarau na tatamusuki; ka sa yacova mai na ikatinikadua ni auwa, ia oqo e sa iotioti ni gauna me’u kacivi ira kina na tamata cakacaka ki na noqu were ni vaini.
4 Ka sa ca sara na noqu were ni vaini ena veiyasana kecega; sa sega e dua sa vinaka, ena vica wale beka ga; ka ra sa vakacalai vakavuqa ena nodra ivakavuvuli na bete vakailasu, sa vakacalai kina na nodra vakasama kecega.
5 E dina, e dina au sa kaya vei kemudrau, ni oqo na noqu lotu au sa tauyavutaka, ka’u sa kauta tani mai na loma ni lekutu.
6 Kau na vakasoqoni ira vata mai na noqu tamata digitaki mai na yasai vuravura e va, io ko ira kecega sa vakabauti au ka muria na domoqu.
7 Io, e dina, e dina, au sa kaya vei kemudrau, raica sa matua tu na were ka sa vakarau na tatamusuki; o koya mo drau curumaka na nomudrau isele takelo ka ia na tatamusuki ena nomudrau igu, vakasama, kei na kaukauwa kecega.
8 Drau dolava na gusumudrau ka na qai vakasinaiti yani kina na veika mo drau tukuna, ka drau na yaco kina me vakataki Nifai makawa, ka a biuti Jerusalemi ka lako yani ki na lekutu.
9 Io, drau dolava na gusumudrau ka kakua ni rere, drau na colata kina e vuqa na ivau sila e dakumudrau, raica, ni’u sa tiko vata ga kei kemudrau.
10 Io, drau dolava na gusumudrau ka na qai vakasinaiti yani kina na veika mo drau tukuna, mo drau qai kaya: Dou veivutuni, dou veivutuni ka caramaka na sala ni Turaga, ka cakava me dodonu na nona salatu; ni sa voleka mai na matanitu vakalomalagi!
11 Io, dou veivutuni ka papitaiso, koi kemudou vakayadua ga, me bokoci kina na nomudou ivalavala ca; io, mo dou papitaiso ena wai, dou na qai papitaiso ena bukawaqa kei na Yalo Tabu.
12 Raica, e dina, e dina, au sa kaya vei kemudrau, oqo na noqu kosipeli; ia nanuma tiko ko ira wale ga sa vakabauti au era na bula;
13 Ia ena dela ni vatu oqo au na tara kina na noqu isoqosoqo lewe ni lotu; io, drau sa tauyavu ena dela ni vatu oqo, ia kevaka drau sa tudei kina, ena sega ni rawai kemudrau na matamata ki eli.
14 Ia mo drau nanuma tiko na veitiki ni lawa eso ni lotu kei na veiyalayalati mo drau maroroya.
15 Ia ko ira kecega sa vakabauta, mo drau vakadeitaka me lewe ni noqu lotu, ena veitabaki ni liga, kau na qai solia vei ira na isolisoli ni Yalo Tabu.
16 Kau sa solia yani na iVola i Momani kei na ivolanikalou tabu me dusimaki kemudrau; ia na kaukauwa ni noqu Yalotabu me vakabulabulataka na ka kecega.
17 Ia, drau yalodina, ka dau masu tikoga, me vakarau tu na nomudrau cina ka me waqa tikoga, ka me tu ga vei kemudrau na kena waiwai, mo drau vakarau tu ena gauna sa yaco mai kina na Tagane sa qai Vakawati—
18 Ia raica, e dina, e dina, au sa kaya vei kemudrau, au na lako vakidacala mai. Io ena yaco vakakina. Emeni.