Vaega 33
Faaaliga na tuuina mai e ala mai ia Iosefa Samita le Perofeta, ia Ezra Thayre ma Northrop Sweet, i Feiete, Niu Ioka, Oketopa 1830. I le faalauiloaina atu o lenei faaaliga, ua faamaonia mai ai e le talafaasolopito a Iosefa Samita “le saunia pea o le Alii … e aoao i latou o e e saili ma le filiga i le faatuatua.”
1–4, Ua valaaulia e e galulue e folafola atu le tala lelei i le itula e sefulutasi; 5–6, Ua faatuina le Ekalesia ma o le a faapotopotoina e ua filifilia; 7–10, Ia salamo, ona ua oo mai lava le malo o le lagi; 11–15, Ua ati a’e le Ekalesia i luga o le papa o le talalelei; 16–18, Ia saunia mo le afio mai o le Faatoafaiavā.
1 Faauta, Ou te fai atu ia te oulua, a’u auauna o Esera ma Northrop, ia tatala o oulua taliga ma faalogo mai i le siufofoga o le Alii lo oulua Atua, o lē o lana afioga ua vave ma mamana, ua sili atu le maai nai lo o se pelu mata-lua, i le vavaeina o sooga o ivi ma le su, tagata-ola ma le agaga; ma o se ua ia silafia mafaufauga ma faamoemoega o le loto.
2 Aua e moni, e moni, Ou te fai atu ia te oulua, ua valaaulia oulua e siitia a’e o oulua leo e pei o le leo o se pu, e folafola atu la’u talalelei i se tupulaga piopio ma le faalogogata.
3 Aua faauta, ua sinasina le fanua ua saunia e selesele ai; ma o le itula lenei e sefulutasi, ma o le taimi mulimuli lenei o le a Ou valaaulia ai e e galulue i lo’u tovine.
4 Ma ua faaleagaina uma lo’u tovine; ma ua leai se tasi ua ia faia le lelei vagana ai se toaitiiti; ma ua latou sese i le tele o taimi ona o faitaulaga pepelo, ua eleelea uma o latou mafaufau.
5 Ma e moni, e moni, Ou te fai atu ia te oulua, o lenei ekalesia na Ou faatuina ma valaauina atu mai le vao.
6 Ma o le a faapea lava ona Ou faapotopotoina la’u au filifilia mai itu e fa o le lalolagi, le toatele lea o i latou o e e talitonu mai ia te a’u, ma faalogo mai i lo’u leo.
7 Ioe, e moni, e moni, Ou te fai atu ia te oulua, ua sinasina le fanua ua saunia e selesele ai; o le mea lea, sasau atu a oulua selesaito, ma selesele ma o oulua manatu atoa, mafaufau atoa, ma le malosi atoa.
8 Tatala o oulua gutu ma o le a faatutumuina, ma o le a avea oulua e pei lava o Nifae o anamua, o lē na malaga mai Ierusalema i le vao.
9 Ioe, tatala o oulua gutu ma ia lē taofia, ma o le a faaee ia te oulua fusisaito i luga o o oulua tua, aua faauta, ua Ou faatasi ma oulua.
10 Ioe, tatala o oulua gutu ma o le a faatutumuina, fai atu: Ina salamo ia, salamo ia, ma outou teuteu le ala o le Alii, ma faasa’osa’o ona ala; ona ua oo mai lava le malo o le lagi;
11 Ioe, ia salamo ma papatiso, outou uma taitoatasi, mo se faamagaloga o a outou agasala; ioe, ia papatiso i le vai lava, ona oo mai ai lea o le papatisoga i le afi ma i le Agaga Paia.
12 Faauta, e moni, e moni, Ou te fai atu ia te oulua, o la’u talalelei lenei; ma ia manatua e ao ina latou faatuatua mai ia te a’u po o le a leai se ala e mafai ona faaolaina ai i latou;
13 Ma o luga o lenei papa o le a Ou ati a’e ai la’u ekalesia; ioe, o luga o lenei papa ua ati a’e ai oulua, ma afai lua te faaauau ai pea, o le a lē manumalo faitotoa o seoli ia te oulua.
14 Ma ia oulua manatua mataupu faavae ma feagaiga o le ekalesia ia tausi i ai.
15 Ma o soo se tasi ua i ai le faatuatua ia oulua faamauina i la’u ekalesia, i le faaee atu o lima, ma o le a Ou tuu atu le meaalofa o le Agaga Paia i o latou luga.
16 Ma ua tuuina atu le Tusi a Mamona ma tusitusiga paia mai ia te a’u mo lo oulua aoaoga; ma o le mana o lo’u Agaga e faaola ai mea uma.
17 O le mea lea, ia faamaoni, ma tatalo i taimi uma, ma teuteu ma faamumu a oulua lamepa, ma ia i ai le suauu ia te oulua, ina ia mafai ona oulua saunia i le afio mai o le Faatoafaiavā—
18 Aua faauta, e moni, e moni, Ou te fai atu ia te oulua, e vave ona Ou alu atu. Ua faapea lava. Amene.