Tasal 35
K’utb’esinb’il na’leb’ k’eeb’il re laj Jose Smith li Profeet ut laj Sidney Rigdon, sa’ Fayette, Nueva York, malaj nach’ rik’in, 7 Diciembre 1830. Sa’ li kutan a’an, li Profeet ka’ch’in chik ma wulaj wulaj yoo chi k’anjelak sa’ xjaltesinkil ru li aatin sa’ li Santil Hu. Kitikla li jaltesink hu maare sa’ Junio 1830, ut laj Oliver Cowdery ut laj John Whitmer ke’k’anjelak jo’ aj tz’iib’anel. Rik’in naq eb’ a’an ak b’oqb’ileb’ sa’ jalaneb’ chik li k’anjel, laj Sidney Rigdon kib’oqe’, chi xaqab’anb’il xb’aan li Dios, re taak’anjelaq choq’ aj tz’iib’anel chiru li Profeet sa’ li k’anjel a’in (chi’ilmanq sa’ li raqal 20). Jo’ xtiklajik li tz’iib’ahom chirix li k’utb’esinb’il na’leb’ a’in, lix tz’iib’anb’il esil laj Jose Smith naxye: “Chiru Diciembre laj Sidney Rigdon kichal chaq Ohio re patz’ok chiru li Qaawa’, ut rochb’een a’an kichal laj Edward Partridge. … Ka’ch’in chik chirix xk’ulunikeb’ li wiib’ chi komon winq a’in, li Qaawa’ ki’aatinak chi jo’ka’in.”
1–2, Chan ru naq eb’ li winq neke’ru chi ok choq’ ralal li Dios; 3–7, Nab’oqe’ laj Sidney Rigdon chi kub’sink ha’ ut chixk’eeb’al li Santil Musiq’ej; 8–12, Li eetalil ut li sachb’a-ch’oolej neke’k’anjelaman rik’in paab’aal; 13–16, Eb’ lix moos li Qaawa’ te’xtz’ileb’ li tenamit rik’in lix wankil li Musiq’ej; 17–19, Wan sa’ ruq’ laj Jose Smith lix laawil li muqmuukil na’leb’; 20–21, Eb’ li sik’b’ileb’ ru te’xkuy xnumsinkil lix kutankil lix k’ulunik li Qaawa’; 22–27, Taakole’q Israel.
1 Ab’ihomaq lix yaab’ xkux li Qaawa’ lee Dios, a’an ajwi’ li Alfa ut li Omega, lix tiklajik ut li roso’jik, li wan xb’e sa’ junaj chi sutam li wan chi junelik, li juntaq’eet anajwan jo’ ewer, ut chi junelik.
2 Laa’in li Jesukristo, li Ralal li Dios, li kik’ehe’ chiru krus choq’ re lix maak li ruchich’och’, jo’ k’ihaleb’ ajwi’ li te’paab’anq re lin k’ab’a’, re naq te’ruuq chi ok choq’ ralal li Dios, chi junajeb’ wik’in jo’ naq laa’in junajin rik’in li Yuwa’b’ej, jo’ li Yuwa’b’ej junaj wik’in, re naq junajaqo.
3 K’ehomaq reetal, chi yaal, chi yaal, ninye re lin moos aj Sidney, wilomat laa’at ut laa k’anjel. Wab’ihomeb’ laa tij, ut katinkawresi choq’ re jun k’anjel q’axal nim wi’chik.
4 Osob’tesinb’ilat laa’at, xb’aan naq taab’aanu xninqal ru na’leb’. K’e reetal, kattaqlaak, jo’ chanru ajwi’ laj Jwan, re xkawresinkil li b’e chiwu, ut chiru laj Elias li toj taachalq, ut moko kanaw ta.
5 Katkub’sink ha’ rik’in ha’ choq’ re li jalb’a-k’a’uxlej, a’b’anan ink’a’ ke’xk’ul li Santil Musiq’ej;
6 A’b’anan anajwan nink’e aawe jun taqlahom, naq tatkub’sinq ha’ rik’in ha’, ut te’xk’ul li Santil Musiq’ej rik’in xk’eeb’al li uq’ej, jo’ chanru ajwi’ eb’ li apostol najter.
7 Ut taak’ulmanq naq taawanq jun xnimal ru k’anjel sa’ li ch’och’, sa’ xyanqeb’ ajwi’ laj Gentil, xb’aan naq lix majelaleb’ xna’leb’ ut lix tz’eqb’eetalileb’ taak’ehe’q chi k’utmank sa’ xnaq’eb’ ru chixjunil li tenamit.
8 Xb’aan naq laa’in li Dios, ut moko k’osb’il ta lin tel; ut laa’in tink’ut li sachb’a-ch’oolejil k’anjel, li eetalil, ut li sachb’a-ch’oolej, chiruheb’ chixjunil li te’paab’anq re lin k’ab’a’.
9 Ut li ani te’tz’aamanq re sa’ lin k’ab’a’ chi wank xpaab’aaleb’, eb’ a’an te’risiheb’ laj tza, ut te’xk’irtesiheb’ li yaj; te’xk’e li mutz’ chixk’ulb’al rilob’aaleb’, ut li tz’ap xik chi ab’ink, ut li mem chi aatinak, ut li yeeq roq chi b’eek.
