Wase 35
Na veika sa vakatakilai vei Josefa Simici na Parofita kei Sidini Rikitoni mai Feieti e Niu Ioka se dua na vanua volekata, ena 7 ni Tiseba, 1830. Oqori ena gauna a ogataka tiko kina e veisiga na Parofita na nona vakadewataka na iVolatabu. A sa tekivu sara na vakavakadewa oqori ena i ka 30 ni June, ka rau a sa vakaitavi ruarua kina vakavunivola ko Oliva Kaudari kei Joni Witima. Ia me vaka ni rau sa kacivi ki na so tale na ilesilesi, sa mani lesi kina vakalou ko Sidini Rikitoni ki na itavi cecere me nona vunivola na Parofita ena cakacaka oqori (raica na tikina e 20). E tukuni kina vaqo ena itukutuku makawa kei Josefa Simici: “A lako mai [Oaio] ko Sidini Rikitoni ena Tiseba me mai taroga na loma ni Turaga ka sala vata mai kei koya o Etuwate Patereji. … Ni rau se qai tadu ga mai vakalailai, sa qai kaya mai vakaoqo na Turaga.”
1–2, Na sala ena yaco rawa kina na tamata me luve ni Kalou; 3–7, Sa lesi ko Sidini Rikitoni me veipapitaisotaki ka solia na Yalo Tabu; 8–12, Ena vakayacori na ivakatakilakila kei na caka mana ena vakabauta; 13–16, Era na wasewasea na veimatanitu ko ira na nona tamata na Turaga ena kaukauwa ni Yalo Tabu; 17–19, Sa soli vei Josefa Simici na idola ni veika vuni; 20–21, Era sa namaka na tamata digitaki na siga sa lako mai kina na Turaga; 22–27, Ena vakabulai ko Isireli.
1 Rogoca na domo ni Turaga na nomudrau Kalou, o koya na Alifa kei na Omeka, na ivakatekivu kei na ivakataotioti, o koya sa dua na iwavoki tawamudu na nona sala, sa ikoyakoya tiko ga ena siga edaidai ena siga sa oti, ka sega ni mudu.
2 Koi Au ko Jisu Karisito na Luve ni Kalou, ko koya ka a lauvako ki na kauveilatai ena vuku ni ivalavala ca ni vuravura, ia ko ira kecega sa vakabauta na yacaqu, me ra na yaco rawa me luve ni Kalou, me ra duavata kei au niu sa duavata kei Tamaqu, ka sa duavata kei au ko Tamaqu, me keimami duavata tale ga vakakina.
3 Raica, e dina, e dina, au sa kaya vei iko Sidini na noqu tamata, au sa raici iko kei na nomu cakacaka. Au sa rogoca na nomu masu, ka qisi iko ki na dua na cakacaka bibi cake.
4 Ko sa kalougata ni ko na kitaka na veika cecere. Raica ko sa talai yani me vakataki Joni, mo caramaka na noqu sala, kei na sala nei Ilaija tale ga ko koya ena qai lako mai, ia ko a sega ni kila.
5 Ko sa papitaisotaki ira sa veivutuni ena wai, ia era sa sega ni ciqoma na Yalo Tabu;
6 Ia oqo au sa vakaroti iko, mo lako yani ka veipapitaisotaki ena wai, ka me ra qai ciqoma na Yalo Tabu ena veitabaki ni liga, me vakataki ira na iapositolo ena gauna makawa.
7 Ka na qai yaco e dua na cakacaka cecere ena vanua oqo, vei ira na Matanitu tani, ni na vakaraitaki mai na nodra yalowai kei na itovo vakasisila e matadra na tamata kecega.
8 Ni koi Au na Kalou, ka sa sega ni lekaleka na ligaqu; au na vakayacora na cakacaka mana e vuqa, na ivakatakilakila e so kei na ka e veivakurabuitaki, kivei ira kecega era sa vakabauta na yacaqu.
9 Ia ko koya sa kerea ena yacaqu ena vakabauta, era na vakasava tani na tevoro; ka ra vakabula na tauvimate; io ena rawa tale ga ni ra kitaka me ra rai na mataboko, ra rogo na didivara, ra vosa na galu ka ra lako na lokiloki.
