Wase 67
Na veika sa vakatakilai yani mai vei Josefa Simici na Parofita mai Airame, Oaio, ena itekivu ni Noveba, 1831. A yaco oqo donuya e dua na gauna ni koniferedi bibi, sa vakasamataki ka veivosakitaki tiko na kena tabaki na ivakatakila eso sa ciqoma oti na Parofita (raica na ulutaga ni wase 1). Se qai tauyavutaka wale toka o Viliame W Felepi na vale ni tabaivola ni Lotu e Inidipenideni, Misuri. Sa mani lewai ena koniferedi me taba na ivakatakila ena Book of Commandments [iVola ni iVakaro] ka tabaki e 10,000 na ilavelave (ia a qai vakalailaitaki sobu ki na 3,000 ena vuku ni so na dredre a sega ni laurai taumada). Era a wasea kina na nodra ivakadinadina e vuqa na turaga ni ra sa ka dina sara na ivakatakila era sa vakasokumuni vata ena gauna oya me tabaki, me vaka sa vakadinadinataka na Yalo Tabu ka soli vei ira. A volai ena itukutuku makawa kei Josefa Simici ni oti na kena ciqomi na ivakatakila ka sa kilai tu me wase 1, a qai vakayacori eso na veivosaki me baleta na ivosavosa e vakayagataki ena ivakatakila. Sa qai muria mai na veika e vakatakilai oqo.
1–3, Sa rogoca na Turaga na nodra masu ka dau wanonovi ira tiko na Nona italatala qase; 4–9, Sa bolea na Turaga o koya na tamata sa vuku duadua, me vola mada e dua na ivakatakila me tautauvata kei na Nona ivakatakila sa lailai duadua; 10–14, Ena vakabulabulataki ira na italatala qase ni lotu yalodina na Yalo, ka ra na raica na mata ni Kalou.
1 Dou raica ka vakatudaliga, koi kemudou na italatala qase ni noqu lotu, io koi kemudou sa soqoni vata mai, kau sa rogoca na nomudou masu, ka kila na lomamudou, ia na nomudou gagadre sa lako cake mai vei au.
2 Dou raica ka kila, sa wanonovi kemudou tiko na mataqu, ka sa tiko ena qeteqete ni ligaqu na lomalagi kei na vuravura, kei na iyau ni gauna tawamudu e noqu me’u solia.
3 Dou sa segata mo dou vakabauta ni sa dodonu mo dou ciqoma na veivakalougatataki ka sa soli tu vei kemudou; ia raica, au sa kaya vakaidina vei kemudou ni a tiko vei kemudou na yalo rere, ka sai koya dina oqori na vuna dou sa sega ni ciqoma kina.
4 Ia oqo, koi Au na Turaga, au sa solia vei kemudou e dua na ivakadinadina ena kedra dina na ivakaro sa koto e matamudou.
5 Raica dou sa dau wanonovi Josefa Simici Lailai tiko na noqu tamata, kei na nona vosa me vaka dou sa kila, kei na nona malumalumu dou sa kila; ka dou sa qisia e lomamudou na kila ka mo dou vakamacalataka vakavinaka cake na nona vosa; dou sa kila talega na veika oqo.
6 Oqo, dou vakasaqaqara mada ena iVola ni iVakaro, na kena e lailai duadua kina, dou qai lesia o koya e vuku duadua vei kemudou;
7 Se, kevaka e dua vei kemudou sa rawa vua me cakava e dua me tautauvata kaya, sa qai dodonu mo dou kaya ni dou sega ni kila ni ra sa dina;
8 Ia kevaka dou sa sega ni rawa ni cakava e dua me tautauvata, dou na cudruvi kina kevaka dou sega ni vakadinadinataka na kena dina.
9 Ni dou sa kila ni sa sega na ka tawadodonu e tu kina, ka ni ka kecega e dodonu sa lako sobu mai cake, mai vua na Tama ni rarama.
10 Kei na dua tale, au sa kaya vakaidina vei kemudou sa tu ga vei kemudou na dodonu, kei na dua na yalayala au sa solia vei kemudou sa tabaki ki na cakacaka oqo, ena veigauna kece dou sa vagalalataki kemudou kina mai na vuvu kei na rere, ka vakayalomalumalumutaki kemudou vei au, ni se sega ni rauta na nomudou yalomalumalumu, ena qai cereki na ilati ka dou na raici au ka kila ni sai au—e segai ena vakanananu vakayago se vakatamata, ia e vakayalo ga.
11 Ni sa sega e dua na tamata vakayago sa raica rawa na Kalou ena dua na gauna, sa rawa ga kevaka sa vakabulabulataki mai na Yalo ni Kalou.
12 Sa sega tale ga na tamata vakavuravura sa tu rawa ena serau ni Kalou, sa sega talega ni rawa ena vakanananu vakatamata.
13 Dou sa sega ni tu rawa ena iserau ni Kalou ena gauna oqo, se vei ira na agilosi dauveiqaravi; o koya mo dou vosota tikoga me yacova ni dou sa vinaka sara.
14 Dou kakua ni vakananuma na veika sa sivi; ia ena gauna dou sa kilikili kina, ena gauna au sa lewa, dou na qai raica ka kila na veika a soli vei kemudou mai na ligana ko Josefa Simici Lailai, na noqu tamata. Emeni.