10 Ut chi seeb’ taachalq xq’ehil naq te’k’utmanq xninqal ru na’leb’ chiruheb’ li ralal xk’ajoleb’ li winq.
11 A’b’an wi maak’a’ li paab’aal, maak’a’ taak’utmanq, ka’ajwi’ li sachok-u sa’ xb’een Babilonia, a’an ajwi’ li kiminok ruheb’ chixjunil li ninqi tenamit chiruk’b’al xviinul li josq’il xb’aan li ko’b’eetak yumb’eetak xb’aanu.
12 Ut maajuneb’ wan li neke’b’aanunk re li chaab’il, ka’ajwi’ eb’ li kawresinb’ileb’ chixk’ulb’al lix tz’aqalil lin evangelio, li kintaqla rik’in li tasal tenamit a’in.
13 Jo’kan ut, ninb’oqeb’ li k’a’aq re ru q’un xmetz’ew re li ruchich’och’, eb’ li moko tzolb’ileb’ ta ut xik’ ilb’ileb’, re xtz’ilb’aleb’ li tenamit rik’in lix wankil inMusiq’;
14 Ut li ruq’eb’ a’an, a’anaq li wuq’ laa’in, ut laa’inaq lix ramleb’ ut li ramok-uq’ reheb’; ut laa’in tinb’ak’ lix yiitoqeb’, ut eb’ a’an te’pleetiq chi kaweb’ xwinqilal choq’ we, ut eb’ li xik’ neke’ilok reheb’ te’wanq rub’eleb’ li roq; ut laa’in tink’e chi t’ane’k li yok’leb’ ch’iich’ choq’ reheb’, ut rik’in xxamlel li xik’ naweek’a tinkoleb’ rix.
15 Ut eb’ li neb’a’ ut li tuulan taajultikamanq li evangelio chiruheb’, ut te’wanq chi ilok, re rilb’al xq’ehil ink’ulunik, xb’aan naq ak haye’k chaq re—
16 Ut te’xtzol li jaljookil ru aatin chirix lix toonal li higo, xb’aan naq anajwan ajwi’ ak haye’k chaq re li saq’ehil.
17 Ut laa’in kintaqla lix tz’aqalil lin evangelio rik’in ruq’ lin moos aj Jose; ut sa’ xq’unal xmetz’ew kiwosob’tesi;
18 Ut kink’e re a’an lix laawil li muqmuukil na’leb’ chirix li k’a’aq re ru k’eeb’il chaq xtz’apb’al, a’ li k’a’aq re ru wanjenaq chalen chaq sa’ xk’ojlajik li ruchich’och’, ut li k’a’aq re ru toj taachalq chalen sa’ li hoonal a’in toj sa’ xq’ehil ink’ulunik, wi taakanaaq wik’in; wi ut ink’a’, jalan tinxaqab’ sa’ xna’aj.
19 Jo’kan ut, chak’aak’ale re naq ink’a’ taalajq xpaab’aal, ut taak’eemanq xb’aan laj K’ojob’anel Ch’oolej, li Santil Musiq’ej, li nanawok re chixjunil li k’a’aq re ru.
20 Ut jun taqlahom nink’e aawe—naq tattz’iib’aq choq’ re a’an; ut te’k’eemanq li loq’laj hu, jo’ chanru ajwi’ naq wan chire tz’aqal inch’ool, choq’ re xkolb’aleb’ li sik’b’ileb’ ru inb’aan;
21 Xb’aan naq eb’ a’an te’rab’i lix yaab’ inkux, ut tine’ril, ut moko te’wanq ta chi warenaq, ut te’xkuy lix kutankil ink’ulunik; xb’aan naq eb’ a’an te’saqob’resiiq ru, jo’ chanru naq saq wu laa’in.
22 Ut anajwan ninye aawe, tatkanaaq rik’in, ut a’an taab’eeq aawochb’een; maakanab’ a’an, ut ch’olch’o naq taatz’aqloq ru li k’a’aq re ru a’in.
23 Ut a’ yaal jo’ ink’a’ nakattz’iib’ak, k’e reetal, k’eeb’ilaq re a’an aatinak jo’ profeet, ut laa’at taajultika lin evangelio ut taak’am chaq raatineb’ li santil profeet re xk’utb’al xyaalal li raatin, jo’ chanru naq k’eeb’ilaq re a’an.
24 Chepaab’ chixjunil li taqlahom ut li sumwank li teneb’anb’ilex wi’; ut laa’in tink’e chi chiq’mank li choxa choq’ re eechaab’ilal, ut laj Satanas taasiksotq ut Sion taasaho’q xch’ool sa’ xb’eeneb’ li tzuul ut taatamq;
25 Ut taakole’q Israel sa’ li kutan k’oxlanb’il inb’aan; ut rik’in li laaw ink’ehom te’k’ame’q xb’e, ut maajaruj chik te’sache’q xna’leb’.
26 Waklesihomaq eech’ool ut chisaho’q eeraam, taanach’oq chaq lix tojb’al eerix.
27 Mexxuwak, ex ch’ina teep inkarneer, eere li awa’b’ejihom, toj reetal naq tink’ulunq. K’ehomaq reetal, tink’ulunq chi seeb’. Chi jo’kan. Amen.