10 Ena yaco kusarawa na gauna me na vakaraitaki kina vei ira na luve ni tamata na veika cecere;
11 Ia kevaka sa sega na vakabauta, ena sega ni dua na ka e vakatakilai mai, ia vakavo ga na rusa mai Papiloni, io ko koya sa vakamatenitaki ira na veivanua kecega ena waini ni cudru ni nona veidauci.
12 Ia sa sega sara sa ivalavala dodonu, ko ira ga sa vakarau tu me ra ciqoma na taucoko ni noqu kosipeli, kau sa tala yani ki na itabatamata oqo.
13 O koya, au sa digitaka kina na veika malumalumu e vuravura, ko ira sa sega ni vuku kei ira sa beci, me ra wasewasei ira na veimatanitu ena kaukauwa ni noqu Yalotabu;
14 Ia na ligadra ena ligaqu, kau na nodra isasabai ka nodra ivakaruru; kau na vakadreta na ivau ni tolodra, ka ra na vala vakaukauwa ena vukuqu; ka ra na tiko na nodra meca e ruku ni yavadra; au na tauca na iseleiwau ena vukudra, ka maroroi ira ena bukawaqa ni noqu cudru.
15 Ka ra na vunautaka yani vei ira na kosipeli ko ira na dravudravua kei ira sa yalomalua, io era na waraka na gauna au na lesu tale mai kina, raica sa voleka vakaidina mai—
16 Ka ra na qai kila na ibalebale ni vosa vakatautauvata ni vu ni lolo, raica sa voleka mai na vulaikatakata.
17 Kau na qai tala yani na taucoko ni noqu kosipeli ena ligana na noqu italai ko Josefa; ia au sa vakalougatataki koya ena veika sa malumalumu kina;
18 Kau sa solia vua na idola ni veika vuni sa dregati tu, io na veika mai na ivakatekivu kei vuravura, kei na veika ena yaco ena gauna oqo me yacova ni’u sa lesu tale mai, kevaka sa dina tiko ga vei au, ia kevaka e sega, au na lesia tale e dua me sosomitaki koya.
19 Ia, mo vakatawai koya tiko kina me kakua ni malumalumu mai na nona vakabauta, ia ena qai soli vua mai vei koya na Dauveivakacegui, io na Yalo Tabu o koya sa kila na ka kecega.
20 Kau sa vakaroti iko kina—mo nona vunivola; ka na soli yani na ivolanikalou, me vaka ga ni sa tu e lomaqu, me baleta na nodra vakabulai na noqu digitaki;
21 Ni ra na rogoca na domoqu ka raici au, ka ra na sega ni moce, era na waraka tiko na siga au na lesu tale mai kina; ni ra na vakasavasavataki, niu sa savasava.
22 Ia oqo au sa kaya vei iko, mo drau tiko wawa vata voli ga, ka na tomani iko ko koya ena nomu ilakolako; mo kakua ni biuti koya, raica ena yaco vakaidina na veika kecega oqo.
23 Ia ena veigauna kece drau cegu kina ena volavola, raica ena dausoli vua me parofisai; ia ko na vunautaka na noqu kosipeli ka wilika na nodra vosa na parofita tabu me vakadinadinataka na veika sa tukuna ko koya.
24 Mo muria na ivakaro kei na veiyalayalati kecega ko sa vauci kina; kau na vakavuna me yavavala ko lomalagi ena vukumu, ka na sautaninini ko Setani ia ena bulabula sara ko Saioni ka vakataudeitaki ena veiulunivanua;
25 Ia ena vakabulai ko Isireli ena gauna kau sa lewa; era na tuberi mai ena idola kau sa solia, ka ra na sega sara ni vakataqayataki tale.
26 Laveta cake na yalomu ka marau, ni sa voleka na gauna mo vueti kina.
27 Dou kakua ni rere, na qele ni sipi lailai, raica sa soli vei kemudou na matanitu me yacova na gauna au sa lesu mai kina. Raica au na lako vakidacala mai. Io ena yaco vakakina. Emeni.